កីឡា - ទេសចរណ៍ កីឡា - ទេសចរណ៍

04/07/2026 - 12:45

ស្វែងយល់ពីសារមន្ទីរដូងខ្ទិះត្រាវិញ

ស្ថិតនៅឃុំតាមង៉ាយ ខេត្តវិញឡុង សារមន្ទីរដូងខ្ទិះត្រាវិញ គឺជាកន្លែងប្រមូលរក្សាទុកនូវឯកសារនិងវត្ថុតាងជាច្រើនដែលពាក់ព័ន្ធនឹងដើមដូងខ្ទិះ – ជាផលិតផលពិសេសដ៏ល្បីល្បាញរបស់តំបន់ដីត្រាវិញកាលពីមុន។ មិនត្រឹមតែបង្ហាញពីតម្លៃប្រភេទដើមឈើពិសេសនេះប៉ុណ្ណោះទេ សារមន្ទីរនេះក៏បានរួមចំណែកផ្សព្វផ្សាយសម្រស់វប្បធម៌របស់សហគមន៍បណ្ដាជនជាតិដែលរស់នៅក្នុងភូមិភាគ ជាពិសេសគឺវប្បធម៌របស់ជនរួមជាតិខ្មែរនៅតំបន់ណាមបូ។

ទិដ្ឋភាពមួយជ្រុងនៃសារមន្ទីរដូងខ្ទិះត្រាវិញ ស្ថិតនៅឃុំតាមង៉ាយ ខេត្តវិញឡុង។

សារមន្ទីរនេះបានសាងសង់លើផ្ទៃដីជិត ១.៥០០ ម៉ែត្រការ៉េ មានអគារផ្ទាល់ដីមួយជាន់និងជាន់ខាងលើពីរ ដែលរចនាតាមទម្រង់អក្សរ U ។ សំណង់នេះបានរចនាឡើងដោយបញ្ចូលគ្នាយ៉ាងសមស្របរវាងរចនាបថទំនើបនិងក្បាច់លម្អដែលបង្ហាញពីអត្តសញ្ញាណវប្បធម៌ខ្មែរ បង្កបានជាលំហងាយស្រួលសម្រាប់ការតាំងបង្ហាញ ទស្សនានិងឆ្លងបទពិសោធន៍របស់ភ្ញៀវទេសចរ។ យោងតាមព័ត៌មានពីអង្គភាពគ្រប់គ្រង សារមន្ទីរបានរក្សាទុកនូវរូបភាព ឯកសារ និងវត្ថុតាងជាច្រើន ដែលឆ្លុះបញ្ចាំងពីដំណើរកកើតនិងការអភិវឌ្ឍនៃពូជដូងខ្ទិះ។ នេះជាប្រភេទដើមពិសេសដែលបានផ្សារភ្ជាប់ជាមួយតំបន់ត្រាវិញអស់រយៈពេលជិតមួយសតវត្សរ៍ មានតម្លៃសេដ្ឋកិច្ចខ្ពស់និងបានអ្នកជាច្រើនដឹងស្គាល់។ តាមរយៈប្រព័ន្ធតាំងបង្ហាញ ភ្ញៀវទេសចរអាចស្វែងយល់អំពីប្រភពកំណើត ដំណើរការបន្តពូជ ដាំដុះនិងថែទាំ ព្រមទាំងកិច្ចខិតខំប្រឹងប្រែងក្នុងការអភិរក្ស និងអភិវឌ្ឍពូជដូងខ្ទិះឱ្យស្របតាមលក្ខណៈបច្ចុប្បន្ន។

បរិវេណសារមន្ទីរបានរៀបចំជាច្រើនផ្នែក រួមមានកន្លែងបូជាបុព្វជនដូងខ្ទិះ តំបន់តាំងបង្ហាញវត្ថុតាង តំបន់ទទួលភ្ញៀវ និងរៀបចំសិក្ខាសាលា តំបន់ឧទេ្ទសនាមផលិតផល តំបន់ម្ហូបអាហារនិងតំបន់សម្រាប់ភ្ញៀវចូលរួមបទពិសោធន៍។ តំបន់នីមួយៗមានមុខងារតាំងបង្ហាញខុសៗគ្នា ដើម្បីជួយឱ្យភ្ញៀវទេសចរយល់ដឹងបានយ៉ាងពេញលេញអំពីប្រវត្តិកកើត ព្រមទាំងតម្លៃសេដ្ឋកិច្ចនិងតួនាទីដ៏សំខាន់របស់ដើមដូងខ្ទិះក្នុងជីវភាពរបស់ប្រជាជននៅមូលដ្ឋាន។

រូបសំណាកព្រះឧបជ្ឈាយ៍ថាច់សូ នៅក្នុងសារមន្ទីរដូងខ្ទិះត្រាវិញ។ យោងតាមឯកសាររបស់សារមន្ទីរ ព្រះអង្គគឺជាអង្គដំបូងដែលបាននាំយកពូជដូងខ្ទិះមកដាំដុះនៅប្រទេសវៀតណាម កាលពីឆ្នាំ ១៩២៤។

ចំណុចលេចធ្លោរបស់សារមន្ទីរគឺតំបន់តាំងបង្ហាញដែលប្រមូលផ្តុំរូបភាព វត្ថុតាង និងឯកសារជាច្រើន ឧទ្ទេសនាមអំពីប្រវត្តិកកើតពូជដូងខ្ទិះ ដំណើរការអភិរក្សប្រភពហ្សែនដ៏មានតម្លៃនិងផលិតផលនានាដែលកែច្នៃពីដូងខ្ទិះ។ ឧបករណ៍ពលកម្ម សម្ភារៈប្រើប្រាស់ក្នុងជីវភាពនិងឯកសារជាច្រើនដែលពាក់ព័ន្ធនឹងការដាំដុះ ថែទាំនិងប្រមូលផលដូងត្រូវបានប្រមូល និងរក្សាទុក ដើម្បីបង្ហាញឡើងវិញនូវដំណើរអភិវឌ្ឍន៍របស់ប្រភេទដើមពិសេសនេះនៅក្នុងដំណាក់កាលនីមួយៗ។ ទន្ទឹមនឹងសកម្មភាពតាំងបង្ហាញ សារមន្ទីរថែមទាំងរៀបចំសកម្មភាពអនុវត្តជាក់ស្តែងជាច្រើនសម្រាប់ភ្ញៀវទេសចរផងដែរ។ នៅទីនេះ ភ្ញៀវអាចចូលរួមដោយផ្ទាល់ក្នុងការបកសម្បកដូង ស្វែងយល់អំពីដំណើរការរៀបចំវត្ថុធាតុដើម ការកែច្នៃ និងភ្លក់រសជាតិផលិតផលដែលផលិតពីដូងខ្ទិះ។ សកម្មភាពទាំងនេះជួយឱ្យអ្នកទស្សនាយល់ដឹងកាន់តែច្បាស់អំពីតម្លៃរបស់ដូងខ្ទិះ ព្រមទាំងការខិតខំប្រឹងប្រែងរបស់ប្រជាកសិករក្នុងការផលិតដែលមានគុណភាព ដើម្បីផ្គត់ផ្គង់តម្រូវការទីផ្សារ។

ភ្ញៀវទេសចរចូលរួមបទពិសោធន៍បកសម្បកដូង និងថតរូបអនុស្សាវរីយ៍នៅសារមន្ទីរដូងខ្ទិះត្រាវិញ។ (រូបថត៖ សារមន្ទីរផ្តល់ជូន)

លើសពីនេះ សារមន្ទីរក៏ជាទីកន្លែងឧទ្ទេសនាមនិងផ្សព្វផ្សាយអំពីវប្បធម៌របស់សហគមន៍បណ្ដាជនជាតិគិញ ខ្មែរ និងហ្វាផងដែរ។ តាមរយៈរូបភាព វត្ថុតាង និងការរៀបចំតាំងបង្ហាញ ភ្ញៀវទេសចរមានឱកាសស្វែងយល់កាន់តែច្បាស់អំពីជីវភាពរស់នៅទំនៀមទម្លាប់ ប្រពៃណី ជំនឿនិងតម្លៃវប្បធម៌ប្រពៃណីរបស់ប្រជាជននៅភូមិភាគ។ ក្នុងចំណោមនោះ មានខ្លឹមសារជាច្រើនបង្ហាញពីអត្តសញ្ញាណដ៏វិសេសវិសាលនៃវប្បធម៌ខ្មែរនៅតំបន់ណាមបូ រួមចំណែកដល់អ្នកទស្សនាយល់ដឹងកាន់តែច្បាស់អំពីអត្តសញ្ញាណវប្បធម៌តំបន់ដីវិញឡុង។

រូបភាពនិងវត្ថុតាងមួយចំនួនដែលកំពុងតាំងបង្ហាញនៅសារមន្ទីរដូងខ្ទិះត្រាវិញ។

យោងតាមលោកង្វៀងវ៉ាន់ខាញ់ អ្នកគ្រប់គ្រងសារមន្ទីរដោយផ្ទាល់ ឱ្យដឹងថា ចាប់តាំងពីសារមន្ទីរបើកដំណើរការមក ទីនេះបានទទួលភ្ញៀវទេសចរជាច្រើនទាំងក្នុងនិងក្រៅប្រទេស មកទស្សនា ស្វែងយល់អំពីដូងខ្ទិះនិងវប្បធម៌ក្នុងតំបន់។ ក្រៅពីភ្ញៀវទេសចរ សារមន្ទីរក៏ទទួលក្រុមសិស្ស និស្សិតនិងអ្នកសិក្សាស្រាវជ្រាវ ដែលមកសិក្សាស្វែងយល់អំពីដើមដូងខ្ទិះនិងវប្បធម៌ភូមិភាគ។ នៅចុងសប្តាហ៍និងក្នុងឱកាសបុណ្យទានផ្សេងៗ ចំនួនភ្ញៀវដែលមកទស្សនាកើនឡើងច្រើនជាងថ្ងៃធម្មតា។

តាមរយៈការរួមបញ្ចូលគ្នារវាងការតាំងបង្ហាញវត្ថុតាង ឧទ្ទេសនាមវត្ថុតាងនិងឆ្លងកាត់ពិសោធន៍ជាក់ស្តែង សារមន្ទីរដូងខ្ទិះត្រាវិញបានរួមចំណែកក្នុងការអភិរក្សនិងលើកកម្ពស់តម្លៃរបស់ដើមដូងខ្ទិះផ្សារភ្ជាប់យ៉ាងជិតស្និទ្ធជាមួយជីវភាពរស់នៅ និងវប្បធម៌របស់ប្រជាជនក្នុងភូមិភាគ។ ទន្ទឹមនឹងនោះ សារមន្ទីរក៏ជាកន្លែងទេសចរណ៍មួយសម្រាប់បម្រើតម្រូវការរបស់ភ្ញៀវដែលចង់ស្វែងយល់អំពីវប្បធម៌ ប្រវត្តិសាស្ត្រនិងឆ្លងកាត់បទពិសោធន៍ជាក់ស្តែង រួមចំណែកផ្សព្វផ្សាយរូបភាពទឹកដីនិងមនុស្សវិញឡុង ព្រមទាំងជំរុញការអភិវឌ្ឍវិស័យទេសចរណ៍ផ្សារភ្ជាប់ជាមួយការអភិរក្សតម្លៃវប្បធម៌ប្រពៃណី៕

ទីទុយ

ចែករំលែកអត្ថបទ

ពាក្យគន្លឹះ