សុខភាព - អប់រំ អប់រំ

12/11/2019 - 13:54

យុវតីសិស្សលុះក្នុងដំបូន្មាន រៀនពូកែ

ប៉ុន្មានឆ្នាំមកនេះ យុវតី សិស្សសើុងធីញៀង រៀនថ្នាក់ទី១២A៦ តែងបាន លោកគ្រូ អ្នកគ្រូនិងមិត្តភ័ក្តិស្ងើចសរសើរ។ ពិសេស ឆ្នាំសិក្សា២០១៨ -២០១៩ ប្អូនបានចូលរួមប្រឡងសិស្សពូកែថ្នាក់ខេត្តវិញ្ញាសារូបវិទ្យាជាប់លេខ៣។

 យុវតីសិស្សក្រីក្រ សង្វាតរៀនសូត្រ សើុងធីញៀង។

“ប្អូនសើុងធីញៀង គឺជាសិស្សលុះក្នុងដំបូន្មាន ព្យាយាមរៀនសូត្រនិងយកចិត្តទុកដាក់ក្រេបជញ្ជក់មេរៀនបានល្អ។ ប្អូនជាសិស្សរៀនពូកែរាល់វិញ្ញាសា ពិន្ទុមធ្យមភាគនៃវិញ្ញាសានីមួយៗ សម្រេចពី៨,៧ឡើងទៅ តាំងពីរៀនថ្នាក់ទី១០រហូតមក។ ប្រការដែលគួរស្ងើចសរសើរនោះ គឺប្អូនខិតខំរៀនសូត្រលត់ដំដោយខ្លួនឯង រិះរកវិធីថ្មីៗដើម្បីធ្វើលំហាត់វិញ្ញាសាសម្រាប់សិស្សពូកែ”–លោកគ្រូគឹមវ៉ាន់ង៉យ នាយករងសាលាវិទ្យាល័យជនជាតិអន្តេវាសិកហ្វិញកឿង ខេត្តសុកត្រាំង ឱ្យដឹងដូច្នេះ។

ជីវភាពគ្រួសារក្រលំបាក ម្ល៉ោះហើយចំពោះប្អូនញៀង បានជាប់ជម្រើសចូលរៀនសាលាជនជាតិអន្តេវាសិកហ្វិញកឿងសុកត្រាំង គឺជាក្តីមោទនៈនិងសោមនស្សបំផុត។ នេះជាសាលាដែលបណ្តុះបណ្តាលមានគុណភាពខ្ពស់សិស្សដែលរៀននៅសាលានេះ មានកន្លែងស្នាក់នៅ ទទួលបានរបបគោលនយោបាយសម្រាប់សិស្សជនជាតិខ្មែរ តាមសេចក្ដីកំណត់របស់រដ្ឋ។ ប្អូនញៀង ឱ្យដឹង៖ “ផ្ទះប្អូនធ្វើស្រែតែ៥កុង ឪពុកឆ្លៀតទៅធ្វើកម្មករសំណង់ ទើបគ្រប់ទ្រទ្រង់ជីវភាពគ្រួសារ និងគិតគូរការរៀនសូត្រដល់ប្អូនទាំងពីរនាក់។ អាស្រ័យហេតុនោះ តាំងពីតូចមក ប្អូនបានប្ដេជ្ញាចិត្តព្យាយាមរៀនឱ្យពូកែ ដើម្បីប្រឡងបានចូលរៀននៅសាលាហ្វិញកឿង។ រៀននៅទីនេះ បានទទួលរបបគោលនយោបាយរៀនពូកែនឹងមានអាហារូបករណ៍ ម្ល៉ោះហើយជួយសម្រាលដល់ឪពុកម្តាយផង”។

ជាសិស្សក្រីក្រ ព្យាយាមរៀនសូត្រ ខណៈពេលបានបណ្តុះបណ្តាលក្នុងសាលាដែលមានកងជួរគ្រូបង្រៀនមានសមត្ថភាព បទពិសោធន៍បង្ហាត់បង្រៀនល្អ និងយកចិត្តទុកដាក់ដល់សិស្ស ដូច្នេះ ប្អូនញៀង ពង្រីកបានសមត្ថភាពដើម្បីសម្រេចស្នាដៃខ្ពស់ក្នុងការរៀនសូត្រ។ ជាពិសេស ប្អូនជាសិស្សម្នាក់ក្នុងចំណោមសិស្សទាំង១៣រូបរបស់សាលាទទួលបានរង្វាន់ខ្ពស់ក្នុងការប្រឡងសិស្សពូកែថ្នាក់ខេត្តឆ្នាំសិក្សា២០១៨- ២០១៩។ ប្អូនសើុងធីញៀង ឱ្យដឹង៖ “ប្អូនបានកំណត់ច្បាស់ការរៀនសូត្រ ជាភារកិច្ចចម្បង ហេតុនោះ ក្រៅពីម៉ោងរៀនក្នុងថ្នាក់ ប្អូនទៅបណ្ណាល័យរកសៀវភៅអានដើម្បីបង្កើនចំណេះដឹង និងរិះរកវិធីធ្វើលំហាត់ថ្មីៗ ឬក៏រិះរកប្រព័ន្ធអឺនធឺណែត។ រីឯថ្ងៃធម្មតា មុនពេលចូលរៀនប្អូនតែងអាន ឬក៏ចងក្រងមេរៀនជាមុន កន្លែងណាមិនទាន់យល់កត់ត្រាចូលកូនសៀវភៅ។ ពេលចូលសាលាស្តាប់លោកគ្រូអ្នកគ្រូពន្យល់មេរៀនត្រង់ណាមិនយល់ប្អូន សួរភ្លាមតែម្តង”។

រស់នៅតំបន់ជនបទឃុំអាងហ៊ីប ស្រុកកេសាច់ ជីវភាពគ្រួសារក្រលំបាក ចំពោះប្អូនញៀង ក៏មិនដែលបានរៀនគួម្តងណាឡើយ។ រដូវវិស្សមកាល ប្អូនវិលត្រឡប់ទៅស្រុកទទួលត្រកួនពីគេយកមកចិត រកបានប្រាក់ចំណូលជាង២០.០០០ដុង/ថ្ងៃ ទឹកប្រាក់រកបានប្អូនសន្សំទុកដើម្បីទិញសៀវភៅលំហាត់សៀវភៅគន្លឹះតែងសេចក្តីយកមកអានជាដើម។ មិនតែប៉ុណ្ណោះ ក្នុងថ្នាក់រៀនប្អូនតែងជួយមិត្តភ័ក្តិ ដើម្បីឈានឡើងក្នុងការរៀនសូត្រ បានជាអ្នកណាក៏ស្រឡាញ់រាប់ អាននិងស្ងើចសរសើរដែរ។ “ជីវភាពគ្រួសារក្រលំបាក ការគិតគូរឱ្យប្អូនរៀនមហាវិទ្យាល័យនឹងមានការលំបាកណាស់ ដូច្នេះចំពោះមុខប្អូននឹងខិតខំរៀនឱ្យពូកែ ដើម្បីប្រឡងចូលផ្នែកនគរបាល។ នេះជាមុខរបរដែលប្អូនប្រាថ្នា ហើយមហាវិទ្យាល័យជាគោលដៅឆ្ពោះទៅរកអនាគតដ៏ភ្លឺស្វាង” - ប្អូនសើុងធីញៀង បានបង្ហើប ឱ្យដឹងដូច្នេះ៕

យ្វីអាញ់-លីសៀ

ចែករំលែកអត្ថបទ

ពាក្យគន្លឹះ