កីឡា - ទេសចរណ៍ កីឡា

08/09/2026 - 14:34

វៀតណាមដណ្តើមបានចំណាត់ថ្នាក់លេខ ១ ទូទាំងក្រុម កីឡាប្រដាល់គុនខ្មែរអាស៊ី លើកទី១ ឆ្នាំ ២០២៦

នៅល្ងាចថ្ងៃទី ៧ ខែកញ្ញា រង្វាន់ជើងឯកកីឡាប្រដាល់គុនខ្មែរអាស៊ី លើកទី១ ឆ្នាំ ២០២៦ បានបិទវគ្គក្រោយពី ៥ ថ្ងៃប្រកួតដណ្តើមយ៉ាងពុះពោរនៅពហុកីឡដ្ឋានមជ្ឈមណ្ឌលហ្វឺកហ្វឺន និងប្រកួតកីឡាទីក្រុងកឹងធើ (សង្កាត់កាយខេ)។

លោកស្រី ង្វៀងធីង៉ុកឌេប អនុប្រធានគណៈកម្មាធិការប្រជាជនទីក្រុងកឹងធើ ជូនមេដាយដល់កីឡាករ។

លោកស្រី ង្វៀងធីង៉ុកឌេប អនុប្រធានគណៈកម្មាធិការប្រជាជនទីក្រុងកឹងធើ និងលោកង្វៀងវុាំងបៃ នាយកមន្ទីរវប្បធម៌ កីឡា និងទេសចរណ៍ទីក្រុងកឹងធើ ប្រធានគណៈចាត់តាំងការប្រកួត; លោក មៀមរ៉ា ប្រធានកិត្តិយសនៃសហព័ន្ធកីឡាប្រដាល់គុនខ្មែរអន្តរជាតិ; តំណាងថ្នាក់ដឹកនាំសហព័ន្ធកីឡាប្រដាល់គុនខ្មែរអន្តរជាតិ សហព័ន្ធកីឡា Kickboxing វៀតណាម មួយអន្លើដោយមន្ទីរ គណៈ ផ្នែកនៅលើភូមិឋានទីក្រុង បានអញ្ជើញចូលរួមក្នុងពិធីបិទវគ្គនេះ។

លោកង្វៀងវុាំងបៃ នាយកមន្ទីរវប្បធម៌ កីឡា និងទេសចរណ៍ទីក្រុងកឹងធើ ប្រធានគណៈចាត់តាំងការប្រកួត ជូនមេដាយដល់កីឡាករ។

ដោយទទួលបានមេដាយគ្រប់ប្រភេទសរុប ៧៥ គ្រឿង ក្នុងនោះ មេដាយមាស៣៨គ្រឿង មេដាយប្រាក់៣០គ្រឿង និងមេដាយសំរិទ្ធ៧គ្រឿង ក្រុមជម្រើសកីឡាប្រដាល់គុនខ្មែរវៀតណាម ដណ្តើមបានចំណាត់ថ្នាក់លេខ ១ ទូទាំងក្រុម។

ចំណាត់ថ្នាក់លេខ ២ ទូទាំងក្រុម គឺក្រុមជម្រើសកីឡាប្រដាល់គុនខ្មែរកម្ពុជា ដោយទទួលបានមេដាយចំនួន ៧១ គ្រឿង ក្នុងនោះ មេដាយមាស៣៥គ្រឿង មេដាយប្រាក់២៧គ្រឿង និង មេដាយសំរិទ្ធ៩គ្រឿង។

ចំណាត់ថ្នាក់លេខ ៣ គឺក្រុមជម្រើសកីឡាប្រដាល់គុនខ្មែរឥណ្ឌូនេស៊ី ដោយទទួលបានមេដាយចំនួន ៩ គ្រឿង ក្នុងនោះ មេដាយមាស ១ គ្រឿង មេដាយប្រាក់៥គ្រឿង និងមេដាយសំរិទ្ធ៣គ្រឿង។

លោកខូវឆាយ អគ្គលេខាធិការសហព័ន្ធកីឡាប្រដាល់គុនខ្មែរអន្តរជាតិ ថ្លែងបិទវគ្គការប្រកួត។

ថ្លែងបិទវគ្គការប្រកួតនេះ លោកខូវឆាយ អគ្គលេខាធិការសហព័ន្ធកីឡាប្រដាល់គុនខ្មែរអន្តរជាតិ បានវាយតម្លៃក្នុងអំឡុងពេលការប្រកួត កីឡាករបានបង្ហាញពីភាពអង់អាចក្លាហាន គោរពវិន័យ មានបច្ចេកទេសពូកែ និងស្មារតីគោរពខ្ពស់។

តាមរយៈការប្រកួតនេះ កីឡាករ គ្រូបង្វឹក មន្ត្រីនិងថ្នាក់ដឹកនាំកីឡាមកពីប្រទេសជាច្រើននៅអាស៊ី បានដោះដូរបទពិសោធន៍ ពង្រឹងកិច្ចសហប្រតិបត្តិការ និងកសាងចំណងមិត្តភាពយូរអង្វែងតាមរយៈកីឡា។

កីឡាករវៀតណាម (ខាងស្តាំ) អបអរទទួលជ័យជម្នះក្នុងវគ្គប្រកួតផ្តាច់ព្រ័ត្រ។

សហព័ន្ធកីឡាប្រដាល់គុនខ្មែរអន្តរជាតិ នឹងបន្តសហការស្អិតល្មួតជាមួយនឹងសហព័ន្ធនៃប្រទេសដែលជាសមាជិកចាត់តាំងការប្រកួត សិក្ខាសាលាជំនាញ កម្មវិធីបណ្តុះបណ្តាល និងសកម្មភាពផ្លាស់ប្តូរវប្បធម៌។ ទន្ទឹមនឹងនោះ លើកកម្ពស់ស្តង់ដារការងារអាជ្ញាកណ្តាល ធានាសុវត្ថិភាពដល់កីឡាករ និងបង្កឱកាសបន្ថែមដើម្បីកីឡាករវ័យក្មេងអភិវឌ្ឍទេពកោសល្យ និងប្រកួតនៅលើឆាកអន្តរជាតិ។

រង្វាន់ជើងឯកកីឡាប្រដាល់គុនខ្មែរអាស៊ី លើកទី១ ឆ្នាំ ២០២៦ អាស្រ័យមន្ទីរវប្បធម៌ កីឡា និងទេសចរណ៍ទីក្រុងកឹងធើ សហការជាមួយនាយកដ្ឋានកីឡាអប់រំកាយវៀតណាមចាត់តាំងឡើង។ ការប្រកួតដណ្តើមរង្វាន់នេះ មានគ្រូបង្វឹក និងកីឡាករសរុប ២៣៦ នាក់ មកពីប្រទេសនានាចំនួន ១១ រួមមាន៖ ប្រទេសអាហ្វហ្គានីស្ថាន កម្ពុជា ប្រទេសចិន ឥណ្ឌា ឥណ្ឌូនេស៊ី កាហ្សាក់ស្ថាន ឡាវ ម៉ាឡេស៊ី ហ្វីលីពីន កូរ៉េខាងត្បូង និងម្ចាស់ផ្ទះវៀតណាម ដោយប្រកួតដណ្តើមមេដាយចំនួន ៧០ គ្រឿង។ ម្ចាស់ផ្ទះវៀតណាមចូលរួមក្នុងការប្រកួតនេះ មានគ្រូបង្វឹកចំនួន ១៧ នាក់ និងកីឡាករចំនួន ៦៣ នាក់៕