មហាសាមគ្គីជនជាតិ ភូមិស្រុកផ្លាស់ថ្មី

16/01/2024 - 09:07

ពិពិធកម្មដំណាំរួមផ្សំបម្រើតម្រូវការទីផ្សារបុណ្យចូលឆ្នាំថ្មីវៀតណាម

កសិករខេត្តត្រាវិញ កំពុងមមាញឹកក្នុងការថែទាំដំណាំសម្រាប់បម្រើតម្រូវការទីផ្សារបុណ្យចូលឆ្នាំថ្មីវៀតណាម ឆ្នាំ២០២៤ ។ តាមការវាយតម្លៃរបស់ផ្នែកឯកទេស ដោយសារអនុវត្តល្អវិទ្យាសាស្ត្របច្ចេកទេស និងអាកាសធាតុអំណោយផល ទើបរដូវដាំដុះរបស់កសិករឆ្នាំនេះដំណាំលូតលាស់ល្អ។

លោកសើុងទិត្យ នៅភូមិចុងមិ-សឃុំហ៊ីបហ្វា រៀបចំចុះពូជសណ្តែកដី។

កសិករនៅឃុំហ៊ីបហ្វា ស្រុកកូវង៉ាង ចុះពូជដំណាំគ្រប់ប្រភេទលើផ្ទៃដីជិត ២០ ហិកតាសម្រាប់លក់ក្នុងឱកាសបុណ្យចូលឆ្នាំថ្មីវៀតណាម ប្រមូលផ្តុំច្រើនបំផុតនៅភូមិធ្លកខាងលិច ភូមិចុងមិ-ស និងភូមិកោះសាន្ត។ លោកសើុងទិត្យ នៅភូមិចុងមិ-ស ឃុំហ៊ីបហ្វា ឱ្យដឹង៖ “ដីនៅតំបន់នេះធ្វើស្រូវផ្ដល់ទិន្នផលទាប ដូច្នេះ ពេលបានផ្នែកជំនាញ និងរដ្ឋអំណាចភូមិភាគ មកចលនាគ្រួសារខ្ញុំក៏សម្រេចចិត្តបង្វែររចនាសម្ព័ន្ធផលិតកម្ម ដោយនាំយកដំណាំចុះដាំលើដីស្រែ។ គ្រួសារខ្ញុំមិនអល់អែកបង្វែរផ្ទៃដីផលិតស្រូវចំនួន ៨ កុង ងាកមកដាំដំណាំរួមផ្សំ។ ការដាំបន្លែបង្ការសម្រាប់លក់ក្នុងឱកាសបុណ្យចូលឆ្នាំថ្មីវៀតណាមឆ្នាំនេះ គ្រួសារខ្ញុំដាំដំណាំប៉េងបោះចំនួន ៣ កុង សណ្តែកដីចំនួន ៥ កុង អាស្រ័យអនុវត្តល្អវិទ្យាសាស្ត្របច្ចេកទេស ជំងឺ និងសត្វល្អិតមិនសូវបំផ្លាញ ដំណាំលូតលាស់ល្អ។ សព្វថ្ងៃប៉េងបោះលក់ក្នុងតម្លៃប្រមាណ១០.០០០ ដុង/គីឡូក្រាម សណ្តែកដីលក់តម្លៃ ១៨.០០០ ដុង/គីឡូក្រាម ជាមួយនឹងតម្លៃនេះ ក្រោយពីទូទាត់រួចនៅចំណេញប្រមាណជាង ៤០ លានដុង”។

លោកថាច់សាន្ត នៅភូមិកោះសាន្ត ឃុំហ៊ីបហ្វា ឱ្យដឹង៖ “រដូវបន្លែសម្រាប់លក់ក្នុងឱកាសបុណ្យចូលឆ្នាំថ្មីវៀតណាម រៀងរាល់ឆ្នាំ ខ្ញុំតែងជ្រើសដាំពូជម្រះស្រុក។ ក្រៅពីរកបានប្រាក់ចំណូលបង្គួរ ប្រភេទដំណាំនេះលក់ដាច់ ការដាំម្រះស្រុកគឺចង់រក្សាពូជម្រះពីដើម។ ដើម្បីដាំម្រះសម្រេចទិន្នផលខ្ពស់ ខ្ញុំលើករងខ្ពស់ប្រើផ្ទាំងកម្រាលកសិកម្ម ប្រយោជន៍ក្នុងការរក្សាសំណើម កាត់បន្ថយជំងឺនិងសត្វល្អិតបំផ្លាញ។ រដូវបន្លែសម្រាប់លក់ក្នុងឱកាសបុណ្យចូលឆ្នាំថ្មីវៀតណាមឆ្នាំនេះ គ្រួសារខ្ញុំដាំដំណាំម្រះជិត ៣ កុង តាមការប៉ាន់ស្មានសម្រេចទិន្នផលប្រមាណ ៣ តោន សព្វថ្ងៃម្រះលក់ក្នុងតម្លៃពី ២២.០០០- ២៥.០០០ដុង/គីឡូក្រាម ក្រោយពីទូទាត់រួច នៅចំណេញប្រមាណជាង ៣០ លានដុង”។

ដើម្បីធានាសុវត្ថិភាពអនាម័យចំណីអាហារ ផ្នែកកសិកម្មខេត្តផ្តល់អនុសាសន៍ដល់កសិករឱ្យមានការគោរពក្នុងការប្រើប្រាស់ថ្នាំការពាររុក្ខជាតិតាមគោលការណ៍ “៤ត្រូវ” សម្រាប់ដំណាំ។ ក្រៅពីនេះ ដើម្បីជួយកសិករបង្កើនប្រសិទ្ធភាពនៃការដាំដុះដំណាំ ផ្នែកកសិកម្មក៏បានចាត់កម្មាភិបាលជំនាញចុះទៅត្រួតពិនិត្យស្ថាន ភាពជំងឺជាប្រចាំ ព្រមទាំងលើកទឹកចិត្តកសិករឱ្យប្រើប្រាស់ថ្នាំការពាររុក្ខជាតិសមស្រប ជ្រើសរើសពូជល្អ។ល។ ដើម្បីកាត់បន្ថយថ្លៃចំណាយក្នុងការផលិត ធានាសុខភាពអ្នកប្រើប្រាស់។ សព្វថ្ងៃកសិករនៅខេត្តត្រាវិញ កំពុងមមាញឹកក្នុងការថែទាំបន្លែបង្ការសម្រាប់លក់ក្នុងឱកាសបុណ្យចូលឆ្នាំថ្មីវៀតណាម។ ជាមួយនឹងការមោះមុតអនុវត្តវិទ្យាសាស្ត្របច្ចេកទេសក្នុងការបង្កបង្កើនផល គួបផ្សំនឹងបទពិសោធន៍ជាក់ស្តែង ទន្ទឹមនឹងសញ្ញាវិជ្ជមាននៃតម្លៃទីផ្សារនាបច្ចុប្បន្ន សង្ឃឹមថាក្នុងរដូវដាំដុះនេះ នឹងនាំមកប្រសិទ្ធភាពសេដ្ឋកិច្ចខ្ពស់ដល់ប្រជាជន៕

សើុងម៉ាល័យ-មុនី

ចែករំលែកអត្ថបទ

ពាក្យគន្លឹះ