សុខភាព - អប់រំ សុខភាព

12/06/2023 - 08:09

មន្ទីរពេទ្យពហុព្យាបាលសុកត្រាំង សង្រ្គោះជោគជ័យអ្នកជំងឺធ្ងន់ ឆ្លងគ្រោះថ្នាក់ជាច្រើននាក់

មន្ទីរពេទ្យពហុព្យាបាលសុកត្រាំង ទើបសង្រ្គោះជោគជ័យអ្នកជំងឺឡឹមធីគឹមថាញ អាយុ ១៩ ឆ្នាំ នៅស្រុកមីទូ កើតមានសហរោគសញ្ញា Guillain-Barré ជាជំងឺកម្រជួបប្រទះនិងពិបាកព្យាបាល។ នេះជាសហរោគសញ្ញាវិបត្តិប្រព័ន្ធភាពសុាំនៃរាងកាយ វាយលុកមួយផ្នែកទៅលើប្រព័ន្ធសរសៃប្រសាទខាងក្រៅ។ ស្ថានភាពនេះអាចបណ្ដាលឱ្យសរសៃប្រសាទរលាករហូតទៅជាខ្វិន ឬខ្សោយសាច់ដុំ ប្រសិនបើមិនបានព្យាបាលត្រូវរបៀប និងទាន់ពេលវេលា។

វេជ្ជបណ្ឌិតធ្វើការព្យាបាលដល់អ្នកជំងឺឡឹមធីគឹមថាញ។

វេជ្ជបណ្ឌិតឯកទេសកម្រិត ២ ហ្វិញវ៉ាន់ហ៊ីប ប្រធានផ្នែករោគក្នុង ២ នៃមន្ទីរពេទ្យពហុព្យាបាលសុកត្រាំង ឱ្យដឹង៖ “អ្នកជំងឺត្រូវបានបញ្ជូនមកមន្ទីរពេទ្យនៅថ្ងៃទី ១៩ ខែធ្នូ ឆ្នាំ ២០២២ ក្នុងស្ថានភាពភ្លេចភ្លាំងស្មារតី ដៃជើងកម្រើក មិនបានជីពចរនិងសម្ពាធឈាមខ្ពស់ ហើមជើងទាំងពីរ សួតស្ដាប់ឮសូរសំឡេងដូចទឹកពុះទាំងសងខាង និងត្រូវជំនួយដកដង្ហើមដោយម៉ាស៊ីន។ រហូតដល់ថ្ងៃទី ២០ ខែកុម្ភៈ ឆ្នាំ ២០២៣ អ្នកជំងឺនៅតែដង្ហើមដោយម៉ាស៊ីន ហើយព្យាបាលដោយវិធីគួបផ្សំថ្នាំគ្រប់គ្រងសម្ពាធឈាម បំបាត់ការឈឺសរសៃប្រសាទ អាហារូបត្ថម្ភរួម ជាមួយនឹងរូបសាស្រ្តព្យាបាល។ ទន្ទឹមនឹងនោះ មន្ទីរពេទ្យណែនាំដល់សមាជិកក្នុងគ្រួសារថែទាំអ្នកជំងឺឱ្យបានហ្មត់ចត់ ជៀសវាងកុំឱ្យរលាក និងអាការៈដែលបណ្ដាលឱ្យស្ទះសរសៃឈាម ដោយសារដេកមួយកន្លែងរយៈពេលយូរ។ ក្រោយរយៈពេល ៦ ខែព្យាបាល អ្នកជំងឺដឹងស្មារតី អាចបរិភោគតាមមាត់បានលែងប្រើ ម៉ាស៊ីនជំនួយដង្ហើម សាច់ដុំមានភាពប្រសើរឡើង អាចក្ដាប់ធ្វើចលនាបានល្អនិងអាចចុះពីមន្ទីរពេទ្យ។

វេជ្ជបណ្ឌិតឯកទេសកម្រិត ២ ហ្វិញវ៉ាន់ហ៊ីប ផ្ដល់អនុសាសន៍៖ សហរោគសញ្ញា Guillain -Barré អាចធ្វើរោគវិនិច្ឆ័យដឹងជាមុនដោយវិធី Electromyography។ Electromyography (EMG) គឺវិធីស្ទាបស្ទង់ ត្រូវបានអនុវត្តសម្រាប់ស្រាវជ្រាវការប្រតិកម្មអគ្គិសនីនៃសរសៃប្រសាទនិងសាច់ដុំ វាយតម្លៃនូវការបាត់បង់នៃការចែកចាយសរសៃប្រសាទនៃសាច់ដុំ។ ព្រោះហេតុនោះ ពេលមានអាការៈដូចជា៖ ស្ពឹកខ្សោយដៃជើងឬសង្ស័យមានជំងឺពីសរសៃប្រសាទ មាមីងគប្បីប្រញាប់ទៅមន្ទីរពហុព្យាបាលខេត្ត ដើម្បីធ្វើរោគវិនិច្ឆ័យនិងព្យាបាលឱ្យបានទាន់ពេល ជៀសវាងអាការៈរោគប្រែទៅជាគ្រោះថ្នាក់។

ចំណែកអ្នកជំងឺឈ្មោះ T.Th.M.Th អាយុ ២២ ឆ្នាំ នៅស្រុកមីទូ ត្រូវបានមន្ទីរពេទ្យពហុព្យាបាលខេត្តសុកត្រាំង សង្រ្គោះជោគជ័យទាំងម្ដាយនិងកូន។ អ្នកជំងឺត្រូវបានបញ្ជូនមក ពីមន្ទីរពេទ្យឯកទេសផ្នែកសម្ភពនិងកុមារខេត្តសុកត្រាំង ជាមួយនឹងការធ្វើរោគវិនិច្ឆ័យកើតជំងឺរលាកសួតធ្ងន់ គ្រោះថ្នាក់ដល់អាយុជីវិត ហានិភ័យមិនអាចរក្សាកូនក្នុងគភ៌អាយុ ៣៤ សប្ដាហ៍បាន។ ហេតុនោះ ក្រុមវេជ្ជបណ្ឌិតនៃមន្ទីរពេទ្យទាំងពីរបានសម្រេចព្យាបាលដោយបច្ចេកទេស ECMO (សួតសិប្បនិម្មិត)។ អំឡុងពេល ៩ ថ្ងៃព្យាបាលដោយបច្ចេកទេស ECMO ជំនួយដង្ហើមដោយម៉ាស៊ីន លាងឈាមបន្តបន្ទាប់ និងប្រើប្រាស់ថ្នាំអង្គបដិបក្ខប្រាណទូលំទូលាយ ទើបបញ្ឈប់ ECMO ដកហូតឧបករណ៍បំពង់ដង្ហើម។ អ្នកជំងឺដឹងស្មារតី សម្ពាធឈាមលំនឹង អាចហូបចុកបាន។ ពេលសុខភាពអ្នកជំងឺបានស្ដារឡើងវិញ មន្ទីរពេទ្យទាំងពីរបានធ្វើការវះកាត់យកទារកបានជោគជ័យ។ បច្ចុប្បន្ន អ្នកជំងឺជាម្ដាយនិងកូនមានសុខភាពល្អ។

វេជ្ជបណ្ឌិតឯកទេសកម្រិត ២ ដាំងធីមិញហៀង នាយកមន្ទីរពេទ្យពហុព្យាបាលសុកត្រាំង ឱ្យដឹង៖ “ពេលប្រឈមនឹងករណីជំងឺធ្ងន់ ពាក់ព័ន្ធនឹងអាយុជីវិតមនុស្ស ២ នាក់ ម្ល៉ោះហើយ វេជ្ជបណ្ឌិតសម្រេចអនុវត្តវិធីសាស្រ្តព្យាបាលសុក្រឹតបំផុត មិនឱ្យមានខុសចន្លោះសូម្បីបន្តិច។ គណៈនាយករបស់មន្ទីរពេទ្យទាំងពីរ តែងយកចិត្តទុកដាក់និងអស់ពីចិត្តពីថ្លើមក្នុងការព្យាបាល ម្ល៉ោះហើយ ពេលឃើញទាំងម្ដាយនិងកូនជាសះស្បើយចេញពីពេទ្យ ក្រុមវេជ្ជបណ្ឌិតក៏មានទឹកមុខត្រេកអររីករាយផងដែរ”៕

យ្វីអាញ-ថាច់ធី

ចែករំលែកអត្ថបទ

ពាក្យគន្លឹះ