មហាសាមគ្គីជនជាតិ គំរូក្នុងសហគមន៍

04/11/2024 - 15:07

កសិករប្ដេជ្ញាចិត្តធ្វើមាន

ប៉ិនគិតគូរ ហ៊ានវិនិយោគក្នុងការអភិវឌ្ឍសេដ្ឋកិច្ច លោកពូឡឹមស៊ា ស្នាក់នៅអនុសង្កាត់២ សង្កាត់៥ ក្រុងសុកត្រាំង ខេត្តសុកត្រាំង បានក្លាយជាសេដ្ឋីតំបន់ជនបទ។

លោកពូឡឹមស៊ា។

សព្វថ្ងៃ លោកពូឡឹមស៊ា រស់នៅក្នុងលំនៅឋានដ៏សមរម្យ ធំទូលាយ មានគ្រឿងសម្ភារៈប្រើប្រាស់ចាំបាច់គ្រប់សព្វ។ ក្បែរផ្ទះមានឃ្លាំងដ៏ធំមួយទំហំ ២០០០ ម៉ែត្រការ៉េសម្រាប់ស្ដុកទុកចំបើង គ្រឿងម៉ាស៊ីនកសិកម្មនិងសម្ភារៈសម្រាប់បម្រើការងារកសិកម្ម។ តាមប្រសាសន៍ លោកពូឡឹមស៊ា ដើម្បីមានជីវភាពធូរធារដូចសព្វថ្ងៃ គឺជាដំណាក់កាលនៃការខិតខំប្រឹងប្រែង ហ៊ានគិត ហ៊ានធ្វើ និងហ៊ានវិនិយោគក្នុងការផលិត ធ្វើអាជីវកម្មដោយពិពិធកម្មមុខរបរកសិកម្ម។

ក៏ដូចជាយុវជនដទៃទៀតដែរ នៅពេលរៀបការរួច គាត់បានឪពុកម្ដាយចែកដីស្រែពីរបីកុង ហេតុនោះ ក្រៅពីធ្វើស្រែ គាត់នៅទាំងរត់ម៉ូតូឌុបដើម្បីរកប្រាក់ចំណូលបន្ថែមសម្រាប់ផ្គត់ផ្គង់ជីវភាពគ្រួសារ។ ប្ដីប្រពន្ធលោកពូឡឹមស៊ា ចាយវាយប្រិតសំចៃ សន្សែសន្សំលុយទុកទិញមាស ទិញដីស្រែ។ លោកពូស៊ា រៀបរាប់៖ រស់នៅតំបន់ជនបទ បើចង់ធ្វើមានគឺត្រូវមានដីស្រែច្រើន។ ហេតុនោះ គាត់ធ្វើស្រែបណ្ដើរ រត់ម៉ូតូឌុបបណ្ដើរដើម្បីរកប្រាក់ចំណូលបន្ថែម។ កាលនោះ រត់ម៉ូតូឌុបបានណាស់! ម្ល៉ោះហើយ នរណាហៅឌុបទៅណាគឺខ្ញុំទៅហ្នឹង មិនថាពេលយប់ព្រលប់ទេ។ ប្រាក់ដែលបានមកពីការលក់ស្រូវនិងរត់ម៉ូតូឌុប ខ្ញុំសន្សែសន្សំទិញមាស ទិញដីស្រែ”។ ចេះតែប្រព្រឹត្តទៅដូច្នេះពីមួយឆ្នាំទៅមួយឆ្នាំ ប្រាក់លក់ស្រូវនិងរត់ម៉ូតូឌុប សន្សែសន្សំទុកសម្រាប់ទិញដីស្រែ លុះដល់ឆ្នាំ ២០០៥ លោកពូឡឹមស៊ា ធ្វើម្ចាស់លើកម្មសិទ្ធិដីស្រែជាង ១០ ហិកតា។

លោកពូឡឹមស៊ា ក្បែររថយន្តដឹកចំបើង។

និស្ស័យជាអ្នកប៉ិនគិតគូរ ម្ល៉ោះហើយ ពេលមានដីស្រែច្រើនសម្រាប់បង្កបង្កើនផល លោកពូឡឹមស៊ា វិនិយោគទិញម៉ាស៊ីនសម្រាប់ធ្វើសេវាកសិកម្ម ដើម្បីធ្វើមាន។ សព្វថ្ងៃ លោកពូស៊ា ទិញបានម៉ាស៊ីនច្រូតកាត់ ២ គ្រឿង ម៉ាស៊ីនមូរចំបើង ៦ គ្រឿង ដ្រូនកសិកម្ម ២ គ្រឿង។ ជាមួយនឹងឧបករណ៍ធ្វើសេវាកសិកម្មនេះ លោកពូស៊ា បានជួយដោះស្រាយការងារធ្វើជូនពលករជនបទជាង ២០ នាក់។ លោកពូស៊ា អំណួត៖ “ហ៊ានវិនិយោគ ទើបអាចធ្វើមានបាន ចំពោះឧបករណ៍កសិកម្មសម្រាប់ធ្វើសេវានោះគឺម៉ាស៊ីនមូរចំបើង ព្រោះការលក់ចំបើងរកបានប្រាក់ចំណូលខ្ពស់បំផុត។ ជាមធ្យមខ្ញុំលក់ចំបើងឱ្យឈ្មួញកណ្ដាលនៅតាមខេត្តក្រុងនានាតំបន់ណាមបូក្នុងមួយរដូវប្រមាណ ៧.០០០ ដុំ (មួយឆ្នាំ៣រដូវ) តម្លៃចំបើងមួយដុំពី ២៥.០០០ ដុងដល់ ៣៥.០០០ ដុង។ ក្នុងមួយឆ្នាំខ្ញុំរកបានប្រាក់ចំណូលមិនក្រោមពី ១ ពាន់លានដុងពីការធ្វើស្រែ ធ្វើសេវាកសិកម្មនិងលក់ចំបើង”។

អាស្រ័យការខិតខំប្រឹងប្រែងឈានឡើងធ្វើមាន លោកពូស៊ា បាននាយករដ្ឋមន្ត្រីនៃរដ្ឋាភិបាល ជូនបណ្ណសរសើរពីព្រោះសម្រេចបានស្នាដៃឆ្នើមក្នុងចលនា “កសិករផលិត ធ្វើអាជីវកម្មពូកែ សាមគ្គីជួយគ្នាធ្វើមាន និងកាត់បន្ថយភាពក្រីក្រដោយចីរភាព”; បានគណៈកម្មាធិការប្រជាជនខេត្តសុកត្រាំង ជូនលិខិតសរសើរជាបន្តបន្ទាប់។ លោកឡេអាញត្វឹង ប្រធានគណៈកម្មាធិការប្រជាជនសង្កាត់ ៥ ឱ្យដឹង៖ “លោកឡឹមស៊ា ជាកសិករគំរូ ឈានឡើងធ្វើមានដោយកម្លាំងរបស់ខ្លួន និងជាបុគ្គលឈានមុខក្នុងការធ្វើស្រូវគុណភាពខ្ពស់ សំខាន់គឺពូជស្រូវ ST២៥ តាមទិសដៅសរីរាង្គ។ លោកឡឹមស៊ា គាត់រស់នៅមានធម៌ណាស់ ចូលចិត្តធ្វើការងារសប្បុរស ជួយដល់អ្នកមានជីវភាពក្រខ្សត់ក្នុងភូមិស្រុក ខ្នះខ្នែងចូលរួមចលនាប្រឡងប្រណាំងនៅមូលដ្ឋាន។ ជាក់ស្ដែងថ្មីៗនេះលោកឡឹមស៊ា បានឧបត្ថម្ភអង្ករ ៤ តោនដល់មាមីងនៅភូមិភាគខាងជើងដែលរងគ្រោះដោយព្យុះលេខ ៣ ដូច្នេះហើយ ទឹកចិត្តសប្បុរសរបស់គាត់គឺវិសេសវិសាលណាស់”៕

លីធាន - ពេជ្រសឿន

ចែករំលែកអត្ថបទ

ពាក្យគន្លឹះ