សុខភាព - អប់រំ អប់រំ

29/05/2018 - 10:41

គំរូសង្វាតរៀនសូត្រ

បងគឹមថៃ (អាយុ៣៧ឆ្នាំ) ជនជាតិខ្មែរ ជាប់ពិន្ទុខ្ពស់បំផុតក្នុងសម័យប្រឡងជម្រើសអ្នករដ្ឋការឆ្នាំ២០១៨ អាស្រ័យមន្ទីរមហាផ្ទៃខេត្តសុកត្រាំងរៀបចំឡើង។

បងគឹមថៃ។

ចុងឆ្នាំ២០១៧ បងគឹមថៃ ចុះឈ្មោះប្រឡងជម្រើសអ្នករដ្ឋការ អាស្រ័យមន្ទីរមហាផ្ទៃខេត្តសុកត្រាំងរៀបចំឡើង។ លទ្ធផល បងសម្រេចបានពិន្ទុរួម២៣៣ពិន្ទុ។ បងគឹមថៃ ត្រូវបានជម្រើសចូលក្នុងនាទីជាបុគ្គលិករដ្ឋបាល ទូទៅចំណុះការិយាល័យក្រុមប្រឹក្សាប្រជាជន និងគណៈកម្មាធិការប្រជាជនស្រុកឡុងភូ។

ប្រការដែលគួរឲ្យប្រសើរចំពោះបងថៃ គឺការខិតខំឈានឡើងមិនខ្លាចហត់នឿយដើម្បីសម្រេចជោគជ័យនូវក្ដីប្រាថ្នារបស់ខ្លួន។ បងថៃ កើតនិងធំដឹងក្ដីឡើងក្នុងគ្រួសារ កសិករក្រីក្រ មានបងប្អូនច្រើននៅភូមិខ្វាន់តាង ទីប្រជុំជនឡុងភូ ស្រុកឡុងភូ ខេត្តសុកត្រាំង។ ទោះបីស្ថានភាពលំបាក ប៉ុន្តែបងថៃ តែងប្ដេជ្ញាចិត្តមិនបោះបង់ការរៀនសូត្រ។ ក្រោយពីប្រឡងបញ្ចប់កម្រិតវិទ្យាល័យ បងប្រឡងជាប់ចូលសាលាអនុមហាវិទ្យាល័យ គរុកោសល្យសុកត្រាំង។ រៀនដល់ឆ្នាំទីពីរ ដោយសាម្ដាយឪពុកចាស់ជរានិងបងប្អូនមានគ្រួសារចេញនៅដោយឡែក ទើបបងឈប់រៀន ដើម្បីជួយម្ដាយឪពុកធ្វើស្រែ។

ថ្វីត្បិតតែរៀបការជាច្រើនឆ្នាំ ប៉ុន្តែជីវភាពនៅតែជួបលំបាក ឆ្នាំ២០០៤ បងដើរលក់ឆ្នោត ដើម្បីរកប្រាក់ចំណូលបន្ថែម។ ទោះបីទុក្ខលំបាកយ៉ាងណាក៏ដោយ ប៉ុន្តែបងមិនលះបង់បំណងប្រាថ្នាក្នុងការសិក្សារៀនសូត្រ ក្លាយជាអ្នករដ្ឋការឡើយ។ ឆ្នាំ២០១១ បងដាក់ពាក្យចូលរៀនបន្តផ្នែកមហាវិទ្យាល័យច្បាប់ (ប្រព័ន្ធបណ្ដុះបណ្ដាលពីចម្ងាយ) អាស្រ័យសាកលវិទ្យាល័យកឹងធើ ចងសម្ព័ន្ធជាមួយនឹងអនុមហាវិទ្យាល័យគរុកោសល សុកត្រាំង បើកនៅសុកត្រាំង។ បងបានបញ្ចប់វគ្គសិក្សាមហាវិទ្យាល័យឆ្នាំ២០១៥ ។

មិនត្រឹមតែព្យាយាមលក់ឆ្នោតដើម្បីរកប្រាក់ចំណូលប៉ុណ្ណោះទេ បងថៃនៅទាំងចូលរួមក្នុងក្រុមប្រជាការពារទីប្រជុំជនឡុងភូ។ បច្ចុប្បន្ន ជាអនុប្រធានក្រុមប្រជាការពារទីប្រជុំជនឡុងភូ និងបានទទួលប័ណ្ណសរសើររបស់នាយកនគរបាលខេត្តសុកត្រាំង៣ឆ្នាំបន្តបន្ទាប់ពីស្នាដៃក្នុងការងារការពារសន្តិសុខសណ្ដាប់ធ្នាប់នៅភូមិភាគ។ ដើមឆ្នាំ២០១៨ ក្រុមប្រឹក្សាជម្រើសអ្នករដ្ឋការខេត្តសុកត្រាំង ប្រកាសពិន្ទុជាសាធារណៈក្នុងសម័យប្រឡងជម្រើសអ្នករដ្ឋការឆ្នាំ២០១៧ បងគឹមថៃ ទទួលបានលទ្ធផលរួម២១៣ពិន្ទុ និងបូកពិន្ទុអាទិភាពជាជនជាតិខ្មែរបន្ថែម២០ពិន្ទុទៀត ម៉្លោះហើយសរុបពិន្ទុទាំងអស់ គឺ២៣៣ពិន្ទុ។ លោកសឺនហ្វៀន លេខាសាខាបក្សនិងជាប្រធានភូមិខ្វាន់តាង ឲ្យដឹង៖ “គ្រួសារថៃ ឋិតក្នុងក្របខ័ណ្ឌគ្រួសារក្រីក្រ។ ប៉ុន្តែថៃ ស៊ូទ្រាំលំបាកប្រិតសំចៃប្រាក់សង់បានផ្ទះមួយខ្នងរឹងមាំ ទន្ទឹមនឹងនោះ សិក្សាសម្រេចដោយជោគជ័យ ម៉្លោះហើយគាត់ស័ក្តិសមជាគំរូដល់សិស្សទាំងឡាយនៅភូមិនេះ”៕

ត្រឿងផល-ទីទុយ

ចែករំលែកអត្ថបទ

ពាក្យគន្លឹះ