គោលនយោបាយ -ការរស់នៅ ការរស់នៅ

24/08/2026 - 20:58

បងថាច់ស៊ើង មានជីវភាពធូរធារដោយសារចិញ្ចឹមគោបន្ធាត់

បងថាច់ស៊ើង កើតឆ្នាំ ១៩៧០ នៅភូមិព្រែកឈូក ឃុំង៉ាយទឺ ខេត្តវិញឡុង មានប្រភពចំណូលលំនឹង សេដ្ឋកិច្ចគ្រួសារបានធូរធារឡើងផ្តើមពីចិញ្ចឹមគោមេបន្តពូជ និងចិញ្ចឹមគោបន្ធាត់។ ជាង ១០ ឆ្នាំផ្សារភ្ជាប់នឹងរបរចិញ្ចឹមគោ គាត់ឆ្លៀតយកអនុផលក្រោយពីប្រមូលផលស្រូវ ដាំស្មៅ និងកាកបាយសា្ររពីមូលដ្ឋានបិទស្រា ដើម្បីម្ចាស់ការបានចំណីឱ្យគោ និងបន្ថយចំណាយដល់ការចិញ្ចឹម។

គ្រួសារបងថាច់ស៊ើង មានក្តីរីករាយជាមួយនឹងផ្ទះទើបសង់ថ្មី។

បងថាច់ស៊ើង ឱ្យដឹង៖ កសិករខ្មែរនៅភូមិព្រែកឈូកភាគច្រើនដាំដំណាំហូបផ្លែជាចម្បង ហេតុនោះគាត់ជ្រើសទិសដៅផ្សេងវិញ គឺអភិវឌ្ឍចិញ្ចឹមគោ។ ដំបូងឡើយ គ្រួសារគាត់ចិញ្ចឹមគោមេបន្តពូជ ក្រោយមកដោយឃើញចិញ្ចឹមគោបន្ធាត់បាននាំមកប្រសិទ្ធភាពសេដ្ឋកិច្ចខ្ពស់ ក៏បង្វែរមកអនុវត្តទម្រង់នេះ។ បច្ចុប្បន្ន គ្រួសារគាត់ធ្វើស្រែ ១០ កុង ឆ្លៀតយកប្រភពចំបើងជាចំណីឱ្យគោ និងដាំស្មៅកន្លះកុង។ ទន្ទឹមនឹងនោះ គាត់នៅទាំងឆ្លៀតយកកាកបាយស្រារធ្វើជាចំណីដល់គោបន្ថែមទៀតផង។ ជួយម្ចាស់ការប្រភពចំណី គ្រួសារកាត់បន្ថយទិញចំបើង និងប្រភេទចំណីផ្សេងទៀត តាមរយៈនោះជួយបន្ថយការចំណាយក្នុងការចិញ្ចឹមគួរឱ្យកត់សម្គាល់។

តាមប្រសាសន៍របស់បងស៊ើង ចិញ្ចឹមគោបន្ធាត់មិនលំបាកពេកទេ ប៉ុន្តែអ្នកចិញ្ចឹមគប្បីយកចិត្តទុកដាក់ចំពោះរបបចំណី ការថែទាំ និងបង្ការជំងឺ។ ចំណីជាសំខាន់រួមមានកាកបាយស្រា កន្ទក់ ស្មៅ និងចំបើង។ រៀងរាល់ថ្ងៃ គាត់តែងតាមដានសុខភាពគោ សម្អាតទ្រុង ចាក់វ៉ាក់សាំងបង្ការឱ្យបានគ្រប់គ្រាន់ និងពេលគោមានអាការខុសប្រក្រតីត្រូវដោះស្រាយឱ្យទាន់ពេលវេលា។ “ចិញ្ចឹមគោបន្ធាត់ ជាសំខាន់គឺ ថែទាំឱ្យបានល្អ និងចាក់វ៉ាក់សាំងបង្ការជំងឺឱ្យបានគ្រប់គ្រាន់។ គោមានសុខភាពល្អ ផ្គត់ផ្គង់ចំណីគ្រប់គ្រាន់គឺគោឆាប់ធំ ឡើងទម្ងន់រហ័ស ពេលលក់នឹងមានតម្លៃខ្ពស់ជាង” បងស៊ើង ឱ្យដឹងដូច្នេះ។

បងថាច់ស៊ើង ថែទាំគោបន្ធាត់។

អាស្រ័យទៅលើទម្ងន់ និងដំណាក់កាលរបស់ទីផ្សារ គោបន្ធាត់មួយក្បាលៗរបស់គ្រួសារបងលក់ដោយតម្លៃពី ៥០ - ៥៥លានដុង។ ក្រោយពីលក់មួយល្បាស់រួច បងបន្តជ្រើសទិញកូនគោដែលល្អៗដើម្បីចិញ្ចឹមបន្តទៀត។ ដោយមានបទពិសោធន៍ច្រើនឆ្នាំ គាត់ម្ចាស់ការជាងមុនក្នុងការជ្រើសគោ ថែទាំ និងកំណត់បានពេលវេលាលក់គោ តាមរយៈនោះ រក្សាប្រភពចំណូលលំនឹងជូនគ្រួសារ។ បងស៊ើង ឱ្យដឹង៖ បើប្រៀបនឹងធ្វើស្រែ ចិញ្ចឹមគោបន្ធាត់ផ្តល់ប្រាក់ចំណេញខ្ពស់ជាង។ គ្រួសារបងមានប្រាក់ចំណូលពីស្រូវផង ហើយយកចំបើងធ្វើជាចំណីឱ្យគោផង; ទន្ទឹមនឹងដាំស្មៅ និងឆ្លៀតយកកាកបាយស្រាដើម្បីកាត់បន្ថយប្រាក់ចំណាយក្នុងការទិញចំណីឱ្យគោ។ ម្យ៉ាងវិញទៀត ដោយសារគួបផ្សំធ្វើស្រែជាមួយនឹងចិញ្ចឹមគោបន្ធាត់ ទើបគ្រួសារបងស៊ើងប្រិតសំចៃបានដើមទុន។ ប្រាក់ចំណូលពីធ្វើស្រែ និងចិញ្ចឹមគោ គាត់សង់បានផ្ទះមួយខ្នងមានតម្លៃជាង ១ ពាន់លានដុង។ ចំពោះគាត់ នេះគឺជាសមិទ្ធផលក្រោយពីការខិតខំប្រឹងប្រែងពលកម្មអស់រយៈកាលជាច្រើនឆ្នាំ និងចេះឆ្លៀតប្រើប្រាស់អស់ពីលទ្ធភាពនូវធនធានដែលមានស្រាប់ដើម្បីអភិវឌ្ឍសេដ្ឋកិច្ច។ "ធ្វើស្រែជាសំខាន់គឺដើម្បីយកចំបើង ចំណែកចិញ្ចឹមគោទើបបង្កប្រភពចំណូលបន្ថែមគួរឱ្យកត់សម្គាល់។ ពេលឆ្លៀតប្រើប្រាស់ចំណីដែលមានស្រាប់ ការចំណាយថយចុះ ប្រាក់ចំណេញកើនឡើង" - បងស៊ើង ឱ្យដឹងដូច្នេះ។

ទម្រង់ចិញ្ចឹមគោបន្ធាត់ គួបផ្សំនឹងធ្វើស្រែរបស់បងថាច់ស៊ើង បានបង្ហាញឱ្យឃើញពីលទ្ធផលដ៏មានប្រសិទ្ធភាពនៃការប្រើប្រាស់អនុផលពីកសិកម្មក្នុងការអភិវឌ្ឍចិញ្ចឹមសត្វ។ ផ្តើមពីប្រភពចំបើងក្រោយពីប្រមូលផលស្រូវ ដាំស្មៅ និងកាកបាយស្រាពីមូលដ្ឋានបិទស្រា ហេតុនោះគាត់ម្ចាស់ការបានចំណីឱ្យគោ កាត់បន្ថយការចំណាយ។ តាមរយៈនោះ ទម្រង់មិនត្រឹមតែជួយគ្រួសារគាត់បង្កើនប្រាក់ចំណូលប៉ុណ្ណោះទេ ថែមទាំងបើកទិសដៅអភិវឌ្ឍន៍សេដ្ឋកិច្ចសមស្របជាមួយនឹងលក្ខណៈផលិតនៅភូមិភាគទៀតផង៕

ទីទុយ - វិមាន

ចែករំលែកអត្ថបទ

ពាក្យគន្លឹះ