គោលនយោបាយ -ការរស់នៅ គោលនយោបាយ

26/04/2016 - 08:38

កសិករវ័យចំណាស់បរិច្ចាគដីកសាងផ្លូវគមនាគមន៍ជនបទ

ជនរួមជាតិខ្មែរជាច្រើននៅឃុំឌិញម៉ូង ស្រុកថើយឡាយ ក្រុងកឹងធើ បានបរិច្ចាគដីធ្វើផ្លូវគមនាគមន៍ជនបទ ជួយឲ្យប្រជាជនធ្វើដំណើរទៅមកមានភាពងាយស្រួល រួមចំណែកអភិវឌ្ឍហេដ្ឋារចនាសម្ព័ន្ធគមនា គមន៍ជនបទនៅភូមិភាគ។

ប្តីប្រពន្ធលោកតាលីឡើមនិងចៅ។

កសិករវ័យចំណាស់ដាវលីឡើម នៅភូមិឌិញហ្វាA ជាកសិករម្នាក់ក្នុងចំណោមកសិករទាំងឡាយបរិច្ចាគដីធ្វើផ្លូវ។ លោកតាឡើម រំលឹកឡើងវិញ៖ "ពីមុន ផ្លូវគមនាគមន៍នៅភូមិឌិញហ្វាA ពិបាកធ្វើដំណើទៅមកខ្លាំងណាស់។ ផ្លូវដីតាមភ្លឺប្រឡាយតូចចង្អៀត ខែវស្សាភក់ជ្រាំ។ ក្មេងៗ ទៅរៀនព្រឹកណាក៏រអិលដួលប្រឡាក់ភក់សឹងតែរាល់ថ្ងៃ។មាមីងទៅផ្សារលក់ដូរ ក៏ជួបការលំបាកហើយផ្លូវនេះជាផ្លូវតែមួយគត់ឆ្ពោះទៅកាន់ឃុំ ម៉្លោះហើយទោះជាលំបាកយ៉ាងណាក៏ដោយមាមីងក៏នៅតែទ្រាំធ្វើដំណើរលើផ្លូវនេះ"។ ដោយអាណិតមាមីងលំបាកក្នុងការធ្វើដំណើរទៅមក និងចង់បានឲ្យក្មួយៗទៅសាលាមានភាពងាយស្រួល លោកតាដាវ លីឡើមរិះរកវិធីធ្វើយ៉ាងណាដើម្បីពង្រីកផ្លូវឲ្យបានធំទូលាយស្រឡះស្រឡំ។ ផ្តើមពីការរិះគិតដូច្នោះ ជារៀងរាល់ថ្ងៃលោកតាឆ្លៀតពេលទំនេរជីកដីពីប្រឡាយនៅមុខផ្ទះលើកទប់ផ្លូវ។ ជាមួយនឹងចរិតឧស្សាហ៍ ស៊ូទ្រាំលំបាករបស់កសិករវ័យចំណាស់ម្នាក់នេះ ផ្លូវនៅមុខ ផ្ទះមានប្រវែងជាង១០០ម៉ែត្រ ត្រូវបានពង្រីកធំទូលាយ រាបរលូនជាង។ ឃើញកសិករវ័យចំណាស់ខិតខំអស់ពីចិត្តពីថ្លើមដូច្នេះ មាមីងក្នុងភូមិក៏ពង្រីកផ្លូវភ្លឺប្រឡាយនៅមុខផ្ទះខ្លួនតាមគាត់ដែរ។ លោកតាចលនាមាមីងកំណត់មួយខែម្តង ជួយកាប់ឆ្ការព្រៃគុម្ពោតនៅសងខាងផ្លូវ ដើម្បីធានាផ្លូវឲ្យបានស្រឡះស្រឡំ។

លោកហុងវុាំងហឿង ប្រធានសមាគម មនុស្សវ័យចំណាស់ឃុំឌិញម៉ូង ឲ្យដឹងដោយក្តីរីករាយ៖ "ពូលីឡើមនិងមាមីងក្នុងភូមិជីកដីទប់ផ្លូវដោយខ្លួនឯង អស់រយៈកាលជាង៥ឆ្នាំមកហើយ។ ផ្តើមពីផ្លូវតូចចង្អៀត ទទឹងជាង១ម៉ែត្រ ឥឡូវមានកំណាត់ផ្លូវទទឹងជិត៥ម៉ែត្រ។ មកដល់ឆ្នាំ២០១៥ ឃុំចាក់ក្រួសតាមបណ្តោយភ្លឺប្រឡាយដើម្បីត្រៀមចាក់បេតុង ពូលីឡើម ស្ម័គ្រចិត្តបរិច្ចាគដីជាង៥០០ម៉ែត្រការ៉េ ដើមឈើហូបផ្លែនិងដើមឈើយូរឆ្នាំជាច្រើនជូនរដ្ឋពង្រីកផ្លូវ។ សំខាន់បំផុតគឺស្មារតីអស់ពីចិត្តពីថ្លើមរបស់ពូមានឥទ្ធិពលធំធេងដល់មាមីងជំរុញអ្នកទាំងឡាយរួមកម្លាំងធ្វើផ្លូវគមនាគមន៍ជនបទ"។

លោកតាលីឡើម សម្លឹងក្មួយៗមកពីរៀនបណ្តើរឲ្យដឹងដោយក្តីរីករាយបណ្ដើរ៖ " ខ្ញុំមានវ័យចំណាស់ទៅហើយភាពសប្បាយរីករាយជារៀងរាល់ថ្ងៃ គឺបានឃើញក្មួយៗនាំគ្នាទៅរៀន។ នៅពេលខាងមុខនឹងធ្វើផ្លូវបេតុងជីវភាពមាមីងនៅភូមិឌិញហ្វាA នឹងបានប្រសើរជាងមុនច្រើន"។ រូបភាពកសិករវ័យចំណាស់ អាយុជិត៧០ឆ្នាំ រៀងរាល់ថ្ងៃលើកដីទប់ផ្លូវ បានដក់ជាប់ក្នុងអារម្មណ៍មាមីងនៅឃុំឌិញម៉ូងជានិច្ច។ អ្នកទាំងឡាយកាន់តែកោតសរសើរលោកតាលីឡើម ពេលដឹងថាគ្រួសារលោកមានដីស្រែត្រឹមតែ១,៥កុង។ ប្រជាជនក្នុងភូមិប្រៀនប្រដៅកូនចៅទៅរៀន ពេលជួបលោកតាលីឡើម ត្រូវចេះឱនលំទោន "ជម្រាបសួរតា ចៅទៅរៀន"។ អាស្រ័យហេតុនោះ មនោសញ្ចេតនាភូមិផងរបងជាមួយកាន់តែមានភាពស្អិតល្មួត៕

ថាច់ថាញ់ភូ-មុនី

ចែករំលែកអត្ថបទ

ពាក្យគន្លឹះ