ព្រឹត្តិការណ៍ - នយោបាយ ព្រឹត្តិការណ៍

30/12/2019 - 16:33

បណ្តុះបណ្តាលបញ្ញវន្តនិងធនធានមនុស្សក្នុងព្រះសង្ឃនិងជនរួមជាតិខ្មែរណាមបូ

កាលពីថ្ងៃទី១៥ ខែធ្នូ វិទ្យាស្ថានពុទ្ធសាសនាទក្ខិណនិកាយខ្មែរ (ខណ្ឌអូរម៉ូង ក្រុងកឹងធើ) មួយអន្លើដោយមហាវិទ្យាល័យ វិទ្យាសាស្រ្តសង្គម និងបញ្ញាសាស្រ្តហាណូយ រួមសហការរៀបចំសិក្ខាសាលា “បណ្តុះបណ្តាលបញ្ញវន្តនិងធនធានមនុស្សក្នុងព្រះសង្ឃនិងជនរួមជាតិខ្មែរណាមបូ ភារកិច្ចនិងដំណោះស្រាយ" (ហៅកាត់ថា សិក្ខាសាលា)។ សិក្ខាសាលាមានការអញ្ជើញចូលរួមរបស់គណៈកម្មការសាសនានៃរដ្ឋាភិបាល សមាគមពុទ្ធសាសនាវៀតណាម គណៈជនជាតិខេត្ត គណៈកម្មាធិការរណសិរ្សមាតុវៀតណាមក្រុងកឹងធើ អ្នកមុខអ្នកការសាសនា និងកម្មាភិបាល បញ្ញវន្តខ្មែរ។ល។

ទិដ្ឋភាពនៃអង្គសិក្ខាសាលា។ រូបថត៖ ត្រុងង្វៀន

ក្រោយរយៈពេលធ្វើការពេញមួយថ្ងៃ អ្នកតំណាងទាំងឡាយបានចូលរួមពិភាក្សា ស្រាយបំភ្លឺពីតថភាព និងស្វែងរកដំណោះស្រាយបញ្ហាសំខាន់ៗ៣ចំណុច ជាក់ស្តែងគឺ៖ តួនាទីរបស់វិទ្យាស្ថានពុទ្ធសាសនាទក្ខិណនិកាយខ្មែរក្នុងជីវភាពជាក់ស្តែង។ ភារកិច្ចអប់រំនិងបណ្តុះបណ្តាលរបស់វិទ្យាស្ថានពុទ្ធសាសនាទក្ខិណនិកាយខ្មែរ។ សិក្សាស្រាវជ្រាវវិទ្យាសាស្រ្ត និងកសាងទម្រង់វិទ្យាស្ថានពុទ្ធសាសនាទក្ខិណនិកាយខ្មែរ។ ឆ្លងតាមរយៈនោះ អង្គសិក្ខាសាលាបានគូសបញ្ជាក់៖ វិទ្យាស្ថានពុទ្ធសាសនាទក្ខិណនិកាយខ្មែរ មានទីតាំងនិងតួនាទីយ៉ាងសំខាន់ក្នុងប្រព័ន្ធអប់រំរបស់ពុទ្ធសាសនាវៀតណាម បម្រើភារកិច្ច បណ្តុះបណ្តាលបញ្ញវន្តនិងធនធានមនុស្សសម្រាប់សមាគមពុទ្ធសាសនា និងអប់រំពុទ្ធិកសិក្សាដល់ព្រះសង្ឃ ពុទ្ធបរិស័ទក្នុងពុទ្ធសាសនាវៀតណាម ពិសេសគឺពុទ្ធសាសនាទក្ខិណនិកាយខ្មែរ។ ដូច្នេះ វិទ្យាស្ថានដើរតួនាទីយ៉ាងសំខាន់ រួមចំណែកក្នុងការបណ្តុះបណ្តាលធនធានមនុស្សនៅតំបន់ជនរួមជាតិខ្មែរណាមបូ និងការអភិវឌ្ឍរួមរបស់ប្រទេសជាតិ កសាងធ្លុងមហាសាមគ្គីជនជាតិ។ អាស្រ័យហេតុនោះ រាល់មតិចូលរួមក្នុងអង្គសិក្ខាសាលា បានគូសបញ្ជាក់៖ រយៈពេលខាងមុខ វិទ្យាស្ថានពុទ្ធសាសនាទក្ខិណនិកាយខ្មែរក្រុងកឹងធើ គប្បីពង្រីកតួនាទីរបស់ខ្លួនជាក់ស្តែងក្នុងជីវភាពសង្គម នឹងបន្តមានដំណោះស្រាយលើកកម្ពស់គុណភាព ប្រសិទ្ធភាពការងារអប់រំនិងបណ្តុះបណ្តាល កសាងទម្រង់សិក្សាដោយដំណើរការមានប្រសិទ្ធភាព។ល។ ដើម្បីរួមចំណែកក្នុងការបណ្តុះបណ្តាលបញ្ញវន្តក្នុងព្រះសង្ឃ សម្រាប់ពុទ្ធសាសនាវៀតណាមនិយាយរួម កសាងធនធានមនុស្សក្នុងពុទ្ធសាសនាទក្ខិណនិកាយខ្មែរនិយាយដោយឡែក៕

ថាញ់ឡុង- លីសៀ

ចែករំលែកអត្ថបទ

ពាក្យគន្លឹះ