គោលនយោបាយ -ការរស់នៅ គោលនយោបាយ

10/03/2014 - 16:36

ដាយត្រឿងកសាងភូមិវប្បធម៌-ជនបទថ្មី

ចុងឆ្នាំ២០១៣ ឃុំភូកឹង ស្រុកទីវកឹង ខេត្តត្រាវិញ ត្រូវបានទទួលស្គាល់ជាឃុំជនបទថ្មីដំបូងបង្អស់របស់ស្រុក។ អាស្រ័យហេតុនោះ ជីវភាពសម្ភារៈ ស្មារតីរបស់មាមីងក្នុងឃុំនិយាយរួម និងភូមិដាយត្រឿងនិយាយដោយឡែក មានការវិវឌ្ឍន៍យ៉ាងសកម្ម...។

ភូមិវប្បធម៌-ជនបទថ្មីនៅដាយត្រឿង។

ឃុំភូកឹង មានបណ្តាជនជាជនជាតិខ្មែររស់នៅប្រមាណ៦០% ប្រមូលផ្តុំ នៅភូមិដាយត្រឿង ស្វាយមីង ព្រែកអំពិលលិចក្តី។ល។ ដាយត្រឿងជាភូមិមួយក្នុងចំណោមភូមិនានា មានការអភិវឌ្ឍន៍លើគ្រប់វិស័យរបស់ឃុំភូកឹង។ មុនពេលឃុំភូកឹងបានទទួលស្គាល់ជាឃុំជនបទថ្មី ប្រជាជនភូមិដាយត្រឿងមានភាពរីករាយ ពីព្រោះភូមិទើបសម្ពោធនិងដាក់ឲ្យប្រើប្រាស់ផ្លូវកៅស៊ូតភ្ជាប់ពីផ្លូវជាតិ។ ថ្ងៃយើងខ្ញុំទៅកាន់ភូមិដាយត្រឿងនៅសងខាងផ្លូវកៅស៊ូមានផ្ទះឥដ្ឋសមរម្យជាច្រើន។ ពូថាច់ង៉ុកសាង លេខាសាខាបក្សភូមិដាយត្រឿង ឲ្យដឹងដោយក្តីរីករាយ៖ "ផ្លូវកៅស៊ូនេះចាប់ពីក្បាលភូមិដល់ចុងភូមិ អាស្រ័យផ្លូវនេះ មាមីងធ្វើដំណើរទៅមកនិងដឹកជញ្ជូនកសិផលងាយស្រួលជាង។ ដូច្នោះបានជានៅពេលចលនាបរិច្ចាគដីធ្វើផ្លូវ មាមីងគាំទ្រពេញទំហឹង សូម្បីដាំដំណាំរួមផ្សំនិងឈើហូបផ្លែកំពុងផ្តល់ផល មាមីងក៏សុខចិត្តបោះបង់មិនស្តាយដើម្បីសម្រួលដល់ការកសាងផ្លូវ"។

ផ្លូវស្រឡះស្រឡំ រថយន្តដឹកទំនិញចូលដល់ចុងភូមិដូច្នេះ តម្លៃកសិផលរបស់មាមីងក៏កើនឡើង។ មីងថាច់ធីផលនៅភូមិដាយដឿង ឲ្យដឹង៖ " ដីស្រែខ្ញុំនៅក្បែរផ្លូវជាតិ ពីមុនពេលប្រមូលផលខ្ញុំច្រើនតែលក់ស្រូវសើម នៅនឹងស្រែតែម្តង ពីព្រោះគ្មានផ្លូវដឹកជញ្ជូនមកផ្ទះ។ ម្យ៉ាងវិញទៀត បើដឹកផលដំណាំនិងសុតមាន់ទាពីផ្ទះឡើងថ្នល់លក់ម្តងៗគឺលំបាកណាស់។ ឥឡូវមានស្ពានដល់ពេលប្រមូលផលត្រូវថ្លៃទើបខ្ញុំលក់ បើមិនដូច្នោះទេ ខ្ញុំយកម៉ូតូដឹកឡើងផ្ទះហាលរង់ចាំស្រូវបានថ្លៃលក់ទើបចំណេញបានច្រើនជាង។ មិនត្រឹមតែដូច្នោះ ពេលបើកផ្លូវដីខ្ញុំបែរជាមានតម្លៃពីព្រោះនៅសងខាងផ្លូវទាំងសងខាង"។

បើសិនជាខាងត្បូងភូមិបានបង្កើនកម្រិតជាផ្លូវកៅស៊ូ ដូច្នេះផ្លូវខាងជើងក៏ត្រូវបានចាក់បេតុងដែរ ជួយឲ្យសិស្សានុសិស្សទៅរៀនមានភាពងាយស្រួលជាង។ ប្អូនថាច់ធូហ៊ុង ជាសិស្សសាលាបឋមសិក្សាភូកឹង ឲ្យដឹង៖ " ពីមុនផ្លូវចូលទៅសាលាមតេ្តយ្យតូចចង្អៀតលំបាកទៅមក។ ឥឡូវផ្លូវបើកទូលាយងាយជិះកង់ដូច្នេះខ្ញុំតែងទៅទទួលប្អូនជំនួសឪពុកម្តាយ" ។ ផ្លូវស្រឡះស្រឡំ មាមីងក៏បានយកចិត្តទុកដាក់គិតគូររៀបចំផ្ទះសម្បែងឲ្យមានភាពសមរម្យ។ អាស្រ័យហេតុនោះ ភូមិដាយត្រឿងតែងសម្រេចបាននូវបណ្តាលក្ខឋានស្តីពីភូមិវប្បធម៌។ ព្រះតេជព្រះគុណថាច់ថឿ ព្រះចៅអធិការវត្តអរុណ្ណរង្សីចាកអាគ្រោង(ដាយត្រឿង) មានថេរដីកា៖ "ផ្លូវស្រះស្រឡំសិស្សានុសិស្សទៅរៀនសូត្រ មាមីងពុទ្ធបរិស័ទធ្វើការរកទទួលទានមានភាពងាយស្រួលជាងម៉្លោះហើយជីវភាពមាមីងបានធូរធារជាងមុនច្រើន"។
ភូមិដាយត្រឿង មានបណ្តាជនជាជនជាតិខ្មែររស់នៅជាង៩០%។ ពីមុន ទូទាំងភូមិមានគ្រួសារក្រីក្រជាង១០០គ្រួសារ។ អត្រាគ្រួសារក្រីក្រត្រូវបានកាត់បន្ថយពីមួយឆ្នាំទៅមួយឆ្នាំ អាស្រ័យគោលនយោបាយឧបត្ថម្ភ ខាងផ្ទះនៅដីសង់ផ្ទះ។ល។ របស់រដ្ឋ ទន្ទឹមនឹងនោះភូមិដាយត្រឿងនៅទាំងជាភូមិមួយក្នុងចំណោមភូមិនានា នាំមុខក្នុងការចលនាកសាងវាលស្រែគំរូធំនៅភូកឹង ដូច្នេះប្រសិទ្ធផលសេដ្ឋកិច្ចពីការធ្វើស្រែកើនឡើង។ ពូគឹមរ៉េន នៅភូមិដាយត្រឿង ឲ្យដឹង៖ " កាលខ្ញុំនៅក្មេងទៅរៀនគ្មានបាន ផ្លូវស្រឡះស្រឡំដូច្នេះឡើយ។ សម័យនោះនៅខ្វះសាលារៀន ដូច្នេះមាមីងខ្មែរចេះអានចេះសរសេរដោយចំនួនតិច។ ឥឡូវគិតទៅកូនចៅយើងខ្ញុំត្រូវបានរដ្ឋយកចិត្តទុកដាក់គិតគូរ យើងខ្ញុំសប្បាយរីករាយគ្រប់ៗគ្នា។ ក្មួយៗបានទៅរៀនតាំងពីកម្រិតមតេយ្យ រហូតដល់កម្រិតមធ្យមសិក្សាចំណេះទូទៅ បន្ទប់រៀនចាស់ត្រូវបានកសាងថ្មី។ល។ ដូច្នេះយើងខ្ញុំត្រេកអរណាស់"។ បន្ទាប់ពីចែកដីឲ្យកូនៗ បច្ចុប្បន្នពូគឹមរ៉េននៅដីស្រែចំនួន១៤កុង ចម្ងាយពីផ្លូវជាតិ៥៤ប្រមាណជាង១០០ម៉ែត្រ គេមកសួរទិញច្រើនគ្នា ប៉ុន្តែពូប្តេជ្ញាចិត្តមិនលក់។ ពូគឹមរ៉េន ចែករំលែក៖"យើងជាកសិករបើលក់ដីតើរស់នៅដោយរបៀបណា។ ជាងនេះទៅទៀតធ្វើស្រែឥឡូវមិនសូវលំបាកដូចមុនឡើយ។ ស្រែខ្ញុំនៅក្នុងវាលស្រែគំរូធំដូច្នេះ តាំងពីការជ្រើសពូជ បូមទឹកបាញ់ថ្នាំសុទ្ធតែបានវិស្វករជួយណែនាំ។ ដល់ពេលប្រមូលផល គឺច្រូតដោយម៉ាស៊ីនប្រមូលផលចម្រុះគ្មាននៅប្រមូលផលដូចពីមុនទៀតឡើយ"។
មានអគ្គិសនី ផ្លូវ អគារសិក្សា ស្ថានីយផ្គត់ផ្គង់ទឹកស្អាត ធ្វើឲ្យមុខមាត់ជនបទភូមិវប្បធម៌-ជនបទថ្មីដាយត្រឿងមានការវិវឌ្ឍន៍។ ផ្តើមពីអ្វីៗដែលកំពុងប្រព្រឹត្តឡើង ប្រាកដជាជីវភាពមាមីងជនរួមជាតិខ្មែរនៅភូមិដាយត្រឿងនឹងមានការរីកចម្រើនជាងទៀត៕

ហាថាញ់-មុនី

ចែករំលែកអត្ថបទ

ពាក្យគន្លឹះ