សុខភាព - អប់រំ អប់រំ

16/01/2023 - 10:11

រវាសរវៃក្នុងការបណ្តុះបណ្តាលវិជ្ជាជីវៈ

អនុមហាវិទ្យាល័យវិជ្ជាជីវៈសុកត្រាំង បានបណ្តុះបណ្តាលសិស្ស និស្សិតរាប់រយនាក់នៅកម្រិតបរិញ្ញាបត្ររង និងមធ្យមសិក្សា ផ្សារភ្ជាប់នឹងការបង្រៀនវប្បធម៌ចំណេះទូទៅ។ ទន្ទឹមនឹងនោះ បានចុះកិច្ចសន្យាជាមួយនឹងអាជីវកម្មនៅក្នុងនិងក្រៅខេត្ត ដើម្បីប្រើប្រាស់ប្រភពធនធានមនុស្សដែលឆ្លងកាត់ការបណ្តុះបណ្តាល។

អនុមហាវិទ្យាល័យវិជ្ជាជីវៈសុកត្រាំង។

ដំណាក់កាល២០១៦-២០២២ សាលាបានជម្រើសសិស្ស និស្សិត ៥.៨០១ នាក់ ក្នុងនោះ មានសិស្ស ២.១៧៨ នាក់ រៀនវិជ្ជាជីវៈបណ្តើរ និងរៀនចំណេះទូទៅតាមកម្មវិធីអប់រំជាប្រចាំបណ្តើរ។ សិស្ស និស្សិតនឹងរៀនចាប់ពីថ្នាក់ទី ១០ដល់ថ្នាក់ ១២ អាស្រ័យលោកគ្រូ អ្នកគ្រូនៅមជ្ឈមណ្ឌលអប់រំជាប្រចាំ អប់រំវិជ្ជាជីវៈខេត្តសុកត្រាំងបង្ហាត់បង្រៀនដោយផ្ទាល់ កម្មវិធីបណ្តុះបណ្តាលមានរយៈពេល ៣៥ ខែ។ ក្រៅពីនោះ សាលានៅទាំងចុះកិច្ចសន្យាលើកម្មវិធីសហការបណ្តុះបណ្តាលនិងផ្គត់ផ្គង់ប្រភពធនធានមនុស្សជាមួយក្រុមហ៊ុនអាជីវកម្ម ដូចជា៖ សម្ព័ន្ធក្រុមហ៊ុន Greenfeed វៀតណាម; សម្ព័ន្ធក្រុមហ៊ុនហ្វាផាក; សម្ព័ន្ធក្រុមហ៊ុនតិនក្វាង និងក្រុមហ៊ុនភាគហ៊ុនស្ករអំពៅថាញ់ថាញ់កុង។ល។ លោកត្រឹងខាញ់ វិទ្យាធិការរងអនុមហាវិទ្យាល័យវិជ្ជាជីវៈសុកត្រាំង ឱ្យដឹង៖ “ដំណើរការបណ្តុះបណ្តាលរបស់សាលា គឺតាមសេចក្តីត្រូវការរបស់អាជីវកម្ម ម្ល៉ោះហើយសិស្ស និស្សិតភាគច្រើនក្រោយពីបញ្ចប់ការសិក្សាពី ៤-៦ ខែ ក៏រកបានការងារធ្វើដោយប្រាក់ខែមធ្យមភាគនៅកម្រិតមធ្យមសិក្សាពី ៤,៥-៦លានដុង/ខែ; កម្រិតបរិញ្ញាបត្ររងពី ៥ -៨ លានដុង/ខែ អាស្រ័យទៅតាមផ្នែកវិជ្ជាជីវៈនីមួយៗ។ បច្ចុប្បន្ន សាលាបណ្តុះបណ្តាលមុខវិជ្ជាជីវៈចំនួន ១៣ រួមមានមុខវិជ្ជាជីវៈស្ថិតក្នុងវិស័យដូចជា បច្ចេកវិទ្យាកុំព្យូទ័រ អគ្គិសនី- អេឡិចត្រូនិក យន្តកម្មនិងកសិកម្ម ចំណីអាហារ-ជលផល។ ក្រៅពីនោះ សាលានៅទាំងបណ្តុះបណ្តាលមុខវិជ្ជាជីវៈដ៏សំខាន់កម្រិត ASEN ចំនួន២ (អេឡិចត្រូនិកឧស្សាហកម្ម និងបច្ចេកវិទ្យារថយន្ត) និងមុខវិជ្ជាជីវៈសំខាន់ ថ្នាក់ជាតិចំនួន ៣។ ទ្រង់ទ្រាយជម្រើសសិស្ស និស្សិតចាប់ពី ៨៧៥ នាក់ដល់ ៩៦២នាក់ក្នុងមួយឆ្នាំ។ សាលានៅទាំងមានគោលនយោបាយ អាទិភាពសម្រាប់សិស្សជនរួមជាតិភាគតិចក្រីក្រ ដូច៖ កាត់បន្ថយថ្លៃសិក្សា ផ្ដល់អាហារូបករណ៍ និងការស្នាក់នៅអន្តេវាសិកដ្ឋាន”។

អនុមហាវិទ្យាល័យវិជ្ជាជីវៈសុកត្រាំង ចុះហត្ថលេខាសហការបណ្តុះបណ្តាលប្រភពធនធានមនុស្សជាមួយនឹងសម្ព័ន្ធក្រុមហ៊ុនវៀតអូស្រ្តាលី។

ប្អូនថាច់ហ្វាងដែប កំពុងធ្វើការនៅក្រុមហ៊ុនភាគហ៊ុនជលផលជ្រះមណ្ឌលឧស្សាហកម្ម អាងហ៊ីប ស្រុកចូវថាញ់ ឱ្យដឹង៖ “ដោយសារគ្រួសារខ្វះខាត់ ហេតុនោះខ្ញុំចូលរៀនផ្នែកអេឡិចត្រូនិកឧស្សាហកម្មនៅអនុមហាវិទ្យាល័យវិជ្ជាជីវៈសុកត្រាំង។ ក្រោយពីបញ្ចប់ការសិក្សា ខ្ញុំសុំធ្វើនៅក្រុមហ៊ុន បច្ចុប្បន្ន ខ្ញុំទទួលប្រាក់ខែជាង ៧ លានដុងក្នុងមួយខែ”។ ចំណែកប្អូនយ៉េបធីមីយ័ញ និស្សិតឆ្នាំចុងក្រោយផ្នែកច្នៃជលផល ឱ្យដឹង៖ “គ្រួសារខ្ញុំក្រ ម្ល៉ោះហើយពេលបញ្ចប់កម្រិតវិទ្យាល័យ ខ្ញុំចូលរៀនវិជ្ជាជីវៈនៅសាលាអនុមហាវិទ្យាល័យវិជ្ជាជីវៈសុកត្រាំង បានកាត់បន្ថយថ្លៃសិក្សា ៧០% និងបានស្នាក់នៅអន្តេវាសិកដ្ឋានដោយឥតគិតថ្លៃ។ បច្ចុប្បន្ន សាលាបានផ្ដល់បញ្ជីឈ្មោះក្រុមហ៊ុន ដើម្បីឱ្យខ្ញុំជ្រើសរើសចូលហ្វឹកហ្វឺននិងធ្វើការ។ សាលាមានគោលនយោបាយល្អណាស់ បណ្តុះបណ្តាលវិជ្ជាជីវៈតាមតម្រូវការក្រុមហ៊ុន ម្ល៉ោះហើយចេញពីសាលាមានការងារធ្វើតែម្តង; សមស្របជាមួយនឹងអ្នកដែលគ្មានលក្ខណៈរៀនមហាវិទ្យាល័យ”។

លោកត្រឹងខាញ់ ឱ្យដឹងបន្ថែម៖ “បច្ចុប្បន្ន សាលាផ្តុំកម្លាំងអនុវត្តគម្រោងលេខ ០១/ĐA- UBND ចុះថ្ងៃទី ០៧ ខែមីនា ឆ្នាំ២០២២ ស្តីពីការអភិវឌ្ឍអនុមហាវិទ្យាល័យវិជ្ជាជីវៈសុកត្រាំង គុណភាពខ្ពស់ដល់ឆ្នាំ ២០២៥។ នៅក្នុងភារកិច្ចទិសដៅ និងវិធានការអនុវត្តគម្រោង គឺអាទិភាពយកចិត្តទុកដាក់បណ្តុះបណ្តាលវិជ្ជាជីវៈដល់មុខសញ្ញាដែលបញ្ចប់អនុវិទ្យាល័យ និងវិទ្យាល័យ តែគ្មានលក្ខណៈរៀនមហាវិទ្យាល័យ”៕

យ្វីអាញ-វិមាន

ចែករំលែកអត្ថបទ

ពាក្យគន្លឹះ