មហាសាមគ្គីជនជាតិ ភូមិស្រុកផ្លាស់ថ្មី

23/12/2024 - 15:04

យុវជនជក់ចិត្តនឹងទូក-ងតូចៗ

ថាច់រ៉ូស៊ីយ៉ន នៅភូមិតឹងឡើយ ឃុំថាញ់តឹង ស្រុកថាញ់ទ្រី ខេត្តសុកត្រាំង បានធ្វើទូក-ង តូចៗសម្រាប់តាំងលម្អ តែងបានអ្នកស្រឡាញ់ទូក-ងចូលចិត្តនិងគាំទ្រ។ នេះក៏ជាទម្រង់ផ្ដើមអាជីពដែលជំរុញឱ្យបងស៊ីយ៉ន ទទួលបានរង្វាន់លើកទឹកចិត្តក្នុងពិធីប្រឡងគម្រោងផ្ដើមអាជីព យុវជនជនបទឆ្នាំ ២០២៣ អាស្រ័យមជ្ឈិមសម្ព័ន្ធយុវជនហូជីមិញបំផុស។

ថាច់រ៉ូស៊ីយ៉ន (ខាងស្ដាំដៃ) ឧទ្ទេសនាមពីទូក-ងតាំងលម្អដល់ភ្ញៀវដែលមកទស្សនា។

តាំងពីតូច ស៊ីយ៉ន តែងតាមឪពុកទៅគូរគំនូរទូក-ងនិងសំណង់ផ្សេងៗនៅតាមវត្តអារាម។ ដោយសង្កេតឃើញស៊ីយ៉ន មានទេពកោសល្យនិងចំណង់ចំណូលចិត្តសិល្បៈគំនូរ ទើបបានឪពុកបង្រៀនរបៀបគូរគំនូរនេះដល់បង។ មិនត្រឹមតែមានទឹកដៃក្នុងការរចនាក្បូរក្បាច់លើទូក-ងធំៗនោះទេ ស៊ីយ៉ន នៅមានទឹកដៃដ៏ប៉ិនប្រសប់ច្នៃធ្វើទូក-ងតូចៗស្រស់ស្អាតទៀតផង។ បងយ៉ន រៀបរាប់ៈ “តាំងពីតូចមក ខ្ញុំចូលចិត្តបំផុតគឺកីឡាទូក-ង ម្ល៉ោះហើយ ខ្ញុំតែងតាមដានការប្រណាំងទូក-ងរបស់ខេត្ត ដើម្បីដឹងច្បាស់ពីទម្រង់ទូក-ងនិងក្បូរក្បាច់រចនាទូក-ង របស់វត្តនីមួយៗ។ បន្ទាប់មក ខ្ញុំដើររកដើមមាក់បាត ដើមស្មាច់ យកហាលឱ្យស្ងួត រួចហើយ ចាំង លុងឆ្លាក់ធ្វើជាទូក-ងតូចៗ។ ក្រោយពីច្នៃបានទូកហើយ ខ្ញុំក៏ចាប់ផ្ដើមផាត់ពណ៌ រំលេចក្បូរក្បាច់ឱ្យបេះបិទនឹងទូក-ងរបស់វត្តនោះៗ”។

ដំបូងទូក-ងតូចៗនេះ បងស៊ីយ៉ន គាត់ធ្វើឡើងគឺគ្រាន់តែបង្ហាញពីទឹកចិត្តស្រឡាញ់ទូក-ង ទុកសម្រាប់តាំងលម្អក្នុងផ្ទះ ហើយថតបង្ហោះលើ Facebook, Zalo របស់ខ្លួន។ តាមរយៈនោះ ទូក-ងតាំងលម្អរបស់បង ក៏មានអ្នកកក់ទិញជាហូរហែ។ ផ្ដើមពីនោះ ទម្រង់ទូក-ងតូចៗរបស់បងស៊ីយ៉ន ក៏មានអ្នកស្គាល់ច្រើន ហើយបងក៏ចាប់ផ្ដើមទទួលការបញ្ជាទិញ តាមការស្រឡាញ់ ចូលចិត្តរបស់អតិថិជន តាំងពីទំហំខ្នាតវែងខ្លី និងក្បាច់ទូក-ងដែលគាត់ស្រឡាញ់គាំទ្រ ។ បងស៊ីយ៉ន ឱ្យដឹង៖ “រយៈពេលជាង ១០ ឆ្នាំមកនេះ ខ្ញុំធ្វើបានជាង១០០ទូក ទៅតាមទំហំនិងខ្នាតវែងខ្លីពី ២០-៥០ សង់ទីម៉ែត្រ តម្លៃចាប់ពី៥០០.០០០ ដុងដល់ ១,៨ លានដុង។ ជាធម្មតាទូកមួយគ្រឿងខ្ញុំធ្វើពី៣ដល់៥ថ្ងៃ ទៅតាមទំហំខ្នាតវែងខ្លី។ ដើម្បីធ្វើបានទូកស្រស់ស្អាត អ្នកធ្វើត្រូវមានទឹកដៃប៉ិនប្រសប់ក្នុងការច្នៃ ការរចនាក្បូរក្បាច់ ផាត់ពណ៌ បង្ហាញពីសោភណភាពនៃគំនូរ ធ្វើយ៉ាងណាឱ្យបេះបិទទូក-ងរបស់វត្តណាមួយដែលយើងស្រឡាញ់ចូលចិត្ត”។

សព្វថ្ងៃទម្រង់ទូក-ងតូចៗរបស់បងស៊ីយ៉ន ត្រូវបានសម្ព័ន្ធយុវជនឃុំថាញ់តឹង ឧបត្ថម្ភចូលរួមក្នុងការប្រឡងផ្ដើមគំនិត គម្រោងផ្ដើមអាជីព ច្នៃប្រតិដ្ឋរបស់យុវជនថ្នាក់ខេត្ត មជ្ឈិមនិងចូលរួមដាក់តាំងផលិតផលនៅក្នុងកម្មវិធីប្រឡង ផ្សារណាត់ជំរុញដំណើរការពាណិជ្ជកម្មផលិតផល OCOP និងផលិតផលពិសេសក្នុងតំបន់ខេត្តសុកត្រាំង; ដាក់តាំងក្នុងមហាសន្និបាតតំណាងសមាគមសហព័ន្ធយុវជនវៀតណាមខេត្ត និងដាក់លក់លើគេហទំព័រវេទិកាពាណិជ្ជកម្មអេឡិចត្រូនិករបស់ខេត្ត។ បងស៊ីយ៉ន ឱ្យដឹងបន្ថែម៖ “ឆ្នាំ២០២៣ នៅពេលទទួលបានរង្វាន់លើកទឹកចិត្ត ពីកម្មវិធីប្រឡងគម្រោងផ្ដើមអាជីពយុវជន ជនបទឆ្នាំ ២០២៣ របស់មជ្ឈិមសហព័ន្ធយុវជន ខ្ញុំរំភើបចិត្តណាស់។ ពីព្រោះនោះគឺជាកម្លាំងចលករនិងជាទំនុកចិត្តដ៏ធំធេង ដើម្បីខ្ញុំបន្តខិតខំប្រឹងប្រែងចាប់យកអាជីពនេះ ទន្ទឹមនឹងការបង្កើនប្រាក់ចំណូល ថែមទាំងរួមចំណែកក្នុងការអភិរក្សកីឡាប្រពៃណីរបស់ជនរួមជាតិខ្មែរ។ ព្រមជាមួយនោះ ក៏ធ្វើការផ្សព្វផ្សាយពីផលិតផលទូក-ងតាំងលម្អដល់ភ្ញៀវទេសចរក្នុងនិងក្រៅប្រទេស” ៕

យ៉ីអាញ-ពេជ្រសឿន

ចែករំលែកអត្ថបទ

ពាក្យគន្លឹះ