វប្បធម៌-សិល្បៈ វប្បធម៌

06/04/2020 - 14:30

រក្សារបររម្ងាស់ស្ករត្នោត

របររម្ងាស់ស្ករត្នោតបានផ្សារភ្ជាប់ជាមួយជីវភាពរបស់ជនរួមជាតិខ្មែរ ជាច្រើននៅឃុំអូរឡឹម ស្រុកទ្រីតូង ខេត្តអាងយ៉ាង។ ក្នុងនោះ គ្រួសារបងស្រីនាងសាមន្ត គឺជាគ្រួសារមួយក្នុងចំណោមគ្រួសារទាំងឡាយ ដែលរក្សារបរនេះ។ គ្រួសារបងស្រី មិនត្រឹមតែរក្សាបាននូវផលិតផលពិសេសប៉ុណ្ណោះទេ នៅទាំងនាំមកនូវប្រភពចំណូលគ្រាន់បើសម្រាប់គ្រួសារទៀតផង។

បងស្រីនាងសាមន្ត កំពុងបិទស្លាកផលិតផល។

បងស្រីនាងសាមន្ត កើតនិងធំដឹងក្ដីក្នុងគ្រួសារប្រកបរបររម្ងាស់ស្ករត្នោតនៅភូមិពាំងពើយ ឃុំអូរឡឹម ស្រុកទ្រីតូង ខេត្តអាងយ៉ាង។ តាំងពីយូរលង់មក គ្រួសារបងស្រីរស់ដោយអាស្រ័យដើមត្នោត ក្នុងនោះ របររម្ងាស់ស្ករត្នោតគឺជាប្រភពចំណូលសំខាន់។ បងស្រីនាងសាមន្ត ឱ្យដឹង៖ “ខ្ញុំប្រកបរបររម្ងាស់ស្ករត្នោតពីម្ដាយរបស់ខ្ញុំ។ រដូវរម្ងាស់ស្ករត្នោតចាប់ពីខែកញ្ញាដល់ដើមរដូវវស្សាឆ្នាំក្រោយ។ បច្ចុប្បន្ន ខ្ញុំជួលដើមត្នោតចំនួន៨០ដើម ដើម្បីយកទឹកផលិតស្ករនិងយកផ្លែលក់។ ទឹកត្នោតប្រមាណ៦០-១០០លីត្រអាចរម្ងាស់បានស្ករប្រមាណ១០គីឡូក្រាមទៅតាមរដូវប្រាំងឬវស្សា លក់តម្លៃមធ្យម៣០.០០០ដុង/គីឡូក្រាម។ ចាប់តាំងពីមានភូមិរបរ ស្ករត្នោតមានយីហោ តម្លៃលក់បានខ្ពស់ជាង”។

តាមប្រសាសន៍លោកទីវឌិញហីវញ៉ឺហូវ ប្រធានសមាគមកសិករឃុំអូរឡឹម របររម្ងាស់ស្ករត្នោតនៅតែរីកចម្រើនលំនឹង ពីព្រោះស្ករត្នោគឺជាប្រភេទស្ករធម្មជាតិ មានរសជាតិផ្អែមត្រជាក់ គ្មានជាតិគីមី សម្រាប់ធ្វើម្ហូបឬបបរ។ល។ បង្កើតនូវរសជាតិពិសេសដោយឡែកនៃតំបន់ភ្នំអាងយ៉ាង។ ស្ករត្នោតមានលក្ខណៈពិសេស ហើយបរិមាណមិនទាន់ឆ្លើយតបទៅនឹងតម្រូវការទីផ្សារ ដូច្នេះ ក៏មិនបារម្ភពីការប្រជែងមុខទំនិញនេះដែរ។ បច្ចុប្បន្ន ភូមិរបរឃុំអូរឡឹមមានគ្រួសារចូលរួមផលិតស្ករត្នោតនៅភូមិពាំងពើយចំនួន៤០គ្រួសារ ហើយបាននាំមកនូវប្រភពចំណូលគួរសមសម្រាប់គ្រួសារជនរួមជាតិខ្មែរ។

ម្ដាយរបស់បងស្រីនាងសាមន្ត កំពុងរម្ងាស់ស្ករត្នោត។

លោកទីវឌិញហីវញ៉ឺហូវ ឱ្យដឹងបន្ថែម៖ “ជាមួយរបៀបធ្វើដោយដៃ មាមីងធ្វើឯកឯងលក់រាយ ទៅតាមគ្រួសារនីមួយៗ ប្រាក់ចំណូលរបស់មាមីងខ្មែរប្រកបរបរនេះនៅទាប បើប្រៀបនឹងការចេញកម្លាំង។ ចាប់តាំងពីឃុំបង្កើត “ភូមិរបរផលិត ស្ករត្នោតនៅឃុំអូរឡឹម” និងឧបត្ថម្ភកសាងខ្លោងទ្វារភូមិរបរ; ហ្វឹកហាត់ ប្តូរបច្ចេកវិទ្យាផលិត ច្នៃប្រអប់វេចខ្ចប់ កសាងយីហោ ដាក់តាំងបង្ហាញផលិតផលនៅតាមតង់នៃភូមិរបរនិងផ្សព្វផ្សាយផលិតផលលើទីផ្សារ រួមផ្សំនឹងការបង្កើតជើងទេសចរណ៍ដើម្បីឱ្យភ្ញៀវទេសចរមកទស្សនាកម្សាន្ត ស្វែងយល់អំពីភូមិរបរ។ល។ ម៉្លោះហើយ តម្លៃស្ករត្នោតឃុំអូរឡឹមក៏បានកើនឡើង។ ដូច្នេះ ជីវភាពរបស់អ្នករម្ងាស់ស្ករត្នោតនៅភូមិរបរមានភាពលំនឹងជាង”៕

អត្ថបទ និងរូប៖ ទីទុយ

ចែករំលែកអត្ថបទ

ពាក្យគន្លឹះ