មហាសាមគ្គីជនជាតិ គំរូក្នុងសហគមន៍

27/09/2022 - 09:45

យុវជនចូលចិត្តទូក-ងខ្នាតតូចៗ

បងគឹមហឹង នៅភូមិបឹងក្រចាប់ថ្មី ឃុំតឹងហឹង ស្រុកឡុងភូ ខេត្តសុកត្រាំង កំពុងបានមជ្ឈដ្ឋានអ្នកចូលចិត្តទូក-ងនៅតាមខេត្ត ក្រុងតំបន់វាលរាបទន្លេគឺវឡុង កក់ធ្វើទូក-ងតូចៗជាវត្ថុតាំងលម្អ។

គឹមហឹង សម្រេចរួចរាល់ទម្រង់ទូក-ងខ្នាតតូចរបស់វត្តអំពូយារ។

កាលពីអាយុ ១២ ឆ្នាំ គឹមហឹង បានចូលចិត្តមើលប្រណាំងទូក-ងទៅហើយ ហេតុនោះពេលឃើញជីតាធ្វើទូក-ងតូចៗឱ្យលេង កាន់តែធ្វើឱ្យគាត់ចូលចិត្តទូក-ងខ្លាំងឡើង។ ផ្តើមពីនោះ គឹមហឹង ចាប់ផ្តើមស្វែងយល់ រៀនសូត្រពីរបៀបធ្វើទូក-ង ដើម្បីបំពេញនូវចំណង់ចំណូលចិត្តរបស់ខ្លួន។ បងគឹមហឹង ឱ្យដឹង៖ “ឃើញជីតាយកដើមហឺតមក កាត់ដាប់ឱ្យទៅជាទ្រង់ទ្រាយទូក-ង រួចគូរក្បូរក្បាច់រចនា និងលាបពណ៌ ខ្ញុំអង្គុយមើលយ៉ាងយកចិត្តទុកដាក់ រួចធ្វើតាម។ ខ្ញុំធ្វើបណ្តើរ កែសម្រួលបណ្តើររហូតមើលទៅហាក់ដូចជាទូក-ងធំរបស់វត្តទើបឈប់”។

នៅតំបន់ជនបទមានដើមហឺតច្រើនណាស់ ម្ល៉ោះហើយយុវជនរូបនេះតែងទៅកាប់ដើមហឺត យកមកធ្វើទូក-ង រហូតដល់ក្លាយជាសិប្បករវ័យក្មេងល្បីឈ្មោះជាមួយនឹងទូក-ងខ្នាតតូចៗ។ បច្ចុប្បន្ន នៅតាមវត្តអារាមនានា ដូចជា៖ វត្តអំពូយារ (សុកត្រាំង) វត្តពិសី (ត្រាវិញ) និងវត្តមួយចំនួនទៀតនៅខេត្តសុកត្រាំង គៀងយ៉ាង វិញឡុង។ល។ បានមកដាក់ពាក្យទិញ។ បងគឹមហឹង ឱ្យដឹង៖ “ក្នុងរយៈពេល ១០ ឆ្នាំមកនេះ ខ្ញុំបានចូលរួមសមាគមអ្នកស្រឡាញ់ចូលចិត្តកីឡាប្រណាំងទូក-ងនៅលើហ្វេកប៊ុក រួចខ្ញុំក៏បានថតរូបទូក-ងតូចៗបង្ហោះឡើង។ ដោយឃើញទម្រង់ទូក-ងតូចៗស្អាតគាប់ភ្នែក ម្ល៉ោះហើយអ្នកស្រឡាញ់ចូលចិត្តក៏មកដាក់ពាក្យទិញ ហើយឥឡូវនេះខ្ញុំធ្វើមិនគ្រប់ប្រគល់ឱ្យអតិថិជនផង”។ ប្រការពិសេសរបស់គឹមហឹងនោះគឺ ទោះជាទូក-ងវត្តណាក៏ដោយឱ្យតែមកចូលរួមប្រណាំងនៅក្នុងពិធីប្រណាំងទូក-ង ខេត្តសុកត្រាំង គឺគាត់អាចគូរក្បូរក្បាច់រចនា តាមទូក-ងវត្តនោះដូចបេះបិទ ហេតុនោះអតិថិជនកាន់តែស្រឡាញ់ពេញចិត្តពីមួយថ្ងៃទៅមួយថ្ងៃ។

តាមប្រសាសន៍បង គឹមហឹង ប្រភេទឈើដែលយកមកច្នៃធ្វើទូក-ងតូចៗ ជាសំខាន់គឺប្រភេទឈើមិនសូវមានភ្នែក ដូចជាដើមហឺត ខ្នុរ ជាដើម។ អាស្រ័យទៅតាមទំហំរបស់ទូក-ង គឹមហឹង អាចធ្វើសម្រេចផលិតផលទូក-ង ១ គ្រឿង ក្នុងរង្វង់កន្លះខែ។ ទូក-ងតូចៗ ១ គ្រឿងលក់ដោយតម្លៃពី ៦០០.០០០ ដុងដល់ ២ លានដុង។ ទន្ទឹមនឹងនោះ គឹមហឹងនៅទាំងធ្វើទូកគែហ៊ៅខ្នាតតូច តាមតម្រូវការរបស់អតិថិជនទៀតផង។ បងគឹមហឹង ឱ្យដឹង៖ “បើចង់ច្នៃប្រភេទកូនទូក-ងតូចៗ ត្រូវតែមានចំណង់ចំណូលចិត្ត និងទ្រាំលំបាកស្វែងយល់ទើបអាចធ្វើបាន ពីព្រោះក្បូរក្បាច់រចនារបស់ទូក-ងនីមួយៗសុទ្ធតែខុសៗគ្នា ហើយដោយសារខ្នាតទូកតូចពិបាកក្នុងការគូររចនា។ ព្រោះហេតុនោះ មុនពេលគូរ ខ្ញុំបែងខ្នាតទូកជាខណ្ឌៗ រួចគូរព្រាងជាលំនាំដោយខ្មៅដៃជាមុន ទើបលាបពណ៌ពីលើ។ ឆ្នាំនេះ ជាលើកដំបូងខ្ញុំបានអញ្ជើញទៅគូរក្បូរក្បាច់ រចនាទូក-ងនៅវត្តបឹងក្រចាប់ថ្មី ប្រការនេះជាក្តីរីករាយ និងជាកិត្តិយសផងដែរ”។

ក្រៅពីច្នៃធ្វើទូក-ងតូចៗ បងគឹមហឹង នៅទាំងច្នៃធ្វើទូកគែហ៊ៅខ្នាតតូចផងដែរ សម្រាប់ប្រឡងប្រណាំងក្នុងភូមិស្រុក។ រៀងរាល់ឆ្នាំ ឱ្យតែដល់បុណ្យចូលឆ្នាំថ្មីម្តងៗ គាត់ចាត់តាំងប្រណាំងទូក-ងតូចនៅប្រឡាយមុខផ្ទះ ហើយទាក់ទាញទូក-ង តូចៗមកចូលរួមប្រកួតទៀតផង ប្រការនេះបានរួមចំណែកយ៉ាងធំធេងក្នុងការអភិរក្សវិញ្ញាសាកីឡាប្រពៃណីរបស់ជនរួមជាតិខ្មែរ៕

លីធាន-វិមាន

ចែករំលែកអត្ថបទ

ពាក្យគន្លឹះ