សុខភាព - អប់រំ អប់រំ

22/04/2023 - 07:45

ឆន្ទៈរបស់ស្ត្រីបណ្ឌិតជនជាតិខ្មែរដំបូងនៅខេត្តសុកត្រាំង

ឆ្លងកាត់ជីវភាពក្រលំបាកដើម្បីតស៊ូរៀនសូត្រ បំពេញក្តីប្រាថ្នា ម្ល៉ោះហើយស្ត្រីខ្មែររូបនេះ បានខិតខំព្យាយាមក្នុងការរៀនសូត្រ។ បច្ចុប្បន្ន គឹមថាញត្វៀង បានក្លាយជាស្រ្តីបណ្ឌិតជនជាតិខ្មែរដំបូងនៅខេត្តសុកត្រាំង បង្រៀនវិញ្ញាសាអង់គ្លេសនៅវិទ្យាល័យឯកទេស ង្វៀងធីមិញខាយ ក្រុងសុកត្រាំង។

ការរៀនសូត្រ ស្រាវជ្រាវតែងបានអ្នកគ្រូគឹមថាញត្វៀង យកចិត្តទុកដាក់បំផុត
ដើម្បីមានវិធីសាស្រ្តបង្រៀនល្អ។

អ្នកគ្រូថាញត្វៀង កំព្រាឪពុកតាំងពីតូច ម្តាយឯកោប្រកបរបរកាត់ដេរដើម្បីចិញ្ចឹមកូនធំដឹងក្តី។ ដោយឃើញតំបន់ជនបទឃុំតាយយ៉ាងក្រពេក ក្មេងៗនិងមិត្តភ័ក្តិវ័យស្រករគ្នា តិចមានអ្នកណាបានទៅសាលា ម្ល៉ោះហើយ ថាញត្វៀង មានក្តីស្រមៃធ្វើជាអ្នកគ្រូដើម្បីបង្រៀនកូនចៅខ្មែរ។

ឆ្នាំ ១៩៩៨ អ្នកគ្រូប្រឡងជាប់មហាវិទ្យាល័យកឹងធើផ្នែកគរុកោសល្យភាសាអង់គ្លេស និងទទួលបានអាហារូបករណ៍បញ្ញវន្តវ័យក្មេងរបស់ខេត្តសុកត្រាំង។ ក្នុងរយៈពេលនោះ អ្នកគ្រូរៀនបណ្តើរបង្រៀនកួបណ្តើរ ដើម្បីរកប្រាក់បន្ថែមសម្រាប់បង់ថ្លៃសាលា។ ឆ្នាំ ២០០២ អ្នកគ្រូបញ្ចប់មហាវិទ្យាល័យ ហើយបានបញ្ជូនទៅបង្រៀននៅវិទ្យាល័យឯកទេស ង្វៀងធីមិញខាយ រហូតដល់សព្វថ្ងៃ។ ក្តីប្រាថ្នាធ្វើជាគ្រូបង្រៀនបានក្លាយជាការពិត ម្ល៉ោះហើយ អ្នកគ្រូថាញត្វៀងខិតខំសម្រេចល្អភារកិច្ចជានិច្ច។ ទន្ទឹមនឹងនោះ អ្នកគ្រូថែមទាំងបានសាលាប្រគល់ឱ្យបង្រៀនបំប៉នដល់ក្រុមជម្រើសសិស្សពូកែវិញ្ញាសាអង់គ្លេសរបស់សាលា ដើម្បីចូលរួមសម័យប្រឡងសិស្សពូកែថ្នាក់ក្រុង និងថ្នាក់ខេត្តផង។

អ្នកគ្រូគឹមថាញត្វៀង រួមជាមួយសិស្សសាលា។

ដើម្បីលើកកម្ពស់មុខជំនាញ ឆ្នាំ ២០០៨ អ្នកគ្រូថាញត្វៀង បានប្រឡងជាប់ចូលរៀនឧត្តមសិក្សាជំនាញផ្នែកទ្រឹស្តី និងវិធីសាស្រ្តបង្រៀនភាសាអង់គ្លេសនៅសាកលវិទ្យាល័យកឹងធើ។ ក្រោយរយៈពេល ២ ឆ្នាំរៀនមហាបរិញ្ញា អ្នកគ្រូថាញត្វៀងបានប្រឡងបញ្ចប់សម្រេចនិទ្ទេសពូកែ ដោយការពារនិក្ខេបបទបញ្ចប់ការសិក្សាសម្រេចពិន្ទុ៩,៩។ នេះគឺជាពិន្ទុនិក្ខេបបទ ដែលខ្ពស់បំផុតសិស្សជំនាន់ទី ១៥។

មិនត្រឹមតែប៉ុណ្ណោះ ចាប់ពីឆ្នាំ ២០១៣ ដល់ឆ្នាំ ២០១៧ អ្នកគ្រូថាញត្វៀង បន្តការសិក្សាថ្នាក់បណ្ឌិតនៅសាកលវិទ្យាល័យ Universiti Sains ម៉ាឡេស៊ី (USM) ទទួលអាហារូបករណ៍ពីកម្មវិធី Mekong ១០០០ និងគម្រោង ១៥០ របស់ខេត្តសុកត្រាំងផងដែរ។ អ្នកគ្រូថាញត្វៀង ចែករំលែក៖ “កាលនោះ ការប្រើប្រាស់ចាយវាយប្រចាំខែតែ ៣៦០USD ប៉ុណ្ណោះ ម្ល៉ោះហើយខ្ញុំទៅរៀនបណ្តើរធ្វើការបណ្តើរ ដើម្បីរកលុយរៀននិងចិញ្ចឹមកូន (ពីព្រោះបានយកកូនទៅតាមផង)។ ខ្ញុំធ្វើការក្នុងភោជនីយដ្ឋាន បង្រៀនឱ្យមជ្ឈមណ្ឌលភាសាបរទេស ទទួលកែតម្រូវនិក្ខេបបទ និងចូលរួមសរសេរអត្ថបទឱ្យទស្សនាវដ្តីអន្តរជាតិ សម្រាប់ជំនួយដល់និស្សិតអន្តរជាតិរៀននៅម៉ាឡេស៊ី។ អាស្រ័យហេតុនោះ ខ្ញុំដកស្រង់បាននូវបទពិសោធន៍ដើម្បីការពារជោគជ័យ និក្ខេបបទថ្នាក់បណ្ឌិត ផ្នែកស្រាវជ្រាវ និងអភិវឌ្ឍកម្មវិធីអប់រំនៅឆ្នាំ ២០១៨”។

អស់រយៈពេលជាង ២០ ឆ្នាំបង្ហាត់បង្រៀន អ្នកគ្រូថាញត្វៀង តែងសម្រេចល្អភារកិច្ច តែងបានសិស្សានុសិស្ស និងមិត្តរួមអាជីពស្រឡាញ់រាប់អាន។ ក្រៅពីនេះ អ្នកគ្រូត្វៀង ថែមទាំងបានអញ្ជើញធ្វើគ្រូឧទ្ទេសក៍ក្នុងសន្និសីទអន្តរជាតិនៅប្រទេសសិង្ហបុរី ម៉ាឡេស៊ី វៀតណាម និងអង្គការអប់រំមួយចំនួនទៀតនៅឥណ្ឌូនេស៊ីនិងហ្វីលិពីនជាដើម។ ទន្ទឹមនឹងនោះ អ្នកគ្រូថែមទាំងបានសាកលវិទ្យាល័យកឹងធើ អញ្ជើញធ្វើជាទីប្រឹក្សាក្នុងការណែនាំសរសេរនិក្ខេបបទមហាបរិញ្ញា ជាគ្រូបង្រៀនវិញ្ញាសាភាសាសាស្រ្តនិងវប្បធម៌; គ្រូបង្រៀនភាសាបរទេសឱ្យសាលា Ischool សុកត្រាំង ។ល។ អ្នកគ្រូថាញត្វៀង រៀបរាប់៖ “ខ្ញុំមានកិត្តិយស និងមោទនៈណាស់ ខណៈដែលរូបនាងខ្ញុំបានឆ្លងកាត់ជីវភាពក្រលំបាកដើម្បីក្លាយបណ្ឌិតនាំមកកិត្តិយសជូនអ្នកម្តាយ និងវង្សត្រកូល។ កាន់តែមោទនភាពជាងទៀត ខណៈពេលដែលប្តីខ្ញុំក៏បានបញ្ចប់ការសិក្សាមហាបរិញ្ញាបត្រផ្នែកសេដ្ឋកិច្ច; រីកូនស្រីច្បងទទួលបានអាហារូបករណ៍និងកំពុងរៀននៅប្រទេសអូស្រ្តាលីផងដែរ។ ឥឡូវ ខ្ញុំសូមផ្តាំផ្ញើទៅដល់កូនចៅជនជាតិខ្មែរថា ត្រូវតែខំប្រឹងរៀនសូត្រឱ្យបានល្អ។ ពីព្រោះរៀនសូត្រមានចំណេះដឹង គឺជា “កូនសោរ” តែមួយគត់ដែលអាចបើកបានទ្វារជោគជ័យទៅអនាគត”។

មហាបរិញ្ញា អុងយ្វីថៀង នាយកវិទ្យាល័យ ឯកទេសង្វៀងធីមិញខាយ ឱ្យដឹង៖ “អ្នកគ្រូត្វៀង គឺជាគំរូឆ្នើម មានឆន្ទៈឈានឡើងគ្រប់ស្ថានភាព មានការទទួលខុសត្រូវខ្ពស់ចំពោះការងារ ម្ល៉ោះហើយគ្រប់ភារកិច្ចដែលបានប្រគល់ឱ្យអ្នកគ្រូតែងសម្រេចល្អជានិច្ច។ អាស្រ័យដោយការរួមចំណែករបស់អ្នកគ្រូត្វៀង សាលាតែងមានសិស្សទទួលបានជ័យលាភីខ្ពស់ក្នុងសម័យប្រឡងសិស្សពូកែថ្នាក់ខេត្តលើវិញ្ញាសាអង់គ្លេស និងទទួលបានពិន្ទុខ្ពស់ ក្នុងសម័យប្រឡងសញ្ញាបត្រវិទ្យាល័យថ្នាក់ជាតិទៀតផង”៕

លីធាន-លីសៀ

ចែករំលែកអត្ថបទ

ពាក្យគន្លឹះ