មហាសាមគ្គីជនជាតិ គំរូក្នុងសហគមន៍

19/11/2025 - 09:17

អ្នកគ្រូអស់ពីចិត្តជាមួយអាជីព

“អ្នកគ្រូឡឹមធ្វីអាង ជាគ្រូបង្រៀនពូកែ អស់ពីចិត្តចំពោះអាជីព ក្នុងការបង្ហាត់បង្រៀនតែងមានគំនិតច្នៃប្រតិដ្ឋ ញុាំងសិស្សកាន់តែរៀនកាន់តែជក់ចិត្ត។ ចាប់ពីថ្ងៃដែលអ្នកគ្រូធ្វីអាង ចូលមកសាលាបង្រៀន គឺសាលាមានសិស្សជាច្រើនសម្រេចកិត្តិនាមជាសិស្សពូកែប្រចាំសាលា ថ្នាក់ទីក្រុងនិងថ្នាក់ជាតិអំពីវិញ្ញាសាប្រវត្តិវិទ្យា” – លោកគ្រូហ្វិញគិញថ្វ័យ នាយករងអនុវិទ្យាល័យ វិទ្យាល័យជនជាតិអន្តេវាសិកថាញ់ភូ ទីក្រុងកឹងធើ បានឧទ្ទេសនាមដូច្នេះ។

អ្នកគ្រូឡឹមធ្វីអាង។

មិនត្រឹមតែជាគ្រូបង្រៀនពូកែប៉ុណ្ណោះទេ អ្នកគ្រូ ថែមទាំងជាគំរូអំពីស្មារតីឆ្លងកាត់ការលំបាកនិងមានទឹកចិត្តស្រឡាញ់អាជីពទៀតផង។ អ្នកគ្រូ ឱ្យដឹង៖ ជីវភាពគ្រួសារខ្វះខាត ម្ល៉ោះហើយ ក្នុងរយៈពេលរៀនមហាវិទ្យាល័យ អ្នកគ្រូឆ្លៀតរកការងារធ្វើបន្ថែមដើម្បីគិតគូរសម្រាប់ការហូបចុក។ ថ្វីដ្បិតដូច្នោះក្តី ប៉ុន្តែក្តីស្រមៃក្លាយជាគ្រូបង្រៀនបានជួយឱ្យអ្នកគ្រូឆ្លងកាត់សព្វបែបយ៉ាង។ ឆ្នាំ២០១៣ ក្រោយពីបញ្ចប់ការសិក្សា អ្នកគ្រូបានបញ្ជូនមកបង្រៀននៅវិទ្យាល័យជនជាតិអន្តេវាសិកវិញចូវមុខវិជ្ជាប្រវត្តិវិទ្យា។ ឆ្នាំ២០២១ អ្នកគ្រូ ត្រូវបានប្តូរទៅអនុវិទ្យាល័យនិងវិទ្យាល័យជនជាតិអន្តេវាសិកថាញ់ភូវិញ ដោយបន្តបណ្តុះបណ្តាលមុខវិជ្ជាដែលខ្លួនពេញចិត្តគឺវិញ្ញាសាប្រវត្តិវិទ្យាដល់សិស្សដដែល។ ផ្តើមពីនោះ សាលាមានសិស្សជាច្រើនសម្រេចកិត្តិនាមជាសិស្សពូកែថ្នាក់ខេត្ត ថ្នាក់ជាតិនិងជ្រើសរើសវិញ្ញាសាប្រវត្តិវិទ្យាជាវិញ្ញាសាប្រឡងសញ្ញាបត្រមធ្យមសិក្សាទុតិយភូមិថ្នាក់ជាតិ។

ដើម្បីការបង្រៀននិងរៀនមានប្រសិទ្ធភាព សិស្សចាប់អារម្មណ៍ អ្នកគ្រូធ្វីអាង បានខិតខំស្រាវជ្រាវរៀនដោយខ្លួនឯងតាមរយៈសៀវភៅ ប្រវត្តិវិទ្យាជាច្រើន និងជានិច្ចកាលចូលរួមថ្នាក់បំប៉នមុខជំនាញដើម្បីលើកកម្ពស់គុណភាពបង្ហាត់បង្រៀន។ ទន្ទឹមនឹងនោះ ខ្នះខ្នែងចូលរួមរាល់សម័យប្រឡងគ្រូបង្រៀនពូកែប្រចាំសាលា ទីក្រុងនិងទទួលបានរង្វាន់ខ្ពស់ជាច្រើន។

អ្នកគ្រូធ្វីអាង ចែករំលែក៖ “ខ្ញុំជ្រើសរើសវិធីសាស្រ្តបង្រៀនផ្សេងៗ ធ្វើឱ្យសិស្សងាយរៀន ងាយចាំ ដាស់ស្មារតីឱ្យមានចិត្ដចង់រៀន និងការជក់ចិត្ត ដិតអារម្មណ៍របស់ប្អូនៗ។ ខ្ញុំតែងប្រើប្រាស់រូបភាពជាក់ស្តែង ដើម្បីធ្វើការពន្យល់ទៅលើមេរៀន បញ្ចាំងជាវីដេអូ និទានរឿង ដាក់សំណួរឱ្យសិស្សឆ្លើយ។ ក្រៅពីនេះ ជានិច្ចកាលរៀបចំពិធីសកម្មភាពក្រៅម៉ោងសិក្សា ស្វែងយល់ពីកេរដំណែលប្រវត្តិសាស្ត្រ ឬទស្សនាសារមន្ទីរ៘ ពេលចូលថ្នាក់បង្រៀន ខ្ញុំផ្តល់អារម្មណ៍ឱ្យសិស្ស “រៀនដូចជាលេង ប៉ុន្តែលេងដូចជារៀន” ម្ល៉ោះហើយកាន់តែរៀនកាន់តែជក់ចិត្ត”។

ប្អូនត្រឹងធីហុងធ្វី សិស្សថ្នាក់ទី១២A២ ឱ្យដឹង៖ “អ្នកគ្រូធ្វីអាង គាត់ស្និទ្ធស្នាលណាស់ ម្ល៉ោះហើយ សិស្សណាក៏ពេញចិត្តរៀនវិញ្ញាសាប្រវត្តិវិទ្យាដែរ។ អ្នកគ្រូមានវិធីសាស្រ្តបង្រៀនងាយចាំ ងាយយល់ ផ្សារភ្ជាប់ជាមួយនឹងភាពជាក់ស្តែង ដូច្នេះហើយ កាន់តែរៀនកាន់តែជក់ចិត្ត”។

ជាមួយនឹងស្នាដៃដែលសម្រេចបាន អ្នកគ្រូធ្វីអាង បានគណៈកម្មាធិការប្រជាជនខេត្តសុកត្រាំង (ចាស់) ក្រសួងអប់រំនិងបណ្តុះបណ្តាលជូនបណ្ណសរសើរ ពីព្រោះមានការរួមចំណែកជាច្រើនក្នុងបុព្វហេតុអប់រំ។ បច្ចុប្បន្ន អ្នកគ្រូកំពុងបានផ្នែកអប់រំទីក្រុងកឹងធើ ស្នើនាយករដ្ឋមន្ត្រីនៃរដ្ឋាភិបាល ពិនិត្យជ្រើសរើសជូនបណ្ណសរសើរ។ នេះគឺជាកម្លាំងជំរុញដើម្បីអ្នកគ្រូធ្វីអាង បន្តសិក្សាស្រាវជ្រាវ រួមចំណែកក្នុងបុព្វហេតុបណ្តុះបណ្តាលធនធានមនុស្ស៕

យ្វីអាញ- លីសៀ

ចែករំលែកអត្ថបទ

ពាក្យគន្លឹះ