សុខភាព - អប់រំ អប់រំ

30/12/2019 - 16:33

បង្កលក្ខណសម្បត្តិងាយស្រួល សម្រាប់សិស្សជនជាតិភាគតិច

រយៈពេលកន្លង ខេត្តគៀងយ៉ាងផ្តុំកម្លាំងវិនិយោគមូលដ្ឋានសម្ភារៈ លើកកម្ពស់សមត្ថភាពកងជួរកម្មាភិបាល គ្រូបង្រៀន ម្ល៉ោះហើយគុណភាពអប់រំនិងបណ្តុះបណ្តាលរបស់ខេត្ត មានការអភិវឌ្ឍដោយឥតឈប់ឈរតាមទិសដៅគ្រប់វិស័យ។

សាលាវិទ្យាល័យជនជាតិអន្តេវាសិកគៀងយ៉ាង ត្រូវបានវិនិយោគយ៉ាងសមរម្យ។

តាមប្រសាសន៍លោកយ័ញភុក ប្រធានគណៈជនជាតិខេត្តគៀងយ៉ាង ឱ្យដឹង៖ គម្រោងចំណុះផ្នែកអប់រំនិងបណ្តុះបណ្តាល ដូច៖ អភិវឌ្ឍប្រព័ន្ធសាលាជនជាតិអន្តេវាសិក និងលើកកម្ពស់គុណភាពគ្រូបង្រៀនជនជាតិភាគតិច។ល។ ត្រូវបានផ្សព្វផ្សាយអនុវត្ត សំដៅរួមចំណែកលើកកម្ពស់ប្រជាបញ្ញា បណ្តុះបណ្តាលប្រភពធនធានមនុស្សដល់ជនរួមជាតិភាគតិចជាដើម។ មកទល់ពេលនេះ ប្រព័ន្ធសាលារៀនតំបន់ជនជាតិភាគតិច ត្រូវបានបន្តការវិនិយោគ បង្កើនកម្រិត សម្ភារៈអប់រំត្រូវបានផ្គត់ផ្គង់បន្ថែម ឆ្លើយតបបានល្អទៅនឹងតម្រូវការបង្រៀននិងរៀន។ ទូទាំងខេត្ត បច្ចុប្បន្នមានសាលាវិទ្យាល័យជនជាតិអន្តេវាសិកចំនួន៦ ថ្នាក់ខេត្ត១និងថ្នាក់ស្រុក៥។ លោកលីមិញថាំង នាយការិយាល័យរងនៃគណៈកម្មាធិការប្រជាជនស្រុកហ្គក្វាវ ឱ្យដឹង៖ "អាស្រ័យមានសាលារៀនមាំទាំ គ្រូបង្រៀនអស់ពីចិត្ត មានសមត្ថភាពម្ល៉ោះហើយការងារកៀរគរសិស្សនៅតាមសាលានីមួយៗក្នុងស្រុកតែងសម្រេចតាមផែនការដាក់ចេញ"។

មិនចំពោះតែតំបន់ជនជាតិស្រុកហ្គក្វាវប៉ុណ្ណោះទេ អត្រាកៀរគរកុមារជនជាតិខ្មែរក្នុងកម្រិតអាយុ ដែលត្រូវទៅរៀនទូទាំងខេត្តក៏កើនឡើងពីមួយថ្ងៃទៅមួយថ្ងៃដោយសម្រេចជាង ៩៧%។ កាលពីឆ្នាំសិក្សា២០១៣-២០១៤ សិស្សជនជាតិខ្មែរទាំង៣កម្រិតសិក្សាមាន៣៥.៨៤៣/២៨៨.៧៣៤នាក់ ស្រូបអត្រា១២៤១%។ លុះដល់ឆ្នាំសិក្សា២០១៨-២០១៩ មាន៣៨.២៩៦/២៥៦.១៥៩នាក់ សម្រេច១៤,៩៥% កើន២.៤៥៣នាក់ បើប្រៀបនឹងឆ្នាំសិក្សា២០១៣-២០១៤។ ទន្ទឹមនឹងនោះ ខេត្តក៏បានអនុវត្តគោលនយោបាយជម្រើសសិស្ស ចាប់ពីឆ្នាំ២០១៤ មកទល់ពេលនេះ មានប្អូនៗចំនួន៤៦នាក់ បានជាប់ជម្រើសចូលមហាវិទ្យាល័យនៅក្រុងកឹងធើនិងក្រុងហូជីមិញ និងប្អូនៗចំនួន៣១៣នាក់ បានជាប់ជ្រើសចូលរៀនមហាវិទ្យាល័យបម្រុងក្រុងហូជីមិញ។

ការវិនិយោគលើគ្រប់វិស័យសម្រាប់ផ្នែកអប់រំរបស់ខេត្តបាននាំមកលទ្ធផល គួរជាទីមោទនៈ គុណភាពសិស្សជនជាតិភាគតិចទាំង៣កម្រិត រៀងរាល់ឆ្នាំសម្រេចតាមសំណូមពរដាក់ចេញ។ អាស្រ័យរដ្ឋផ្តោតការយកចិត្តទុកដាក់អភិវឌ្ឍន៍អប់រំតំបន់ជនជាតិ ម្ល៉ោះហើយស្មារតីភ្ញាក់រលឹករបស់អាណាព្យាបាលក្នុងការរៀនសូត្ររបស់កូនចៅក៏ត្រូវបានកើនឡើងផងដែរ។ បងយ័ញថាំង នៅឃុំឌិញអាង ស្រុកហ្គក្វាវ ឱ្យដឹង៖ "រដ្ឋគិតគូរសាងសង់សាលារៀនមាំទាំ ដូច្នេះប្តីប្រពន្ធខ្ញុំប្តេជ្ញាមិនឱ្យកូនឈប់រៀនទេ"។ ដោយឃើញឪពុកម្តាយប្តេជ្ញាចិត្ត ប្អូនយ័ញហ្វាងអ៊ុក ឱ្យដឹង៖ "ប្អូនក៏ចង់រៀនសូត្រ ដើម្បីថ្ងៃក្រោយមានការងារ ធ្វើលំនឹងគ្មានគិតដល់ការបោះបង់រៀនសូត្រទេ"។

មិនត្រឹមតែផ្តោតការយកចិត្តទុកដាក់ អភិវឌ្ឍន៍អប់រំលើគ្រប់វិស័យសម្រាប់សិស្សប៉ុណ្ណោះទេ ខេត្តថែមទាំងជំនួយទឹកប្រាក់ជិត៦០០លានដុង ដើម្បីទិញសៀវភៅពុម្ពជាឧភយភាសានិងជំនួយទឹកប្រាក់សម្រាប់គ្រូបង្រៀន និងព្រះសង្ឃដែលបង្រៀនអក្សរខ្មែរក្នុងរដូវវិស្សមកាលផង។ ក្រៅពីមណ្ឌលសាលាទាំង៤៣ ដែលបង្រៀនឧភយភាសាចំនួន២២៣បន្ទប់ រដូវវិស្សមកាលរៀងរាល់ឆ្នាំ មានវត្តចំនួន៣១បានបង្រៀនអក្សរខ្មែរក្នុងរដូវវិស្សមកាល រួមមាន២៩៧បន្ទប់ ដោយមានសិស្សជនជាតិខ្មែរចូលរៀនជាង៧.០០០នាក់ជារៀងរាល់ឆ្នាំ៕

ហាថាញ់-លីសៀ

ចែករំលែកអត្ថបទ

ពាក្យគន្លឹះ