សន្តិសុខ - ការពារប្រទេស សន្តិសុខ

06/12/2021 - 08:24

បន្លំប្តូរប័ណ្ណកម្មសិទ្ធិដីធ្លីក្លែងក្លាយយកប័ណ្ណពិត ដើម្បីបោកប្រាស់ជួញដូរដី

មុខសញ្ញាលឺវហ្វាងហាយ។ រូបថត៖CTV

ការិយាល័យនគរបាលព្រហ្មទណ្ឌ នគរបាលក្រុងកឹងធើ ទើបសហការជាមួយនឹងនាយកដ្ឋាននគរបាលព្រហ្មទណ្ឌ ក្រសួងនគរបាល ប្រយុទ្ធ បង្ក្រាបករណីពិសេស ពីបទបោកប្រាស់កិបកេងទ្រព្យសម្បត្តិ ដែលកើតមានលើភូមិសាស្រ្តក្រុងកឹងធើនិងខេត្តនានាតំបន់តីណាមបូ។

យោងតាមនោះ កងកម្លាំងបានចាប់ ឃាត់ខ្លួនមុខសញ្ញា ៥ នាក់។ ដែលជាក្រុមឧក្រិដ្ឋជនមានអង្គការសកម្មភាពចល័តពីក្រុងហូជីមិញមកដល់ខេត្តនានាតំបន់តីណាមបូ អាស្រ័យលឺវហ្វាងហាយ (កើតឆ្នាំ ១៩៧២ នៅខណ្ឌ ៦ ក្រុងហូជីមិញ) ជាមេឃ្លោង។

ក្នុងឆ្នាំ ២០២០ លើភូមិសាស្រ្តក្រុងកឹងធើ និងខេត្តនានាតំបន់តីណាមបូ មានមុខសញ្ញាមួយក្រុមដើរស្វែងរកលេខទូរស័ព្ទអ្នកត្រូវការលក់ដី លក់ផ្ទះ (តាមរយៈអន្តរការី ឬការប្រកាសលក់លើប្រព័ន្ធអីុនធឺណេត និងលេខទូរស័ព្ទដែលបោះដោតលើដី។ល។) ដើម្បីសុំយកប័ណ្ណកម្មសិទ្ធិដីធ្លីទៅថតចម្លង។ បន្ទាប់មកមុខសញ្ញា ក៏យកទៅធ្វើប័ណ្ណកម្មសិទ្ធិដីធ្លីក្លែងក្លាយ។ ល្បិចកលរបស់ពួកវាគឺប្រើឈ្មោះក្លែងក្លាយ ប្រើប្រាស់លេខទូរស័ព្ទមិនចុះឈ្មោះទាក់ទងម្ចាស់ដី ដើម្បីទៅមើលទីតាំងក្បាលដី ផ្ទះនិងប័ណ្ណកម្មសិទ្ធិដីធ្លីច្បាប់ដើមរួចបោះប្រាក់កក់។ ឆ្លៀតពេលម្ចាស់ដីធ្វេសប្រហែស ពួកវាបន្លំប្តូរយកប័ណ្ណកម្មសិទ្ធិដីធ្លីពិត ហើយជួលមនុស្សបន្លំ ធ្វើជាម្ចាស់ដី (ធ្វើក្លែងក្លាយក្រដាសស្នាម អត្តសញ្ញាណប័ណ្ណ បញ្ជីគ្រួសារនិងលិខិតចុះឈ្មោះអាពាហ៍ពិពាហ៍របស់ម្ចាស់ដី) ដើម្បីផ្ទេរសិទ្ធិលក់ឱ្យអ្នកផ្សេងដោយតម្លៃថោកជាងទីផ្សារ។ បន្ទាប់ពីអនុវត្តការដោះដូរសម្រេច ពួកវាក៏បិទទូរស័ព្ទ។

ព្រោះជាប័ណ្ណកម្មសិទ្ធិដីធ្លីពិត ទើបការិយាល័យសារការី ការិយាល័យធនធាននិងបរិស្ថានមិនអាចដឹងទង្វើបោកប្រាស់។ ពេលម្ចាស់ដី ពិតប្រាកដដឹង គឺកិច្ចសន្យាលក់ បញ្ចាំ ដាក់ បញ្ចាំតម្កល់ទ្រព្យធានា បានឆ្លងកាត់មនុស្សជាច្រើន។ ចំពោះស្ថានភាពនេះ នៅខែមេសា ឆ្នាំ ២០២១ នាយកនគរបាលក្រុងកឹងធើ បានចង្អុលការដល់ការិយាល័យនគរបាលព្រហ្មទណ្ឌ បង្កើតករណីពិសេសដែលមានលេខសម្ងាត់ ៤២១/L ដើម្បីប្រមូលផ្តុំកងកម្លាំងបោសសម្អាត។

បន្ទាប់ពីសួរចម្លើយ មុខសញ្ញាបានសារភាពដោយសារធ្លាប់ធ្វើអន្តរការីអចនាទ្រព្យនៅក្រុងហូជីមិញ ទើបស្គាល់គ្នានៅតាមហាងកាហ្វេ ហើយពិភាក្សា ព្រមព្រៀងគ្នាប្រព្រឹត្តបទល្មើសដូចពោលខាងលើ។ ជាមួយល្បិចកលបោកប្រាស់នេះ ក្រុមរបស់ហាយបានប្រព្រឹត្តបទល្មើស ៤ករណី ដោយបន្លំប្តូរយកប័ណ្ណកម្មសិទ្ធិដីធ្លីចំនួន ៦ ប័ណ្ណនៅខណ្ឌនិញកេវនិងកៃរុាំង ក្រុងកឹងធើ។ ប័ណ្ណកម្មសិទ្ធិដីធ្លីទាំង ៦ នេះ គិតជាទឹកប្រាក់ប្រមាណ ៨០ ពាន់លានដុង។ ក្រុមនេះ អនុវត្តការដោះដូរបាន ៤ ប័ណ្ណ កិបកេងទ្រព្យសម្បត្តិជាង ១៥ ពាន់លានដុង។ ក្រៅពីនោះ មុខសញ្ញាទាំងនេះនៅទាំងសារភាពថា បានធ្វើប័ណ្ណកម្មសិទ្ធិដីធ្លីក្លែងក្លាយនៅខេត្តឡុងអាន បេនត្រែ ដុងថាប និងសុកត្រាំង ក្នុងគោលបំណងបោកប្រាស់កិបកេងទ្រព្យសម្បត្តិ។

រឿងក្តីកំពុងបានការិយាល័យនគរបាលព្រហ្មទណ្ឌ នគរបាលក្រុងកឹងធើ បន្តការកសាងសំណុំរឿង និងស្វែងរកភស្តុតាងដើម្បីតាមចាប់ខ្លួនមុខសញ្ញាដែលពាក់ព័ន្ធ។ ជនរងគ្រោះរបស់មុខសញ្ញាទាំងនេះ សូមទាក់ទងការិយាល័យនគរបាលព្រហ្មទណ្ឌក្រុងកឹងធើ ជួបអ្នកសើុបអង្កេត ង្វៀងង៉ុកត្រេវ តាមរយៈលេខទូរស័ព្ទ ០៩៣៧៦២៧៩៩៧៕

ឡាងហឿង-មុនី

ចែករំលែកអត្ថបទ

ពាក្យគន្លឹះ