គោលនយោបាយ -ការរស់នៅ គោលនយោបាយ

12/04/2018 - 10:04

លំនៅឋានរដូវចូលឆ្នាំ

ឆ្នាំ២០១៧ ខេត្តវិញឡុង សាងសង់ផ្ទះជូនគ្រួសារជនរួមជាតិខ្មែរដែលជួបលំបាកអំពីផ្ទះនៅសម្រេចរួចរាល់ចំនួន៧៦៧ខ្នង ដូច្នេះបង្កើនចំនួនផ្ទះដែលសាងសង់ក្នុង២ឆ្នាំ ចាប់ពី២០១៦-២០១៧ឡើងដល់១.៥៤៧ខ្នង។ សរុបថវិកាជាង៦០ពាន់លានដុង អាស្រ័យស្ថានីយវិទ្យុ ទូរទស្សន៍វិញឡុងធ្វើហិរញ្ញប្បទាន។

ផ្ទះថ្មីរបស់គ្រួសារលោកសេីុងនីបានរដ្ឋជំនួយសាងសង់។

ប្តីប្រពន្ធលោកថាច់ថ នៅភូមិអង្គុលីត្បូង ឃុំដុងប៊ិញ ក្រុងប៊ិញមិញ កំពុងរៀបចំផ្ទះសម្បែងដើម្បីទទួលបុណ្យចូលឆ្នាំថ្មី២០១៨ ដោយក្តីសប្បាយរីករាយយ៉ាងក្រៃលែង។ ប្រពន្ធលោកថ ចែករំលែក៖ “បើទុកណាជាសុបិន្ត ក៏ខ្ញុំមិនហ៊ានប្រាថ្នាមានផ្ទះឥដ្ឋដូច្នេះឡើយ។ ក្មួយគិតទៅមើល ពីរនាក់ប្តីប្រពន្ធចាស់ហើយគ្មានដីផលិតកម្ម រស់នៅប្រកបរបរលក់ឆ្នោត ធ្វើម្តេចនឹងមានប្រាក់សេសសល់សង់បានផ្ទះឥដ្ឋ”។ បន្តពាក្យប្រពន្ធលោកថ បងវីទីវ៉ាល័យ លេខាសាខាបក្សភូមិ និងជាប្រធានភូមិអង្គុលីត្បូង ឲ្យដឹង ៖ “ផ្ទះចាស់របស់គ្រួសារពូថ គឺផ្ទះស្លឹក សសរឈើ មានភាពទ្រុឌទ្រោម។ ពេលប្រជុំសាខាបក្សម្តងៗ យើងខ្ញុំតែងលើកពីបញ្ហានេះមកពិភាក្សា។ ប៉ុន្តែដោយសារប្រាក់ចំណូលរបស់គ្រួសារពូបានត្រឹមគ្រប់ចាយវាយប្រចាំថ្ងៃប៉ុណ្ណោះ រីឯភូមិភាគវិញក៏គ្មានប្រភពទុនសម្រាប់ជំនួយជួសជុលផ្ទះ ម៉្លោះហើយយើងខ្ញុំមានការបារម្ភជាខ្លាំង”។ ចំណែក លោកសេីុងមិត្ត អនុប្រធានការិយាល័យជនជាតិក្រុងប៊ិញមិញ ចាំមិនភ្លេចនូវករណីនេះពេលលោកចុះទៅបំពេញការងារនៅភូមិម្តងៗ។ ព្រោះហេតុនោះ ពេលខេត្តផ្សព្វផ្សាយកម្មវិធីជំនួយសាងសង់អាស្រ័យស្ថានីយវិទ្យុទូរទស្សន៍ធ្វើហិរញ្ញប្បទាន ការិយាល័យជនជាតិក៏បានស្នើភូមិភាគគប្បីអនុវត្តបែបបទប្រជុំប្រជាជន ពិនិត្យពិច័យ សូមយោបល់មាមីងក្នុងភូមិអំពីករណីគ្រួសារលោកថាច់ថ។ បងវ៉ាល័យ ឲ្យដឹង៖ “នេះជាករណីមួយក្នុងចំណោមករណីចំនួនពីរដែលបានសម្រេចយ៉ាងឆាប់រហ័ស ដោយគ្មានយោបល់ជំទាស់អ្វីឡើយ ពីព្រោះគ្រួសារលោកថាច់ថ ឋិតក្នុងស្ថានភាពក្រលំបាក”។ ផ្ទះសង់រួចស្រេច ប៉ុន្តែប្រពន្ធលោកថសន្យាទទួលយេីងខ្ញុំនៅឱកាសក្រោយពីព្រោះគាត់រៀបចំផ្ទះសម្បែងមិនទាន់បានស្រួលបួល។ ប្រការដែលញាុំងឲ្យប្តីប្រពន្ធលោកថ សប្បាយបំផុតគឺកូនស្រីរបស់គាត់ទៅរកស៊ីឆ្ងាយស្រុកជាច្រើនឆ្នាំ ឥឡូវព្រមវិលមកផ្ទះរស់នៅជាមួយគាត់។ ប្រពន្ធលោកថ ឲ្យដឹងដោយក្តីរីករាយ៖ “និយាយពិតពីមុនផ្ទះចាស់ដាច់ដោច ប្តីប្រពន្ធខ្ញុំមិនចង់ឲ្យកូនស្រីមករស់នៅជាមួយទេ។ ឥឡូវមានផ្ទះឥដ្ឋសមរម្យ ហៅវាមករស់នៅជាមួយជួយធ្វើការរកស៊ីរកប្រាក់ចំណូលបន្ថែមលើកស្ទួយជីវភាពគ្រួសារ ដើម្បីចាកផុតពីភាពក្រីក្រដោយមិនឲ្យរដ្ឋខកបំណងឡើយ”។ នៅក្នុងភូមិអង្គុលីត្បូងនេះដែរ គ្រួសារលោកសេុីងនី ទើបបញ្ជូនរបស់របរចូលនៅផ្ទះថ្មី។ រីឯផ្ទះចាស់នៅខាងក្រោយ គាត់ក៏យកធ្វើជារោងបាយ លោកនីឲ្យដឹង៖ “ខ្ញុំយកផ្ទះចាស់ធ្វើរោងបាយ ដើម្បីយើងងាយស្រួល ប្រៀបធៀបផ្ទះចាស់នឹងផ្ទះថ្មី។ ផ្តើមពីនោះ រំលឹកស្មារតីឲ្យយើងចេះដឹងគុណរដ្ឋដែលយកចិត្តទុកដាក់សង់ផ្ទះជូន”។ នៅក្នុងផ្ទះខ្វះរបស់របរប្រើប្រាស់ចាំបាច់ជាច្រើន ប៉ុន្តែលោកសេីុងនីជឿជាក់ ពេលមានផ្ទះសម្បែងលំនឹងគ្រួសារលោកនឹងនរចិត្តធ្វើការរកទទួលទាន ដើម្បីចាកផុតពីភាពក្រីក្រនៅពេលខាងមុខ។ គិតដោយឡែកឆ្នាំ២០១៧ ក្រុងប៊ិញមិញ សង់ផ្ទះជូនគ្រួសារក្រីក្របានចំនួន១១ខ្នង អាស្រ័យស្ថានីយវិទ្យុទូរទស្សន៍វិញឡុងធ្វើ ហិរញ្ញប្បទាន។ តាមប្រសាសន៍ លោកសេីុងហ្វាងយ្វី ប្រធានការិយាល័យជនជាតិក្រុងប៊ិញមិញ បន្ទាប់ពីមានផ្ទះនៅលំនឹង ទាំង១១គ្រួសារនេះតែងខំប្រឹងធ្វើការរកទទួលទានដើម្បីឈានឡើងចាកផុតពីភាពក្រីក្រ។

ស្រុកទាំង២គឺ ស្រុកត្រាអូងនិងតាមប៊ិញ បានស្ថានីយវិទ្យុទូរទស្សន៍ឧបត្ថម្ភសាងសង់ផ្ទះច្រើនបំផុតនៅឆ្នាំ២០១៧។ ក្នុងនោះ ស្រុកត្រាអូងមាន៤៥៥ខ្នង ស្រុកតាមប៊ិញមាន៣០១ខ្នង។ ក្នុងចំនួន៣០១ខ្នងរបស់ស្រុកតាមប៊ិញ ប្រមូលផ្តុំនៅឃុំឡងម៉ី។ លោកកាវថាញ់យ៉ាង ប្រធានគណៈកម្មាធិការប្រជាជនឃុំឡងម៉ី ចែករំលែក៖ “ក្នុង២ឆ្នាំ ឃុំឡងម៉ីសង់ផ្ទះជូនគ្រួសារក្រីក្រជាង៥០០ខ្នង។ អាស្រ័យហេតុនោះ លំនៅឋានតាមលក្ខឋានជនបទថ្មីរបស់ឃុំកសាងសម្រេចជាង៩០%”។ លោកថាច់មេន នៅភូមិកឹងសុក ឃុំឡងម៉ី រំភើបចិត្តដោយសារមានផ្ទះថ្មីសមរម្យ លោកឲ្យដឹង៖ “ផ្ទះចាស់ទ្រុឌទ្រោម ពុំទាន់មានប្រាក់ជួសជុល។ រដ្ឋឃើញដូច្នោះ ក៏សង់ផ្ទះថ្មីជូន ខ្ញុំនឹងកូនៗទៅធ្វើការសន្សែសន្សំទិញទ្វារដែកនិងទឹកថ្នាំពណ៌លាបផ្ទះ ម៉្លោះហើយផ្ទះមើលទៅមានភាពសមរម្យ។ ផ្ទះត្រូវបានសង់តាមខ្នាតរឹងមាំ លើផ្ទៃដី៣២ម៉ែត្រការ៉េ មានបន្ទប់អនាម័យនៅក្នុងផ្ទះទៀតផង”។

អ្នកមីងថាច់ធីកុំ នៅភូមិតាមោង ឃុំតឹងម៉ី ស្រុកត្រាអូង បានសាច់ញាតិជួយផ្សំប្រាក់បន្ថែម ហេតុនោះសង់បានផ្ទះយ៉ាងសមរម្យ។ ផ្ទះមីងលាបពណ៌ខៀវ ជុំវិញគឺចម្ការឈើហូបផ្លែ ម៉្លោះហើយផ្ទះរំលេចពណ៌ស្អាតណាស់។ អ្នកមីងកុំ ឲ្យដឹង៖ “មានផ្ទះថ្មីខ្ញុំត្រេកអរខ្លាំងណាស់ ខ្ញុំអរគុណស្ថានីយវិទ្យុ ទូរទស្សន៍និងរដ្ឋសង់ផ្ទះជូនគ្រួសារខ្ញុំ។ ឥឡូវគ្មាននៅបារម្ភពីផ្ទះលេច សសរទ្រេតទ្រោតដូចមុនឡើយ គ្រួសារខ្ញុំខំប្រឹងធ្វើការរកទទួលទានដើម្បីចាកផុតពីភាពក្រីក្រដោយមិនឲ្យរដ្ឋខកបំណងឡើយ”។ ក្នុងចំណោមគេហដ្ឋានត្រូវបានសាងសង់នៅឆ្នាំ២០១៧ មានផ្ទះរាប់រយខ្នងបានសាច់ញាតិជំនួយប្រាក់បន្ថែមសង់បានផ្ទះយ៉ាងសមរម្យ។ លោកថាច់ហ្វិញ នៅភូមិម៉ីអាង ឃុំតឹងម៉ី ឲ្យដឹង៖ “ប្អូនៗរបស់ខ្ញុំ គេជួយសម្ភារៈបនែ្ថម ម្លោ៉ះហេីយខ្ញុំសង់បានផ្ទះមានយា៉ងសមរម្យ។ ថ្ងៃក្រោយលែងនៅបារម្ភពីផ្ទះទៀត”។ ចំណែកអ្នកមីងថាច់ធីស្វឹង នៅភូមិព្រែកឈូក ឃុំឡងម៉ី ដោយបានកូនៗនៅធ្វើកម្មករឯក្រុងហូជីមិញ សូមឲ្យម្តាយសង់ផ្ទះបើកទូលាយបន្ថែម ពេលបុណ្យទានអ្វីម្តងៗ សម្រាកពីការងារមកផ្ទះមានកន្លែងស្នាក់នៅសមរម្យ។ អ្នកមីងស្វឹង ឲ្យដឹង៖ “ដំបូងខ្ញុំមិនបានគិតថានឹងសង់ទូលាយទេប៉ុន្តែដោយកូនៗជួយជំរុញ ហើយផ្ញើប្រាក់មក ទើបខ្ញុំសម្រេចចិត្តធ្វើតាមបំណងរបស់កូនៗ។ អាស្រ័យហេតុនោះ បុណ្យចូលឆ្នាំថ្មីឆ្នាំនេះ កូនៗមកផ្ទះលេងមានកន្លែងស្នាក់នៅត្រឹមត្រូវ ជួបជុំគ្រួសារទទួលឆ្នាំថ្មីប្រកបដោយភាពសប្បាយរីករាយ”។

លោកថាច់យឿង ប្រធានគណៈជនជាតិខេត្តវិញឡុង ចែករំលែក៖ “ស្ថានីយវិទ្យុ ទូរទស្សន៍វិញឡុងបានជំនួយសង់ផ្ទះជាង១.៥០០ខ្នង នេះគឺជាភាពលេចធ្លោមួយក្នុងការរួមកម្លាំងគិតគូរជូនគ្រួសារខ្មែរក្រីក្ររបស់ខេត្ត។ ទង្វើនេះនឹងជួយជនរួមជាតិខ្មែរមានលក្ខណសម្បត្តិឈានឡើងចាកផុតពីភាពក្រីក្រ មាមីងរឹតតែជឿជាក់លើការគិតគូររបស់រដ្ឋ របស់សហគមន៍ ចំពោះគ្រួសារជនរួមជាតិភាគតិចក្រីក្រដែលនៅជួបលំបាកក្នុងជីវភាព”៕

ហាថាញ់-មុនី

ចែករំលែកអត្ថបទ

ពាក្យគន្លឹះ