មហាសាមគ្គីជនជាតិ ភូមិស្រុកផ្លាស់ថ្មី

03/06/2024 - 15:58

ទម្រង់សេដ្ឋកិច្ចទីក្រុងមានប្រសិទ្ធភាព

ប៉ុន្មានឆ្នាំមកនេះ ជាមួយនឹងស្មារតីឈានមុខក្នុងការអភិវឌ្ឍសេដ្ឋកិច្ច មានយុវជនជាច្រើននៅខណ្ឌអូរម៉ូង ក្រុងកឹងធើ បាននាំមុខក្នុងការអភិវឌ្ឍសេដ្ឋកិច្ចកសិកម្មទីក្រុង។ ឆ្លងតាមរយៈនោះ បានជ្រើសរើសបង្កើតទម្រង់សេដ្ឋកិច្ច សមស្របនឹងលក្ខណៈជាក់ស្តែង នាំមកនូវប្រសិទ្ធភាពសេដ្ឋកិច្ចខ្ពស់។

ទម្រង់ធ្វើអាជីវកម្មដើមដំបងយក្សលម្អ ជួយឱ្យបងថាយដាក់ត្រុង រកបានប្រាក់
ចំណូលប្រមាណ ៥០ លានដុងក្នុងមួយខែ។

ដាំដើមដំបងយក្ស - រកបានប្រាក់ចំណូលខ្ពស់

ដើមដំបងយក្ស ជារុក្ខជាតិលម្អមួយប្រភេទ បានមនុស្សជាច្រើនជ្រើសទិញសម្រាប់ដាក់តាំងលម្អ ឬក៏ជូនជាវត្ថុអនុស្សាវរីយ៍។ ចាប់យកបាននិន្នាការនេះ ឆ្នាំ២០១៩ បងថាយដាក់ត្រុង នៅសង្កាត់ចូវវ៉ាន់លីម ផ្តើមអាជីពជាមួយទម្រង់ធ្វើអាជីវកម្មដើមដំបងយក្សលម្អ។ ជាមួយនឹងការឧស្សាហ៍ព្យាយាម និងភាពប៉ិនប្រសប់ក្នុងការធ្វើអាជីវកម្ម មកទល់ពេលនេះ បងត្រុង បានបង្កាត់ពូជដើមដំបងយក្សលម្អរាប់ពាន់ដើម រកបានប្រាក់ចំណូលរាប់សិបលានដុងក្នុងមួយខែ។

បងត្រុង រៀបរាប់នៅឆ្នាំ ២០១៩ គាត់បានទិញពូជដើមដំបងយក្សចំនួន ១០ ដើម ដោយតម្លៃ ៥០០.០០០ ដុង យកមកដាំសាកល្បង។ បងត្រុង ឱ្យដឹង៖ “ដំបូង ដោយសារពុំទាន់មានបទពិសោធន៍ក្នុងការថែទាំ ដូច្នេះ ដើមដំបងយក្ស មានការលូតលាស់យឺត ដើមខ្លះរលួយឫសងាប់ ក៏សឹងមាន។ ខ្ញុំបានសិក្សាស្រាវជ្រាវបទពិសោធន៍ពីការដាំដើមដំបងយក្សតាមបណ្តាញសង្គម ដើម្បីស្វែងរកមូលហេតុនិងកែលម្អវា ទើបដើមដំបងយក្សឆាប់លូតលាស់និងចេញកូនច្រើន”។ ក្រោយពីថែទាំបាន ១ ឆ្នាំ បងត្រុងបំបែកកូនបាន២០០ ដើមសម្រាប់ដាំ។ ដោយឃើញកូនដុះមានចំនួនច្រើន បងត្រុងពង្រីកផ្ទៃដីដាំឡើងដល់ ២០០ ម៉ែត្រការ៉េ ហើយបានវិនិយោគសាងសង់រោងកញ្ចក់ ដោយចំណាយថវិកាប្រមាណ ២០ លានដុង ដើម្បីធ្វើអាជីវកម្មទម្រង់ដាំដើមដំបងយក្ស។

ដើម្បីពង្រីកការធ្វើអាជីវកម្ម ឆ្នាំ ២០២១ បង ត្រុងបានជួលផ្ទៃដីទំហំ ១.០០០ ម៉ែត្រការ៉េក្បែរផ្លូវជាតិលេខ ៩១ នៅសង្កាត់ចូវវ៉ាន់លីម ខណ្ឌអូរម៉ូង ដើម្បីសាងសង់រោងកញ្ចក់សម្រាប់ដាំនិងបើកហាងលក់ដើមដំបងយក្ស។ បច្ចុប្បន្ន ចំនួនដើមដំបងយក្សត្រូវបានបង្កាត់ពូជប្រមាណ ១០.០០០ ដើម មានច្រើនប្រភេទ ដូចជា៖ gymlem, gymnocalycium, aster, echino, lobi, mammi ជាដើម រួមជាមួយនឹងដើមដំបងយក្ស ប្រភេទប្តូរពណ៌។ បងត្រុង ឱ្យដឹងបន្ថែម៖ “ក្រៅពីពូជដើមដំបងយក្សក្នុងប្រទេស ខ្ញុំនៅទាំងនាំចូលពូជដើមដំបងយក្សពីប្រទេសថៃ ប្រទេសចិន មកដាំនិងបង្កាត់ពូជ។ យោងទៅតាមប្រភេទនិងពណ៌សម្បុរ ពិសេសគឺដើមដំបងយក្ស gymlem ប្តូរពណ៌ លក់ក្នុងតម្លៃពី ១៥ - ២០ លានដុងក្នុងមួយដើម”។

ទម្រង់បណ្តុះផ្សិតអំបោះ ជួយឱ្យបងផាងហ្វាងសាងរកបានប្រាក់ចំណូលលំនឹង។

រកបានប្រាក់ចំណូលលំនឹងពីការបណ្តុះផ្សិតអំបោះ

តាមរយៈការទៅទស្សនកិច្ចសិក្សាពីទម្រង់បណ្តុះផ្សិតអំបោះ នៅខែតុលា ឆ្នាំ២០២៣ បងផាងហ្វាងសាង នៅមណ្ឌលទី ១២ សង្កាត់ចូវវ៉ាន់លីម បានឆ្លៀតយកផ្ទៃដីនៅខាងក្រោយផ្ទះប្រមាណ ១០០ ម៉ែត្រការ៉េ ដើម្បីវិនិយោគសាងសង់រោងកញ្ចក់សម្រាប់បណ្តុះផ្សិតអំបោះ។ គាត់ធ្វើធ្នើរសម្រាប់ថ្កល់ដំបែផ្សិត និងដំឡើងប្រព័ន្ធស្រោចស្រពស្វ័យប្រវត្តិដោយចំណាយថវិកាអស់ប្រមាណ ៥០ លានដុង។ ដំបូង គាត់ទិញដំបែផ្សិតអំបោះនៅខេត្តប៊ិញយឿង ចំនួន ៥.០០០ កញ្ចប់ មកដាំសាកល្បង ក្រោយរយៈពេលថែទាំបានជាង១ខែ ផ្សិតចាប់ផ្តើមផ្តល់ផល។ បងសាង ចែករំលែក៖ “បណ្តុះផ្សិតអំបោះនាំមកប្រសិទ្ធភាពសេដ្ឋកិច្ចខ្ពស់ ពីព្រោះបច្ចេកទេសបណ្តុះគឺសាមញ្ញ ចំណាយដើមទុន និងកម្លាំងថែទាំតិច។ល។ ផ្សិតអំបោះ បន្ទាប់ពីប្រមូលផលបានឈ្មួញមកដល់ផ្ទះប្រមូលទិញតម្លៃពី ៤០.០០០ - ៥០.០០០ ដុងក្នុងមួយគីឡូក្រាម”។

តាមប្រសាសន៍បងសាង ដំបែផ្សិតអំបោះតាំងពីបណ្តុះរហូតដល់ប្រមូលផលប្រមាណជាង ១ ខែ ដំបែមួយកញ្ចប់ផ្តល់ទិន្នផលផ្សិតប្រមាណ ៤០០ ក្រាម។ ការប្រមូលផលមានរយៈពេលពី៥- ៦ ខែ អាស្រ័យទៅលើអាកាសធាតុនិងបច្ចេកទេសថែទាំ។ ដើម្បីការបណ្តុះផ្សិតសម្រេចជោគជ័យ ត្រូវជ្រើសទិញដំបែដែលមានគុណភាពល្អ ក្នុងដំណាក់ការបណ្តុះត្រូវធានាសីតុណ្ហភាពនិងរក្សាសំណើមដើម្បីឱ្យផ្សិតដុះលូតលាស់។ រោងបណ្តុះផ្សិតត្រូវបានបិទបាំងជិត ជៀសវាងខ្យល់និងពន្លឺព្រះអាទិត្យប៉ះចំថង់ដំបែផ្សិត។ ធ្នើរដាក់ដំបែផ្សិតធានាជាប់រឹងមាំ ស្រពទឹកដោយក្បាលបាញ់ចំហាយទឹកជាប្រចាំពី ៣ - ៤ ដងក្នុងមួយថ្ងៃ។ ការបណ្តុះផ្សិតអំបោះមិនខ្វល់ពីជំងឺនិងដង្កូវបំផ្លាញទេ ហើយវដ្តនៃការប្រមូលផលក៏ឆាប់រហ័ស។ ដើម្បីធានាការផ្គត់ផ្គង់ផ្សិតអំបោះឱ្យទីផ្សារបានគ្រប់ចំនួន ជារៀងរាល់ថ្ងៃ បងសាង ចែកមណ្ឌលបណ្តុះផ្សិតអំបោះជា ២ មណ្ឌល ប្រមូលផលរួច គឺគាត់រៀបចំសម្អាតហើយចុះដំបែផ្សិតបណ្តុះជាបន្ត ដើម្បីមានប្រាក់ចំណូលលំនឹង៕

អត្ថបទនិងរូបថត៖ T.T - មុនី

ចែករំលែកអត្ថបទ

ពាក្យគន្លឹះ