សុខភាព - អប់រំ អប់រំ

03/06/2019 - 16:27

យីមកេវ និស្សិតឆ្នើមត្រូវបានលើកសរសើរនៅហាណូយ

ឆ្នាំ២០១៨ យីមកេវ ជានិស្សិតខ្មែរឆ្នើមម្នាក់ក្នុងចំណោមនិស្សិតខ្មែរគំរូ ត្រូវបានស្ងើតសរសើរ នៅពិធីលើកសរសើរសិស្ស និស្សិតជនជាតិភាគតិចឆ្នើមនៅហាណូយ ហើយក៏ជាឆ្នាំដែលយីមកេវ ទទួលសញ្ញាបត្រគរុកោសល្យផ្នែកនិរុត្តិសាស្រ្ត សម្រេចនិទ្ទេសឆ្នើមនៅសាកលវិទ្យាល័យកឹងធើផងដែរ។ ចំពោះស្នាដៃឆ្នើមទាំងនោះ គឺជាលទ្ធផលលេចធ្លោឆ្លុះបញ្ចាំងពីឆន្ទៈ ការខិតខំ ប្រឹងប្រែងឆ្លងកាត់លំបាកក្នុងជីវភាព និងការរៀនសូត្ររបស់យីមកេវ ក្នុងរយៈពេលកន្លង។

យីមកេវ កំពុងបង្រៀនប្អូនៗនៅភូមិភាគ។

ថាច់ធីយីមកេវ កើតឆ្នាំ១៩៩៦ ឪពុក ម្តាយជាកសិករនៅភូមិបារស្រែA ឃុំលឿងហ្វា ស្រុកចូវថាញ់។ ស្ថានភាពគ្រួសារ ប្អូនក្រលំបាក ឪពុកមិនចេះអក្សរ ចំណែកម្តាយក៏មិនបានរៀនសូត្រប៉ុន្មានដែរ ប៉ុន្តែ ពេលណាក៏ដោយ ឪពុកម្តាយប្អូនតែងតែដាស់តឿន លើកទឹកចិត្ត និងយកចិត្តទុកដាក់គិតគូរឲ្យកូនរៀនសូត្របានត្រឹមត្រូវ។ យីមកេវ ជាកុមារីឆ្លាតមួយរូប ប្អូនយល់ដឹងពីភាពលំបាក ការហត់នឿយរបស់ឪពុកម្តាយតាំងពីតូច ទើបប្អូនតាំងចិត្តថានឹងខិតខំរៀនឲ្យបានពូកែដើម្បីកុំឲ្យឪពុកម្តាយអស់សង្ឃឹម។ ផ្ដើមពីឆន្ទៈនោះឯង ទើបយីមកេវ សម្រេចបានស្នាដៃខ្ពស់ក្នុងការរៀនសូត្រ។ ជាពិសេស គឺសម្រេចបានពិន្ទុខ្ពស់បំផុតនាឆ្នាំប្រឡងចូលរៀនថ្នាក់ទី១០ សាលាវិទ្យាល័យជនជាតិអន្តេវាសិកខេត្ត និងសម្រេចកិត្តិនាមជាសិស្សឆ្នើមក្នុងរយៈពេលរៀន១២ឆ្នាំបន្តបន្ទាប់។ លុះពេលប្រឡងចូលមហាវិទ្យាល័យគរុកោសល្យផ្នែកនិរុត្តិសាស្រ្តនៃសាកលវិទ្យាល័យកឹងធើ ពិន្ទុកំណត់របស់សាលាគឺ២០ពិន្ទុ យីមកេវ ប្រឡងជាប់បានដល់២៥,៥ពិន្ទុ។ ប្រឡងជាប់មហាវិទ្យាល័យក្នុងចិត្តប្អូនត្រេកអរផង បារម្ភផង មិនដឹងតើគ្រួសារមានសមត្ថភាពគិតគូរឲ្យប្អូនរៀនសូត្រ បានឬអត់។ ថ្វីបើដូច្នោះក្តី ជាមួយនឹងឆន្ទៈប្តេជ្ញា បន្តការរៀនសូត្រចាប់តាំងពីថ្ងៃដំបូងឈានចូលរៀនសកលវិទ្យាល័យ យីមកេវ បានរៀបចំពេលវេលារៀនបណ្តើរ ធ្វើការរកប្រាក់បណ្តើរដើម្បីផ្គត់ផ្គង់ជីវភាព។ ផ្តើមពីស្ថានភាពលំបាកដូច្នោះ ក៏បង្កជាកម្លាំងចលករជំរុញឲ្យយីមកេវ សម្រេចបានស្នាដៃឆ្នើមក្នុងរយៈពេលរៀននៅសាកលវិទ្យាល័យ៤ឆ្នាំបន្តបន្ទាប់។ ជាមួយនឹងស្នាដៃសម្រេចបានខាងលើ យីមកេវ ត្រូវបានសាលានិងសប្បុរសជននានាជូនអាហារូបករណ៍ជាច្រើនចំណែកសម្រាប់លើកទឹកចិត្តក្នុងការរៀនសូត្រ។

ក្នុងពេលរង់ចាំលទ្ធផលដែលដាក់ពាក្យសុំការងារនៅមន្ទីរអប់រំនិងបណ្តុះបណ្តាលនៅក្នុងនិងក្រៅខេត្ត ប្អូនមិនទៅរកការងារធ្វើនៅក្រុមហ៊ុន ឬការងារអ្វីខាងក្រៅដើម្បីរកបានប្រាក់ចំណូលបង្គួរនោះទេ យីមកេវ បែរជាជ្រើសយកការងារបង្រៀនបន្ថែមដល់សិស្ស ក្រីក្រនៅភូមិភាគទៅវិញ។ នោះក៏ដោយសារតែ យីមកេវ ស្រឡាញ់ចូលចិត្តចំពោះមុខរបរគ្រូបង្រៀន និងមានបំណងចង់ធ្វើការងារអ្វីមួយទោះបីតូចតាចដើម្បីជាប្រយោជន៍ដល់សហគមន៍។ រៀងរាល់ថ្ងៃ ក្រៅម៉ោងទៅបង្រៀននៅសាលារៀន មានសិស្សានុសិស្សក្រីក្រតាំងពីថ្នាក់ទី១ដល់ថ្នាក់ទី៥ នៅទាំងមានសិស្សប្រហែល៨ដល់១០នាក់មករៀនបន្ថែមនៅនឹង ផ្ទះយីមកេវទៀតផង។

យីមកេវ ឲ្យដឹង៖ “នៅខែវិច្ឆិកា ឆ្នាំ២០១៨ ប្អូនមានកិត្តិយសនិងមោទនភាពខ្លាំងណាស់ នៅពេលតំណាងសិស្ស និស្សិតខ្មែរទៅចូលរួមពិធីលើកសរសើរសិស្ស និស្សិតជនជាតិភាគតិចនៅហាណូយ អាស្រ័យដោយគណៈកម្មាធិការជនជាតិ ក្រសួងអប់រំនិងបណ្តុះបណ្តាល និងមជ្ឈិមសម្ព័ន្ធយុវជនកុម្មុយនិស្ដហូជីមិញសហការចាត់តាំង។ ទៅចូលរួមពិធីលើកសរសើរ ប្អូនថែមទាំងបានចូលរួមសកម្មភាពជាច្រើន មានដូច៖ ទៅគោរពវិមានតម្កល់សពអ៊ំហូ ទស្សនកិច្ចមណ្ឌលកេរដំណែលលោកប្រធានហូជីមិញនិងផ្ទះរតអ៊ំហូ ចូលរួមពិធីអុជធូប និងកត់ត្រាក្នុងក្រាំងមាសនៅសាកលវិទ្យាល័យ ជំនាន់ដើមក្វឹកតឺយ៉ាម។ល។ នោះមិនត្រឹមតែជាកិត្តិយសប៉ុណ្ណោះទេ នៅទាំងជាការលើកទឹកចិត្តដ៏ធំធេងញុាំងឲ្យប្អូនបន្តការខិតខំក្នុងការរៀនសូត្រ និងលត់ដំខ្លួនឲ្យកាន់តែរឹងប៉ឹងថែមទៀត ដើម្បីរួមចំណែកធ្វើការងារមានប្រយោជន៍ជូនសហគមន៍និងសង្គម”។

លោកត្រឹងមិញថាំង ប្រធានសមាគមជំរុញការសិក្សាឃុំលឿងហ្វា ស្រុកចូវថាញ់ ខេត្តត្រាវិញ ឲ្យដឹង៖ “ក្មួយយីមកេវ ជានិស្សិតគំរូម្នាក់ មិនត្រឹមតែរៀនពូកែបានទទួលអាហារូបករណ៍ នៅសាលាប៉ុណ្ណោះទេ រីឯនៅភូមិភាគវិញ តាមនរណាក៏អាណិតស្រឡាញ់ក្មួយដែរ ក្នុងរយៈ ពេលឈប់សម្រាកវិស្សមកាល ក្មួយយីមកេវទទួលបង្រៀនឥតគិតថ្លៃជូនក្មួយតូចៗក្នុងភូមិ។ ជាពិសេស ក្មួយយីមកេវ សកម្មចូលរួមរាល់ការចលនារបស់សាលា ក៏ដូចជារបស់ភូមិនិងអស់ពីចិត្តជួយបង្ហាត់បង្រៀនក្មួយៗក្នុងភូមិ ក្មួយយីមកេវ គឺជាគំរូនិស្សិតក្រីក្រឆ្លងកាត់ការលំបាកក្នុងការរៀនសូត្រ និងធ្វើនូវទង្វើមានប្រយោជន៍ជូនសង្គម”៕

សឺនម៉ាល័យ - ថាច់ធី

ចែករំលែកអត្ថបទ

ពាក្យគន្លឹះ