សុខភាព - អប់រំ អប់រំ

03/08/2020 - 16:48

វិនិយោគអប់រំតំបន់ជនជាតិ

លោកដុងវ៉ាន់ថាញ អនុប្រធានប្រចាំការនៃគណៈកម្មាធិការបក្សខេត្តហូវយ៉ាង ឱ្យដឹង៖ “សាលារៀននៅតំបន់មានជនរួមជាតិភាគតិចរស់នៅកុះកររបស់ស្រុកទាំង២ គឺស្រុកវីធ្វី និងចូវថាញ់A ត្រូវបានខេត្តវិនិយោគកសាងជាបន្តបន្ទាប់ ដើម្បីឆ្លើយតបតម្រូវការរៀនសូត្ររបស់សិស្ស”។

ដំណាក់កាលទី១នៃសាលាមធ្យមសិក្សាមូលដ្ឋានវីប៊ិញ ត្រូវបានដាក់ឱ្យប្រើប្រាស់។

តាមប្រសាសន៍លោកផាមថាញហាយ ប្រធានការិយាល័យអប់រំនិងបណ្តុះបណ្តាលស្រុកវីធ្វី ទូទាំងស្រុកមានសាលារៀនចំនួន ៤៩ ចាប់ពីមតេ្តយ្យរហូតដល់មធ្យមសិក្សាចំណេះទូទៅ។ ក្នុងនោះ មត្តេយ្យមាន ១១ សាលា បឋមសិក្សា២៧សាលាមធ្យមសិក្សាមូលដ្ឋាន ៨ សាលា និងមធ្យមសិក្សាចំណេះទូទៅ៣សាលា។ ក្រោយពីបញ្ចប់ឆ្នាំសិក្សា ផ្នែកអប់រំស្រុកបានសំណូមពរដល់សាលានីមួយៗ ធ្វើស្ថិតិមូលដ្ឋាន សម្ភារៈបន្ទប់រៀន មានដូច៖ តុ កៅអី របង ទីធ្លា បន្ទប់រៀន បន្ទប់មុខងារ ឬក៏ម៉ាស៊ីនកុំព្យូទ័រ។ល។ និងឡើងផែនការជួសជុលឬក៏ទិញថ្មី ដើម្បីផ្នែកអប់រំកសាងផែនការរួម ធ្វើយ៉ាងណាកុំឱ្យមានភាពរអាក់រអួលពេលឈានចូលឆ្នាំសិក្សាថ្មី។ ទន្ទឹមនឹងនោះ ស្រុកនឹងមានផែនការបណ្តុះបណ្តាល បំប៉នដល់កងជួរគ្រូបង្រៀននិងកម្មាភិបាលគ្រប់គ្រង អប់រំ ផ្សារភ្ជាប់នឹងតម្រូវការបណ្តុះបណ្តាលធនធានមនុស្សរបស់ផ្នែកអប់រំ ឆ្លើយតបនឹងតម្រូវការកែប្រែថ្មី។ តាមការគ្រោងទុកឆ្នាំសិក្សាថ្មី ផ្នែកអប់រំស្រុកវីធ្វី ទទួលកុមារនិងសិស្សានុសិស្សចូលរៀន ប្រមាណ ១៦ ពាន់នាក់។ លោកផាមថាញហាយ ឱ្យដឹង៖ “មុនពេលបញ្ចប់ឆ្នាំសិក្សា ២០១៩-២០២០ នេះ ផ្នែកអប់រំបានដាក់ឱ្យប្រើប្រាស់សាលាមធ្យមសិក្សាមូលដ្ឋានវីប៊ិញ ដែលទើបនឹងកសាងថ្មី។ មកទល់ពេលនេះ សាលារៀនតំបន់ជនជាតិនៅឃុំវីប៊ិញ វីធ្វី ។ល។ ត្រូវបានកសាងថ្មី”។

នៅឃុំតឹងហ្វា ស្រុកចូវថាញ់A កម្មករសំណង់ក៏កំពុងស្រូតបង្ហើយខ្លោងទ្វារនិងយានដ្ឋានរបស់សាលាមធ្យមសិក្សាមូលដ្ឋានតឹងហ្វា។ នេះ គឺជាសាលារៀនត្រូវបានកសាងថ្មី គិតជាថវិការាប់សិបពាន់លានដុង។ លោកង្វៀនថាញលីម អនុប្រធានការិយាល័យអប់រំនិងបណ្តុះបណ្តាលស្រុកចូវថាញ់A ឱ្យដឹង៖ “មុននេះ សិស្សមធ្យមសិក្សាមូលដ្ឋាននៅឃុំតឹងហ្វា ត្រូវទៅរៀនដល់ទីប្រជុំជនបៃង៉ាង។ អាស្រ័យហេតុនោះ ផ្នែកអប់រំស្រុកបានធ្វើសេនាធិការស្នើថ្នាក់លើជំរុញល្បឿនកសាងសាលារៀន ដើម្បីឆ្លើយតបតម្រូវការរៀនសូត្ររបស់សិស្សសាលាតឹងហ្វា។ ដូច្នេះ សាលាមធ្យមសិក្សាមូលដ្ឋានតឹងហ្វាត្រូវបានកសាងថ្មី តាមបទដ្ឋានជាតិ នឹងដាក់ឱ្យប្រើប្រាស់នៅដើមឆ្នាំសិក្សា ២០២០ -២០២១ ”៕

ហាថាញ់-លីសៀ

ចែករំលែកអត្ថបទ

ពាក្យគន្លឹះ