កីឡា - ទេសចរណ៍ ទេសចរណ៍

18/08/2026 - 22:07

ខេត្តកាម៉ាវជំរុញការផ្សព្វផ្សាយសក្តានុពលនិងម៉ាកសញ្ញាទេសចរណ៍

ខេត្តកាម៉ាវខិតខំប្រឹងប្រែងដល់ឆ្នាំ២០៣០ ទទួលភ្ញៀវទេសចរឱ្យបានជាង ១១,៥ លាននាក់ (ក្នុងនោះ មានភ្ញៀវអន្តរជាតិ ១៥៥.០០០ នាក់) ចំណូលសរុបពីវិស័យទេសចរណ៍សម្រេចបានប្រមាណ ១៤.៧០០ ពាន់លានដុង រួមចំណែកផ្ទាល់ពី ៤,៥% ដល់ ៥% នៃ GRDP របស់ខេត្ត ។ ដើម្បីសម្រេចបានទិសដៅនេះ ខេត្តបានកំណត់ ការជំរុញកិច្ចការផ្សព្វផ្សាយ ជំរុញទេសចរណ៍និងលើកកម្ពស់សក្តានុពល ភាពខ្លាំងនៃទេសចរណ៍មានលក្ខណៈពិសេស គឺជាដំណោះស្រាយគន្លឹះ ដើម្បីលើកកម្ពស់កិត្យានុភាព ម៉ាកសញ្ញា និងបង្កកម្លាំងទាក់ទាញភ្ញៀវទេសចរក្នុងប្រទេសនិងអន្តរជាតិ ។

*ជំរុញការផ្សព្វផ្សាយ លើកកម្ពស់ភាពខ្លាំងនៃទេសចរណ៍តំបន់ដីជ្រោយ

តាមប្រសាសន៍លោក លីវីទ្រីវយឿង នាយករងមន្ទីរវប្បធម៌ កីឡា និងទេសចរណ៍ខេត្តកាម៉ាវ ក្នុងបរិការណ៍សមាហរណកម្ម ខេត្តបានកំណត់ផ្លាស់ប្ដូរឌីជីថលជាឧបករណ៍លោតផ្លោះដើម្បីលើកកម្ពស់ប្រសិទ្ធភាពការផ្សព្វផ្សាយទេសចរណ៍ ។ បច្ចុប្បន្ន ភូមិភាគកំពុងជំរុញការធ្វើឌីជីថលលក្ខណៈ ៣D អនុវត្តបច្ចេកវិទ្យាជាក់ស្តែងនិម្មិត និងជាក់ស្តែងបង្កើនបន្ថែម (VR/AR) នៅតាមទីតាំងដែលល្បីៗ ដូចជា៖ ជ្រោយកាម៉ាវ ឧទ្យានជាតិអ៊ូមិញហា ហងដាបាក ប្រព័ន្ធកេរដំណែល និងប្រព័ន្ធជីវស្ថានព្រៃលិចទឹកប្រៃ។ បច្ចេកវិទ្យានេះអនុញ្ញាតឱ្យភ្ញៀវទេសចរទស្សនាជានិម្មិត ស្វែងយល់ពីទិដ្ឋភាពល្អស្រស់នៃខេត្តកាម៉ាវមុនពេលធ្វើដំណើរទៅទស្សនាផ្ទាល់ តាមរយៈនោះ ជួយដាស់តម្រូវការធ្វើទេសចរណ៍ជាក់ស្ដែង។ ចំណែកនៅតំបន់ក្រុង ខេត្តតម្រង់ទិសដៅអភិវឌ្ឍលំហផ្លូវរាត្រី ផ្សារសិល្បៈ ផ្លូវសម្តែងសិល្បៈ គួបបញ្ចូលនឹងម្ហូបអាហារនិងបេតិកភណ្ឌ ។

ជ្រោយកាម៉ាវ កំពុងជាទីតាំងទាក់ទាញភ្ញៀវទេសចរមកទស្សនានិងឆ្លងបទពិសោធន៍ ។

ទន្ទឹមនឹងនោះ ខេត្តផ្តោតលើការជំរុញផ្សព្វផ្សាយសក្តានុពល ភាពខ្លាំងលេចធ្លោអំពីទេសចរណ៍ជីវស្ថាន ទេសចរណ៍សហគមន៍ និងវប្បធម៌ប្រជាជនភូមិស្រុក។ ក្នុងនោះ យកចិត្តទុកដាក់លើកកម្ពស់គុណភាព និងធ្វើឱ្យសម្បូរបែបនូវផលិតផលឆ្លងបទពិសោធន៍ ផ្សារភ្ជាប់នឹងតំបន់ដីចុងប៉ូចភាគខាងត្បូង ដូចជា៖ ជ្រោយកាម៉ាវ ឧទ្យានជាតិអ៊ូមិញហា ហងដាបាក មណ្ឌលទេសចរណ៍ជីវស្ថានព្រៃលិចទឹកប្រៃ និងប្រព័ន្ធកេរដំណែល... ដោយបច្ចេកវិទ្យា ៣D VR/AR ដើម្បីផ្សព្វផ្សាយតាមប្រព័ន្ធអ៊ីនធឺណិត បង្កើតបទពិសោធន៍ទស្សនានិម្មិតមុនពេលធ្វើដំណើរទៅទស្សនាផ្ទាល់និងទាក់ទាញភ្ញៀវទេសចរ ។ ជាពិសេស ជំរុញការអនុវត្តបច្ចេកវិទ្យា GIS ដើម្បីគ្រប់គ្រងលំហទេសចរណ៍ ឧបត្ថម្ភការរៀបគម្រោងប្លង់ គ្រប់គ្រងទីតាំងនិងផ្តល់ព័ត៌មានតាមប្រព័ន្ធអ៊ីនធឺណិតជូនភ្ញៀវទេសចរ ។

ក្រៅពីនោះ បណ្តាតម្លៃវប្បធម៌ - ប្រវត្តិសាស្ត្រ និងភូមិរបរប្រពៃណី ក៏ត្រូវបានដាក់បញ្ចូលជាផ្នែកសំខាន់ក្នុងការផ្សព្វផ្សាយ និងអភិវឌ្ឍ ។ ខេត្តកាម៉ាវ ផ្តោតលើការធ្វើឱ្យសុក្រឹតទីតាំងទស្សនាភូមិរបរ ភ្ជាប់ទំនាក់ទំនងជាមួយទេសចរណ៍ជីវស្ថាន ព្រមទាំងលើកកម្ពស់តម្លៃបេតិកភណ្ឌវប្បធម៌អរូបី ដូចជា៖ សិល្បៈដើងកាតាយតឺណាមបូ បណ្តាពិធីបុណ្យប្រជាប្រិយ និងបណ្តាទីតាំងទេសចរណ៍ជំនឿសាសនា ដូចជា៖ រមណីយដ្ឋានក្វាងអឹមផឹកដាយ រមណីយដ្ឋានវិហារតាក់សៃ មូលដ្ឋានកាយចាញ់។ល។ បណ្តាកម្មវិធីសម្តែងសិល្បៈបេតិកភណ្ឌ បញ្ចូលគ្នានឹងការរៀបរាប់រឿងរ៉ាវ និងបច្ចេកវិទ្យាឆាកទំនើប នឹងបង្កបានជាផលិតផលទេសចរណ៍ពិសេស ប្លែកអារម្មណ៍ ទាក់ទាញភ្ញៀវទេសចរយ៉ាងកុះករមកធ្វើបុណ្យ និងបានឆ្លងបទពិសោធន៍វប្បធម៌ ។

លោកងោវូថាំង អនុប្រធានគណៈកម្មាធិការប្រជាជនខេត្តកាម៉ាវ បានឱ្យដឹង៖ ដើម្បីសម្រេចបានគោលដៅខាងលើ ខេត្តកាម៉ាវ បានកំណត់ការវិនិយោគកសាងកែលម្អហេដ្ឋារចនាសម្ព័ន្ធគមនាគមន៍តភ្ជាប់ជាភារកិច្ចស្នូលឈានមុខគេ។ បច្ចុប្បន្ន ខេត្តកំពុងផ្តោតលើការកៀរគរធនធានយ៉ាងសម្បូរបែប ដើម្បីវិនិយោគកសាងរចនាសម្ព័ន្ធគមនាគមន៍ និងមូលដ្ឋានសម្ភារបច្ចេកទេសគមនាគមន៍ឱ្យបានព្រមៗគ្នា។ ក្នុងនោះ អាទិភាពប្រភពថវិការដ្ឋនិងប្រភពទុនកៀរគរស្របច្បាប់ ដើម្បីពន្លឿនល្បឿនគម្រោងផ្លូវគមនាគមន៍សំខាន់ៗ ពង្រឹងភាពតភ្ជាប់រវាងតំបន់និងតភ្ជាប់ជាមួយបណ្តាទីតាំងទេសចរណ៍។ ផ្តោតលើការជំរុញផ្លូវល្បឿនលឿន កាម៉ាវ - ដីជ្រោយ កសាងសម្រេចនិងដាក់ឱ្យប្រើប្រាស់ព្រលានយន្តហោះកាម៉ាវ លើកកម្ពស់ប្រព័ន្ធកំពង់ផែសមុទ្រ កំពង់ផែផ្លូវទឹកក្នុងប្រទេស ខ្សែផ្លូវហូជីមិញ ឆ្ពោះទៅដីជ្រោយ និងប្រព័ន្ធផ្លូវខ្នែងភ្ជាប់ទៅកាន់បណ្តាទីតាំងទេសចរណ៍សហគមន៍។ ការធ្វើឱ្យសុក្រឹតបណ្ដាប្រព័ន្ធគមនាគមន៍ មិនត្រឹមតែលើកកម្ពស់សមត្ថភាពតភ្ជាប់ប៉ុណ្ណោះទេ ថែមទាំងទាក់ទាញអ្នកវិនិយោគចូលរួមបណ្តាគម្រោងដែលមានទ្រង់ទ្រាយធំ ដូចជា៖ មណ្ឌលសម្រាកលំហែកាយជាន់ខ្ពស់ មណ្ឌលកម្សាន្ត សណ្ឋាគារគុណភាពខ្ពស់ និងប្រព័ន្ធសេវាកម្មឡូជីស្ទីកទេសចរណ៍។

ភ្ញៀវទេសចរ មកទស្សនាវាយោអគ្គិសនីហ្វាប៊ិញ នៅខេត្តកាម៉ាវ ។

ជាមួយគ្នានោះ ខេត្តបន្តអភិវឌ្ឍផលិតផលទេសចរណ៍ទស្សនាបណ្តាសំណង់វាយោអគ្គិសនី ផ្សារភ្ជាប់នឹងការស្វែងយល់ទេសភាពតំបន់ឆ្នេរសមុទ្រកាម៉ាវ; ការទាញយកផលគួបបញ្ចូលនឹងបណ្តាមណ្ឌល ទីតាំងទេសចរណ៍ផ្សេងៗ បង្កបានជាផលិតផលទេសចរណ៍ជីវស្ថាន - ឆ្លងបទពិសោធន៍មានលក្ខណៈពិសេស ផ្សារភ្ជាប់នឹងការអប់រំអំពីបរិស្ថាន និងអភិវឌ្ឍប្រកបដោយចីរភាព។ លោកងោវូថាំង បានឱ្យដឹងបន្ថែម៖ ចក្ខុវិស័យដល់ឆ្នាំ២០៥០ ខេត្តកាម៉ាវ នឹងក្លាយជាទីតាំងនិមិត្តរូបថ្នាក់ជាតិ ជាមជ្ឈមណ្ឌលទេសចរណ៍ជីវស្ថាន - វប្បធម៌ ជាទ្វារតភ្ជាប់សមុទ្រជាមួយអនុតំបន់មេគង្គ និងអាស៊ីអាគ្នេយ៍; ជាមជ្ឈមណ្ឌលទេសចរណ៍ និងអភិរក្សតម្លៃពិសេសនៃតំបន់វាលរាបទន្លេគឺវឡុង។ ទេសចរណ៍នឹងក្លាយជាវិស័យសេដ្ឋកិច្ចមុខព្រួញ ជំរុញកំណើនបៃតងនិងចីរភាព; មានហេដ្ឋារចនាសម្ព័ន្ធទំនើប ផ្សារភ្ជាប់នឹងការអភិរក្សទេសភាពធម្មជាតិនិងអត្តសញ្ញាណជនជាតិ ៕

យ្វីអាញ - ថាច់ធី

ចែករំលែកអត្ថបទ

ពាក្យគន្លឹះ