គោលនយោបាយ -ការរស់នៅ គោលនយោបាយ

23/09/2024 - 16:31

បំផុសសេចក្ដីប្រាថ្នារួមចំណែករបស់កងជួរកម្មាភិបាល បក្ខជនជាជនជាតិភាគតិចនៅក្រុងកឹងធើ

ក្រុងកឹងធើ បានអនុវត្តកម្មវិធីជំនួយជាច្រើន សំដៅបំផុសសេចក្ដីប្រាថ្នារួមចំណែករបស់កងជួរ កម្មាភិបាល បក្ខជនជាជនជាតិភាគតិច រួមចំណែកអភិវឌ្ឍក្រុងកឹងធើឆាប់រហ័សនិងចីរភាព។

កម្មាភិបាលជនជាតិភាគតិចលើភូមិសាស្រ្តក្រុង តែងលើកទឹកចិត្តជនរួមជាតិអនុវត្ត
ចលនាប្រឡងប្រណាំងស្នេហាជាតិ។ រូបថត៖ ង៉ុកក្វៀង

អនុវត្តសេចក្ដីសម្រេចចិត្តលេខ ៥២/NQ-CP របស់នាយករដ្ឋមន្រ្តីនៃរដ្ឋាភិបាល គណៈកម្មាធិការប្រជាជនក្រុងកឹងធើ បានប្រកាសឱ្យប្រើផែនការលេខ ៣៥/KH-UBND ចុះថ្ងៃ ១៥/៣/២០១៧ អំពីជំរុញការអភិវឌ្ឍប្រភពធនធានមនុស្សបណ្ដាជនជាតិភាគតិច ដំណាក់កាល ២០១៧ - ២០២០ ទិសដៅដល់ឆ្នាំ ២០៣០។ ក្រោយរយៈពេលផ្សព្វផ្សាយអនុវត្តការងារអភិវឌ្ឍកងជួរកម្មាភិបាល បក្ខជនជាជនជាតិភាគតិចសម្រេចបានលទ្ធផលសំខាន់ៗជាច្រើន។ គិតត្រឹមថ្ងៃ ៣១/១២/២០២៣ ក្រុងកឹងធើមានកម្មាភិបាល បុគ្គលិក អ្នករដ្ឋការ និយោជិតជាជនជាតិភាគតិចចំនួន៦៥៤នាក់ ស្រូបអត្រា២,៩៤%។ អំពីកម្រិតវិជ្ជាជីវៈ៖ មានកម្មាភិបាល បុគ្គលិក អ្នករដ្ឋការជាជនជាតិភាគតិច១០០% មានកម្រិតវិជ្ជាជីវៈចាប់ពីមធ្យមសិក្សាឡើង ក្នុងនោះ អត្រាកម្មាភិបាល បុគ្គលិក អ្នករដ្ឋការជាជនជាតិភាគតិចមានកម្រិតមហាវិទ្យាល័យឡើងគឺ៨២,៧៣%; ក្រោយមហាវិទ្យាល័យសម្រេច១៤,១០%។ អំពីកម្រិតវិជ្ជាទ្រឹស្ដីនយោបាយ៖ អត្រាកម្មាភិបាល បុគ្គលិក អ្នករដ្ឋការជាជនជាតិភាគតិច មានកម្រិតវិជ្ជាទ្រឹស្ដីនយោបាយចាប់ពីកម្រិតមធ្យមឡើងសម្រេច៣០,៥៩%។

រៀងរាល់ឆ្នាំ គណៈជនជាតិក្រុងបានសហការជាមួយនឹងគណៈកម្មាធិការរណសិរ្សមាតុភូមិវៀតណាមក្រុង នគរបាលក្រុង និងគណៈសាសនា ចំណុះមន្ទីរមហាផ្ទៃ រៀបចំការដោះដូរ រៀនសូត្រ បទពិសោធន៍ ស្វែងយល់កេរដំណែលប្រវត្តិសាស្រ្តបដិវត្តន៍ជូនអ្នកមានប្រជាប្រិយក្នុងជនរួមជាតិភាគតិច។ ទន្ទឹមនឹងនោះ ក្រុងតែងយកចិត្តទុកដាក់ដល់ការអនុវត្តគោលនយោបាយចំពោះកងជួរកម្មាភិបាល បក្ខជននិងអ្នកមានប្រជាប្រិយជាជនជាតិភាគតិច។ អនុវត្តសេចក្ដីសម្រេចចិត្តលេខ ០៨/២០១៧/NQ-HĐND ចុះថ្ងៃ ៦/១០/២០១៧ របស់ក្រុមប្រឹក្សាប្រជាជនក្រុងកឹងធើ អំពីការទិញប័ណ្ណធានារ៉ាប់រងសុខាភិបាលជូនអ្នកមានប្រជាប្រិយក្នុងជនរួមជាតិភាគតិច រៀងរាល់ឆ្នាំ ក្រុងតែងទិញប័ណ្ណធានារ៉ាប់រងសុខាភិបាល ជូនអ្នកមានប្រជាប្រិយក្នុងសហគមន៍ជនជាតិភាគតិច។

ការអនុវត្តសកម្មភាពខាងលើមានអត្ថន័យជាក់ស្ដែង ជាកម្លាំងលើកទឹកចិត្តផ្នែកស្មារតីដល់កងជួរកម្មាភិបាល បក្ខជននិងអ្នកមានប្រជាប្រិយក្នុងជនរួមជាតិភាគតិច។ ឆ្លងតាមរយៈនោះ បង្កជាកម្លាំងចលករ និងបំផុសសេចក្ដីប្រាថ្នារួមចំណែកដើម្បីពួកគាត់កាន់តែខិតខំបំពេញតួនាទីរបស់ខ្លួនក្នុងការងារផ្សព្វផ្សាយ កៀរគរជនរួមជាតិ អនុវត្តល្អនូវគោលការណ៍ គោលមាគ៌ារបស់បក្ស គោលនយោបាយ ច្បាប់របស់រដ្ឋ និងសេចក្ដីកំណត់របស់ភូមិភាគ បង្កើនការពង្រឹងពង្រីកផែនមហាសាមគ្គីបណ្តាជនជាតិលើភូមិសាស្រ្តក្រុងកឹងធើ។

ដើម្បីបន្តការបំផុសសេចក្ដីប្រាថ្នារួមចំណែករបស់កងជួរកម្មាភិបាល បក្ខជនជាជនជាតិភាគតិច ក្រុងកឹងធើបន្តការបញ្ជ្រាបនិងចង្អុលការអនុវត្តប្រកបដោយប្រសិទ្ធភាពនូវសេចក្ដីសម្រេចចិត្តនិងសេចក្តីសម្រេចរបស់មជ្ឈិម អំពីការងារជនជាតិក្នុងស្ថានភាពថ្មី។ ទន្ទឹមនឹងនោះ យកចិត្តទុកដាក់និងបន្តជំរុញការអនុវត្តផែនការលេខ ៣៥ ចុះថ្ងៃ ១៥/៣/២០១៧ អំពីជំរុញការអភិវឌ្ឍប្រភពធនធានមនុស្សបណ្ដាជនជាតិភាគតិច ដំណាក់កាល២០១៧ - ២០២០ ទិសដៅដល់ឆ្នាំ ២០៣០ លើភូមិសាស្រ្តក្រុង; ផែនការលេខ ១៦៨/KH-UBND ចុះថ្ងៃ១៧/១១/២០១៧ របស់គណៈកម្មាធិការប្រជាជនក្រុង អនុវត្តគម្រោងអភិវឌ្ឍកងជួរកម្មាភិបាល បុគ្គលិក អ្នករដ្ឋការជាជនជាតិភាគតិចក្នុងសម័យថ្មី។ល។ ទន្ទឹមនឹងនោះ ទីក្រុងគប្បីពិនិត្យឡើងវិញយ៉ាងហ្មត់ចត់នូវការងាររៀបចំគម្រោងបណ្ដុះបណ្ដាល បញ្ជូនកម្មាភិបាល បក្ខជនជាជនជាតិភាគតិចទៅរៀន សមស្របនឹងមុខជំនាញ សមត្ថភាព ចំណូលចិត្តក្នុងការងាររបស់កម្មាភិបាល បុគ្គលិក អ្នករដ្ឋការដែលកំពុងទទួលបន្ទុកដើម្បីពង្រីកលក្ខណៈសកម្មច្នៃប្រតិដ្ឋ លើកកម្ពស់គុណភាពប្រភពធនធានមនុស្សរបស់ស្ថាប័ន អង្គភាព។ ក្រៅពីនោះ គប្បីផ្ដោតការយកចិត្តទុកដាក់ដល់ការងាររៀបចំគម្រោងបណ្ដុះបណ្ដាល បំពាក់បំប៉ន ពង្រីកបក្ខជន សម្ព័ន្ធយុវជន សមាជិកសមាគមក្នុងជនរួមជាតិភាគតិច៕

ប្រែសម្រួល៖ ថាច់ធី

ចែករំលែកអត្ថបទ

ពាក្យគន្លឹះ