សុខភាព - អប់រំ សុខភាព

09/07/2026 - 06:35

ឃុំយ៉ាហ្វា អនុវត្តល្អគោលនយោបាយឧបត្ថម្ភធានារ៉ាប់រងសុខាភិបាលដល់ជនជាតិភាគតិច

ធានារ៉ាប់រងសុខាភិបាល គឺជាគោលនយោបាយមួយក្នុងចំណោមគោលនយោបាយសុខុមាលភាពសង្គមដ៏សំខាន់របស់បក្សនិង រដ្ឋ ដើម្បីធានាប្រជាជនគ្រប់រូបបានកៀកជិតសេវាថែទាំសុខភាព។ នៅឃុំយ៉ាហ្វា ទីក្រុងកឹងធើ ការងារនេះបានអនុវត្តល្អដល់ជនជាតិភាគតិច ក្រៅពីរួមចំណែកកាត់បន្ថយបន្ទុកលើថ្លៃពិនិត្យព្យាបាលជំងឺ ថែមទាំងបង្ហាញពីការយកចិត្តទុកដាក់ពិសេសរបស់រដ្ឋចំពោះជនជាតិភាគតិចទៀតផង។

កម្មាភិបាលដំណាក់សុខាភិបាលឃុំយ៉ាហ្វា ពិនិត្យជំងឺដល់ជនជាតិភាគតិច ដែលមានប័ណ្ណធានារ៉ាប់រងសុខាភិបាលដែលរដ្ឋផ្តល់ជូន។

តាមការិយាល័យវប្បធម៌ - សង្គមឃុំយ៉ាហ្វា រយៈពេលកន្លង ឃុំគួបផ្សំជាមួយនឹងអង្គការមហាជនភូមិនានា ផ្សព្វផ្សាយ ចលនាដល់ជនជាតិភាគតិចដែលមិនទាន់មានប័ណ្ណធានារ៉ាប់រងសុខាភិបាល ធ្វើបែបបទផ្តល់ជូនប័ណ្ណធានារ៉ាប់រងសុខាភិបាល។ មកដល់ពេលនេះ គ្រួសារជនជាតិភាគតិចស្ទើរតែទាំងអស់ បំផុតគឺគ្រួសារខ្មែរ សុទ្ធតែមានប័ណ្ណធានារ៉ាប់រងសុខាភិបាល ដើម្បីមានលក្ខណៈពិនិត្យ ព្យាបាលជំងឺ ធានាមានសុខភាពល្អ។ បងស៊ើងលិញ នៅភូមិដៃអំពូរ បានរដ្ឋឧបត្ថម្ភប័ណ្ណធានារ៉ាប់រងសុខាភិបាល មិនបារម្ភពីការរកប្រាក់កាសទៅពិនិត្យជំងឺទៀត។ បងស៊ើងលិញ ឱ្យដឹង៖ “គ្រួសារខ្ញុំមានដីដាំបន្លែតែ១កុងប៉ុណ្ណោះ ប្រពន្ធខ្ញុំលក់បន្លែបង្ការ ចំណែកខ្ញុំធ្វើជាងកំបោរ ហេតុនោះគ្រាន់តែគ្រប់ផ្គត់ផ្គង់ជីវភាពប្រចាំថ្ងៃប៉ុណ្ណោះ។ ច្រើន ឆ្នាំមកនេះ គ្រួសារខ្ញុំបានទទួលប័ណ្ណធានារ៉ាប់រងសុខាភិបាលដោយឥតគិតថ្លៃចំនួន ៤ គឺប្តីប្រពន្ធខ្ញុំ និងកូន២នាក់។ ថ្មីៗនេះ ខ្ញុំឈឺខ្នង ត្រូវចូលសម្រាកព្យាបាលនៅមន្ទីរពេទ្យ វេជ្ជបណ្ឌិតធ្វើរោគវិនិច្ឆ័យថាខ្ញុំរលាកឆ្អឹងខ្នង ដោយសារមានធានារ៉ាប់រងសុខាភិបាលដែលរដ្ឋផ្តល់ជូនដោយឥតគិតថ្លៃ ទើបគ្រួសារខ្ញុំមិនសូវបង់ថ្លៃព្យាបាលជំងឺ។ ឥឡូវនេះ រៀងរាល់សប្តាហ៍ខ្ញុំតែងមកមន្ទីរពេទ្យពហុព្យាបាលសុកត្រាំងពិនិត្យជំងឺឡើងវិញ និងយកថ្នាំផឹកដោយមិនបង់ប្រាក់កាស ម្ល៉ោះហើយ ខ្ញុំមានក្តីត្រេកអរ និងស្ងប់អារម្មណ៍ព្យាបាលជំងឺ”។ ចំណែកបងកៀង ង៉ុកមិញ នៅភូមិដាវវៀង ឱ្យដឹង៖ “គ្រួសារក្រ ខ្ញុំធ្វើការប្រចាំថ្ងៃនៅវាលស្រែតាមរដូវកាល ហេតុនោះគ្រាន់តែគ្រប់គិតគូរការហូបចុកប្រចាំថ្ងៃប៉ុណ្ណោះ។ ថ្មីៗនេះ សង្កេតឃើញក្នុងខ្លួនអស់កម្លាំង ពិបាកដង្ហើម ខ្ញុំទៅដំណាក់សុខាភិបាលឃុំយ៉ាហ្វាពិនិត្យជំងឺ ដោយសារមានប័ណ្ណធានារ៉ាប់រងសុខាភិបាលមិនបង់ថ្លៃ គ្រាន់តែបង់ប្រាក់ទិញសៀវភៅកត់ត្រាពិនិត្យជំងឺ ១០.០០០ ដុងប៉ុណ្ណោះ។ ឥឡូវនេះ ឱ្យតែកន្លងទៅមួយសប្តាហ៍ខ្ញុំមកពិនិត្យជំងឺឡើងវិញម្តង ដើម្បីបានវេជ្ជបណ្ឌិតពិគ្រោះ និងយកថ្នាំផឹកព្យាបាលជំងឺសឹកសន្លាក់ឆ្អឹងក និងសម្ពាធឈាម”។

ប្រការគួរកត់សម្គាល់ ដើម្បីធានាផលប្រយោជន៍របស់ប្រជាជននៅឃុំតំបន់សុវត្ថិភាព បានថវិការដ្ឋឧបត្ថម្ភបង់ថ្លៃធានារ៉ាប់រងតិចបំផុត ៧០% ហើយភូមិភាគឧបត្ថម្ភ៣០% ជួយប្រជាជនចូលរួមធានារ៉ាប់រងសុខាភិបាល។ សមមិត្តឡឹមហាល ប្រធានមន្ទីរវប្បធម៌ - សង្គមឃុំយ៉ាហ្វា ឱ្យដឹង៖ “ចំពោះឃុំយ៉ាហ្វា បានប្រធានគណៈកម្មាធិការប្រជាជនទីក្រុងកឹងធើ ទទួលស្គាល់ជាឃុំតំបន់សុវត្ថិភាព អំពីការយកចិត្តទុកដាក់គិតគូរដល់ជនរួមជាតិ តែងបានគណៈកម្មាធិការបក្ស គណៈកម្មាធិការប្រជាជនអនុវត្តល្អនូវគោលនយោបាយ ពិសេសគឺគោលនយោបាយឧបត្ថម្ភធានារ៉ាប់រងសុខាភិបាលទូទាំងប្រជាជន ដើម្បីប្រជាជនបានពិនិត្យព្យាបាលជំងឺពេលត្រូវការ។ ទន្ទឹមនឹងនោះ ការិយាល័យតែងសហការជាមួយផ្នែកធានារ៉ាប់រងពិនិត្យផ្ទៀងផ្ទាត់ឡើងវិញ ជាមួយនគរបាលឃុំ ដើម្បីបន្តផ្តល់ជូនប័ណ្ណធានារ៉ាប់រងដោយឥតគិតថ្លៃ ១០០% ដល់មាមីងជនជាតិភាគតិច។ គិតដល់ដំណាក់កាលនេះ មាមីងបានទទួលផលពីគោលនយោបាយធានារ៉ាប់រងសុខាភិបាលមានក្តីត្រេកអរ និងស្ងប់ចិត្តក្នុងការរស់នៅ ដើម្បីបន្តបង្កបង្កើនផល អភិវឌ្ឍសេដ្ឋកិច្ចគ្រួសារ”។

ដើម្បីគោលនយោបាយពង្រីកប្រសិទ្ធភាព រដ្ឋអំណាចគ្រប់ថ្នាក់ ផ្នែក សុខាភិបាល ស្ថាប័នធានារ៉ាប់រងសង្គម និងអង្គការមហាជន គប្បីបន្តជំរុញការផ្សព្វផ្សាយ ណែនាំប្រជាជនឱ្យយល់ច្បាស់ពីផលប្រយោជន៍ ពេលចូលរួមធានារ៉ាប់រងសុខាភិបាល; ទន្ទឹមនឹងនោះ ឧបត្ថម្ភប្រជាជនអនុវត្តបែបបទផ្តល់ជូនថ្មី ពន្យាពេល និងប្រើប្រាស់ប័ណ្ណធានារ៉ាប់រងសុខាភិបាលមានភាពងាយស្រួល ត្រូវតាមសេចក្តីកំណត់។ នេះបង្ហាញពីការយកចិត្តទុកដាក់ទាន់ពេលរបស់បក្ស រដ្ឋចំពោះជនជាតិភាគតិច ដើម្បីជួយជនរួមជាតិកៀកជិតសេវាថែទាំសុខភាពកាន់តែល្អជាងទៀត៕

ដាលីន-វិមាន

ចែករំលែកអត្ថបទ

ពាក្យគន្លឹះ