គោលនយោបាយ -ការរស់នៅ ការរស់នៅ

16/08/2016 - 09:11

ហ្វាតឹង ជំរុញល្បឿនកសាងជនបទថ្មី

ហ្វាតឹងជាឃុំមួយក្នុងចំណោមឃុំទាំងឡាយ ដែលមានជនរួមជាតិខ្មែររស់នៅកុះកររបស់ស្រុកកូវកែ (ត្រាវិញ) ស្រូបអត្រាជិត៥០%នៃចំនួនប្រជាជនក្នុងឃុំ។ រយៈពេលជិត៥ឆ្នាំ អនុវត្តកម្មវិធីទិសដៅជាតិកសាងជនបទថ្មី មុខមាត់ជនបទឃុំហ្វាតឹងកាន់តែមានសោភណភាព ជីវភាពជនរួមជាតិខ្មែរត្រូវបានលើកស្ទួយដោយឥតឈប់ឈរ។

ផ្លូវជនបទភូមិចុងផ្នោ៣។

រយៈពេលកន្លង នៅលើភូមិសាស្រ្តឃុំហ្វាតឹង មានទម្រង់រូបភាពបង្វែររចនាសម្ព័ន្ធសេដ្ឋកិច្ចប្រកបដោយប្រសិទ្ធភាព រួមចំណែកបង្កើនប្រាក់ចំណូលមធ្យមភាគ ក្នុងឆ្នាំ២០១៥ជាង២៩លានដុង/ម្នាក់/ឆ្នាំ។ លោកថាច់សល លេខាសាខាបក្សនិងជាប្រធានភូមិចុងផ្នោ៣ឲ្យដឹង៖"ចាប់ពីផ្សព្វផ្សាយកម្មវិធីកសាងជនបទថ្មី ប្រជាជនក្នុងភូមិពិសេសគឺជនរួមជាតិខ្មែរ បានទទួលផលច្រើនពីគោលនយោបាយជំនួយរបស់រដ្ឋ ជាពិសេសគឺជំនួយខាងវិទ្យាសាស្រ្តបច្ចេកទេស កែប្រែដំណាំដាំដុះ សត្វចិញ្ចឹមចំទិសដៅ ប្រកបដោយប្រសិទ្ធភាព។ តួយ៉ាងដូចគ្រួសារបងថាច់ សេនសារឿន នៅភូមិចុងផ្នោ៣ មានដីស្រែមួយកុងកន្លះធ្វើស្រែមិនសូវបានផល។ មុននេះមួយឆ្នាំ បងបានបង្វែរផ្ទៃដីស្រែទាំងនោះ មកដាំខ្ទឹម ជំហានដំបូងនាំមកប្រសិទ្ធភាពខ្ពស់ផ្ដល់ផលជាង៨០លានដុង/ឆ្នាំ ជួយឲ្យជីវភាពគ្រួសារបងលំនឹង"។

រួមជាមួយនឹងការយកចិត្តទុកដាក់អភិវឌ្ឍសេដ្ឋកិច្ច លើកស្ទួយជីវភាពប្រជាជនឃុំបានយកចិត្តទុកដាក់ពិសេស ដល់ការវិនិយោគកសាងសំណង់ហេដ្ឋារចនាសម្ព័ន្ធគមនាគមន៍ជនបទរហូតមកទល់ពេលនេះ ទូទាំងឃុំមានផ្លូវជនបទជាង៣០គីឡូម៉ែត្រត្រូវបានក្រាលកៅស៊ូឬចាក់បេតុងរឹងមាំ តភ្ជាប់ពីមជ្ឈមណ្ឌលឃុំទៅភូមិនានា លើភូមិសាស្រ្តនិងឃុំជិតខាងជួយឲ្យប្រជាជនធ្វើដំណើរទៅមក ដឹកជញ្ជូនកសិផលមានភាពងាយស្រួលទាំងប្រាំងវស្សា។ ទន្ទឹមនឹងនោះ សុខាភិបាលអប់រំ វប្បធម៌-សង្គមកិច្ចក្នុងតំបន់ជនរួមជាតិខ្មែរមានការវិវឌ្ឍន៍ច្រើន។ មកទល់បច្ចុប្បន្ន ឃុំមានដំណាក់សុខាភិបាលសម្រេចបទដ្ឋានជាតិ អត្រាសិស្សប្រឡងជាប់រៀងរាល់ឆ្នាំសម្រេច៩៨% មានគ្រួសារជាង៩១%បានប្រើប្រាស់ទឹកស្អាត គ្រួសារជាង៩៥%បានប្រើប្រាស់អគ្គិសនី និងប្រព័ន្ធព័ត៌មានត្រូវបានបើកទូលាយចុះទៅតាមភូមិ។ ចលនា "ទូទាំងប្រជាជនសាមគ្គីកសាងផ្នត់រស់នៅវប្បធម៌នៅតំបន់តាំងទីលំនៅ" ត្រូវបានឃុំអនុវត្តល្អ មានគ្រួសារជាង៩១% ត្រូវបានទទួលស្គាល់ជាគ្រួសារវប្បធម៌។ ស្ថានភាពសន្តិសុខនយោបាយសណ្ដាប់ធ្នាប់ សុវត្ថិភាពសង្គមត្រូវបានរក្សាខ្ជាប់។ ផ្ដើមពីលទ្ធផលខាងលើរហូតមកទល់ពេលនេះ ឃុំហ្វាតឹង អនុវត្តបានសម្រេច១២/១៩លក្ខឋានជនបទថ្មី។

លោកឡេក្វឹកធ្វឹង អនុប្រធានគណៈកម្មាធិការប្រជាជនឃុំហ្វាតឹង ឲ្យដឹង៖ "ឃុំកំពុងផ្ដុំកម្លាំងអនុវត្តសម្រេចលក្ខឋានដែលនៅសេសសល់ ដើម្បីសម្រេចបទដ្ឋានជនបទថ្មីក្នុងឆ្នាំ២០២០"៕

សេីុងម៉ាល័យ-ពេជ្រសឿន

ចែករំលែកអត្ថបទ

ពាក្យគន្លឹះ