|
ប្រសិទ្ធភាពនៃកម្មវិធីទិសដៅជាតិអភិវឌ្ឍសេដ្ឋកិច្ច-សង្គមតំបន់ជនរួមជាតិភាគតិចនិងតំបន់ភ្នំ ដំណាក់កាល ២០២១-២០២៥ បាននិងកំពុងបង្ហាញឱ្យឃើញ ប្រសិទ្ធភាពនៅពេលបានដំណើរការអនុវត្តជាក់ស្តែងនៅតំបន់វាលរាបទន្លេគឺវឡុង។ល។ ហេតុនេះ ភូមិភាគនានាក្នុងតំបន់ បន្តបង្ហាញច្បាស់នូវការប្តេជ្ញាចិត្តប្តូរផ្តាច់ និងព្រមៗគ្នាអនុវត្តកម្មវិធី ដើម្បីឆាប់សម្រេចតាមទិសដៅ នាំមកជីវភាពកាន់តែសម្បូរសប្បាយ សុខដុមរមនាសម្រាប់ជនរួមជាតិ។ * គោលនយោបាយពិសេសដោយឡែក ជំរុញជីវភាពផ្ដល់"ផ្លែផ្កា" |
គោលនយោបាយពិសេសដោយឡែក ជំរុញជីវភាពផ្តល់”ផ្លែផ្កា”
រួមនឹងគោលនយោបាយពិសេសដោយឡែក កម្មវិធីទិសដៅជាតិអំពីការអភិវឌ្ឍសេដ្ឋកិច្ច-សង្គម តំបន់ជនរួមជាតិភាគតិចនិងតំបន់ភ្នំ ដំណាក់កាល ១ ចាប់ពីឆ្នាំ ២០២១-២០២៥ នៅក្រុងកឹងធើ កំពុងពង្រីកប្រសិទ្ធភាពជាបណ្តើរៗ នាំមកជីវភាពធូរធារដល់ជនរួមជាតិខ្មែរ។
អ្នកមីងលីធីយេវ នៅសង្កាត់ភឿកថើយ ត្រេកអររីករាយជាមួយនឹងផ្ទះថ្មីដែលរដ្ឋឧបត្ថម្ភសាងសង់។
អ្នកមីងលីធីយេវ នៅមណ្ឌលប៊ិញខាញ់ សង្កាត់ភឿកថើយ ខណ្ឌអូរម៉ូង ក្រុងកឹងធើ កំពុងដេកយោលអង្រឹងនៅមុខរបៀងផ្ទះដែលទើបសង់ថ្មីយ៉ាងសមរម្យ។ ចំហាយពីកម្រាលឥដ្ឋជះឡើងត្រជាក់ស្រិប។ អ្នកមីងយេវ លើកដៃចង្អុលទៅសំយាបខាងមុខផ្ទះ ឱ្យដឹង៖ “ខ្ញុំទទួលបានផ្ទះថ្មីនៅខែឆ្នូ ឆ្នាំ ២០២២ ។ ចំណែកសំយាបខាងមុខទើបធ្វើហើយថ្មីៗ ដើម្បីរៀបចំត្រៀមទទួលអំណរបុណ្យចូលឆ្នាំថ្មី។ កូនៗនិយាយថា កន្លែងនេះទូលាយ ខ្យល់បក់មកត្រជាក់ស្រួល ពេលមានបុណ្យទានម្តងៗកូនចៅមកជួបជុំគ្នា មានកន្លែងអង្គុយលេង”។
តាមសម្តីអ្នកមីងយេវ សំយាបខាងមុខនេះ គឺប្រើប្រាស់សម្ភារៈសំណង់ចាស់ៗ ដែលកូនៗធ្វើជាងដែក ជាងសំណង់ ទិញគេថោកៗ ឬបានម្ចាស់គេឱ្យ ឆ្លៀតពេលសម្រាកកូនៗនាំគ្នាធ្វើ។ អង្គុយក្នុងគេហដ្ឋានស្អាតបាតសមរម្យ ដែលសង់លើដីធារផ្ទះចាស់ លិចទឹក សសរខ្មូតស៊ីទ្រុឌទ្រោមអស់ បន្ទាប់ពីទទួលបានផ្ទះថ្មីគាត់សប្បាយចិត្តខ្លាំងណាស់។ អ្នកមីងយេវ ឱ្យដឹង៖ “បន្ទាប់ពីឮថារដ្ឋឧបត្ថម្ភប្រាក់សង់ផ្ទះ កូនៗខ្ញុំខ្លះជួយទ្វារដែក ខ្លះជួយថ្មបិទជញ្ជាំង។ល។ ដើម្បីរួមចំណែកបន្ថែមក្នុងការសាងសង់ផ្ទះឱ្យកាន់តែមានភាពស្អាតបាតសមរម្យ”។
ផ្លូវដានភូមិឌិញខាញ់ B ទើបកសាងរួចរាល់។
តាមប្រសាសន៍បងត្រឿងថាញតាយ ប្រធានមណ្ឌលប៊ិញខាញ់ អ្នកមីងយេវ រស់នៅជាមួយកូនស្រីពៅ។ ពីរនាក់ប្តីប្រពន្ធទៅធ្វើការឈ្នួល ដូច្នេះ ពេលបានផ្ទះថ្មីក៏ស្ងប់អារម្មណ៍ខិតខំប្រកបការរកស៊ីនិងចិញ្ចឹមកូនរៀនសូត្រ។ ចៅអ្នកមីងម្នាក់កំពុងសិក្សាថ្នាក់ទី ៩នៅវិទ្យាល័យជនជាតិអន្តេវាសិកកឹងធើ ម្នាក់ទៀតកំពុងសិក្សាថ្នាក់ទី ៥ នៅសាលាបឋមសិក្សាង្វៀងហ្វែ បម្រុងដាក់ពាក្យពិនិត្យជម្រើសចូលរៀនថ្នាក់ទី ៦ នៃសាលាអន្តេវាសិកដូចបងស្រីដែរ ដើម្បីឪពុកម្តាយពុំសូវបារម្ភគិតគូរ។ ក្រោយពីទទួលបានផ្ទះនៅចុងឆ្នាំ ២០២២ គ្រួសារអ្នកមីងយេវ ក៏បានឈានឡើងជាគ្រួសារប្រកៀកបន្ទាត់ក្រ។ ប្រសិនបើកូនទាំង ២ របស់គាត់ ប្រកបរបរស៊ីឈ្នួលមានភាពងាយស្រួលដូចពេលនេះ នៅចុងឆ្នាំ ២០២៣ គ្រួសារអ្នកមីងនឹងឈានឡើងចាកផុតពីភាពក្រីក្រ។ បងតាយ ឱ្យដឹងបន្ថែម គ្រួសារជនជាតិខ្មែរនៅមណ្ឌលប៊ិញខាញ់ ភាគច្រើនទទួលបានផលប្រយោជន៍ពីគោលនយោបាយអនុគ្រោះ ពិសេសដោយឡែកអំពីលំនៅឋានរបស់រដ្ឋ ដូច្នេះហើយ បច្ចុប្បន្នគ្មាននៅផ្ទះស្លឹក ផ្ទះបណ្តោះអាសន្នទេ។ ដោយឡែកកម្មវិធីបណ្ដុះបណ្ដាលវិជ្ជាជីវៈ គម្រោងប្រកបមុខរបរ បានជួយឱ្យគ្រួសារជាច្រើនមានជីវភាពលំនឹង។ បច្ចុប្បន្ន ទូទាំងមណ្ឌលគ្មានគ្រួសារខ្មែរក្រីក្រ មានតែគ្រួសារប្រកៀកបន្ទាត់ក្រចំនួន ៣ គ្រួសារប៉ុណ្ណោះ។
យោងតាមស្ថិតិរបស់គណៈជនជាតិក្រុងកឹងធើ ឆ្នាំ ២០២២ គណៈជនជាតិបានសហការជាមួយភូមិភាគនិងអង្គភាពនានាប្រគល់ជូនផ្ទះ ១០ ខ្នង ដល់គ្រួសារជនរួមជាតិភាគតិចដែលមានស្ថានភាពលំបាក។ ចាប់តាំងពីគ្រួសារទាំងនេះមានផ្ទះសម្បែងស្រួលបួល មាមីងស្ងប់ចិត្តផ្តុំកម្លាំងខិតខំប្រកបការងាររកស៊ី ដើម្បីឈានឡើងចាកផុតពីភាពក្រីក្រ។ លោកង្វៀងភឿកឌឹក ប្រធានការិយាល័យជនជាតិស្រុកកើ-ដ ឱ្យដឹង៖ “កម្មវិធី គម្រោងឧបត្ថម្ភពិសេសដោយឡែករបស់រដ្ឋសម្រាប់ជនរួមជាតិភាគតិច បានពង្រីកប្រសិទ្ធភាព ជួយមាមីងមានជីវភាពលំនឹង។ ដោយឡែកនៅឆ្នាំ ២០២២ មានគ្រួសារចំនួន ៣ នោះគឺ គ្រួសារលោកលីវត្រឹង គ្រួសារយ័ញធីតៀង និងគ្រួសារយ័ញរី នៅទីប្រជុំជនកើ-ដ បានរដ្ឋឧបត្ថម្ភសង់ផ្ទះថ្មី។ តាមការគ្រោងទុកនៅឆ្នាំ ២០២៣ នឹងមាន ៣ គ្រួសារបន្ថែមទៀតបានឧបត្ថម្ភសង់ផ្ទះ។ ក្នុងនោះ មានគ្រួសារចំនួន ២ នៅឃុំថើយដុងគ្មានដីសង់ផ្ទះ ដូច្នេះ ការិយាល័យជនជាតិសហការជាមួយភូមិភាគធ្វើសេនាធិការជូនថ្នាក់លើ ពិនិត្យឧបត្ថម្ភដីសង់ផ្ទះនៅមណ្ឌលតាំងទីលំនៅជនជាតិភាគតិចជូនមាមីង”។
មិនត្រឹមតែគិតគូរឱ្យមាមីងមានផ្ទះថ្មីប៉ុណ្ណោះ ភូមិភាគនានានៅទាំងផ្តោតលើការអភិវឌ្ឍព្រមៗគ្នាផ្នែកហេដ្ឋារចនាសម្ព័ន្ធនៅតំបន់ជនជាតិ បង្កលក្ខណៈដើម្បីមាមីងពង្រីកមុខរបរ។ បងលីវត្វឹងខឿង អនុប្រធានការិយាល័យជនជាតិស្រុកថើយឡាយ ឱ្យដឹង៖ “ស្រុកទើបដាក់ឱ្យប្រើប្រាស់ផ្លូវដាន នៅភូមិឌិញខាញ់B ឃុំឌិញម៉ូង។ ទន្ទឹមនឹងដំណាក់ការកសាងផ្លូវដាន ស្រុកក៏បានជីកស្តារប្រឡាយតាមបណ្តោយភូមិឌិញខាញ់ ឌិញខាញ់ B រហូតដល់ទំនប់ពាមញ៉ង ដើម្បីធានាប្រភពទឹកស្រោចស្រពចម្ការទុរេន Ri6 មៀន Ido និងដំណាំស្រូវជាដើមរបស់មាមីងនៅឃុំឌិញម៉ូងនិងឃុំទ្រឿងថាញ់”។
អនុវត្តកម្មវិធីទិសដៅជាតិអំពីការអភិវឌ្ឍសេដ្ឋកិច្ច-សង្គម តំបន់ជនរួមជាតិភាគតិចនិងតំបន់ភ្នំ ដំណាក់កាលទី ១ ចាប់ពីឆ្នាំ ២០២១-២០២៥ លោកហូវ៉ាន់ភឿង អនុប្រធានគណៈជនជាតិក្រុងកឹងធើ លើកឡើង៖ ជំហានដំបូងកម្មវិធីបាននាំមកនូវភាពផ្លាស់ថ្មីនៃជីវភាពសម្ភារនិងស្មារតីរបស់ជនរួមជាតិភាគគិច តាមទិសដៅកាន់តែរីកចម្រើន។
ការវិវឌ្ឍថ្មីនៅតំបន់ជនរួមជាតិខ្មែរ
ក្រោយពីរយៈការផ្សព្វផ្សាយអនុវត្តសេចក្តីសម្រេចចិត្តលេខ ១៧១៩/QĐ-TTg ចុះថ្ងៃទី ១៤ ខែតុលា ឆ្នាំ ២០២១ របស់នាយករដ្ឋមន្ត្រីនៃរដ្ឋាភិបាល បានផ្តល់សច្ចាប័នលើកម្មវិធីទិសដៅជាតិអភិវឌ្ឍសេដ្ឋកិច្ច-សង្គម តំបន់ជនរួមជាតិភាគតិច និងតំបន់ភ្នំ ដំណាក់កាល ២០២១-២០៣០ ដំណាក់កាល I ចាប់ពីឆ្នាំ ២០២១-២០២៥ ឃើញថា ជីវភាពសម្ភារៈ ស្មារតីរបស់ប្រជាជនខេត្តត្រាវិញ ត្រូវបានលើកស្ទួយ។
សមាគមព្រះសង្ឃសាមគ្គីស្នេហាជាតិស្រុកថ្កូវ និងថ្នាក់ដឹកនាំស្រុក សង់ផ្ទះជូនគ្រួសារអ្នកមីងគឹមធីសេ នៅភូមិថ្កូវ C ដើម្បីគ្រួសារគាត់មានផ្ទះសម្បែងសមរម្យទទួលអំណរបុណ្យចូលឆ្នាំថ្មី។
លោកគឹមង៉ុកថាយ អនុលេខាប្រចាំការនៃគណៈកម្មាធិការបក្ស ខេត្តត្រាវិញ ឱ្យដឹង៖ “ប្រជាជនខេត្តត្រាវិញ មានជាង ១ លាននាក់ រួមមានជនជាតិកិញខ្មែរ ចិន និងចាម ក្នុងនោះ ជនរួមជាតិខ្មែរមានចំនួន ៣១៨.២៣១ នាក់ ស្រូបអត្រាជាង ៣១,៥%។ អនុវត្តកម្មវិធីទិសដៅជាតិអភិវឌ្ឍសេដ្ឋកិច្ច-សង្គម តំបន់ជនរួមជាតិភាគតិចនិងតំបន់ភ្នំ ដំណាក់កាល ២០២១-២០៣០ ក្នុងដំណាក់កាល I ២០២១-២០២៥ ខេត្តត្រាវិញ មានផែនការវិនិយោគគម្រោងនានា សំដៅដោះស្រាយបញ្ហាខ្វះដីសង់ផ្ទះ លំនៅឋាន ដីផលិតកម្ម ទឹកស្អាត; រៀបចំផែនការដាក់ពង្រាយលំនឹងប្រជាជននៅកន្លែងចាំបាច់; វិនិយោគហេដ្ឋារចនាសម្ព័ន្ធចាំបាច់បម្រើការផលិតនិងការរស់នៅរបស់ប្រជាជនតំបន់ជនរួមជាតិភាគតិច; អភិរក្ស ពង្រីកតម្លៃវប្បធម៌ប្រពៃណីរបស់ជនជាតិភាគតិច ផ្សារភ្ជាប់នឹងការអភិវឌ្ឍទេសចរណ៍។ល។ សរុបថវិកាវិនិយោគជាង ២៧១ ពាន់លានដុង។ អាស្រ័យអនុវត្តមានប្រសិទ្ធភាព គោលនយោបាយវិនិយោគអភិវឌ្ឍសេដ្ឋកិច្ច-សង្គម កាត់បន្ថយភាពក្រីក្រ មួយអន្លើដោយការខិតខំប្រឹងប្រែងឈានឡើងក្នុងជីវភាពរបស់ប្រជាជន ទើបអត្រាគ្រួសារក្រីក្ររបស់ខេត្ត សព្វថ្ងៃនៅត្រឹម ១,៨៨% ”។
ដោយប្រភពទុនកសាងជនបទថ្មី ឃុំលឿងហ្វា A វិនិយោគពង្រីកដងផ្លូវស្រុកលេខ ១៣។
លោកពូគឹមសើុង (ឈរខាងឆ្វេង) សប្បាយរីករាយពេលបានគណៈកម្មាធិការបក្ស គណៈកម្មាធិការប្រជាជន ឃុំភឿកហឹង ឧបត្ថម្ភផ្ទះមួយខ្នង កំពុងសាងសង់ជិតនឹងសម្រេចរួចរាល់ដើម្បីគ្រួសារគាត់មានផ្ទះសម្បែងសមរម្យទទួលអំណរបុណ្យចូលឆ្នាំថ្មី
ចូវថាញ់ ជាស្រុកមួយចំណោមស្រុកទាំងឡាយរបស់ខេត្តត្រាវិញ ដែលអនុវត្តល្អកម្មវិធីទិសដៅជាតិអភិវឌ្ឍសេដ្ឋកិច្ច-សង្គម តំបន់ជនរួមជាតិភាគតិចនិងតំបន់ភ្នំ ដំណាក់កាល ២០២១-២០២៥។ ក្រោយពីរយៈកាល ២ឆ្នាំ (២០២១-២០២២) ស្រុកបានវិនិយោគកម្មវិធីទិសដៅជាតិចំនួន៣ សរុបប្រភពទុនវិនិយោគជាង ៦,៤ ពាន់លានដុង ក្នុងនោះ ទុនវិនិយោគអភិវឌ្ឍជាង ៣,២ ពាន់លានដុង ទុនបុព្វហេតុជាង ៣,២ ពាន់លានដុង។ ផ្តើមពីប្រភពទុនទាំងនេះ ស្រុកក៏បានវិនិយោគកសាងផ្លូវគមនាគមន៍ជនបទនៅភូមិចុងទង់ ភូមិអូរក្តារ ឃុំភឿកហាវ ភូមិភូមី ឃុំមីចាញ; ឧបត្ថម្ភដីធារផ្ទះជូន២គ្រួសារ; ឧបត្ថម្ភសង់ផ្ទះជូនគ្រួសារក្រីក្រ ១៧ ខ្នង; ឧបត្ថម្ភប្រជាជន ១៤៨ គ្រួសារផ្លាស់ប្តូរមុខរបរ។ល។ លោកគឹមយ៉ូយ នៅភូមិថាញទ្រី A ឃុំដាឡុក ស្រុកចូវថាញ់ ឱ្យដឹង៖ “ពីមុន គ្រួសារខ្ញុំជួបការលំបាកខ្លាំង ដោយសារគ្មានដីផលិតកម្ម ម៉្លោះហើយ ស្នាក់នៅពឹងអាស្រ័យលើដីរបស់បងប្អូនសាច់ញាតិ។ កន្លងហើយ គ្រួសារខ្ញុំបានរដ្ឋឧបត្ថម្ភដីធារផ្ទះទំហំ ២៧៩ ម៉ែត្រការ៉េ និងសង់ផ្ទះមហាសាមគ្គីឱ្យខ្ញុំ សប្បាយចិត្តណាស់។ មានកន្លែងនៅស្រួលបួល ផ្តល់កម្លាំងចិត្តដល់គ្រួសារខ្ញុំខិតខំធ្វើការរកស៊ី ដើម្បីឈានឡើង ចាកផុតភាពក្រីក្រ”។
ឃុំឌិញអាង ស្រុកថ្កូវ មិនបង្អង់ក្នុងការធ្វើឱ្យសុក្រឹតផ្លូវជនបទដើម្បីអភិវឌ្ឍន៍សេដ្ឋកិច្ច-សង្គម។
លោកថាយកេន នៅភូមិចុងទង់ ឃុំដាឡុក ស្រុកចូវថាញ់ ឱ្យដឹងដោយក្តីរីករាយ៖ “ប្រសិនបើមិនបានរដ្ឋឧបត្ថម្ភ និងការចូលរួមដ៏ខ្លាំងក្លាពីគណៈ ផ្នែកគ្រប់លំដាប់ថ្នាក់ ភូមិភាគទេនោះ យើងខ្ញុំមិនដឹងថាពេលណា ទើបមានផ្លូវបេតុងស្មើរលូនពីភូមិតភ្ជាប់ឃុំ និងស្រុក ជ្រះស្អាតដូចសព្វថ្ងៃនេះឡើយ។ ឆ្នាំ ២០២២ អាស្រ័យបានរដ្ឋអំណាចភូមិភាគវិនិយោគបន្ថែមដងផ្លូវគមនាគមន៍ជនបទក្នុងភូមិ កសិករនៅទីនេះ លែងប្រឈមនឹងលម្អងធូលី ភក់ជ្រាំដូចពីមុនឡើយ។ បន្ទាប់ពីផ្លូវគមនាគមន៍ជនបទកសាងរួចរាល់ មាមីងនៅទីនេះមានស្មារតីការពារផ្លូវ គមនាគមន៍ មានគ្រួសារជាច្រើនក៏បានដាំ ផ្កាលម្អ ដាំដើមឈើ បង្កើតទេសភាពបរិស្ថាន ដើម្បីរួមនឹងរដ្ឋអំណាចភូមិភាគកសាងជនបទថ្មី”។
មិនត្រឹមតែអនុវត្តមានប្រសិទ្ធភាពគោលនយោបាយអំពីការអភិវឌ្ឍលើគ្រប់វិស័យ នៅតំបន់ដែលមានជនរួមជាតិភាគតិចរស់នៅកុះកររបស់មជ្ឈិមប៉ុណ្ណោះទេ ខេត្តត្រាវិញនៅទាំងអនុវត្តល្អនូវការងារកាត់ បន្ថយភាពក្រីក្រ ផ្តើមពីនោះ ឃើញថាជីវភាពរបស់ប្រជាជនលើភូមិសាស្ត្រខេត្ត មានការផ្លាស់ប្តូរយ៉ាងច្បាស់។ នៅពេលខាងមុខ ខេត្តត្រាវិញនឹងបន្តការអនុវត្តមានប្រសិទ្ធភាពនូវសេចក្តីសម្រេចលេខ ១៧១៩/QĐ-TTg របស់នាយករដ្ឋមន្ត្រីនៃរដ្ឋាភិបាល ដើម្បីប្រជាជនមានជីវភាពសម្បូរសប្បាយនិងសុភមង្គល។
សង្ឃឹមថាកម្មវិធីនាំមកជីវភាពធូរធារ សម្បូរសប្បាយដល់ជនរួមជាតិ
…ខេត្តអាងយ៉ាង បាននិងកំពុងជំរុញការអនុវត្តកម្មវិធីទិសដៅជាតិអភិវឌ្ឍសេដ្ឋកិច្ច-សង្គម តំបន់ជនរួមជាតិភាគតិចនិងតំបន់ភ្នំខេត្តអាងយ៉ាង ដំណាក់កាល ២០២១-២០៣០ ដំណាក់កាល I ចាប់ពីឆ្នាំ ២០២១-២០២៥ (ហៅកាត់ថា កម្មវិធី) សង្ឃឹមថា នឹងនាំមកជីវភាពកាន់តែធូរធារ សម្បូរសប្បាយដល់ជនរួមជាតិភាគតិច។
លោកចៅសឹង នៅភូមិតូធ្វឹង ឃុំណុយតូ ស្រុកទ្រីតូង (ឈរខាងឆ្វេង) កំពុងរៀបរាប់ពីភាពផ្លាស់ថ្មីរបស់ភូមិស្រុក។
មកកាន់តំបន់ដែលមានជនរួមជាតិខ្មែររស់នៅកុះកររបស់ស្រុកទ្រីតូង ខេត្តអាងយ៉ាង ប្រការដែលគួរកត់សម្គាល់ គឺផ្នែកហេដ្ឋារចនាសម្ព័ន្ធជនបទមានការអភិវឌ្ឍពីមួយថ្ងៃទៅមួយថ្ងៃ។ ផ្លូវគមនាគមន៍តភ្ជាប់ឃុំ ផ្លូវបេតុងទំហំ៣ម៉ែត្រមតភ្ជាប់ភូមិកាន់តែសុក្រឹត។ គ្រប់យ៉ាង ធ្វើឱ្យមុខមាត់តំបន់ជនបទដែលធ្លាប់បានចាត់ទុកថាលំបាកខ្លាំង មានភាពផ្លាស់ថ្មីទាំងស្រុង។ កសិករវ័យចំណាស់ ចៅសឹង នៅភូមិតូធ្វឹង ឃុំណុយតូ ចែករំលែក៖ “ឆ្នាំនេះ ខ្ញុំមានវ័យ ៨៦ ឆ្នាំហើយ បានឃើញផ្ទាល់ភ្នែកនូវភាពប្តូរផ្លាស់របស់ស្រុកទ្រីតូង។ ពិសេស ផ្តើមពីការចលនាកសាងជនបទថ្មី ផ្លូវគមនាគមន៍ សាលារៀន ដំណាក់សុខាភិបាល។ល។ ត្រូវបានកសាងកាន់តែស្អាតបាតសមរម្យ។ ជីវភាពជនរួមជាតិខ្មែរកាន់តែរីកចម្រើន”។
លោក ចៅសឹង ពីមុនជាកសិករម្នាក់ ផលិតនិងធ្វើអាជីវកម្មពូកែ។ មុននឹងឈានចូលវ័យ ៧០ គាត់បានមាមីងទំនុកចិត្តបោះឆ្នោតជាអ្នកមានប្រជាប្រិយ។ ប៉ុន្មានថ្ងៃដំបូងភូមិភាគកសាងជនបទថ្មី ខ្ញុំរួមនឹងកម្មាភិបាលភូមិ ឃុំ ផ្សព្វផ្សាយចលនាមាមីង បរិច្ចាគដី កម្លាំងពលកម្មជាដើមដើម្បីធ្វើផ្លូវ។ ឥឡូវ ភូមិភាគបានអនុវត្តកម្មវិធី វិនិយោគយ៉ាងច្រើនសម្រាប់មាមីជនរួមជាតិខ្មែរ។ ខ្ញុំនឹងនាំមុខនៅរាល់ការចលនាប្រឡងប្រណាំង អាស្រ័យភូមិភាគបំផុស; ចលនា កូនចៅ មាមីងក្នុងភូមិស្រុកខិតខំធ្វើការរកស៊ី ចិញ្ចឹមកូនចៅរៀនសូត្រឱ្យបានត្រឹមត្រូវ។ល។ ខ្ញុំគិតថា រដ្ឋបានយកចិត្តទុកដាក់គិតគូរជីវភាពជនរួមជាតិខ្មែរ ដូច្នេះ មាមីងត្រូវតែតបគុណ គឺលើកស្ទួយជីវភាពដោយខ្លួនឯង ធ្វើមានស្របច្បាប់នៅភូមិកំណើត” លោកចៅសឹង បានចែករំលែកដូច្នេះ។
មាមីងកសិករវ័យចំណាស់ ឬក៏អ្នកមានប្រជាប្រិយក្នុងតំបន់ជនរួមជាតិភាគតិចនៅខេត្តអាងយ៉ាង មានគំនិតដូចលោកចៅសឹង សព្វថ្ងៃនេះគឺមិនតិចឡើយ។ តួយ៉ាងដូច លោក ចៅគឹមសង អនុប្រធានសមាគមកសិករស្រុកទ្រីតូង ចែករំលែក៖ “អាស្រ័យ បានចលនា ផ្សព្វផ្សាយដោយទម្រង់រូបភាពផ្សេងៗជាច្រើន ពិសេស “ត្រចៀកឮភ្នែកឃើញ” មានប្រសិទ្ធភាពជាក់ស្តែង គោលការណ៍ គោលនយោបាយរបស់បក្ស និងច្បាប់របស់រដ្ឋ វិនិយោគនៅតំបន់ជនរួមជាតិភាគតិច ម៉្លោះហើយមាមីងជនរួមជាតិខ្មែរកាន់តែមានការជឿជាក់។ ដូច្នេះហើយ មានកសិករជាច្រើន ផលិតធ្វើអាជីវកម្មពូកែ និងមានទម្រង់ផលិតកសិកម្មនាំមកប្រសិទ្ធភាពសេដ្ឋកិច្ចខ្ពស់។ល។ ក្នុងតំបន់ជនរួមជាតិភាគតិចលេចឡើងកាន់តែច្រើន។ ជាពិសេស ជនរួមជាតិភាគតិចក៏ “ចាំដុះពោះ” ទិសស្លោក “ប្រជាជនដឹង ប្រជាជនពិភាក្សា ប្រជាជនធ្វើ ប្រជាជនត្រួតពិនិត្យ ប្រជាជនទទួលផល” ដូច្នេះ កាន់តែមានខ្នះខ្នែងចូលរួមរាល់ការចលនាប្រឡងប្រណាំងនៅភូមិភាគ”។
ជ្រុងមួយនៃផ្លូវគមនាគមន៍ជនបទតំបន់ជនរួមជាតិភាគតិចនៅខេត្តអាងយ៉ាង។
រួមនឹងភូមិភាគដែលមានជនរួមជាតិភាគតិចរស់នៅកុះករក្នុងទូទាំងប្រទេស ខេត្តអាងយ៉ាងបាននិងកំពុងជំរុញការអនុវត្តកម្មវិធី។ កម្មវិធីឆ្ពោះទៅរកទិសដៅភាគកម្រិតមួយចំនួន មានដូច៖ ខិតខំដល់ឆ្នាំ ២០២៥ ខេត្តឧបត្ថម្ភដីសង់ផ្ទះជូន ៣១៧ គ្រួសារ លំនៅឋានជូន ១.០៩២ គ្រួសារ; ឧបត្ថម្ភផ្លាស់ប្តូរមុខរបរជូន ៣៥៨ គ្រួសារ។ ទន្ទឹមនឹងនោះ ខេត្តនឹងវិនិយោគកសាងសំណង់ ហេដ្ឋារចនាសម្ព័ន្ធសំខាន់ៗចំនួន ៥៩ នៅភូមិ ឃុំលំបាកខ្លាំងតំបន់ជនរួមជាតិភាគតិចនិងតំបន់ភ្នំ; រៀងរាល់ឆ្នាំកាត់បន្ថយអត្រាគ្រួសារក្រីក្រ ដំណាក់កាល ២០២១-២០២៥ តំបន់ជនរួមជាតិភាគតិចនិងតំបន់ភ្នំ ថយចុះនៅ ៣,៥%/ឆ្នាំ។ល។ ដើម្បីអនុវត្តបានទិសដៅកម្មវិធីដាក់ចេញ ខេត្តអាងយ៉ាង ផ្សព្វផ្សាយអនុវត្តគម្រោងចំនួន ១០ សរុបទុនវិនិយោគជាង ៥៧៣,៥៦ ពាន់លានដុង។ គម្រោង ជាក់ស្តែងមួយចំនួន ដូចជា៖ ដោះស្រាយស្ថានភាពខ្វះដីសង់លំនៅឋាន លំនៅឋាន ដីផលិតកម្ម ទឹកស្អាត រៀបចំផែនការលំនឹង ប្រជាជននៅកន្លែងចាំបាច់; អភិវឌ្ឍផលិតកសិកម្ម រុក្ខកម្មប្រកបដោយចីរភាព ពង្រីកសក្តានុពល ឧត្តមភាពរបស់តំបន់នីមួយៗ ដើម្បីផលិតទំនិញតាមខ្សែសង្វាក់តម្លៃ; វិនិយោគហេដ្ឋារចនាសម្ព័ន្ធចាំបាច់ បម្រើការផលិត ជីវភាពក្នុងតំបន់ជនរួមជាតិភាគតិច និងគ្រប់អង្គភាពអាជីវកម្មរដ្ឋបម្រើការងារវិស័យជនជាតិ; អភិវឌ្ឍការអប់រំនិងបណ្តុះបណ្តាល លើកកម្ពស់គុណភាពប្រភពធនធានមនុស្ស…។
កម្មវិធីគឺជាគោលការណ៍ត្រឹមត្រូវ សំដៅដោះស្រាយពីបញ្ហាអភិវឌ្ឍសេដ្ឋកិច្ច-សង្គម នៅភូមិភាគ; ប្រមូលផ្តុំរាល់ប្រភពកម្លាំង ទប់ស្កាត់បានភាពរាយប៉ាយនិងបង្កលក្ខណៈដើម្បីរៀបចំមានប្រសិទ្ធភាពគោលនយោបាយជនជាតិ។ ព្រោះថា ដូចដែលលោក ម៉ែនផល្លី ប្រធានគណៈជនជាតិខេត្តអាងយ៉ាង បានលើកឡើង៖ “កម្មវិធីគឺជាការបញ្ចូលគ្នាហាក់ដូចជាទាំងស្រុងនូវគោលនយោបាយជនជាតិ។ ហេតុដូច្នោះ ការងារផ្សព្វផ្សាយកម្មវិធី បំផុតគឺការងារគ្រប់គ្រង ចាត់ចែងកម្មវិធី ដំណាក់កាល ២០២១-២០២៥ ត្រូវបានខេត្តអាងយ៉ាងអនុវត្តឯកភាពព្រមៗគ្នាពីថ្នាក់ខេត្តដល់ស្រុក ឃុំ។ ក្បាលម៉ាស៊ីនគ្រប់គ្រង ដំណើរការមានរបៀបរៀបរយ ដោយមានការបែងចែកការងារច្បាស់លាស់ សហការស្អិតល្មួតក្នុងកិច្ចចង្អុលការ ចំណាត់ការ និងរៀបចំអនុវត្ត។ “ប្រាកដជាជួបការលំបាកច្រើនក្នុងដំណាក់ការអនុវត្ត។ គ្រប់គណៈ គ្រប់ផ្នែក បន្តការលើកកម្ពស់ការយល់ដឹង បញ្ជ្រាបយ៉ាងជ្រាលជ្រៅ គោលការណ៍ គោលមាគ៌ារបស់បក្ស គោលនយោបាយ ច្បាប់របស់រដ្ឋ អំពីការងារជនជាតិ។ ម្ចាស់ការកៀរគររាល់ប្រភពកម្លាំង ស្របច្បាប់ អំពាវនាវការវិនិយោគពីអាជីវកម្ម រៀបចំផ្គួបផ្សំរាល់ប្រភពកម្លាំងវិនិយោគ អភិវឌ្ឍប្រកបដោយប្រសិទ្ធភាព។ល។ ជាពិសេស គឺជំរុញការផ្សព្វផ្សាយ ចលនា បង្កទំនុកចិត្តនិងព្រួតដៃអនុវត្តកម្មវិធីរបស់ជនរួមជាតិ។ ពីព្រោះការស្របចិត្តប្រជាជន គឺជាកត្តាមួយក្នុងចំណោមកត្តាកំណត់ សម្រេចជឿជាក់ក្នុងភាពជោគជ័យនៃកម្មវិធី នាំមកជីវភាពកាន់តែធូរធារ សម្បូរសប្បាយ ដល់ជនរួមជាតិខ្មែរ” លោកម៉ែនផល្លី បានចែករំលែកដូច្នេះ។
ក្តីរីករាយថ្មី!
ឆ្នាំ២០២២ ខេត្តសុកត្រាំង បានផ្សព្វផ្សាយអនុវត្តកម្មវិធីទិសដៅ ជាតិអភិវឌ្ឍសេដ្ឋកិច្ច -សង្គម នៅតំបន់ជនជាតិភាគតិចនិងតំបន់ភ្នំ ដំណាក់កាល I ឆ្នាំ២០២១ - ២០២៥ (ហៅកាត់ថា កម្មវិធី) សម្រេចបានលទ្ធផលវិជ្ជាមានជាច្រើន និងទទួលបានការគាំទ្ររបស់ជនរួមជាតិខ្មែរ។
សាលារៀន ត្រូវបានខេត្តសុកត្រាំងវិនិយោគកសាងយ៉ាងសមរម្យ។
តាមប្រសាសន៍លោក លីរដ្ឋា ប្រធានគណៈជនជាតិខេត្តសុកត្រាំង កម្មវិធីមានគម្រោងធំៗចំនួន ១០ និងអនុគម្រោងជាច្រើនទៀត ពេលផ្សព្វផ្សាយអនុវត្តនឹងធ្វើឱ្យផ្លាស់ថ្មីទាំងស្រុងមុខមាត់ជនបទនៅតំបន់ជនរួមជាតិភាគតិច ទាំងជីវភាពសម្ភារៈ និងស្មារតីរបស់ជនរួមជាតិភាគតិច។ ហេតុនោះ ពេលមជ្ឈិមបែងចែកប្រភពទុន ខេត្តបានចង្អុលការផ្សព្វផ្សាយអនុវត្តត្រូវតាមផែនការ ដើម្បីឆ្លើយតបបានទៅក្តីសង្ឃឹមរបស់ប្រជាជន។ ឆ្នាំ២០២២ ខេត្តរៀបចំផ្សព្វផ្សាយបាន ១១ លើកជូនអ្នកតំណាងចំនួន ១.៨២០ នាក់ ដែលជាកម្មាភិបាល អ្នករដ្ឋការ បុគ្គលិករដ្ឋ អ្នកមានប្រជាប្រិយ និងជនរួមជាតិភាគតិច; ផ្តល់ជូនឯកសារផ្សព្វផ្សាយបានចំនួន ១.៨២០ ច្បាប់ និងខិត្តបណ្ណច្បាប់ពីរភាសាវៀត-ខ្មែរចំនួន ២១.០០០ ច្បាប់ដល់ប្រជាជន។ ឆ្លងតាមរយៈនោះ ប្រជាជនចូលរួមគាំទ្រយ៉ាងខ្លាំងនិងពង្រីកនូវតួនាទី ភារកិច្ចរួមជាមួយនឹងរដ្ឋអំណាចភូមិភាគ អនុវត្តកម្មវិធី។
សរុបប្រភពទុនអនុវត្តកម្មវិធីឆ្នាំ ២០២២-២០២៣ នៅលើភូមិសាស្រ្តខេត្តសុកត្រាំង គឺ ៦៥៧ ពាន់លានដុង។ ឆ្លងតាមរយៈនោះ ឆ្នាំ២០២២ ខេត្តផ្តុំកម្លាំងប្តូរផ្តាច់អនុវត្តព្រមៗ គ្នានូវគម្រោងអនុគម្រោងចំណុះកម្មវិធី ក្នុងនោះកសាងសំណង់បានចំនួន ៦៣ (រួមមាន៖ សំណង់ផ្លូវគមនាគមន៍ជនបទចំនួន ៤៨ សំណង់ស្ពានជនបទចំនួន ១១ សំណង់អគារប្រជុំជីវភាពសហគមន៍ ១ ខ្នង និងសំណង់ប្រព័ន្ធផ្សារចំនួន ៣); សំណង់ទឹកស្អាតប្រមូលផ្តុំចំនួន ៤; ឧបត្ថម្ភផ្លាស់ប្តូរមុខរបរជូន ១៩៧ គ្រួសារ ឧបត្ថម្ភទឹកស្អាតប្រើប្រាស់ដល់គ្រួសារប្រជាជនរស់នៅរាយប៉ាយចំនួន ២៦៧ គ្រួសារ និងកំពុងបន្តឧបត្ថម្ភដល់គ្រួសារដទៃទៀត។ ទន្ទឹមនឹងនោះ ពេលនាយករដ្ឋមន្ត្រីនៃរដ្ឋាភិបាល ចេញសេចក្តីកំណត់កម្រិតឧបត្ថម្ភ គឺភូមិភាគនានានឹងដំណើរការឧបត្ថម្ភដីសង់ផ្ទះជូន ២១៣ គ្រួសារ ឧបត្ថម្ភសង់ផ្ទះជូន ៦២៣ គ្រួសារ និងឧបត្ថម្ភ ដីផលិតកម្មជូន ២៣០ គ្រួសារ។
គោលនយោបាយអប់រំត្រូវបានយកចិត្តទុកដាក់ កូនចៅខ្មែរនៅសុកត្រាំង
អ្នកណាក៏បានទៅសាលារៀន។
ថាញ់ភូ ជាឃុំមានជនរួមជាតិខ្មែររស់នៅកុះកររបស់ស្រុកមីស្វៀង ពេលទទួលបានទុន វិនិយោគរបស់កម្មវិធី ឃុំបានកសាងផ្លូវគមនាគមន៍ជនបទ រោងផ្សារញូយ៉ា ឧបត្ថម្ភ អភិវឌ្ឍផលិតកម្ម ដោះស្រាយស្ថានភាព កង្វះទឹកប្រើប្រាស់ ឧបត្ថម្ភបង្រៀនវិជ្ជាជីវៈ និងដោះស្រាយការងារធ្វើជូនប្រជាជន។ល។ លោកថាច់ថាយភា ប្រធានគណៈកម្មាធិការប្រជាជនឃុំ ឱ្យដឹង៖ “កម្មវិធីបាននាំមកនូវក្ដីរីករាយជូនមាមីងខ្មែរ បំផុតគឺគ្រួសារក្រីក្រ គ្រួសារប្រកៀកបន្ទាត់ក្រ មានលក្ខណៈកៀកជិតប្រភពទុន បច្ចេកទេស ពូជ ដើម្បីអភិវឌ្ឍសេដ្ឋកិច្ច។ ពិសេស ប្រភពទុនក៏ជួយភូមិភាគបង្កើនកម្រិត ជួសជុលសំណង់ ហេដ្ឋារចនាសម្ព័ន្ធជនបទ ធារាសាស្រ្ត ទឹកស្អាត ដើម្បីឈានដល់ជនបទថ្មីកម្រិតខ្ពស់នៅឆ្នាំ ២០២៤”។ លោកលីចៀង នៅភូមិព្រែកឈ្វេង ឃុំថាញ់ភូ ឱ្យដឹង៖ “បុណ្យចូលឆ្នាំថ្មីឆ្នាំនេះ ទាំងភូមិខ្ញុំមានសេចក្តីត្រេកអរពន់ពេកណាស់ ពីព្រោះបានរដ្ឋតបំពង់ទឹកស្អាតចុះមកដល់ផ្ទះ។ ខ្ញុំនិងមាមីងគ្មាននៅបារម្ភខ្វះទឹកស្អាតប្រើប្រាស់ក្នុងរដូវក្តៅទៀតហើយ”។
ផ្លូវជនបទតំបន់ជនរួមជាតិខ្មែរ កាន់តែសុក្រឹតពីមួយថ្ងៃទៅមួយថ្ងៃ។
ភូមីជាឃុំលំបាកខ្លាំង មានជនរួមជាតិខ្មែររស់នៅកុះកររបស់ស្រុកមីទូ ឆ្នាំ ២០២២-២០២៣ បានវិនិយោគជាង ៣,៥ ពាន់លានដុង ដើម្បីអនុវត្តគម្រោង និងអនុគម្រោងរបស់កម្មវិធី។ ក្នុងនោះ ឃុំអាទិភាពវិនិយោគ កសាងផ្លូវគមនាគមន៍ជនបទ ឧបត្ថម្ភទុន ផ្ទះដីសង់ផ្ទះ ដីផលិតកម្មជូនគ្រួសារក្រីក្រ ។ល។ លោក ថាច់មិញឡី អនុប្រធានគណៈកម្មាធិការប្រជាជនឃុំភូមី ឱ្យដឹង៖ “កម្មវិធីគឺស្ដែងបង្ហាញពីការយកចិត្តទុកដាក់របស់បក្ស រដ្ឋ ចំពោះជនរួមជាតិខ្មែរ ហើយពិតជាធ្វើឱ្យផ្លាស់ថ្មីទាំងស្រុងនៅតំបន់ជនបទនិងជីវភាពជនរួមជាតិខ្មែរ។ គម្រោង អនុគម្រោងតែងទទួលបានការសហការ ឃ្លាំមើលយ៉ាងហ្មត់ចត់ពីមាមីងខ្មែរ។ អាស្រ័យមានកម្មវិធី ទើបឃុំកសាងបានសំណង់ផ្លូវជនបទ សាលារៀន ដំណាក់សុខាភិបាល ឧបត្ថម្ភទុន ពូជ និងបច្ចេកទេស។ល។ រួមចំណែកជួយឱ្យឃុំអនុវត្តសម្រេចលក្ខឋានជនបទថ្មីក្នុងឆ្នាំ២០២៣”។
លោក លីរដ្ឋា ឱ្យដឹង៖ “កម្មវិធីបានគណៈកម្មាធិការបក្សខេត្ត ដាក់បញ្ចូលក្នុងសេចក្តីសម្រេចចិត្ត ហេតុនោះពេលមានប្រភពទុនភ្លាម ភូមិភាគនានាជំរុញល្បឿនដំណើរការដើម្បីសម្រេចលទ្ធផលត្រូវតាមផែនការ។ ខេត្តបានបើកវគ្គហ្វឹកហ្វឺន បណ្តុះបណ្តាល លើកកម្ពស់សមត្ថភាពជូនកម្មាភិបាលនៅតំបន់គម្រោង ដើម្បីផ្សព្វផ្សាយអនុវត្តគោលនយោបាយរបស់កម្មវិធីឱ្យបានពេញលេញ។ ជាពិសេស គឺពង្រីកតួនាទីអ្នកមានប្រជាប្រិយ ក្នុងការឃ្លាំមើល និងឃោសនា ចលនាប្រជាជនព្រួតដៃអនុវត្តកម្មវិធី ដើម្បីសម្រេចបានប្រសិទ្ធភាពខ្ពស់បំផុត។ ទន្ទឹមនឹងនោះ ជំរុញល្បឿនការងារត្រួតពិនិត្យ ឃ្លាំមើលការអនុវត្តកម្មវិធី ដើម្បីប្រទះឃើញនិងកែតម្រង់បានទាន់ពេលនូវភាពខ្វះចន្លោះក្នុងដំណើរការអនុវត្ត”។
សញ្ញាគួរឱ្យរីករាយនៅគៀងយ៉ាង
ការផ្សព្វផ្សយអនុវត្តប្រកបដោយប្រសិទ្ធភាព “កម្មវិធីទិសដៅជាតិអភិវឌ្ឍសេដ្ឋកិច្ច-សង្គម នៅតំបន់ជនជាតិភាគតិចនិងតំបន់ភ្នំ ដំណាក់កាល ២០២១ - ២០២៥” (ហៅថា កម្មវិធី) នឹងរួមចំណែកលើកកម្ពស់ជីវភាពសម្ភារៈ និងស្មារតីដល់ជនជាតិភាគតិចនៅខេត្តគៀងយ៉ាង។
ផ្លូវទៅកាន់កំពង់ចម្លងធ្វីលីវ ស្រុកហ្គក្វាវ កំពុងធ្វើការជួសជុល។
គៀងយ៉ាង ជាខេត្តមួយក្នុងចំណោមខេត្តដែលមានជនជាតិភាគតិចរស់នៅកុះករនៅតំបន់វាលរាបទន្លេគឺវឡុង។ ក្នុងចំណោមជនជាតិភាគតិចក្នុងទូទាំងខេត្ត ១៤,៩៤% គឺមានជនជាតិខ្មែរ ១៣,១៩%។ ជនរួមជាតិខ្មែរនៅខេត្តគៀងយ៉ាង រស់នៅលាយឡំជាមួយជនជាតិនានា៖ កិញ, ចិន, ចាម ។ល។ នៅគ្រប់ភូមិស្រុកក្នុងខេត្ត ក្នុងនោះប្រមូលផ្តុំច្រើនបំផុតនៅស្រុកហ្គក្វាវ ស្រុកយ៉ុងរៀង ស្រុកហងដឹក ក្រុងហាតៀង ។ល។ លោកយ័ញភុក ប្រធានគណៈជនជាតិខេត្តគៀងយ៉ាង មានប្រសាសន៍៖ “ពេលយើងខ្ញុំឡើងផែនការអនុវត្តកម្មវិធី បានជួបប្រទះការលំបាកជាច្រើន ដោយសារខេត្តគៀងយ៉ាងមានផ្ទៃដីធំ មានទាំងសមុទ្រ និងភ្នំផង។ ប៉ុន្តែដោយកំណត់ច្បាស់ថា បើអនុវត្តកម្មវិធីបានរហ័ស និងមានប្រសិទ្ធភាពនោះ នឹងជួយផ្លាស់ប្តូរជីវភាពរបស់ជនរួមជាតិ តាមទិសដៅកែលម្អទាំងគុណភាព សម្ភារៈនិងស្មារតី ដូច្នេះក៏ទទួលបានការឯកភាពពីអង្គភាពពាក់ព័ន្ធ ក្រោមកិច្ចចង្អុលការដោយផ្ទាល់របស់គណៈកម្មាធិការបក្សខេត្ត និងគណៈកម្មាធិការប្រជាជនខេត្ត។ អាស្រ័យហេតុនោះ ការលំបាកជំហានដំបូង ត្រូវបានដោះស្រាយ ហើយកម្មវិធីត្រូវបានអនុវត្តទាន់ពេលវេលានិងត្រូវតាមល្បឿនដំណើរការ។
ពេលជីវភាពបានលើកស្ទួយ មានសិស្សជាច្រើនបានទៅរៀនដោយម៉ូតូ។
យោងតាមរបាយការណ៍របស់គណៈជនជាតិខេត្តគៀងយ៉ាង បានឲ្យដឹង៖ ក្រោយរយៈពេលពីរឆ្នាំអនុវត្តកម្មវិធី ដោយប្រភពទុនជាច្រើនរបស់មជ្ឈិម ទុនផ្គួបផ្សំ ទុនភូមិភាគ បានផ្តុំកម្លាំងវិនិយោគអភិវឌ្ឍដល់ឃុំ តំបន់ជនជាតិភាគតិច រួមចំណែកអភិវឌ្ឍហេដ្ឋារចនាសម្ព័ន្ធនៅឃុំទាំងនេះ។ កម្មវិធី ក៏ជួយលើកកម្ពស់គុណភាពធនធានមនុស្ស តាមរយៈកម្មវិធីបណ្តុះបណ្តាល និងបំពាក់បំប៉នកម្មាភិបាលមូលដ្ឋាន ដើម្បីបម្រើដល់ការអភិវឌ្ឍរួម។ បងយ័ញមី ជាកម្មាភិបាល ទទួលបន្ទុកផ្នែកចាក់ថ្នាំបង្ការនៅដំណាក់សុខាភិបាលឃុំឌិញអាង ស្រុកហ្គក្វាវ មានប្រសាសន៍៖ “តាមរយៈវគ្គហ្វឹកហ្វឺនរបស់ផ្នែកសុខាភិបាល ខ្ញុំកាន់តែមានទំនុកចិត្តក្នុងការអនុវត្តកម្មវិធីចាក់ថ្នាំបង្ការថ្នាក់ជាតិ”។
ជនរួមជាតិខ្មែរចូលរួមទីវាបុណ្យវប្បធម៌ កីឡានិងទេសចរណ៌ខេត្តគៀងយ៉ាង
ឆ្នាំ ២០២៣ នៅស្រុកហ្គក្វាង។
ព្រែកប្រឡាយនៅស្រុកហ្គក្វាង បានជីកស្តារជារឿយៗ ធានាប្រភពទឹកសម្រាប់
ប្រជាជនបង្កបង្កើនផល់
លោកយ័ញភុក ឱ្យដឹងបន្ថែម ដើមទុនសរុបសម្រាប់អនុវត្តកម្មវិធីនៅខេត្តគៀងយ៉ាង គឺជាង ៦៦០ ពាន់លានដុង ដើម្បីដោះស្រាយដីសង់លំនៅឋាន សង់លំនៅឋាន ដីផលិតកម្ម ទឹកស្អាតប្រើប្រាស់; អភិវឌ្ឍការអប់រំនិងបណ្តុះបណ្តាល លើកកម្ពស់គុណភាពធនធានមនុស្ស។ អភិរក្ស និងលើកកម្ពស់តម្លៃប្រពៃណីល្អប្រសើររបស់ជនជាតិ ភាគតិច ផ្សារភ្ជាប់ជាមួយនឹងការអភិវឌ្ឍទេសចរណ៍; ថែទាំសុខភាពប្រជាជន បង្កើនកាយសម្បទា មាឌ កម្ពស់ជនជាតិភាគតិច បង្ការ ទប់ស្កាត់បញ្ហាកង្វះអាហារូបត្ថម្ភដល់កុមារ។ល។ ដើម្បីអនុវត្តគម្រោងប្រកបដោយប្រសិទ្ធភាព ខេត្តគៀងយ៉ាងបានចែកគម្រោងធំៗទៅជាអនុគម្រោង។ តួយ៉ាងដូចគម្រោង អភិវឌ្ឍការអប់រំនិងបណ្តុះបណ្តាល លើកកម្ពស់ធនធានមនុស្ស គឺមានអនុគម្រោង អភិវឌ្ឍសាលារៀននៅតំបន់ជនជាតិភាគតិច បំពាក់បំប៉នចំណេះដឹងជនជាតិ និងលើកកម្ពស់សមត្ថភាពដល់សហគមន៍ និងកម្មាភិបាល។
ហ្គក្វាវ គឺជាអង្គភាពថ្នាក់ស្រុកមួយក្នុងចំណោមអង្គភាពថ្នាក់ស្រុកចំនួនពីរដែលមានជនជាតិខ្មែររស់នៅច្រើនជាងគេរបស់ខេត្តគៀងយ៉ាង ដូច្នេះបានទទួលផលពីគម្រោងជាច្រើននៃកម្មវិធី។ ជាពិសេស គឺបានជ្រើសរើសរៀបចំទិវាបុណ្យវប្បធម៌ កីឡា និងទេសចរណ៍ជនរួមជាតិខ្មែរជារៀងរាល់ឆ្នាំ។ ថ្វីដ្បិតតែជាពិធីបុណ្យថ្នាក់ខេត្តក៏ដោយ ប៉ុន្តែ ទិវាបុណ្យនៅហ្គក្វាវតែងទាក់ទាញភ្ញៀវទេសចររាប់រយពាន់នាក់មកទស្សនា និងអបអរសាទរ។ យោងតាមប្រសាសន៍លោកឡេមិញខ្វា អនុប្រធានគណៈកម្មាធិការប្រជាជន ស្រុកហ្គក្វាវ បានឱ្យដឹង ទិវាបុណ្យ និយាយដោយឡែក និងការផ្សព្វផ្សាយអនុវត្តនូវកម្មនីមួយៗវិធីបានរួមចំណែកជួយផ្លាស់ប្តូរហេដ្ឋារចនាសម្ព័ន្ធនៅបណ្តាឃុំដែលមានជនរួមជាតិខ្មែររស់នៅកុះករ ដូចជា ឌិញហ្វា, ឌិញអាង, វិញភឿក B, ធ្វីលីវ, ថើយក្វាង។ល។ លោកស្រីចុងថាញទ្រុក អនុលេខាគណៈកម្មាធិការបក្សឃុំថើយក្វាង ស្រុកហ្គក្វាវ បានឱ្យដឹង៖ “នៅពេលអនុវត្តគម្រោងទាំងឡាយរបស់កម្មវិធី បានធ្វើឱ្យផ្លាស់ប្តូរទាំងស្រុងតំបន់ជនជាតិភាគតិចលើភូមិសាស្រ្ត រួមចំណែកដល់ការអភិវឌ្ឍរួមរបស់ឃុំ។ ផ្តើមពីការផ្លាស់ប្តូរទាំងនេះ ជីវភាពសម្ភារៈនិងស្មារតីរបស់ជនរួមជាតិភាគតិចលើភូមិសាស្រ្ត ក៏មានភាពល្អប្រសើរឡើងផងដែរ”៕
ក្រុមអ្នកយកព័ត៌មានកាសែតកឹងធើភាសាខ្មែរ
ពាក្យគន្លឹះ
អគ្គនិពន្ធនាយក: ត្រឿងវ៉ាំងច្វៀន អគ្គនិពន្ធនាយករងទទួលបន្ទុកភាសាខ្មែរ: ង្វៀងថាញត្វឹង
លិខិតអនុញាតលេខ៧៨៩/GP-BTTTT អាស្រ័យក្រសួងពត៌មាននិងសារគមនាគមន៍ផ្តល់ថ្ងៃទី០២-១២-២០២១។លេខ២៤ ត្រឹងវ៉ាំងហ្វាយ ទីក្រុងកឹងធើ - ទូរស័ព្ទ: (០២៩២) ៣៨៣០០៩៨
ទូរសារ: (០២៩២) ៣៨៣០៥៦១។ អ៊ីម៉ែល: toasoan@baocantho.com.vn
ទំនាក់ទំនងផ្សាយពាណិជ្ជកម្ម : quangcao@baocantho.com.vn
សរសេរច្បាស់ប្រភព"សារព័ត៌មានអេឡិចត្រូនិកកឹងធើ" នៅពេលផ្សាយបន្តពីwebsite នេះ។
អភិវឌ្ឍន៍ដោយ:
