វប្បធម៌-សិល្បៈ សិល្បៈ

20/01/2015 - 14:41

អភិរក្សតម្លៃវប្បធម៌ជនជាតិ

អនុវត្តសេចក្ដីសម្រេចចិត្តមជ្ឈិម៥ នីតិកាល៨ របស់គណៈប្រតិបត្តិការមជ្ឈិមបក្ស ស្ដីពី" កសាងនិងអភិវឌ្ឍខឿនវប្បធម៌វៀតណាមជឿនលឿន ដិតដាមដោយអត្តសញ្ញាណជាតិ" មជ្ឈមណ្ឌលវប្បធម៌ក្រុងកឹងធើ បានស្ថាបនាឡើងវិញនូវបណ្តាឈុតសំដែងលើឆាកអំពីកម្មវិធីបុណ្យប្រជាប្រិយផ្សេងៗ ។ល។

ឈុតសម្តែងពិធីបន់ស្រន់សុំទឹកភ្លៀងរបស់អង្គភាពក្រុងកឹងធើ ។

ឆ្នាំ២០១៤ គឺជាឆ្នាំ" បានផលលើសលុប" របស់មជ្ឈមណ្ឌលវប្បធម៌ក្រុងកឹងធើ ត្បិតអីបណ្តាឈុតសំដែងស្ដីពីវប្បធម៌ប្រជាប្រិយនានា អាស្រ័យមជ្ឈមណ្ឌលតម្លើងនិងសំដែងសុទ្ធតែបានទទួលជ័យលាភី។ នៅក្នុងសមោសរវប្បធម៌សិល្បៈបង្ហាញម៉ូដសំលៀកបំពាក់ប្រវេណី និងកម្មវិធីសំដែងសិល្បៈប្រជាប្រិយក្នុងទិវាមហោស្រពវប្បធម៌កីឡា និងទេសចរណ៍ជនរួមជាតិខ្មែរណាមបូលើកទី៧ឆ្នាំ២០១៤ នៅក្រុងវីថាញ ខេត្ដហូវយ៉ាងកន្លងហើយ មជ្ឈមណ្ឌលវប្បធម៌ក្រុងកឹងធើ បង្កបាននូវការចាប់អារម្មណ៍ ខណៈពេលឈុតសំដែងទាំង៧ឈុតរបស់មជ្ឈមណ្ឌល សុទ្ធតែទទួលបានជ័យលាភី។ ក្នុងនោះ ជ័យលាភីA ចំនួន៣ ជ័យលាភីB ចំនួន២ និងជ័យលាភីC ចំនួន២។ ក្នុងចំណោមជ័យលាភីA ទាំង៣ រួមមានឈុតសំដែងអំពីទំនៀមបន់ស្រន់សុំទឹកភ្លៀងរបស់ជនរួមជាតិខ្មែរផងដែរ។ អ៊ំស្រីថាច់ធីវុាំង នៅខេត្តកាម៉ាវ ជាអ្នកចូលរួមទស្សនាការសំដែងរបស់ក្រុមសិល្បៈក្រុងកឹងធើ ដែលមកសំដែងនៅក្រុងវីថាញ ឲ្យដឹងទាំងក្ដីរំភើប៖ "កាលពីនៅតូច ខ្ញុំធ្លាប់បានចូលរួមសំដែងសិល្បៈអំពីពិធីបុណ្យបន់ស្រន់សុំទឹកភ្លៀង បានជាខណៈពេលបានឃើញក្រុមសិល្បៈសំដែងឈុតនេះ ខ្ញុំមានអារម្មណ៍ហាក់ដូចជាខ្លួនខ្ញុំកំពុងចូលរួមសំដែងជាមួយអញ្ចឹង"។ ជនរួមជាតិខ្មែរភាគច្រើនតែងប្រារព្ធពិធីបន់ស្រន់សុំទឹកភ្លៀង រួមជាមួយនឹងឱកាសនៃពិធីតម្លើងអ្នកតាស្រុក ជាជំនឿប្រជាប្រិយម្យ៉ាងក្នុងចំណោមជំនឿប្រជាប្រិយរបស់ជនជាតិខ្មែរ។ តាមរយៈនៃការតម្លើងជាឈុតសំដែងលើឆាកអំពីពិធីបន់ស្រន់សុំទឹកភ្លៀង ត្រូវបានអ្នកទស្សនាឲ្យតម្លៃថា ជាឈុតសំដែងមានភាពគគ្រឹកគគ្រេង ត្រូវតាមប្រវេណី ដោយមានទាំងឈុតរបាំឆៃយុាំហែហម អមដំណើរចាស់ទុំក្នុងភូមិឆ្ពោះទៅកាន់សាលាអ្នកតា ដើម្បីរៀបតង្វាយសែនថ្វាយ បន់ស្រន់ សុំទឹកភ្លៀង។ល។ ភាពល្អវិសេសនៃឈុតសំដែង គឺការគួបផ្សំរវាងបទភ្លេង ចង្វាក់រាំ មានលំនាំសមស្របជាមួយនឹងពិធីសែនថ្វាយ។ ក្រៅពីឈុតសំដែងបង្ហាញពីទំនៀមបន់ស្រន់សុំទឹកភ្លៀង បណ្តាឈុតសំដែងដទៃទៀតរបស់មជ្ឈមណ្ឌលវប្បធម៌ក្រុងកឹងធើ ក៏ទាក់ទាញបានទស្សនិកជនចូលរួមទស្សនាផងដែរ មានដូច៖ ឈុតសំដែងអំពីបុណ្យសាមគ្គីកន្សែងជនជាតិ។ល។

ការអភិរក្សនិងពង្រីកបណ្តាតម្លៃវប្បធម៌របស់ជនរួមជាតិភាគតិច ក្នុងសហគមន៍បណ្តាជនជាតិវៀតណាម ជាភារកិច្ចសំខាន់មួយក្នុងចំណោមភារកិច្ចសំខាន់ទាំងឡាយ ដើម្បីកសាងខឿនវប្បធម៌វៀតណាម ដិតដាមដោយអត្តសញ្ញាណជាតិ។ ជាមួយនឹងទិសដៅខាងលើ មជ្ឈមណ្ឌលវប្បធម៌ក្រុងកឹងធើ សំដែងដោយជោគជ័យនៅពេលបានស្ថាបនាឡើងវិញនូវឈុតសម្ដែងអំពីវិធីបន់ស្រន់ សុំទឹកភ្លៀងនៅក្នុងទិវាសមោសរសិល្បៈប្រជាប្រិយបណ្តាជនជាតិ និងបង្ហាញម៉ូដ សំលៀកបំពាក់ដែលបានប្រព្រឹត្តឡើងនៅក្រុងដាឡាក។ ឈុតសំដែងខាងលើរបស់មជ្ឈមណ្ឌលវប្បធម៌ក្រុងកឹងធើ សម្រេចបានជ័យលាភីA។ ទោះបីចូលរួមសំដែងសិល្បៈនៅក្នុងតំបន់ឬក្នុងទូទាំងប្រទេស បណ្តាឈុតសំដែងរបស់មជ្ឈមណ្ឌលវប្បធម៌ក្រុងកឹងធើ សុទ្ធសឹងសម្រេចបានជ័យលាភីខ្ពស់ជានិច្ច។ មូលហេតុសម្រេចជោគជ័យ តាមប្រសាសន៍របស់លោកហ្វិនញឹកយ័ញ អនុប្រធានមជ្ឈមណ្ឌលវប្បធម៌ក្រុងកឹងធើ គឺដោយសាររក្សាបាននូវដួងព្រលឹងនៃពិធីបុណ្យប្រជាប្រិយនានា៕

ហាថាញ-សេរី

ចែករំលែកអត្ថបទ

ពាក្យគន្លឹះ