មហាសាមគ្គីជនជាតិ គំរូក្នុងសហគមន៍

13/07/2020 - 15:52

អស់ពីចិត្តនឹងចម្រៀងចាប៉ី

លោកលីហ្វាងង៉ឹង អនុប្រធានការិយាល័យវប្បធម៌ កីឡានិងទេសចរណ៍ ស្រុកត្រឹងដេ ខេត្តសុកត្រាំង ឱ្យដឹង៖ “ក្នុងស្រុកត្រឹងដេ សព្វថ្ងៃ នៅតែលោកតាលីសេមម្នាក់ប៉ុណ្ណោះ នៅភូមិយ៉ុងចាក (ព្រែកចាក) ឃុំលីវទូ ដែលចេះចម្រៀងចាប៉ីដងវែង ជាកេរដំណែលវប្បធម៌អរូបីថ្នាក់ជាតិ។ ថ្វីត្បិតមានវ័យ៨៧ឆ្នាំក្ដី ប៉ុន្តែ សំនៀងរបស់លោកតានៅច្បាស់ និងដេញចាប៉ីពីរោះណាស់។ នៅមហោស្រពចម្រៀងប្រជាប្រិយវៀតណាម ថ្នាក់តំបន់ និងទូទាំងប្រទេស ឆ្នាំ ២០១៣ លោកតាលីសេម ទទួលបានរង្វាន់ឆ្នើមជាមួយនឹងលំនាំបទ “ច្រៀងបំពេ” ក្នុងវ័យ៨០ឆ្នាំ។ រហូតមកទល់សព្វថ្ងៃ លោកតាលីសេម នៅតែបន្តសម្រេចបានស្នាដៃជាច្រើនក្នុងពិធីប្រឡងសមោសរសិល្បៈថ្នាក់ខេត្តនិងថ្នាក់តំបន់”។

សិល្បករលីសេម ច្រៀងចាប៉ីដងវែងនៅមហោស្រពចម្រៀងប្រជាប្រិយខ្មែរតំបន់វាលរាប

ទន្លេគឺវឡុងលើកទី ១ - ២០១៨ នៅខេត្តសុកត្រាំង។

សិប្បករលីសេម (ឈរទី២រាប់ពីឆ្វេង) ទទួលរង្វាន់លើកទឹកចិត្តនៅមហោស្រពចម្រៀងប្រជាប្រិយខ្មែរតំបន់វាលរាបទន្លេគឺវឡុងលើកទី១ - ២០១៨ នៅខេត្តសុកត្រាំង។

រាល់ថ្ងៃនៅពេលរសៀល លោកតាលីសេម ក៏ចាប់ចាប៉ីអង្គុយក្រោមម្លប់ពោធិ៍ ច្រៀងរៀបរាប់ពីភាពរីកចម្រើននៃភូមិស្រុក។ សម្លឹងទៅចាប៉ី សិល្បករ លីសេម ឱ្យដឹង៖ “ខ្ញុំជាអ្នកជំនាន់ទី ៣ ក្នុងវង្សត្រកូល បានថែរក្សាចាប៉ីដងវែងនេះ។ ចាប៉ីធ្វើពីឈើប្រណីត ម្ល៉ោះហើយដេញឮសម្លេងយ៉ាងពីរោះ ពេលចាប់ចាប៉ីឡើងសម្លឹងទេសភាពជុំវិញ ទិដ្ឋភាពស្រស់ស្អាតនៃជនបទ ទិដ្ឋភាពកុមារស្ពាយសំពៀតទៅកាន់សាលាជាដើម ខ្ញុំក៏ច្រៀងតែម្ដង។ ច្រៀងរួច អារម្មណ៍ខ្ញុំរីករាយ ការហត់នឿយទាំងអំបាលម៉ាន ហាក់ដូចបានរសាយអស់។ រយៈពេលប៉ុន្មានឆ្នាំមកនេះ ចាប៉ីដងវែងប្រៀបបានដូចជាមុខថ្នាំបំប៉នស្មារតី ជាមិត្តនាំមកនូវភាពរីករាយ សុភមង្គលនៅវ័យចំណាស់ ជួយឱ្យខ្ញុំរស់នៅមាំមួនដល់សព្វថ្ងៃ”។

តាមប្រសាសន៍សិល្បករលីសេម គាត់បានរៀនចម្រៀងចាប៉ីពីលោកឪពុករបស់គាត់ និងបានរៀនឧបករណ៍ភ្លេងប្រពៃណី ភ្លេងពិណពាទ្យតាំងពីអាយុ ១៦ ឆ្នាំ។ ហេតុតែជាអ្នកចូលចិត្តភ្លេង ម្ល៉ោះហើយពេលបានឪពុកបង្ហាត់ គាត់ក៏ក្លាយជាយុវជនលេងភ្លេងដ៏ចំណានម្នាក់នៅភូមិយ៉ុងចាក។ ផុតពីឪពុក គាត់ក៏ស្នងបន្តកេរឪពុក ថែរក្សាចម្រៀងចាប៉ីដងវែងរហូតដល់សព្វថ្ងៃ។ លោកតាលីសេម ចែករំលែក៖ “ការលំបាកនៃការច្រៀងចាប៉ី គឺច្រៀងមុន ដេញចាប៉ីតាមក្រោយ និងផ្ទុយមកវិញ ជាពិសេស អ្នកច្រៀងប្រើកំណាព្យកាព្យឃ្លោងដោយឥតព្រាងទុក គឺច្រៀងតាមខ្លឹមសារនៃការចំណាប់អារម្មណ៍។ អ្នកច្រៀងប្រើសំនួនវោហារសមស្របទៅនឹងអត្ថន័យ ម្ល៉ោះហើយអ្នកច្រៀងចាំបាច់ត្រូវចេះអក្សរ យល់ដឹងពីសង្គមឱ្យបានទូលំទូលាយ។ល។ ផ្ដើមពីភាពលំបាកដូច្នោះ មានយុវជនខ្មែរជាច្រើនមិនសូវយកចិត្តទុកដាក់ដល់ចម្រៀងចាប៉ី ម្ល៉ោះហើយតទៅមុខមានហានិភ័យសាបរលាបទៅ”។

ដើម្បីរក្សាព្រលឹងចម្រៀងចាប៉ីដងវែងពីជំនាន់មួយទៅជំនាន់មួយ រៀងរាល់ថ្ងៃសិល្បករលីសេម តែងចំណាយពេលបង្ហាត់ដល់កូនចៅក្នុងវង្សត្រកូល។ លោកលីសម្បត្តិ កូនប្រុសរបស់លោកតាលីសេម ឱ្យដឹង៖ “ ចម្រៀងចាប៉ីពិតជាពិបាកច្រៀង ពិបាកដេញ ដ្បិតចាប៉ីដងវែងមានខ្សែតែពីរ ខ្ញុំរៀនពីឪពុករយៈពេលច្រើនឆ្នាំមក ប៉ុន្តែមិនអាចច្រៀងនិងដេញពីរោះដូចគាត់។ ទោះជាយ៉ាងនេះ តែខ្ញុំនៅតែប្ដេជ្ញារៀនឱ្យទាល់តែចេះ ដើម្បីចម្រៀងចាប៉ីបានបន្តថែរក្សាពីជំនាន់មួយទៅជំនាន់មួយក្នុងវង្សត្រកូល”៕

យ្វីអាញ់ - ថាច់ធី

ចែករំលែកអត្ថបទ

ពាក្យគន្លឹះ