មហាសាមគ្គីជនជាតិ ភូមិស្រុកផ្លាស់ថ្មី

19/08/2026 - 06:21

ស្ពានតភ្ជាប់នៃទឹកចិត្តមនុស្សធម៌

រយៈពេលជាងមួយឆ្នាំកន្លង គណៈកម្មាធិការរណសិរ្សមាតុភូមិវៀតណាមឃុំឡុងភូ និងឃុំមីភឿក ទីក្រុងកឹងធើ បានជំរុញយ៉ាងខ្លាំងក្លានូវការបំផុសចលនាប្រឡងប្រណាំងជាក់ស្តែង បង្កផ្សព្វផ្សាយស៊ីជម្រៅទូលំទូលាយក្នុងសហគមន៍ លេចធ្លោគឺការងារសង្គមូបនីយកម្មកសាងគមនាគមន៍ជនបទ។ ផ្តើមពីការព្រួតដៃរបស់រដ្ឋអំណាច សប្បុរសជននិងប្រជាជន ស្ពានថ្មីៗជាច្រើនបានកសាងឡើង រួមចំណែកផ្លាស់ប្តូរទិដ្ឋភាព ជនបទ ផ្តល់ភាពងាយស្រួលសម្រាប់ធ្វើដំណើរទៅមក ដោះដូរពាណិជ្ជកម្ម និងអភិវឌ្ឍសេដ្ឋកិច្ច។

ស្ពានថៀងឡុក នៅភូមិទឹកប្រៃបានដាក់ឱ្យប្រើប្រាស់។

តាមប្រសាសន៍លោកស្រី ត្រឹងធីថាញហាំង ប្រធានគណៈកម្មាធិការរណសិរ្សមាតុភូមិវៀតណាមឃុំឡុងភូ ចាប់ពីថ្ងៃទី ១ ខែកក្កដា ឆ្នាំ ២០២៥ មកទល់ពេលនេះ ភូមិភាគបានជំរុញចលនាសង្គមូបនីយកម្មកសាងជនបទថ្មី ផ្តោតលើហេដ្ឋារចនា សម្ព័ន្ធគមនាគមន៍។ ដោយមានការព្រួតដៃពីរដ្ឋអំណាច សប្បុរសជននិងប្រជាជន ភូមិភាគបានកៀរគរទឹកប្រាក់ជាង ៤ ពាន់លានដុង កសាងស្ពានជនបទ ចំនួន ១០ នៅតាមភូមិដាច់ស្រយាល រួមចំណែកឆ្លើយតបតម្រូវការធ្វើដំណើរទៅមក ដឹកជញ្ជូនទំនិញ និងធ្វើឱ្យសុក្រឹតនូវលក្ខឋានកសាងជនបទថ្មី។

ភាពរីករាយបានបង្ហាញច្បាស់តាមរយៈទឹកមុខប្រជាជនភូមិទឹកប្រៃ នៅពេលដែលស្ពានថៀងឡុក ប្រវែង ៣៤ ម៉ែត្រ ទទឹង ៣,៣ ម៉ែត្រ ថវិកាសរុបជាង ៤០០ លានដុង បានដាក់ឱ្យប្រើប្រាស់។ អ្នកមីងឡឹមធីសឿង ចែករំលែក៖ “កាលពីមុន ស្ពានតូចចង្អៀត ម្ល៉ោះហើយអ្នកណាក៏បារម្ភដែរពេលឆ្លងកាត់។ ឥឡូវនេះ ស្ពានថ្មីធំទូលាយ រឹងមាំ ប្រជាជនសប្បាយចិត្តខ្លាំងណាស់។ រថយន្តអាចបើកបរមកដល់កន្លែង ធ្វើឱ្យការធ្វើដំណើរទៅមក ដឹកជញ្ជូនទំនិញកាន់តែងាយស្រួល ហើយក្មួយៗសិស្សានុសិស្សទៅសាលាក៏មានសុវត្ថិភាពដែរ”។ ក្តីរីករាយដូចគ្នានេះដែរ ស្ពាន ម៉ីវអុងតា នៅភូមិបឹងធំ ប្រវែងជាង ៣០ ម៉ែត្រ ទទឹង ៣,៣ ម៉ែត្រ ថវិកាសរុបជាង ៧០០ លានដុង បានឆ្លើយតបបំណងប្រាថ្នាច្រើនឆ្នាំមកហើយរបស់ប្រជាជន។ លោកថាច់សុផល អ្នកមានប្រិយភាពនៅភូមិបឹងធំ ឱ្យដឹង៖ “ស្ពានចាស់មានទទឹងត្រឹមតែជាង ១ ម៉ែត្រប៉ុណ្ណោះ ដូច្នេះការធ្វើដំណើរមានការលំបាកខ្លាំងណាស់។ ឥឡូវនេះមានស្ពានថ្មី មាមីងអ្នកណាក៏សប្បាយចិត្តដែរ ព្រោះការធ្វើដំណើរទៅមក និងដឹកជញ្ជូនទំនិញមានភាពងាយស្រួលជាងមុន”។

បរិយាកាសរីករាយដូច្នេះ ក៏បានសាយភាយនៅឃុំមីភឿកផងដែរ នៅពេលស្ពានលេខ ៤ នៅភូមិភឿក-ថ បានសម្រេចជាស្ថាពរនិងដាក់ឱ្យប្រើប្រាស់។ ស្ពាននេះមានប្រវែង ៣០ ម៉ែត្រ ទទឹង ៣,៥ ម៉ែត្រ ថវិកាសរុបជាង ២០០ លានដុង ក្នុងនោះក្រុមមនុស្សធម៌ស្ម័គ្រចិត្ត ហ្វាស៊ាងធូឌឹក (ទីក្រុងហូជីមិញ) បានឧបត្ថម្ភជាង ១៣០ លានដុង ហើយដទៃពីនោះ ភូមិភាគនិងប្រជាជនរួមវិភាគទាន។ អ្នកមីងត្រឹងធីហ្វែ នៅភូមិភឿក-ថ ឱ្យដឹង៖ “កាលពីមុន នៅទីនេះ មានតែស្ពានស្នួរប៉ុណ្ណោះ ម្ល៉ោះហើយការធ្វើដំណើរទៅមកលំបាកខ្លាំងណាស់ ពិសេសគឺនៅរដូវភ្លៀង។ ចាប់ពីមានស្ពានថ្មីមក ការធ្វើដំណើរទៅមក ជួញដូរ មានភាពងាយស្រួលជាងមុន ហើយសិស្សានុសិស្សក៏ស្ងប់ចិត្តពេលទៅសាលាដែរ”។

លោក ត្រឹងថាញឌាំង ប្រធានគណៈកម្មាធិការរណសិរ្សមាតុភូមិវៀតណាមឃុំមីភឿក ឱ្យដឹង៖ “ចាប់ពីខែកក្កដា ឆ្នាំ ២០២៥ មកទល់ពេលនេះ ភូមិភាគបានចលនាកសាងស្ពានជនបទចំនួន ៤ ថវិកាសរុបជាង ១ ពាន់លានដុង។ សំណង់ទាំងនេះ មិនត្រឹមតែធ្វើឱ្យសុក្រឹតនូវហេដ្ឋារចនាសម្ព័ន្ធគមនាគមន៍ប៉ុណ្ណោះទេ ថែមទាំងបង្កលក្ខណៈងាយស្រួលសម្រាប់ប្រជាជនធ្វើដំណើរ សិស្សានុសិស្សទៅសាលាសុវត្ថិភាព ព្រមទាំងបើកឱកាសដោះដូរពាណិជ្ជកម្ម ជំរុញអភិវឌ្ឍសេដ្ឋកិច្ច និងលើកកស្ទួយជីវភាពប្រជាជន”។

ស្ពាននីមួយៗបានសម្រេចជាស្ថាពរ គឺជាការរួបរួមនៃស្មារតីសាមគ្គី ចែករំលែកនិងការទទួលខុសត្រូវចំពោះសហគមន៍។ ស្ពានថ្មីៗទាំងនេះ មិនត្រឹមតែភ្ជាប់ច្រាំងទាំងសងខាងប៉ុណ្ណោះទេ ថែមទាំងភ្ជាប់ទឹកចិត្តមនុស្សធម៌ ផ្តល់កម្លាំងជំរុញបន្ថែម ដើម្បីភូមិភាគនីមួយៗកសាងជនបទថ្មីកាន់តែរីកចម្រើន រួមចំណែកលើកកម្ពស់គុណភាពរស់នៅរបស់ប្រជាជន និងពូនជ្រំទំនុកចិត្តនៃកម្លាំងមហាសាមគ្គីទូទាំងជនជាតិ៕

យ្វីអាញ - លីសៀ

ចែករំលែកអត្ថបទ

ពាក្យគន្លឹះ