គោលនយោបាយ -ការរស់នៅ គោលនយោបាយ

07/10/2026 - 14:08

ពីដំបូលផ្ទះកក់ក្ដៅ រហូតដល់មុខរបរចិញ្ចឹមជីវិត ផ្តល់ទីបង្អែកសម្រាប់ជនរួមជាតិខ្មែរ

ផ្ទះសម្បែងថ្មីរឹងមាំ ព្រមទាំងទម្រង់ប្រកបមុខរបរចិញ្ចឹមជីវិតជាក់ស្តែងដែលរណៈសិរ្សមាតុភូមិគ្រប់ថ្នាក់ កំពុងក្លាយជាទីបង្អែកដ៏រឹងមាំសម្រាប់ជនជាតិភាគតិចនៅទីក្រុងកឹងធើ។ ក្តីសប្បាយរីករាយពីការមានផ្ទះសម្បែងសមរម្យ និងមុខរបរស្ថិរភាព បាននិងកំពុងធ្វើឱ្យភូមិស្រុកកាន់តែមានភាពអភិវឌ្ឍន៍ នាំមកនូវរដូវបុណ្យសែនដូនតាសម្បូរសប្បាយ ពោរពេញដោយភាពកក់ក្តៅនិងមនោសញ្ចេតនា។

ផ្ទះមហាសាមគ្គី នាំមកក្តីរីករាយជូនគ្រួសារដែលមានជីវភាពលំបាកនៅឃុំឡាយហ្វា។

ការងារគិតគូរអំពីសុខុមាលភាពសង្គម និងកាត់បន្ថយភាពក្រីក្រដោយចីរភាព តែងតែជាភារកិច្ចស្នូលដ៏សំខាន់និងជាប្រចាំ ដែលរណសិរ្សមាតុភូមិវៀតណាមគ្រប់ថ្នាក់យកចិត្តទុកដាក់អនុវត្ត។ គិតត្រឹមចុងខែសីហា ឆ្នាំ២០២៦ រណសិរ្សមាតុភូមិគ្រប់ថ្នាក់ បានកៀរគរប្រភពធនធានដើម្បីសាងសង់និងប្រគល់ផ្ទះមហាសាមគ្គីចំនួន ៨៤០ ខ្នង ព្រមទាំងអនុវត្តទម្រង់ឧបត្ថម្ភមុខរបរចិញ្ចឹមជីវិតចំនួន ២៦៨ទម្រង់ ជូនគ្រួសារជាង ២.៤០០គ្រួសារ ជួយឱ្យប្រជាជនឈានដល់ស្ថិរភាពក្នុងជីវភាពជាបណ្តើរៗ និងម្ចាស់ការឈានឡើងចាកផុតពីភាពក្រីក្រដោយចីរភាព។ ក្នុងនោះ ការប្រមូលផ្តុំប្រភពធនធានឧបត្ថម្ភដល់តំបន់ដែលមានជនជាតិភាគតិចរស់នៅកុះករ ពិសេសគឺមាមីងជនជាតិខ្មែរ បាននាំមកនូវប្រសិទ្ធភាពយ៉ាងជាក់ស្តែង។

នៅឃុំឡាយហ្វា ស្នាមញញឹមនិងសេចក្តីរីករាយនៃការមានផ្ទះសម្បែងរឹងមាំ កំពុងបង្ហាញច្បាស់តាមផ្ទះថ្មីនីមួយៗ។ គិតចាប់ពីដើមឆ្នាំ២០២៦ មកទល់បច្ចុប្បន្ន គណៈកម្មាធិការរណៈសិរ្សមាតុភូមិវៀតណាមឃុំ បានសហការយ៉ាងសកម្មជាមួយអង្គការនានា ដើម្បីស្វែងរកប្រភពជំនួយសាងសង់ផ្ទះមហាសាមគ្គីចំនួន ២១ខ្នង និងផ្ទះមេត្តាធម៌ ១ ខ្នង តម្លៃក្នុងមួយខ្នង ៦០លានដុង។ ផ្ទះថ្មីនីមួយៗមិនត្រឹមតែជាជម្រកដ៏កក់ក្តៅ ជួយបាំងក្ដៅបាំងភ្លៀងប៉ុណ្ណោះទេ ថែមទាំងរួមចំណែករំលែកក្តីព្រួយបារម្ភអំពីផ្ទះសម្បែង និងបង្កជាទីបង្អែកបន្ថែមទៀត ដើម្បីឱ្យគ្រួសារនានាស្ងប់ចិត្តធ្វើពលកម្ម និងឈានឡើងលំនឹងជីវភាព។

លោកត្រឹងធឿន នៅភូមិព្រៃជាប់ A ឃុំឡាយហ្វា បានចែករំលែកដោយក្តីរំភើប៖ “ច្រើនឆ្នាំកន្លងមកនេះ គ្រួសារខ្ញុំនៅក្នុងផ្ទះទ្រុឌទ្រោម និងធ្លុះធ្លាយ ឱ្យតែដល់រដូវភ្លៀងធ្លាក់ ទឹកស្រក់ពេញផ្ទះ។ ឥឡូវនេះ បានរដ្ឋនិងរណសិរ្សឧបត្ថម្ភសាងសង់ផ្ទះមហាសាមគ្គីយ៉ាងរឹងមាំ គ្រួសារខ្ញុំមានក្តីរីករាយណាស់។ មានកន្លែងស្នាក់នៅរឹងមាំ ខ្ញុំលំនឹងចិត្តធ្វើការងារ គិតគូរដល់គ្រួសារនិងឈានឡើងក្នុងជីវភាពជាបណ្តើរៗ។ បុណ្យសែនដូនតាឆ្នាំនេះ គ្រួសារខ្ញុំទទួលបុណ្យសប្បាយរីករាយជាង និងកក់ក្តៅជាង ព្រោះមានផ្ទះថ្មី”។

ទន្ទឹមនឹងការឧបត្ថម្ភផ្ទះសម្បែង ការផ្ដល់ “ប្រភពទុនចិញ្ចឹមជីវិត” តាមរយៈទម្រង់មុខរបរចិញ្ចឹមជីវិត ក៏បានអនុវត្តព្រមគ្នាផងដែរ។ នៅឃុំថាញ់ថើយអាង គណៈកម្មាធិការរណសិរ្សមាតុភូមិវៀតណាមឃុំ បានសហការជាមួយបណ្តាផ្នែក និងអង្គការមហាជន ផ្សារភ្ជាប់ការងារកាត់បន្ថយភាពក្រីក្រ ទៅនឹងគោលនយោបាយឧបត្ថម្ភជាក់ស្តែង បង្កលក្ខណៈងាយស្រួលសម្រាប់គ្រួសារក្រនិងគ្រួសារក្បែរក្រ ម្ចាស់ការឈានឡើង។ តាមរយៈនោះ សមាជិកសមាគមជាច្រើនដែលមានជីវភាពលំបាក បានទទួលប្រភពទុន ពូជសត្វ និងការណែនាំបច្ចេកទេសចិញ្ចឹមសត្វ ស្របតាមលក្ខណះជាក់ស្តែង ដើម្បីបង្កើតមុខរបរចិញ្ចឹមជីវិតនិងបង្កើនប្រាក់ចំណូលជាបណ្តើរ ៗ។

ប្រគល់មុខរបរចិញ្ចឹមជីវិត បង្កកម្លាំងចលករឱ្យគ្រួសារក្រីក្រម្ចាស់ការឈានឡើង។

បងស្រី ថាច់ធីធឿង នៅភូមិហឹងថើយ ឃុំថាញ់ថើយអាង មិនអាចលាក់បាំងក្តីសប្បាយរីករាយនៅពេលបានទទួលមេគោពូជល្អៗចំនួន ៣ ក្បាល ពីប្រភពទុនឧបត្ថម្ភរបស់រណសិរ្ស។ បងស្រី ថាច់ធីធឿង បានឱ្យដឹង៖ “គ្រួសារខ្ញុំគ្មានដីផលិត ប្រាក់ចំណូលមិនស្ថិតស្ថេរ។ ពេលបានរដ្ឋអំណាចពិនិត្យឧបត្ថម្ភមេគោពូជចំនួន ៣ ក្បាល ខ្ញុំសប្បាយចិត្តណាស់។ ខ្ញុំខិតខំថែទាំយ៉ាងដិតដល់ កាត់ស្មៅរាល់ថ្ងៃ និងអនុវត្តត្រឹមត្រូវតាមការណែនាំបង្ការជំងឺរបស់កម្មាភិបាលបសុពេទ្យ។ ហ្វូងគោនេះ គឺជាទ្រព្យសម្បត្តិដ៏មានតម្លៃបំផុត និងជាក្តីសង្ឃឹមសម្រាប់គ្រួសារខ្ញុំមានប្រាក់ចំណូលស្ថិរភាពនាពេលខាងមុខ”។

លោកស្រី ង្វៀងធីហ្វែជី អនុប្រធានគណៈកម្មាធិការរណសិរ្សមាតុភូមិវៀតណាមទីក្រុងកឹងធើ បានបញ្ជាក់៖ រណសិរ្សមាតុភូមិគ្រប់ថ្នាក់ តែងតែកំណត់ថា ការឧបត្ថម្ភផ្ទះសម្បែង ត្រូវតែដើរទន្ទឹមគ្នានឹងដំណោះស្រាយមុខរបរចិញ្ចឹមជីវិតរយៈពេលវែង។ នៅពេលប្រជាជនមានផ្ទះសុវត្ថិភាពសម្រាប់ជ្រកកោន និងមានមធ្យោបាយបង្កប្រាក់ចំណូល ពួកគាត់នឹងមានលទ្ធភាព ជំនឿចិត្តបន្ថែមនិងមានឆន្ទៈក្នុងការកសាងជីវភាព។ ការព្រួតដៃគ្នារបស់សង្គមទាំងមូលនាពេលកន្លង បានរួមចំណែកនាំយកបណ្តាគោលការណ៍និងគោលនយោបាយចូលក្នុងជីវភាពរស់នៅ តាមរយៈការសាងសង់ផ្ទះជូន ពូជសត្វ និងទម្រង់សេដ្ឋកិច្ចមានប្រសិទ្ធភាព នៅតាមភូមិឋាននីមួយៗ។ នាពេលខាងមុខ រណសិរ្សមាតុភូមិគ្រប់ថ្នាក់ នឹងបន្តពង្រីកតួនាទីជាស្ពានតភ្ជាប់ បង្កើនការកៀរគរប្រភពធនធានក្នុងសង្គម សហការអនុវត្តប្រកបដោយប្រសិទ្ធភាពនូវបណ្តាកម្មវិធីសុខុមាលភាពសង្គម ជួយឧបត្ថម្ភផ្ទះសម្បែងនិងមុខរបរចិញ្ចឹមជីវិត។ តាមរយៈនោះ រួមចំណែកលើកកម្ពស់គុណភាពជីវភាពនិងយកចិត្តទុកដាក់គិតគូរដល់គ្រួសារក្រីក្រ គ្រួសារដែលមានជីវភាពលំបាកឱ្យបានកាន់តែល្អប្រសើរ ជាពិសេសគឺជនជាតិភាគតិច។

ចាប់ពីដំបូលផ្ទះថ្មីៗ រហូតដល់ទម្រង់មុខរបរចិញ្ចឹមជីវិតសមស្រប ការព្រួតដៃគ្នារបស់គ្រប់ថ្នាក់ គ្រប់ផ្នែក រណសិរ្សនិងសហគមន៍ កំពុងបណ្តុះកម្លាំងចលករ ដើម្បីឱ្យមាមីងជនរួមជាតិ ឈានឡើងលំនឹងជីវភាពជាបណ្តើរៗ។ នៅក្នុងបរិយាកាសបុណ្យសែនដូនតា ក្តីសប្បាយរីករាយបានកើនឡើងទ្វេឡើង នៅពេលគ្រួសារនីមួយៗមានផ្ទះរឹងមាំ មានមុខរបរចិញ្ចឹមជីវិតច្បាស់លាល់ និងកាន់តែមានជំនឿចិត្តអំពីជីវភាពសម្បូរសប្បាយ សុភមង្គល៕

ហុងទើ - ថាច់ធី

ចែករំលែកអត្ថបទ

ពាក្យគន្លឹះ