សុខភាព - អប់រំ សុខភាព

03/09/2026 - 14:02

បង្កើនគុណភាពថែទាំសុខភាពសម្រាប់តំបន់ជនជាតិភាគតិច

ប៉ុន្មានឆ្នាំកន្លង ទីក្រុងកឹងធើ បានផ្សព្វផ្សាយនូវយន្តការនិងគោលនយោបាយជាច្រើន ដោយបានផ្តល់ប្រភពធនធានមិនតិចទេ ដើម្បីអភិវឌ្ឍសេដ្ឋកិច្ច-សង្គមនៅតំបន់ជនជាតិភាគតិច។ ក្នុងនោះ គោលនយោបាយឧបត្ថម្ភប័ណ្ណធានារ៉ាប់រងសុខាភិបាល បានរួមចំណែកលើកកម្ពស់គុណភាពនៃការរស់នៅរបស់ជនជាតិភាគតិច ព្រមទាំងបង្កើននិងពង្រឹងផែនសាមគ្គីទូទាំងជនជាតិឱ្យកាន់តែស្អិតល្មួត។

វេជ្ជបណ្ឌិតពិនិត្យជំងឺជូនមាមីង។

បងស្រីថាច់ធីសន នៅភូមិគិញដាវ ឃុំហូដាក់គៀង ឱ្យដឹង៖ “ឪពុកខ្ញុំមានជំងឺ ហើយបានទៅមន្ទីរពេទ្យព្យាបាល។ តាមរយៈការវះកាត់ប្តូរត្រគាក នៅមន្ទីរពេទ្យពហុព្យាបាលសុកត្រាំង ទីក្រុងកឹងធើ គ្រួសារខ្ញុំមានការលំបាកខ្លាំងណាស់និង គ្មានលទ្ធភាពទេ ប៉ុន្តែគ្រូពេទ្យបានធ្វើការវះកាត់ដោយជោគជ័យហើយធានារ៉ាប់រងសុខាភិបាលបានទូទាត់ប្រាក់ ១០០% ដូច្នេះខ្ញុំត្រេកអរខ្លាំងណាស់”។ ចំណែកអ្នកមីងស៊ើងធីគិន នៅឃុំយ៉ាហ្វា រៀបរាប់ទាំងក្តីរំភើប៖ “ខ្ញុំគេងមិនលក់ និងឈឺមួយចំហៀងខ្លួនខាងឆ្វេង ដោយសារស្ថានភាពសេដ្ឋកិច្ចគ្រួសារ ជួបការលំបាក ខ្ញុំមិនដែលបានទៅពិនិត្យ និងព្យាបាលជំងឺនៅមន្ទីរពេទ្យថ្នាក់លើទេ។ ពេលឈឺខ្លាំង ខ្ញុំបានត្រឹមទៅដំណាក់សុខាភិបាលឃុំយ៉ាហ្វា ដើម្បីពិនិត្យនិងសុំថ្នាំពេទ្យយកមកផឹក ព្រោះបានរដ្ឋជួយបង់ប្រាក់តាមរយៈធានារ៉ាប់រងសុខាភិបាល។ ខ្ញុំក៏មិនដែលបានប្រើប្រាស់ម៉ាស៊ីនឬឧបករណ៍ទំនើបៗ ពេលពិនិត្យជំងឺទេ... ដូច្នេះ ពេលមានគ្រូពេទ្យថ្នាក់ លើចុះមកពិនិត្យជំងឺដោយឥតគិតថ្លៃនៅដំណាក់សុខាភិបាលឃុំយ៉ាហ្វា ខ្ញុំបានមកតាំងពីព្រលឹម ដើម្បីបានពិនិត្យសុខភាព ហើយខ្ញុំបានគ្រូពេទ្យពិនិត្យ និងផ្តល់ថ្នាំដោយឥតគិតថ្លៃ”។

ការងារថែរទាំសុខភាពប្រជាជនមានសារៈសំខាន់ខ្លាំងណាស់ រួមចំណែកលើកកម្ពស់គុណភាពនៃការរស់នៅរបស់ប្រជាជន។ គោលនយោបាយជំនួយប័ណ្ណធានារ៉ាប់រងសុខាភិបាល គឺជាគោលនយោបាយសុខុមាលភាពសង្គមមួយ ដែលជួយឱ្យប្រជាជន អាចទទួលបានសេវាកម្មពិនិត្យនិងព្យាបាលជំងឺ ព្រមទាំងកាត់បន្ថយការចំណាយ។ ចំពោះតំបន់ជនជាតិភាគតិច ជាកន្លែងដែលជីវភាពរបស់ប្រជាជនមួយចំនួន នៅជួបការលំបាកការអនុវត្តបានល្អនូវគោលនយោបាយធានារ៉ាប់រងសុខាភិបាលមានអត្ថន័យសំខាន់ក្នុងការការពារ និងលើកកម្ពស់សុខ ភាពប្រជាជន។ ទោះជាយ៉ាងណាក៏ដោយការងារពិនិត្យ និងព្យាបាលជំងឺដោយធានារ៉ាប់រងសុខាភិបាលនៅតំបន់ជនជាតិភាគតិច នៅមានកម្រិតនៅឡើយ ដូចជា មូលដ្ឋានសម្ភារៈមិនទាន់ព្រមៗគ្នា កង្វះធនធានមនុស្សផ្នែកសុខាភិបាល ការធ្វើដំណើររបស់ប្រជាជនមានការលំបាក និងការយល់ដឹងអំពីផលប្រយោជន៍នៃធានារ៉ាប់រងសុខាភិបាលនៅមានកម្រិត។ ដូច្នេះហើយ ការលើកកម្ពស់គុណភាពនៃការពិនិត្យជំងឺដោយប្រើប្រាស់ធានារ៉ាប់រងសុខាភិបាល សម្រាប់ជនជាតិភាគតិច គឺជាភារកិច្ចដែលត្រូវយកចិត្តទុកដាក់និងអនុវត្តឱ្យបានព្រមៗគ្នា។ វេជ្ជបណ្ឌិតឯកទេសកម្រិត ២ ហាក្វាងប៊ិញ ប្រធានការិយាល័យផែនការទូទៅនៃមន្ទីរពេទ្យពហុព្យាបាលសុកត្រាំង ទីក្រុងកឹងធើ ឱ្យដឹង៖ “មន្ទីរពេទ្យតែងបង្កលក្ខណៈងាយស្រួល ដើម្បីផ្តល់នូវសេវាកម្មបច្ចេកទេសខ្ពស់ ដែលជាសេវាកម្មចាំបាច់ស្របតាមការកំណត់នៃច្បាប់ ដើម្បីឱ្យប្រជាជនទទួលបានផលប្រយោជន៍ល្អបំផុត។ សេវាកម្មថែទាំសុខភាពនៅមូលដ្ឋាន ពិសេសគឺជំងឺធ្ងន់ធ្ងរនិងជំងឺដែលត្រូវប្រើសេវាកម្មបច្ចេកទេសខ្ពស់ ប្រាក់ចំណាយក៏ច្រើន។ ប្រាក់ចំណាយដែលធានារ៉ាប់រងជួយបង់ថ្លៃឱ្យ គឺជួយសម្រាលដល់ប្រជាជនយ៉ាងច្រើន និងធានាបាននូវ គុណភាពនៃការរស់នៅសម្រាប់អ្នកជំងឺ”។

ដោយការយកចិត្តទុកដាក់របស់រដ្ឋ កិច្ចសហការរបស់គណៈ ផ្នែកគ្រប់លំដាប់ថ្នាក់ និងភាពម្ចាស់ការរបស់សហគមន៍ ការងារពិនិត្យនិងព្យាបាលជំងឺ ជាពិសេសគឺធានារ៉ាប់រងសុខាភិបាលនៅតំបន់ជនជាតិភាគតិច នឹងបានលើកកម្ពស់ជាបណ្តើរៗ រួមចំណែកការពារសុខភាពប្រជាជននិងជំរុញការអភិវឌ្ឍសេដ្ឋកិច្ច-សង្គមប្រកបដោយចីរភាពនៅតំបន់ជនជាតិភាគតិច៕

ដាលីន

ចែករំលែកអត្ថបទ

ពាក្យគន្លឹះ