ព្រឹត្តិការណ៍ - នយោបាយ ព្រឹត្តិការណ៍

19/09/2022 - 14:41

សង្គ្រោះរស់អ្នកជំងឺគ្រុនឈាមធ្ងន់

មន្ទីរពហុព្យាបាលខេត្តសុកត្រាំង បានសង្រ្គោះរស់អ្នកជំងឺឈ្មោះហ្វិញតៀងដាក កើតឆ្នាំ ១៩៩៩ ស្នាក់នៅឃុំថាញ់ភូ ស្រុកមីស្វៀង ខេត្តសុកត្រាំង។ អ្នកជំងឺមានរោគសញ្ញាគ្រុនឈាមកម្រិតធ្ងន់ បណ្តាលឱ្យអាការរោគគំរាមកំហែងដល់អាយុជីវិត។

បច្ចុប្បន្នសុខភាពអ្នកជំងឺបានធូរស្រាលជាបណ្តើរៗ។

បើតាមមន្ទីរពេទ្យ អ្នកជំងឺត្រូវបាននាំមកកាន់មន្ទីរពេទ្យកាលពីថ្ងៃ ១៥ ខែសីហា ស្ថិតក្នុងស្ថានភាពគ្រុនក្តៅធ្ងន់ជាបន្តបន្ទាប់មិនធូរសោះឡើយ មានស្នាមកន្ទួលចេញឈាមឡើងពាសពេញខ្លួន និងមានស្មារតីមិននឹងនរ៘ អ្នកជំងឺត្រូវបានធ្វើរោគវិនិច្ឆ័យគឺកើតជំងឺគ្រុនឈាម Dengue ប្រភេទធ្ងន់ដោយវិបត្តិសាច់ដុំ ម្ល៉ោះហើយផ្នែកប្រពោធកម្មធ្វើការសង្គ្រោះនិងបន្សាបជាតិពុល បានសង្គ្រោះនិងព្យាបាលទាន់ពេល។ ក្រោយព្យាបាលរយៈពេល ១២ ម៉ោង ឃើញថាស្ថានភាពអ្នកជំងឺបានធូរស្រាលគ្រាន់បើ ប៉ុន្តែដោយវិបត្តិសាច់ដុំធ្ងន់ធ្ងរពេក ម្ល៉ោះហើយត្រូវជំនួយដោយវិធានការផ្សេងៗដូច៖ ការបញ្ចូលឈាម បញ្ចូលសូលុយស្យុងក្នុងសរសៃឈាម លាងឈាមជាបន្តបន្ទាប់ និងប្រើម៉ាស៊ីនជំនួយដង្ហើម។ល។ ឆ្លងកាត់ដំណាក់កាលព្យាបាលមកទល់ពេលនេះ សុខភាពរបស់អ្នកជំងឺបានធូរស្រាល អាចហូបចុកបានខ្លះនិងស្ថានភាពវិបត្តិ សាច់ដុំក៏បានកាត់បន្ថយផងដែរ។

វេជ្ជបណ្ឌិតឯកទេស II ឌាំងមិញហៀង នាយកមន្ទីរពហុព្យាបាលសុកត្រាំង បានផ្តល់អនុសាសន៍៖ ឥឡូវកំពុងស្ថិតក្នុងរដូវជំងឺគ្រុនឈាម ម្ល៉ោះហើយមាមីងគប្បីប្រុងប្រយ័ត្នខ្ពស់ក្នុងការបង្ការ ប្រឆាំងជំងឺរាតត្បាត; ជានិច្ចកាលអនាម័យផ្ទះសម្បែង កម្ចាត់ដង្កូវទឹក ដេកក្នុងមុង ៘ ខណៈពេលឃើញសាច់ញាតិក្នុងគ្រួសារគ្រុនក្តៅខ្លួនជាបន្តបន្ទាប់ គប្បីនាំទៅពិនិត្យនៅមូលដ្ឋានសុខាភិបាល ដើម្បីឆាប់រកគំហើញនិងព្យាបាលបានទាន់ពេល។ ដាច់ខាតមិនត្រូវព្យាបាលដោយខ្លួនឯង ពីព្រោះអាចនឹងបណ្តាលឱ្យជំងឺកាន់តែធ្ងន់ធ្ងរគ្រោះថ្នាក់ដល់អាយុជីវិត៕

យ្វីអាញ-លីសៀ

ចែករំលែកអត្ថបទ

ពាក្យគន្លឹះ