សុខភាព - អប់រំ សុខភាព

16/07/2026 - 07:30

ព្រួតដៃថែទាំសុខភាពអ្នកវ័យចាស់

រយៈពេលកន្លង ការងារថែទាំសុខភាពអ្នកវ័យចាស់នៅទីក្រុងកឹងធើ ត្រូវបានយកចិត្តទុកដាក់ផ្សព្វផ្សាយអនុវត្តដោយសកម្មភាពជាក់ស្តែងជាច្រើន។ តាមរយៈនោះ រួមចំណែកលើកកម្ពស់លទ្ធភាពទទួលបានសេវាសុខាភិបាល ជួយឱ្យអ្នកវ័យចាស់លំនឹងចិត្តរស់នៅដោយរីករាយ និងមានសុខភាពល្អជារៀងរាល់ថ្ងៃ។

សកម្មភាពថែទាំសុខភាពអ្នកវ័យចាស់នៅឃុំវិញហាយ ទីក្រុងកឹងធើ។

គិតត្រឹមចុងឆ្នាំ២០២៥ ទីក្រុងកឹងធើមានអ្នកវ័យចាស់ជិត ៥៦៧.៨០០ នាក់។ ទីក្រុងតែងយកចិត្តទុកដាក់ចង្អុលការអនុវត្តល្អនូវការថែទាំសុខភាពអ្នកវ័យចាស់ ដោយមានអត្រាអ្នកវ័យ ចាស់ចូលរួមធានារ៉ាប់រងសុខាភិបាលសម្រេចបាន ៨៩,៥៨% ហើយអត្រាអ្នកមានអាយុចាប់ពី ៦០ ឆ្នាំឡើងទៅទទួលបានការពិនិត្យសុខភាពជាប្រចាំ សម្រេចបាន ៤២,៩% រួមចំណែកលើកកម្ពស់ប្រសិទ្ធភាពនៃការថែទាំនិងការពារសុខភាពជូនប្រជាជន។

នៅឃុំវិញហាយ ការងារថែទាំសុខភាពអ្នកវ័យចាស់ តែងបានគណៈកម្មាធិការបក្ស រដ្ឋអំណច និងសុខាភិបាលមូលដ្ឋានយកចិត្តទុកដាក់ពិសេស។ ថ្មីៗនេះ ដំណាក់សុខាភិបាលឃុំវិញហាយ បានម្ចាស់ការសហការជាមួយមជ្ឈមណ្ឌលសុខាភិបាលវិញបាយ ចាត់តាំងការពិនិត្យសុខភាពជាប្រចាំ និងពិនិត្យស្វែងរកជំងឺជូនអ្នកវ័យចាស់មានអាយុចាប់ពី ៦០ឆ្នាំឡើង ទៅដែលកំពុងរស់នៅក្នុងភូមិឋាន ដោយមានអ្នកវ័យចាស់អញ្ជើញមកពិនិត្យសុខភាពយ៉ាងកុះករ។ ខ្លឹមសារនៃការពិនិត្យផ្តោតសំខាន់លើការវាស់សម្ពាធឈាម សរសៃឈាមបេះដូង ជាតិស្ករក្នុងឈាម ជំងឺសន្លាក់ឆ្អឹង និងផ្តល់ការប្រឹក្សាអំពីជំងឺទូទៅដែលតែងកើតមានលើអ្នកវ័យចាស់។ តាមរយៈនោះ ករណីជំងឺជាច្រើនបានរកឃើញរោគសញ្ញាមិនប្រក្រតីទាន់ពេល ដើម្បីណែនាំឱ្យតាមដាននិងព្យាបាលដោយសមស្រប។

លោកលីថក ប្រជាជននៅភូមិតាសេក បានសំណេះសំណាល៖ “ខ្ញុំឆ្នាំនេះមានអាយុជាង ៦០ឆ្នាំហើយ សុខភាពក៏ថយចុះ ហេតុនេះនៅពេលដឹងថាភូមិភាគចាត់តាំងពិនិត្យជំងឺដោយឥតគិតថ្លៃ ខ្ញុំមានសេចក្តីត្រេកអរណាស់។ គ្រូពេទ្យបានផ្តល់ការប្រឹក្សាយ៉ាងហ្មត់ចត់អំពីរបបអាហារ និងរបៀបរស់នៅប្រចាំថ្ងៃ ជួយឱ្យខ្ញុំយល់ដឹងកាន់តែច្បាស់អំពីការថែទាំខ្លួនឯង ដើម្បីរស់នៅមានសុខភាពល្អរាល់ថ្ងៃ”។

យោងតាមការវាយតម្លៃរបស់ផ្នែកជំនាញ សកម្មភាពពិនិត្យសុខភាពជាប្រចាំមិនត្រឹមតែជួយរកឃើញជំងឺទាន់ពេលប៉ុណ្ណោះទេ ថែមទាំងរួមចំណែកលើកកម្ពស់ការយល់ដឹងរបស់អ្នកវ័យចាស់ ក្នុងការម្ចាស់ ការថែទាំសុខភាព និងផ្លាស់ប្តូរទម្លាប់រស់នៅទៅតាមទិសដៅវិជ្ជមាន។

តាមប្រសាសន៍លោកង្វៀងវ៉ាំងហឿង អនុប្រធានដំណាក់សុខាភិបាលឃុំវិញហាយ៖ ការចាត់តាំងពិនិត្យសុខភាពជាប្រចាំជូនអ្នកវ័យចាស់ គឺជាសកម្មភាពមួយដែលមានអត្ថន័យជាក់ស្តែង បង្ហាញពីការយកចិត្តទុកដាក់របស់ភូមិភាគចំពោះការថែទាំសុខភាពប្រជាជន។ នៅពេលខាងមុខ ដំណាក់សុខាភិបាលនឹងបន្តសហការជាមួយបណ្តាអង្គភាពជំនាញ ដើម្បីរក្សានិងលើកកម្ពស់គុណភាពនៃការពិនិត្យ ស្វែងរកជំងឺ ក្នុងគោលបំណងរួមចំណែកថែទាំសុខ ភាពប្រជាជនឱ្យកាន់តែល្អប្រសើរឡើង ពិសេសគឺអ្នកវ័យចាស់។

បច្ចុប្បន្ន ការថែទាំសុខភាពអ្នកវ័យចាស់កាន់តែបានយកចិត្តទុកដាក់ ចាត់តាំងអនុវត្តព្រមៗគ្នានិងមានប្រសិទ្ធភាព។ មិនត្រឹមតែរួមចំណែកលើកកម្ពស់គុណភាពជីវិតប៉ុណ្ណោះទេ សកម្មភាពទាំងនេះ ថែមទាំងបញ្ជាក់ពីការយកចិត្តទុកដាក់របស់សង្គមទាំងមូលចំពោះអ្នកវ័យចាស់ បន្តរស់នៅដោយសេចក្តីរីករាយ មានសុខភាពល្អ និងរស់នៅមានប្រយោជន៍ទៀតផង៕

ហុងទើ - ថាច់ធី

ចែករំលែកអត្ថបទ

ពាក្យគន្លឹះ