សុខភាព - អប់រំ អប់រំ

21/03/2022 - 14:20

ពិពិធកម្មមុខរបរបណ្តុះបណ្តាល

សាលាមធ្យមសិក្សាវិជ្ជាជីវៈជនជាតិអន្តេវាសិកអាងយ៉ាង ស្ថិតនៅភូមិតូហា ឃុំណូយតូ ស្រុកទ្រីតូង បានបង្កើតឡើងកាលពីឆ្នាំ ២០០៩ ផ្អែកលើមូលដ្ឋានបង្កើនកម្រិតពីមជ្ឈមណ្ឌលបណ្ដុះបណ្ដាលវិជ្ជាជីវៈស្រុកទ្រីតូង និងជម្រើសសិស្សចូលរៀនជាផ្លូវការវគ្គដំបូងនៅខែមីនា ឆ្នាំ២០១១។ នេះជាសាលាមធ្យមសិក្សាវិជ្ជាជីវៈជនជាតិអន្តេវាសិកដំបូងនៅតំបន់វាលរាបទន្លេគឺវឡុង។ ភារកិច្ចរបស់សាលា គឺបណ្តុះបណ្តាលវិជ្ជាជីវៈជូនជនរួមជាតិភាគតិចក្នុងខេត្តអាងយ៉ាង ពិសេសគឺជនរួមជាតិខ្មែរនៅស្រុកទ្រីតូងនិងទិញបៀង។

សិស្សអនុវត្តជាក់ស្ដែងនៅនឹងសាលា។

សាលាត្រូវបានកសាងតាមបែបស្ថាបត្យកម្មទំនើប មានគ្រប់បន្ទប់មុខងារ ផ្នែករដ្ឋបាល បន្ទប់រៀនទ្រឹស្តី សាលប្រជុំ បន្ទប់អនុវត្ត និងអន្តេវាសិកដ្ឋាន។ល។ ក្រៅពីនេះ សាលាថែមទាំងមានបរិវេណធំទូលាយ ស្រឡះស្រឡំ បង្កលក្ខណសម្បត្តិសម្រាប់សិស្សរៀនសូត្រ កម្សាន្តសប្បាយ ហាត់ប្រាណ លេងកីឡា-អប់រំកាយ។ល។

បច្ចុប្បន្ន សាលាមាន ៣ ផ្នែកមុខជំនាញ៖ បច្ចេកវិទ្យាព័ត៌មាន អគ្គិសនីយន្តកម្ម-កសិកម្ម អប់រំ ប្រចាំ - មុខវិញ្ញាសាទូទៅ និងមាន ៣ បន្ទប់មុខងារ៖ បន្ទប់បណ្តុះបណ្តាល បន្ទប់ចម្រុះ-ហិរញ្ញវត្ថុ-បរិក្ខារ បន្ទប់កិច្ចការសិស្ស - ទំនាក់ទំនងអាជីវកម្ម។ សុទ្ធសឹងតែសម្រេចបទដ្ឋានអំពីមុខជំនាញនិងវិជ្ជាជីវៈ។ ម្យ៉ាងទៀត សាលាអនុវត្តកម្មវិធីបណ្តុះបណ្តាល ២ ទន្ទឹមគ្នា គឺមធ្យមសិក្សាវិជ្ជាជីវៈនិងអប់រំប្រចាំ។ ចំពោះកិច្ចការបង្រៀនវិជ្ជាជីវៈ សាលាបណ្តុះបណ្តាលមុខរបរកម្រិតមធ្យមសិក្សាចំនួន ១៥ មុខរបរកម្រិតបឋមចំនួន ២ និងមុខរបរសម្រាប់ពលករជនបទចំនួន ២០។

នាយកសាលាមធ្យមសិក្សាវិជ្ជាជីវៈជនជាតិអន្តេវាសិកអាងយ៉ាង លោកកាវវ៉ាន់ធឹត ឱ្យដឹង៖ “រាល់កម្មវិធីបណ្តុះបណ្តាលត្រូវបានកសាង តាមទិសដៅបត់បែន សមស្របទៅនឹងសំណូមពររបស់អាជីវកម្មដែលតម្រូវការពលករ។ សាលាបានធានាសិស្សទាំង ១០០% ក្រោយពីបញ្ចប់ការសិក្សាសុទ្ធសឹងមានការងារធ្វើ។ ពិសេស ដើម្បីលើកកម្ពស់គុណភាពបណ្តុះបណ្តាលវិជ្ជាជីវៈ អង្គភាពបានអនុវត្តនូវសកម្មភាពចងសម្ព័ន្ធជាមួយអាជីវកម្ម និងមហាវិទ្យាល័យ អនុមហាវិទ្យាល័យនានានៅក្នុងនិងក្រៅខេត្តផងដែរ។ អង្គភាពនីមួយៗបានចូលរួមជាមួយសាលារៀន កសាងកម្មវិធីបណ្តុះបណ្តាល បង្ហាត់បង្រៀន អនុវត្តជាក់ស្ដែងមុខរបរជូនសិស្ស។ ក្រៅពីនេះ នៅទាំងសហការប្រើប្រាស់គ្រឿងបរិក្ខាររបស់សាលារៀននិងអាជីវកម្មទៀតផង។ អាស្រ័យហេតុនោះ ប្អូនៗក្រោយពីចេញសាលាគ្មានការអល់អែក អាចនឹងធ្វើម្ចាស់លើគ្រឿងបរិក្ខាររបស់អាជីវកម្ម ដោយមិនចាំបាច់បណ្តុះបណ្តាលឡើងវិញ។ សាលានៅទាំងសហការនឹងអនុមហាវិទ្យាល័យ មហាវិទ្យាល័យនានា បណ្តុះបណ្តាលបន្តកម្មវិធីអនុមហាវិទ្យាល័យ និងមហាវិទ្យាល័យ (ប្រព័ន្ធពីចម្ងាយ រៀនបណ្តើរ ធ្វើការបណ្តើរ) និងក្រោយមហាវិទ្យាល័យ។ ឆ្លងតាមរយៈនោះ ជួយសិស្សកាត់បន្ថយពេលវេលារៀនសូត្រ តែចំណេះដឹងមិនចាញ់សិស្សដែលរៀនប្រព័ន្ធរៀបរយឡើយ។ ជាពិសេស ចាប់ពីឆ្នាំ ២០២០ សាលារៀនបានសហការនឹងអាជីវកម្មមួយចំនួន ផ្សព្វផ្សាយកម្មវិធីបណ្តុះបណ្តាលប្រភពធនធានមនុស្សសម្រាប់ទៅពលកម្មនៅក្រៅប្រទេស”៕

យោង៖ កាសែតអាងយ៉ាង-ប្រែសម្រួល៖ លីសៀ

ចែករំលែកអត្ថបទ

ពាក្យគន្លឹះ