មហាសាមគ្គីជនជាតិ ភូមិស្រុកផ្លាស់ថ្មី

06/01/2025 - 16:04

បាកលីវ អភិវឌ្ឍទម្រង់ចិញ្ចឹមសត្វសំពោចក្រអូប

ទម្រង់ចិញ្ចឹមសត្វសំពោចក្រអូបនៅខេត្តបាកលីវ បានផ្ដល់ប្រសិទ្ធភាពសេដ្ឋកិច្ច ជួយដល់កសិករមានប្រាក់ចំណូលលំនឹង សមស្របនឹងគ្រួសារដែលមានដីតិចតួច។ ផ្តើមពីនោះ ជួយដល់គ្រួសារជាច្រើនចាកផុតពីភាពក្រីក្រ និងឈានឡើងធូរធារ។

ទម្រង់ចិញ្ចឹមសត្វសំពោចក្រអូបនៅខេត្តបាកលីវ កាន់តែបង្ហាញពីតម្លៃសេដ្ឋកិច្ចជួយ
ដល់គ្រួសារប្រជាជនបង្កើនប្រាក់ចំណូល។

លោក ង្វៀងថាញតុង ស្នាក់នៅទីប្រជុំជនភឿកឡុង ស្រុកភឿកឡុង បានទិញសត្វសំពោចក្រអូប ៤ ក្បាលក្នុងតម្លៃ ២៨ លានដុង។ លោកតុង ឱ្យដឹង៖ “សត្វសំពោចក្រអូបនេះ ងាយស្រួលចិញ្ចឹមណាស់ មិនត្រូវការផ្ទៃដីធំទេ ឱ្យតែបរិវេណទ្រុងស្រឡះស្រឡំ ជ្រះស្អាត មានពន្លឺ ហើយមានចំណីគ្រប់គ្រាន់ នឹងអាចធំធាត់យ៉ាងឆាប់។ ចិញ្ចឹមបាន ១៨ ខែ សំពោចមានទម្ងន់ពី ៤- ៦ គីឡូក្រាម លក់តម្លៃពី ១,៥ - ១,៧ លានដុងក្នុង ១ គីឡូក្រាម។ ការចិញ្ចឹមសត្វសំពោចគឺសមស្របជាមួយគ្រួសារក្រខ្សត់ ព្រោះវាមិនត្រូវការផ្ទៃដីធំ មិនចំណាយកម្លាំងថែទាំច្រើន និងផ្ដល់ប្រសិទ្ធភាពសេដ្ឋកិច្ចខ្ពស់។ បើតាមលោកតុង ដើម្បីការចិញ្ចឹមសត្វសំពោចផ្ដល់ប្រសិទ្ធភាពសេដ្ឋកិច្ចខ្ពស់ ក្រៅពីពូជល្អ សុខភាពមាំមួន និងផ្តល់ចំណីគ្រប់គ្រាន់ អ្នកចិញ្ចឹមត្រូវផ្តល់អង់ស៊ីមជំនួយរំលាយអាហារដើម្បីកុំឱ្យពោះវៀនសំពោចរលាកឬកើតជំងឺ។ ពិសេស ត្រូវសម្អាតទ្រុងឱ្យបានទៀងទាត់។

បងស្រី ដាំងគឹមអាញ់ ស្នាក់នៅទីប្រជុំជន ភឿកឡុង ក៏ជាគ្រួសារមួយដែលមានប្រាក់ចំណូលបង្គួរពីការចិញ្ចឹមសត្វសំពោចក្រអូបផងដែរ។ បច្ចុប្បន្ន បងស្រីគឹមអាញ់ ក៏ឆ្លៀតឱកាសយកដីជុំវិញផ្ទះដាំចេក និងជីកស្រះចិញ្ចឹមត្រីក្រាញ់សម្រាប់ទុកធ្វើជាចំណី។ បងស្រីគឹមអាញ់ ចែករំលែក៖ “ខ្ញុំបានសមាគមកសិករឱ្យចូលរួមថ្នាក់ហ្វឹកហាត់បច្ចេកទេសចិញ្ចឹមសត្វសំពោច និងនាំខ្ញុំទៅទស្សនាទម្រង់ចិញ្ចឹមសត្វសំពោចប្រកបដោយប្រសិទ្ធភាព ដូច្នេះ ខ្ញុំមិនរារែកក្នុងការវិនិយោគ។ ដំបូងខ្ញុំចិញ្ចឹម ៤ ក្បាល អាស្រ័យបានសមាគមជំនួយដោយឃើញប្រសិទ្ធភាពសេដ្ឋកិច្ចខ្ពស់ ទើបខ្ញុំពង្រីកចិញ្ចឹមបន្ថែម១០ក្បាល ។ សត្វសំពោចងាយស្រួលចិញ្ចឹមណាស់ ចំណីសំខាន់គឺត្រីអណ្តែង ត្រីក្រាញ់ស្រស់ និងចេកទុំជាដើម នេះគឺជាចំណីពីរប្រភេទដែលសត្វសំពោចចូលចិត្តនិងគ្រប់ជីវជាតិ ហើយមិនប៉ះពាល់ដល់ផ្លូវរំលាយអាហារ។ ដើម្បីកាត់បន្ថយការចំណាយ ជារៀងរាល់ថ្ងៃ ប្តីប្រពន្ធខ្ញុំទៅបង់សំណាញ់ ចាប់ត្រី ដើម្បីធ្វើជាចំណីឱ្យសត្វសំពោច”។

តាមប្រសាសន៍លោក ហ្វិញវ៉ាន់តែវ ប្រធានគណៈកម្មាធិការប្រជាជនទីប្រជុំជនភឿកឡុង ឱ្យដឹង សត្វសំពោចក្រអូបងាយស្រួលក្នុងការចិញ្ចឹម មិនចាំបាច់មានផ្ទៃដីធំ ងាយស្រួលថែទាំ ហើយប្រភពចំណីក៏ងាយរក ម៉្លោះហើយ ការចិញ្ចឹមសត្វសំពោចមានពេលទំនេរអាចប្រកបការងារផ្សេងៗទៀតបាន។ ម៉្យាងទៀត សត្វសំពោចលក់បានថ្លៃ ប្រភពចេញលំនឹងហើយមានតម្លៃសេដ្ឋកិច្ចខ្ពស់ ហេតុនេះទើបមូលដ្ឋានជ្រើសជាទម្រង់កាត់បន្ថយភាពក្រីក្រប្រកបដោយចីរភាព ហើយកំពុងពង្រីកដល់គ្រួសារផ្សេងៗទៀត៕

យ្វីអាញ-ត្រឹងរ៉ូន

ចែករំលែកអត្ថបទ

ពាក្យគន្លឹះ