គោលនយោបាយ -ការរស់នៅ ការរស់នៅ

18/08/2026 - 18:26

ផ្តើមពីគោពីរក្បាល បានបង្កើតទៅជាហ្វូងគោ

ផ្ដើមពីគោមេពីរក្បាល លោកថាច់គ្វីឡា កើតឆ្នាំ១៩៧៥ នៅភូមិក្នក ឃុំសុងឡុក ខេត្តវិញឡុង បានព្យាយាមបង្កើតជាហ្វូងគោ ដោយរួមផ្សំជាមួយការធ្វើស្រែ ដាំស្មៅ ដើម្បីអភិវឌ្ឍការចិញ្ចឹមសត្វមានប្រសិទ្ធភាពជាបណ្តើរៗ នាំមកនូវប្រាក់ចំណូលរាប់រយលានដុងក្នុងមួយឆ្នាំៗ។

បងថាច់គ្វីឡា ត្រៀមយកចំបើងឱ្យចំណីគោ។

បងថាច់គ្វីឡាកើតនិងធំដឹងក្តីក្នុងគ្រួសារកសិករខ្មែរមួយ ក្រោយពីបញ្ចប់ការសិក្សាចំណេះដឹងទូទៅ គាត់បានជ្រើសរើសរៀនវិជ្ជាជីវៈកម្រិតមធ្យមជំនាញពេទ្យសត្វ។ ជាមួយនឹងចំណេះដឹងដែលមាន គាត់បានសម្រេចចិត្តអភិវឌ្ឍសេដ្ឋកិច្ចគ្រួសារតាមរយៈការចិញ្ចឹមគោ។ ក្រោយពីរៀបការរួច គាត់បានទិញគោពីរក្បាលដោយតម្លៃ ៦០០.០០០ ដុង នៅឆ្នាំ១៩៩៤។ ផ្តើមពីដើមទុនដ៏តិចតួចដំបូងនេះ គាត់បានកំណត់ច្បាស់ថា បើចង់ពង្រីកហ្វូងគោត្រូវតែយកចិត្តទុកដាក់លើការជ្រើសរើសពូជ ថែទាំ និងបង្ការជំងឺ។ គាត់បានផ្តោតលើការចិញ្ចឹមគោបន្តពូជ ដោយជ្រើសរើសមេគោដែលមានសុខភាពល្អដើម្បីបង្កើតហ្វូង ចំណែកគោឈ្មោល គឺចិញ្ចឹមបំប៉នឱ្យធាត់ ហើយពេលមានទម្ងន់សមស្រប គាត់ក៏លក់។ ដោយសារមានចំណេះដឹងជំនាញផ្នែកពេទ្យសត្វ គាត់បានអនុវត្តយ៉ាងសកម្មនូវអ្វីដែលបានរៀនទៅក្នុងការចិញ្ចឹមសត្វជាក់ស្តែង។ ពិសេស គាត់បានអនុវត្តបង្កាត់ពូជសិប្បនិម្មិតដោយខ្លួនឯងដើម្បីលើកកម្ពស់គុណភាពហ្វូងគោ។

បងថាច់គ្វីឡា (ខាងស្តាំដៃ) ដោះដូរជាមួយកម្មាភិបាលភូមិភាគពីទម្រង់
ចិញ្ចឹមគោរបស់គ្រួសារ។

ផ្តើមពីគោ ២ ក្បាលដំបូង មកដល់ពេលនេះ ហ្វូងគោរបស់បងបានកើនឡើងដល់ ២៥ ក្បាល ដែលមានពូជសំខាន់ៗគឺ៖ គោបារាំង គោបង្កាត់ស៊ីន និងគោប្រាម៉ាន់។ ក្នុងចំណោមពូជនោះ មានគោសម្រាប់បន្តពូជចំនួន ២០ ក្បាលនិងគោ ៥ ក្បាលទៀតកំពុងបានចិញ្ចឹមបំប៉នយកសាច់ត្រៀមលក់។ ដើម្បីម្ចាស់ការលើប្រភពចំណីសម្រាប់ហ្វូងគោ គ្រួសារគាត់មានផ្ទៃដី ៣៥ កុងដែលក្នុងនោះ ៣០ កុងធ្វើស្រែសម្រាប់បម្រើដល់ការផលិតផងនិងសម្រាប់យកចំបើងធ្វើជាចំណីគោផង ចំណែកដី ៥ កុងដែលនៅសល់គឺទុកសម្រាប់ដាំស្មៅ។ អាស្រ័យហេតុនេះ គ្រួសារគាត់អាចម្ចាស់ការលើប្រភពចំណី បន្ថយប្រាក់ចំណាយ និងបង្កើនប្រសិទ្ធភាពក្នុងការចិញ្ចឹម។ តាមលោកថាច់គ្វីឡា ជារៀងរាល់ឆ្នាំ គ្រួសារគាត់បានលក់គោបំប៉នប្រមាណ ១០ ក្បាល ក្នុងតម្លៃ ៥៥ លានដុងក្នុងមួយក្បាល អាស្រ័យលើដំណាក់កាលនិងទម្ងន់ នាំមកនូវប្រាក់ចំណូលរាប់រយលានដុង។ ទន្ទឹមនឹងនោះ ហ្វូងគោបន្តពូជត្រូវបានរក្សាជាប្រចាំ ជួយឱ្យគ្រួសារគាត់មានកូនគោសម្រាប់ពង្រីកហ្វូងឬក៏ចិញ្ចឹមបំប៉នឱ្យឆាប់ធំ។ អាស្រ័យរក្សាទម្រង់ចិញ្ចឹមនេះក្នុងរយៈពេលយូរ ការចិញ្ចឹមគោបានក្លាយជាប្រភពចំណូលដ៏សំខាន់មួយ រួមចំណែកធ្វើឱ្យជីវភាពគ្រួសារមានស្ថិរភាព។

មិនត្រឹមតែយកចិត្តទុកដាក់លើការអភិវឌ្ឍសេដ្ឋកិច្ចគ្រួសារប៉ុណ្ណោះទេ បងគ្វីឡា ថែមទាំង ចែករំលែកបទពិសោធន៍ជាមួយមាមីងក្នុងភូមិផងដែរ។ នៅពេលមានគ្រួសារណាត្រូវការជំនួយគាត់តែងជួយណែនាំចាប់តាំងពីការជ្រើសរើសពូជ ថែទាំ...។ តាមរយៈនោះ បានរួមចំណែកជួយប្រជាជនអនុវត្តបច្ចេកទេសបានសមស្រប លើកកម្ពស់គុណភាពហ្វូងគោនិងប្រសិទ្ធភាពនៃការចិញ្ចឹម។ មិនត្រឹមតែប៉ុណ្ណោះ គាត់ថែមទាំងសហការយ៉ាងសកម្មជាមួយផ្នែកសមត្ថកិច្ចនៃឃុំសុងឡុក ក្នុងការងារបង្ការនិងទប់ស្កាត់ជំងឺលើសត្វចិញ្ចឹម។ នៅពេលភូមិភាគផ្សព្វផ្សាយធ្វើការចាក់វ៉ាក់សាំងបង្ការ បងបានចូលរួមចលនាប្រជាជនឱ្យអនុវត្ត ពិសេសចំពោះជំងឺគ្រោះថ្នាក់ដូចជា ជំងឺអុតក្តាមនិងជំងឺដុំពកលើស្បែក។ តាមរយៈនេះ បងបានរួមចំណែកលើកកម្ពស់ការយល់ដឹងអំពីការបង្ការជំងឺរបស់អ្នកចិញ្ចឹមសត្វ កាត់បន្ថយហានិភ័យនៃការផ្ទុះឡើងនូវជំងឺ និងការពារសត្វពាហនៈនៅលើភូមិសាស្រ្ត។

ចាប់ផ្ដើមពីគោ២ក្បាល ជាមួយទុនដើមដំបូង ៦០០.០០០ ដុង ក្រោយពីផ្សារភ្ជាប់ជាមួយរបរនេះច្រើនឆ្នាំមក បងគ្វីឡា បានពង្រីកហ្វូងសត្វជាបន្តបន្ទាប់ ប្រមូលផ្ដុំបទពិសោធន៍ និងសាងសង់ទម្រង់សមស្របតាមលក្ខណៈគ្រួសារ។ លទ្ធផលដែលទទួលបានគឺជាផ្លែផ្កានៃភាពឧស្សាហព្យាយាម អត់ធ្មត់ ចង់ចេះចង់ដឹង និងអនុវត្តចំណេះដឹងជំនាញចូលក្នុងការផលិត។ បច្ចុប្បន្ន ភូមិភាគកំពុងរៀបចំស្នើសុំថ្នាក់លើពិនិត្យនិងស្ងើចសរសើរបងថាច់គ្វីឡា ជាកសិករផលិតនិងធ្វើអាជីវកម្មឆ្នើម៕

ទីទុយ-ដាលីន

ចែករំលែកអត្ថបទ

ពាក្យគន្លឹះ