សន្តិសុខ - ការពារប្រទេស ការពារប្រទេស

04/10/2021 - 07:20

យោធភូមិភាគ ៩ ចេញទ័ពទៅជួយទីក្រុងហូជីមិញបង្ការ ប្រឆាំងជំងឺ COVID-១៩

(កឹងធើ)៖ បញ្ជាការដ្ឋានយោធភូមិភាគ ៩ ទើបរៀបចំពិធីចេញទ័ពជួយទីក្រុងហូជីមិញ យកសំណាកធ្វើតេស្តរកមេរោគ SARS-CoV-២ ក្នុងការបង្ការ ប្រឆាំងជំងឺ COVID-១៩ ។

ឧត្តមសេនីយ៍ទោ ង្វៀងស្វឹងយ៉ាក់ មេបញ្ជាការយោធាយោធភូមិភាគ ៩ និងបណ្ដាសមមិត្តថ្នាក់ដឹកនាំបញ្ជាការដ្ឋានយោធាយោធភូមិភាគ ៩ បានលើកទឹកចិត្តកងកម្លាំង ត្រៀមលក្ខណៈចេញទៅបំពេញភារកិច្ចនៅទីក្រុងហូជីមិញ។

ថ្លែងការណ៍ក្នុងពិធីនេះ ឧត្តមសេនីយ៍ទោ ង្វៀងស្វឹងយ៉ាក់ បានសង្កត់ធ្ងន់៖ ការចេញទ័ពលើកនេះ គឺជាការងារមានអត្ថន័យយ៉ាងជ្រាលជ្រៅ សម្ដែងបង្ហាញពីស្មារតីសាមគ្គី និងការស្រឡាញ់រាប់អានគ្នាទៅវិញទៅមករបស់ប្រជាជាតិ។ នេះគឺជាកិច្ចការសែនលំបាកនិងគ្រោះថ្នាក់ជាទីបំផុត ពីព្រោះការបង្ការ ប្រឆាំងជំងឺរាតត្បាត COVID-១៩ គឺជាសមរភូមិថ្មី សង្គ្រាមថ្មី ឧត្តមសេនីយ៍ទោ ង្វៀងស្វឹងយ៉ាក់ បានសំណូមពរ កម្មាភិបាល យុទ្ធជន វេជ្ជបណ្ឌិត និងគ្រូពេទ្យគ្រប់រូប ត្រូវកំណត់ច្បាស់ពីទង្វើនិងភារកិច្ចរបស់ខ្លួន សកម្មចូលរួម អនុវត្តល្អ បណ្តាភារកិច្ច តាមតម្រូវការរបស់អង្គភាពមិត្ត។ រួមកម្លាំង ចែករំលែកនូវការលំបាក វេទនា យកអស់ពីកម្លាំងកាយចិត្តបម្រើប្រជាជន។ កងកម្លាំងដែលបំពេញភារកិច្ចនៅទីក្រុងហូជីមិញ ត្រូវគោរពយ៉ាងតឹងរ៉ឹងនូវវិន័យកងទ័ព និងសេចក្តីកំណត់ស្តីពីការបង្ការ ប្រឆាំងជំងឺ COVID -១៩ ។ ពង្រឹងចំណងសាមគ្គីភាពរវាងកងទ័ព និងប្រជាជន រក្សាម៉ឺងម៉ាត់នូវវិន័យប្រជាចលនានិងជួយគ្នាទៅវិញទៅមក ដើម្បីសម្រេចភារកិច្ចបានល្អ។

ក្រោយពីពិធីចេញទ័ព មានកម្មាភិបាល យុទ្ធជន វេជ្ជបណ្ឌិត គ្រូពេទ្យចំនួន ១.០០០ រូប មកពីនាយកដ្ឋានភស្តុភារ សាលាយោធាយោធភូមិភាគ ៩ កងពលថ្មើរជើងលេខ ៣៣០ កងពលតូចកាំភ្លើងធំកងទ័ពជើងអាកាសលេខ ២២៦ និងកងពលតូច ព័ត៌មានលេខ ២៩ បានចេញទៅបំពេញភារកិច្ចនៅទីក្រុងហូជីមិញ។

ចាប់ពីខែសីហា ឆ្នាំ ២០២១ រហូតមកដល់ពេលនេះ បញ្ជាការដ្ឋានយោធាយោធភូមិភាគ ៩ បានរៀបចំចេញទ័ពចំនួន ២ លើក គឺជំនួយកម្លាំង មធ្យោបាយបង្ការ ប្រឆាំងជំងឺ COVID-១៩ និងស្បៀងអាហារដល់ទីក្រុងហូជីមិញមួយលើក និងចេញកម្លាំងទៅជួយខេត្តគៀងយ៉ាងបង្ការ ប្រឆាំងជំងឺ COVID-១៩ មួយលើក។

អត្ថបទ & រូប: ផាមទ្រុង- ប្រែសម្រួល៖ វ៉ាន់តឹន

ចែករំលែកអត្ថបទ

ពាក្យគន្លឹះ