មហាសាមគ្គីជនជាតិ គំរូក្នុងសហគមន៍

14/09/2020 - 09:27

ខ្នះខ្នែងជួយប្រជាជនចាកផុតពីភាពក្រីក្រ

ភូមិចាញ់ទ្រី ឃុំតឹបសើុង ស្រុកថ្កូវ ខេត្តត្រាវិញ បាននិងកំពុងអនុវត្តមានប្រសិទ្ធភាពការបង្វែររចនាសម្ព័ន្ធសេដ្ឋកិច្ច ហេតុនោះ គ្រួសារក្រីក្រក្នុងភូមិថយចុះគួរឱ្យកត់សម្គាល់។ លទ្ធផលទាំងនេះ ក៏មានការរួមចំណែកមិនតិចរបស់លោកប្រធានភូមិគឹមថាយ។

លោកគឹមថាយ (អង្គុយកណ្តាល) ប្រធានភូមិចាញ់ទ្រី ។

លោកគឹមថាយ កើតនិងធំដឹងក្តីនៅភូមិចាញ់ទ្រី ឃុំតឹបសើុង ស្រុកថ្កូវ។ ឆ្នាំ ១៩៩៣ លោកបានចូលរួមបម្រើការងារក្នុងភូមិ ក្នុងតួនាទីជាអនុប្រធានសាខាសមាគមកសិករ។ ជាអ្នកមានអត្តចរិតស្លូតបូត រស់នៅជិតដិតនឹងមាមីងភូមិផងរបងជាមួយ ឆ្នាំ ២០១៣ លោកក៏បានប្រជាជនទំនុកចិត្តបោះឆ្នោតធ្វើជាប្រធានភូមិរហូតមកទល់សព្វថ្ងៃ។

លោកគឹមថាយ (ខាងស្តាំ) ចុះមកពិនិត្យគ្រួសារកសិករទើបចាកផុតពីភាពក្រីក្រ។

ចាញ់ទ្រីជាភូមិក្រីក្រលំបាក មានជនរួមជាតិខ្មែរដល់ទៅ ៨២,២% ។ ឆ្នាំ ២០១៩ ភូមិចាញ់ទ្រីនៅមានគ្រួសារក្រីក្រ ៦ គ្រួសារ និងគ្រួសារប្រកៀកបន្ទាត់ក្រ ២១ គ្រួសារប៉ុណ្ណោះ។ ខ្វល់ខ្វាយពីជីវភាពក្រីក្ររបស់ប្រជាជន លោកគឹមថាយ តែងខ្នះខ្នែងឧបត្ថម្ភប្រជាជនអភិវឌ្ឍសេដ្ឋកិច្ចគ្រួសារ ដូច៖ ជួយប្រជាជនបុលដើមទុន ចលនាប្រជាជនបរិច្ចាគដីធ្វើផ្លូវ ចំណាយកម្លាំងពលកម្មដើម្បីធ្វើផ្លូវ ជីកស្តារប្រឡាយ និងស្នើឡើងថ្នាក់លើសង់ផ្ទះមេត្តាធម៌ជូនគ្រួសារក្រលំបាក។ ពិសេស គាត់បានចលនាប្រជាជនបរិចា្ចគដី រួមវិភាគទានដីដើម្បីជីកស្តារប្រឡាយប្រវែង ១៤.០០០ ម៉ែត្រ ដើម្បីបម្រើការបង្កបង្កើនផល។ លោកគឹមថាយ ឱ្យដឹង៖ “មាមីងនៅទីនេះភាគច្រើនគ្មានដីបង្កបង្កើនផល មុខរបរមិនទៀងទាត់។ ហេតុនោះ យើងត្រូវតែផ្សព្វផ្សាយ ចលនាមាមីងងាកមកដាំដំណាំ គួបផ្សំនឹងការចិញ្ចឹមសត្វ។ បន្ទាប់មកបង្កលក្ខណសម្បត្តិដើម្បីមាមីងមានការងារធ្វើលំនឹង ទើបអាចចាកផុតពីភាពក្រីក្របាន”។ បងគឹមចួ នៅភូមិចាញទ្រី ឱ្យដឹង៖ “ពេលប្រជាជនត្រូវការ ពូថាយ តែងគិតគូរជួយដោះស្រាយជានិច្ច។ ម្យ៉ាងទៀត គ្រួសារខ្ញុំក៏បានគាត់ជួយឧទ្ទេសនាមបុលទុនពីធនាគារគោលនយោបាយសង្គម ២៥ លានដុង ដើម្បីធ្វើដើមទុនរកស៊ីផងដែរ។ មកទល់ពេលនេះ ខ្ញុំសងបំណុលធនាគាររួចស្រឡះ ហើយបានចាកផុតពីភាពក្រីក្រ”។

លោកថាច់ង៉ុករិន្ទ កម្មាភិបាលផ្នែកវប្បធម៌សង្គម ឃុំតឹបសើុង ឱ្យដឹង៖ “លោកគឹមថាយ ជាកម្មាភិបាលខ្មែរគំរូមួយរូប ទទួលបន្ទុកភូមិចាញ់ទ្រី តែងខ្នះខ្នែងក្នុងកិច្ចការគ្រួសារនិងសង្គម បានប្រជាជនក្នុងភូមិទំនុកចិត្ត គោរពរាប់អាន”៕

ស៊ឺនម៉ាល័យ-លីសៀ

ចែករំលែកអត្ថបទ

ពាក្យគន្លឹះ