វប្បធម៌-សិល្បៈ វប្បធម៌

23/09/2026 - 05:45

វិចិត្រករអន្តរជាតិចូលរួមកម្មវិធី "ប្អូនគូរអំពីក្តីប្រាថ្នា"

នៅថ្ងៃទី ២២ ខែកញ្ញា នៅសង្កាត់បាកលីវ ខេត្តកាម៉ាវ បានរៀបចំកម្មវិធី "ប្អូនគូរអំពីក្តីប្រាថ្នា" ដោយមានការចូលរួមពីវិចិត្រករអន្តរជាតិ ៥០ រូប មកពីសមាគមគំនូរពណ៌ទឹកអន្តរជាតិ។ នេះជាសកម្មភាពមួយក្នុងថ្ងៃចុងក្រោយនៃព្រឹត្តិការណ៍សិល្បៈនិងមនុស្សធម៌កាម៉ាវ Art Tour ២០២៦ ក្រោមប្រធានបទ "Colors of the Southern Horizon – ពណ៌សម្បូរនៅចុងប៉ូចភាគខាងត្បូង"។ នៅក្នុងកម្មវិធីនេះ វិចិត្រករអន្តរជាតិទាំង ៥០ រូបបានរួមគ្នាបង្កើតស្នាដៃគំនូរមួយដែលមានប្រវែង ១០ ម៉ែត្រ; ប្អូនៗកុមារក៏បានបង្ហាញក្តីប្រាថ្នារបស់ខ្លួន តាមរយៈគំនូរដែលពោរពេញដោយពណ៌ដ៏ស្រស់ស្អាត ប្រកបដោយភាពច្នៃប្រតិដ្ឋ។

ប្អូនៗចូលរួមកម្មវិធី "ប្អូនគូរអំពីក្តីប្រាថ្នា" ជាមួយវិចិត្រករអន្តរជាតិ។

នៅក្នុងព្រឹត្តិការណ៍នេះ លោកហ្វិញហុងយុង អនុប្រធានមន្ទីរវិទ្យាសាស្ត្រនិងបច្ចេកវិទ្យាខេត្តកាម៉ាវ បានវាយតម្លៃខ្ពស់ចំពោះដំណើរទស្សនកិច្ចសិក្សា ការចុះទៅស្វែងយល់ផ្ទាល់នៅតំបន់ដីជ្រោយ និងការបង្កើតស្នាដៃសិល្បៈរបស់សិល្បករនានាក្នុងរយៈពេលកន្លងមក។ ព្រឹត្តិការណ៍នេះ មិនត្រឹមតែរួមចំណែកផ្សព្វផ្សាយរូបភាព វប្បធម៌ និងមនុស្សខេត្តកាម៉ាវប៉ុណ្ណោះទេ ថែមទាំងបញ្ជាក់សិល្បៈគឺជាភាសារួមដែលតភ្ជាប់បណ្ដាប្រទេសនិងសហគមន៍។

សង្កត់ធ្ងន់លើចំណុចសំខាន់នៃកម្មវិធីនេះ វិចិត្រករអន្តរជាតិបានរួមគ្នាបង្កើតស្នាដៃសិល្បៈខ្នាតធំមួយដែលមានប្រវែង ១០ ម៉ែត្រដែលបង្ហាញពីការលាយបញ្ចូលគ្នារវាងរចនាបថ ទស្សនៈ និងខឿនវប្បធម៌ផ្សេងៗ។ ជាមួយគ្នានេះ សកម្មភាព "ប្អូនគូរអំពីក្តីប្រាថ្នា" ដោយមានការចូលរួមពី "វិចិត្រករកុមារ" ក្នុងតំបន់ចំនួន ៥០ នាក់ បានបង្កឱកាសផ្លាស់ប្តូរនិងបន្តមរតកពីសិល្បករល្បីៗទៅកាន់អ្នកជំនាន់ក្រោយ។ តាមរយៈកម្មវិធីនេះ កុមារមិនត្រឹមតែទទួលបានការណែនាំអំពីបំណិនគំនូរប៉ុណ្ណោះទេ ថែមទាំងទទួលបានការលើកទឹកចិត្តនិងការបំផុសគំនិតដើម្បីមានទំនុកចិត្តចាប់យកក្តីប្រាថ្នារបស់ខ្លួន។

ជំនួសមុខថ្នាក់ដឹកនាំខេត្តកាម៉ាវ លោកហ្វិញហុងយុង អនុប្រធានមន្ទីរវិទ្យាសាស្ត្រនិងបច្ចេកវិទ្យាខេត្តកាម៉ាវ បានថ្លែងអំណរគុណយ៉ាងជ្រាលជ្រៅចំពោះសិល្បករ អង្គការ អាជីវកម្មនិងអ្នកជំនួយឧបត្ថម្ភទាំងអស់ដែលបានចូលរួមគាំទ្រកម្មវិធី; ជាមួយគ្នានេះ លោកសង្ឃឹមថា ស្នាមជក់និងមនោសញ្ចេតនារបស់សិល្បករនឹងបន្តផ្សព្វផ្សាយរូបភាពខេត្តកាម៉ាវ ទៅកាន់សហគមន៍សិល្បៈនិងសាធារណជនទាំងក្នុងនិងក្រៅប្រទេស។ កម្មវិធីនេះ មិនត្រឹមតែមានអត្ថន័យក្នុងវិស័យសិល្បៈប៉ុណ្ណោះទេ ថែមទាំងជាសកម្មភាពចែករំលែកក្តីស្រឡាញ់ និងការយកចិត្តទុកដាក់ចំពោះកុមារ។ ក្នុងឱកាសនេះដែរ អំណោយចំនួន ៥០ ចំណែកក៏បានផ្ដល់ជូនប្អូនៗកុមារ ដើម្បីជាការលើកទឹកចិត្តនិងបន្ថែមជំនឿចិត្តដល់ពួកគេក្នុងការចិញ្ចឹមក្តីប្រាថ្នាសម្រាប់អនាគត៕

យ្វីអាញ - ពេជ្រសឿន

ចែករំលែកអត្ថបទ

ពាក្យគន្លឹះ