គោលនយោបាយ -ការរស់នៅ គោលនយោបាយ

16/12/2024 - 09:18

ជំនួយកម្លាំងដល់ជនរួមជាតិខ្មែរ

រយៈពេលកន្លង ឃុំតឹងឡុក ស្រុកថើយប៊ិញ ខេត្តកាម៉ាវ បានផ្សព្វផ្សាយអនុវត្តល្អនូវកម្មវិធីគម្រោង និងគោលនយោបាយជនជាតិ; ផ្ដើមពីនោះ ជួយដល់ការអភិវឌ្ឍសេដ្ឋកិច្ច-សង្គមតំបន់ជនជាតិភាគតិច ជីវភាពសម្ភារៈនិងស្មារតីរបស់ជនជាតិភាគតិចត្រូវបានលើកស្ទួយ។

មូលដ្ឋានជាងឈើរបស់គ្រួសារបងឡឹមដន។

ឃុំតឹងឡុក មានជនរួមជាតិភាគតិច ២២៩ គ្រួសារ ដោយមានចំនួនមនុស្ស ៨១២ នាក់ ស្រូបអត្រា ៧,៩១%។ អនុវត្តកម្មវិធីទិសដៅជាតិអភិវឌ្ឍសេដ្ឋកិច្ច - សង្គមតំបន់ជនរួមជាតិភាគតិច ដំណាក់កាល ២០២១ - ២០២៥ នៅឆ្នាំ ២០២៣ ឃុំបានផ្សព្វផ្សាយអនុវត្តសំណង់នៃអនុគម្រោងទី ១ អនុគម្រោងទី ៤ វិនិយោគហេដ្ឋារចនាសម្ព័ន្ធចាំបាច់បម្រើដល់ការផលិតកម្ម និងជីវភាពក្នុងតំបន់ជនរួមជាតិភាគតិច។ បច្ចុប្បន្ន ធ្វើដំណើរតាមដងផ្លូវចូលមកកាន់មណ្ឌលតាំងទីលំនៅភូមិ ៧ នឹងបានឃើញនូវភាពរីកចម្រើននៅពេលដែលប្រព័ន្ធផ្លូវគមនាគមន៍ត្រូវបានវិនិយោគបង្កើនកម្រិតនិងបើកទូលាយ។

បងឃឺវថាញ់តៀង នៅមណ្ឌលតាំងទីលំនៅភូមិ ៧ រ៉ាយរ៉ាប់៖ “មុននេះ ផ្លូវចូលផ្ទះតូចចង្អៀត រដូវភ្លៀងភក់ជ្រាំ។ ចាប់តាំងពីបានបង្កើនកម្រិតនិងបើកទូលាយ ប្រជាជននៅទីនេះសប្បាយរីករាយគ្រប់គ្នា ដ្បិតអី ការធ្វើដំណើរទៅមកនិងដឹកជញ្ជូនទំនិញបានងាយស្រួល”។ ទន្ទឹមនឹងនោះ កម្មវិធីគម្រោងចំណុះកម្មវិធីទិសដៅជាតិ កាត់បន្ថយភាពក្រីក្រដោយចីរភាពលើភូមិសាស្រ្តឃុំត្រូវបានផ្សព្វផ្សាយនិងពង្រីកបានប្រសិទ្ធភាព មានដូច៖ ជំនួយទុនពូជដំណាំ សត្វចិញ្ចឹម ។ល។ បង្កលក្ខណៈងាយស្រួលដើម្បីគ្រួសារក្រីក្រ គ្រួសារប្រកៀកបន្ទាត់ក្រមានដើមទុនអភិវឌ្ឍផលិតកម្ម បង្កើនប្រាក់ចំណូល កែលម្អជីវភាពជនរួមជាតិភាគតិច រួមចំណែកកាត់បន្ថយអត្រាគ្រួសារក្រីក្រលើភូមិសាស្រ្តឃុំ។

ឆ្នាំ ២០០៦ ក្រោយពីរៀបការប្ដីប្រពន្ធបងឡឹមដន (ជនជាតិខ្មែរ នៅភូមិ ៧) ចេញរស់នៅដោយឡែក ពេលនោះជីវភាពនៅលំបាក ចំណុះក្របខ័ណ្ឌគ្រួសារក្រីក្ររបស់ឃុំ។ បានការឧបត្ថម្ភរបស់រដ្ឋអំណាចភូមិភាគ បងដន បានបុលទុន ១៣ លានដុងអំពីធនាគារគោលនយោបាយសង្គមសម្រាប់អភិវឌ្ឍសេដ្ឋកិច្ច។ ដោយធ្លាប់ធ្វើជាងឈើ បន្ទាប់ពីមានដើមទុន បងដនក៏វិនិយោគ បង្កើតមូលដ្ឋានជាងឈើ។ អាស្រ័យឧស្សាហ៍ព្យាយាម គ្រួសារបានឆ្លងកាត់ការលំបាក រាល់ផលិតផលដែលធ្វើពីឈើរបស់បងដន ត្រូវបានអតិថិជនស្គាល់ច្រើននិងកុម្មង់ទិញ។ គ្រួសារបងដន សង់បានផ្ទះរឹងមាំនិងទិញបានដីបន្ថែមសម្រាប់ចិញ្ចឹមជលផល រហូតដល់ឆ្នាំ ២០១១ បានចាកផុតពីភាពក្រីក្រ។ “អាស្រ័យបានការយកចិត្តទុកដាក់ឧបត្ថម្ភរបស់រដ្ឋអំណាចភូមិភាគ និងជួយឱ្យខ្ញុំបានបុលទុនសម្រាប់ធ្វើសេដ្ឋកិច្ច ម្ល៉ោះហើយសព្វថ្ងៃគ្រួសារខ្ញុំរកបានប្រាក់ចំណូលលំនឹង” បងដន បានចែករំលែកដូច្នេះ។

លោកង្វៀងវ៉ាន់ត្វង ប្រធានគណៈកម្មាធិការប្រជាជនឃុំតឹងឡុក ឱ្យដឹង៖ “កន្លងហើយ ក្រៅពីការយកចិត្តទុកដាក់របស់បក្ស រដ្ឋ និងការឧបត្ថម្ភផ្សព្វផ្សាយទាន់ពេលរបស់ភូមិភាគ ឃើញថា ការខិតខំប្រឹងប្រែងឈានឡើងរបស់ជនរួមជាតិភាគតិចត្រូវបានពង្រីកប្រសិទ្ធភាព។ ផ្ដើមពីនោះ ជីវភាពរបស់ជនរួមជាតិភាគតិចមានការវិវឌ្ឍច្បាស់ក្រឡែត មុខមាត់ជនបទតំបន់ជនរួមជាតិភាគតិចមានការរីកចម្រើនពីមួយថ្ងៃទៅមួយថ្ងៃ។ បន្ទាប់ពីផ្សព្វផ្សាយកម្មវិធីគោលនយោបាយជនជាតិ ហេដ្ឋារចនាសម្ព័ន្ធត្រូវបានវិនិយោគ មានដូច៖ អគ្គិសនី ផ្លូវថ្នល់ សាលារៀន ដំណាក់សុខាភិបាល និងទឹកស្អាតប្រើប្រាស់; ទម្រង់ផលិតកម្មជាច្រើនមានប្រសិទ្ធភាព បង្កើតការងារធ្វើដល់ពលករ រួមចំណែកបង្កើនប្រាក់ចំណូល។ អត្រាគ្រួសារក្រីក្រ គ្រួសារប្រកៀកបន្ទាត់ក្របានកាត់បន្ថយ គ្រួសារធូរធារកើនឡើង ជីវភាពក៏រីកចម្រើនឡើងជាលំដាប់ពីមួយថ្ងៃទៅមួយថ្ងៃ មុខមាត់ជនបទបានផ្លាស់ថ្មី។ ផែនមហាសាមគ្គីទូទាំងជនជាតិត្រូវបានរឹតបន្តឹងពីមួយថ្ងៃទៅមួយថ្ងៃ សន្ដិសុខសណ្ដាប់ធ្នាប់ត្រូវបានធានា”៕

ប្រភព៖ កាសែតកាម៉ាវ-ប្រែសម្រួល៖ ថាច់ធី

ចែករំលែកអត្ថបទ

ពាក្យគន្លឹះ