មហាសាមគ្គីជនជាតិ គំរូក្នុងសហគមន៍

01/08/2022 - 15:08

អស់ពីចិត្តជាមួយនឹងសិស្សខ្មែរ

អ្នកគ្រូង៉ោធីលី គ្រូបង្រៀនសាលាវិទ្យាល័យជនជាតិអន្តេវាសិកខេត្តបាកលីវ តែងផ្តល់ក្តីស្រឡាញ់និងរិះរកវិធីសាស្ត្របង្រៀនឱ្យបានសមស្របនឹងសិស្សខ្មែរ ម៉្លោះហើយអ្នកគ្រូតែងបានសិស្សគោរពស្រឡាញ់។

អ្នកគ្រូលី កំពុងណែនាំសិស្សធ្វើមេរៀន។

ប្អូនត្រឹងហ្វាងហ៊ី សិស្សថា្នក់ទី ១២ សាលាវិទ្យាល័យជនជាតិអន្តេវាសិកខេត្តបាកលីវ ឱ្យដឹង៖ “អ្នកគ្រូលី គាត់ស្លូតនិងស្រឡាញ់សិស្សខ្លាំងណាស់។ អ្នកគ្រូបង្រៀនវិញ្ញាសាគីមីវិទ្យាងាយយល់ ព្រោះគាត់មានវិធីសាស្ត្របង្រៀនល្អ ជួយឱ្យពួកប្អូនងាយចងចាំមេរៀន។ អ្នកគ្រូតែងអញ្ជើញមកអន្តេវាសិកដ្ឋានជារឿយៗ ដើម្បីណែនាំសិស្សពីរបៀបរស់នៅសមូហភាព ឃើញសិស្សរូបណាខ្វះខាតអ្វីគាត់ទិញឱ្យ ព្រមទាំងលើកទឹកចិត្តកូនសិស្សឱ្យស្ងប់ចិត្តរៀនសូត្រ ពេលរស់នៅឆ្ងាយពីផ្ទះ។ ពិសេស គឺពេលជំងឺ COVID-១៩ ឆ្លងរាលដាលកន្លងហើយ អ្នកគ្រូបានទិញថ្នាំ យកម្ហូបអាហារ នំនែក ផ្លែឈើ ភេសជ្ជៈ។ល។ ផ្គត់ផ្គង់ដល់សិស្ស ដូច្នេះ យើងខ្ញុំគោរពស្រឡាញ់អ្នកគ្រូខ្លាំងណាស់”។

ម៉ោងបង្រៀនរបស់អ្នកគ្រូលី។

តាមប្រសាសន៍ អ្នកគ្រូលី ពីមុន ដោយសារស្ថានភាពគ្រួសារជួបការលំបាក ម៉្លោះហើយបានចូលរៀននៅសាលាវិទ្យាល័យជនជាតិអន្តេវាសិកខេត្តបាកលីវ អ្នកគ្រូសប្បាយខ្លាំងណាស់ ហើយសាលានេះដែរក៏បានជួយឱ្យអ្នកគ្រូសម្រេចក្តីប្រាថ្នាធ្វើជាគ្រូបង្រៀនបានដូចបំណង។ រយៈពេលជាង ១៧ ឆ្នាំផ្សារភ្ជាប់នឹងសិស្សខ្មែរ ក្រៅពីម៉ោងចូលបង្ហាត់បង្រៀន អ្នកគ្រូលីតែងឆ្លៀតពេលទៅនិយាយលេងជាមួយនឹងសិស្ស ជួយបំភ្លឺរាល់បញ្ហាចម្ងល់ ព្រមទាំងយកចិត្តទុកដាក់ចំពោះស្ថានភាពសិស្សគ្រប់រូប។ ហេតុនេះ មិនត្រឹមតែសិស្សប៉ុណ្ណោះទេ អ្នកគ្រូនៅទាំងបានមិត្តរួមអាជីពស្រឡាញ់រាប់អាន ថែមទាំងបានគណៈនាយកសាលាទំនុកចិត្ត និងប្រគល់ឱ្យអ្នកគ្រូធ្វើជាអចិន្ត្រៃយ៍ថ្នាក់ទី ១២ ទៀតផង។ អ្នកគ្រូលី សំណេះសំណាល៖ “ផ្ទះខ្ញុំក្រ បើសិនរៀននៅសាលាក្រៅបង់ប្រាក់ ឪពុកម្តាយគ្មានលទ្ធភាព ដូច្នេះពេលបានរៀននៅសាលាអន្តេវាសិក បានសាលាជួយគិតគូរតាំងពីកន្លែងស្នាក់នៅ ហូបចុក សម្លៀក បំពាក់ សៀវភៅ ប៊ិច ។ល។ បើរៀនពូកែនៅទាំងទទួលបានអាហារូបករណ៍ទៀតផង ម៉្លោះហើយខ្ញុំតែងព្យាយាមប្រឹងប្រែងសិក្សា។ ហេតុនោះ ពេលបានមកបង្រៀននៅសាលាដែលខ្លួនធ្លាប់រៀន ខ្ញុំរឹតតែស្រឡាញ់ និងយល់ច្បាស់ពីសិស្សខ្មែរ។ ខ្ញុំតែងចាត់ទុកកូនសិស្សដូចជាកូនបង្កើតរបស់ខ្លួនដែរ ក្រៅពីម៉ោងបង្ហាត់ក្នុងថ្នាក់ ខ្ញុំនៅទាំងណែនាំប្អូនៗឱ្យយល់ពីរបៀបរស់នៅសម្របសម្រួលនឹងមិត្តភក្តិ របៀបរស់នៅសមូហភាព រក្សាអនាម័យបរិស្ថាន រក្សាសន្តិសុខសណ្តាប់ធ្នាប់កន្លែងស្នាក់នៅ។ល។ ពេលដឹងថាសិស្សរូបណាជួបការលំបាក រៀនខ្សោយ ខ្ញុំតែងលើកទឹកចិត្ត ជួយបង្រៀនបន្ថែម ដើម្បីប្អូនៗមានគោលជំហររឹងមាំជម្នះលំបាក រៀនបានល្អឡើងវិញ”។

លោកគ្រូត្រឹងវ៉ាន់ជុង នាយកវិទ្យាល័យជនជាតិអន្តេវាសិកខេត្តបាកលីវ ឱ្យដឹង៖ “អ្នកគ្រូង៉ោធីលី ជាគ្រូបង្រៀនវ័យក្មេងមានមុខជំនាញរឹងបឹុង តែងខ្នះខ្នែងជួយដល់មិត្តរួមអាជីពអស់ពីចិត្តពីថ្លើម មានស្មារតីទទួលខុសត្រូវខ្ពស់ក្នុងការងារ។ អ្នកគ្រូតែងចូលរួមជួយបំប៉នសិស្សពូកែថ្នាក់ខេត្ត និងទទួលបានរង្វាន់ខ្ពស់ជាច្រើន បានមិត្តរួមអាជីពកោតសរសើរ និងបានសិស្សគោរពស្រឡាញ់។ ជាពិសេស អ្នកគ្រូលីក៏បានទៅសិក្សាបង្កើនមុខជំនាញ ដោយបញ្ចប់ថ្នាក់បរិញ្ញាបត្រជាន់ខ្ពស់ និងជាគ្រូបង្រៀនខ្មែរមួយរូប តែងសម្រេចឆ្នើមនូវភារកិច្ច បានគណៈកម្មាធិការប្រជាជនខេត្តបាកលីវជូនប័ណ្ណសរសើរ”៕

យ្វីអាញ-មុនី

ចែករំលែកអត្ថបទ

ពាក្យគន្លឹះ