សុខភាព - អប់រំ អប់រំ

18/07/2022 - 14:38

វត្តដៃទទឹងបង្រៀនអក្សរខ្មែរក្នុងរដូវវិស្សមកាល

ដល់រដូវវិស្សមកាលម្ដងៗ គឺវត្តដៃទទឹង ឃុំតឹបង៉ាយ ស្រុកទីវកឹង ខេត្តត្រាវិញ តែងបើកថ្នាក់បង្រៀនអក្សរខ្មែរដល់សិស្សានុសិស្ស។ សកម្មភាពនេះ ត្រូវបានភូមិភាគវាយតម្លៃខ្ពស់ ដ្បិតអីជាទង្វើនាំមកប្រយោជន៍ជាក់ស្ដែង។

ក្រៅពីរៀនអក្សរខ្មែរ ប្អូនៗទទួលបានការអប់រំពីវប្បធម៌ សុជីវធម៌សង្គមទៀតផង។

ព្រះតេជព្រះគុណ ថាច់ស៊ុង ព្រះចៅអធិការវត្តដៃទទឹង មានថេរដីកា៖ “រៀងរាល់ឆ្នាំ វត្តតែងបើកថ្នាក់បង្រៀនភាសាបាលី-ខ្មែរ មានសមណសិស្សនិងសិស្សជាង ២០ អង្គនិងរូប ព្រមទាំងបើកថ្នាក់បង្រៀនអក្សរខ្មែរក្នុងរដូវវិស្សមកាល ៥ ថ្នាក់ មានសិស្សជាង ១០០រូប។ ឆ្នាំនេះ វត្តឆាប់រៀបចំបើករៀន ព្រោះមានបំណងឱ្យប្អូនៗបានជិតដិតនឹងបរិស្ថានរៀនសូត្រក្នុងវត្តនិងមានពេលវេលាច្រើនសម្រាប់រំលឹកមេរៀនឡើងវិញ ដ្បិតអី ប្អូនៗអាក់ខានរៀនពីរឆ្នាំហើយ ដោយសារផលប៉ះពាល់នៃជំងឺ COVID - ១៩”។ ក្នុងថ្នាក់រៀន ក្រៅពីរៀនអក្សរខ្មែរ ប្អូនៗថែមទាំងបានអប់រំខាងសីលធម៌ សុជីវធម៌ វប្បធម៌ប្រពៃណី ស្មារតីគោរពច្បាប់។ល។ ញុាំងឱ្យប្អូនៗមានផ្នត់រស់នៅល្អពេលធំដឹងក្ដី។

ថ្នាក់រៀនអក្សរខ្មែររដូវវិស្សមកាលនៅវត្តដៃទទឹង។

ប្អូនយឿងធីមីភឿង សិស្សសាលាបឋមសិក្សាតឹបង៉ាយ C ឱ្យដឹង៖ “ឆ្លងតាមរយៈរៀនអក្សរខ្មែរក្នុងវត្ត និងការរៀនអក្សរខ្មែរនៅសាលារៀន ជួយឱ្យប្អូនចេះអាន ចេះសរសេរ។ ពួកប្អូនមករៀនរៀងរាល់ព្រឹក ក្រៅពីរៀនអក្សរខ្មែរ លោកគ្រូបានបង្រៀនចំណេះដឹងអំពីវប្បធម៌ សុជីវធម៌ក្នុងសង្គមទៀតផង។ ប្អូនចូលចិត្តរៀនអក្សរខ្មែរក្នុងវត្តណាស់ ម្ល៉ោះហើយ ក្រោយពីសាលាសាកលបូកសរុបឆ្នាំសិក្សារួច គឺប្អូនចុះឈ្មោះចូលរៀននៅវត្តភ្លាម”។

ពូថាច់អ៊ុករុង លេខាសាខាបក្សភូមិដៃទទឹង ឱ្យដឹង៖ “គ្រូបង្រៀនក្នុងសាលាវត្ត តែងកំណត់ច្បាស់ការបង្ហាត់បង្រៀនភាសានិងអក្សរសាស្រ្តដល់កូនចៅជនរួមជាតិខ្មែរគឺជាកត្តាសំខាន់។ ទន្ទឹមនឹងនោះ ការអប់រំស្មារតី សុជីវធម៌ ផ្នត់រស់នៅដល់ប្អូនៗក៏ចាំបាច់ណាស់ដែរ។ ក្រៅពីការអប់រំរបស់គ្រួសារ វត្តក៏តែងខ្នះខ្នែងរួមចំណែកបង្ហាត់បង្រៀន អប់រំដល់ប្អូនៗឱ្យស្គាល់គុណ ទោស ខុស ត្រូវ អាក្រក់ ល្អជាដើម”៕

សើុងម៉ាល័យ - ថាច់ធី

ចែករំលែកអត្ថបទ

ពាក្យគន្លឹះ