សុខភាព - អប់រំ សុខភាព

27/06/2022 - 16:35

បង្ការជំងឺគ្រុនឈាមក្នុងរដូវភ្លៀង

តាមប្រសាសន៍ វេជ្ជបណ្ឌិត ត្រឿងវ៉ាន់យុង នាយករងទទួលបន្ទុកនៃមជ្ឈមណ្ឌលត្រួតពិនិត្យជំងឺត្រាវិញ នៅរដូវភ្លៀង អាកាសធាតុមានកម្រិតសំណើមខ្ពស់ ងាយនឹងកើតមានជំងឺគ្រុនឈាមលើកុមារ ម្ល៉ោះហើយមជ្ឈមណ្ឌលបានបង្កើនកិច្ចសហការជាមួយគណៈ ផ្នែកគ្រប់លំដាប់ថ្នាក់រួមជាមួយប្រជាជនម្ចាស់ការបង្ការជំងឺគ្រុនឈាម។

បងស្រីថាច់ធីហ្វាង កំពុងណែនាំកូនលាងពាងទឹកដើម្បីកម្ចាត់ដង្កូវទឹក។

ឆ្លងតាមរយៈនោះ មជ្ឈមណ្ឌលអនុវត្តគោលលំនាំ មិនទុកឱ្យជំងឺឆ្លងរាលដាល ទើបប្រឆាំងនោះទេ ពោលគឺផ្នែកសុខាភិបាល មានផែនការបង្ការប្រឆាំងរាល់ប្រភេទជំងឺចាប់ពីដើមឆ្នាំមកម៉្លេះ ក្នុងនោះ ផ្តោតទៅលើជំងឺគ្រុនឈាម។ ម្យ៉ាងទៀត មន្ទីរសុខាភិបាល សហការជាមួយនឹងមន្ទីរព័ត៌មាននិងសារគមនាគមន៍ រាល់ស្ថាប័នព័ត៌មានមហាជននិងរដ្ឋអំណាចភូមិភាគគ្រប់លំដាប់ថ្នាក់ បង្កើនការផ្សព្វផ្សាយព័ត៌មានពីការបង្ការប្រឆាំងជំងឺគ្រុនឈាមដល់ប្រជាជនក្នុងសហគមន៍ ពិសេសគឺនៅតំបន់ដែលមានទឹកភ្លៀងដក់ ឬប្រជាជនតំបន់ជនបទដែលតែងតែត្រងទឹកភ្លៀងទុកប្រើប្រាស់ ប៉ុន្តែមិនបានចាប់អារម្មណ៍ពីដង្កូវទឹកកើតទៅជាមូសបណ្តាលឱ្យកើតជំងឺគ្រុនឈាម។ គណៈ ផ្នែកគ្រប់លំដាប់ថ្នាក់រួមជាមួយរដ្ឋអំណាចភូមិភាគផ្សព្វផ្សាយ ត្រួតពិនិត្យយ៉ាងហ្មត់ចត់ និងមានវិធានការដោះស្រាយដាច់ខាត ខណៈសំបុករោគកើតមានលើភូមិសាស្ត្រ។

បងស្រីថាច់ធីហ្វាង នៅឃុំហ្វាធ្វឹង ស្រុកចូវថាញ់ ឱ្យដឹង៖ “គ្រួសារខ្ញុំមានកូនតូច ម្ល៉ោះហើយរដូវភ្លៀងខ្ញុំតែងលាងជម្រះពាងទឹក ពិនិត្យមើល ប្រសិនបើឃើញមានដង្កូវទឹកគឺព្រលែងត្រីក្រឹម ឬគ្របគម្របដោយពាសកៅស៊ូដើម្បីកុំឱ្យកើតមូស។ ខ្ញុំក៏បានកម្មាភិបាលដំណាក់សុខាភិបាលចុះមកដល់ផ្ទះ ណែនាំពីរបៀបបង្ការ ប្រឆាំងជំងឺគ្រុនឈាមផងដែរ ហេតុនោះ ខ្ញុំដឹងវិធីបង្ការជំងឺក្នុងគ្រួសារ។ ខ្ញុំតែងក្រើនរំលឹកកូនចៅអនាម័យផ្ទះសម្បែង ដេកដាក់មុងសូម្បីពេលថ្ងៃ អូសរនាំងទ្វារបង្អួច បោសសម្អាតនិងពិនិត្យទ-ទឹក ព្រលែងត្រីទៅក្នុងពាងទឹក ផ្លាស់ទឹក ដុះលាងខាងក្នុងពាងយ៉ាងហោចណាស់ ១ដង/សប្តាហ៍ ចៀសវាងមូសខាំឆ្លងជំងឺគ្រោះថ្នាក់” ។

លោកស្រីគឹមធីបុប្ផា អនុប្រធានគណៈកម្មាធិការប្រជាជនឃុំហ្វាធ្វឹង ឱ្យដឹង៖ “ឃុំមានផែនការបើកយុទ្ធនាការកម្ចាត់ដង្កូវទឹកក្នុងរដូវភ្លៀង និងចលនាគណៈ ផ្នែកអង្គការមហាជននានា ក្នុងនោះ ដំណាក់សុខាភិបាលធ្វើជាកម្លាំងស្នូលចុះទៅដល់គ្រួសារនីមួយៗ ជូនខិត្តប័ណ្ណផ្សព្វផ្សាយដោយប្តេជ្ញាចិត្ត “គ្មានដង្កូវទឹក គ្មានជំងឺគ្រុនឈាម”។ ជាពិសេស អំពាវនាវដល់ប្រជាជន ខណៈពេលប្រើប្រាស់ឧបករណ៍ តម្កល់ទឹកភ្លៀង គប្បីគ្របឱ្យជិតដើម្បីកុំឱ្យមូសញាស់ពងកើតដង្កូវទឹក ហើយគប្បីប្រមែប្រមូលនូវសំណល់ប្រើប្រាស់ខាងក្រៅដែលមិនចាំបាច់ មានដក់ទឹកភ្លៀង ទម្លាប់ឱ្យប្រជាជនមានស្មារតីភ្ញាក់រលឹកខ្ពស់ពីការបង្ការប្រឆាំងជំងឺគ្រុនឈាមដល់កូនចៅយើង ពិសេសគឺក្នុងរដូវភ្លៀង”៕

សឺនម៉ាល័យ -លីសៀ

ចែករំលែកអត្ថបទ

ពាក្យគន្លឹះ