ព្រឹត្តិការណ៍ - នយោបាយ ព្រឹត្តិការណ៍

08/11/2026 - 18:42

ភាពកក់ក្តៅនៃទិវាវប្បធម៌វៀតណាម ផ្សារភ្ជាប់នឹងទិវាមហាសាមគ្គីទូទាំងជនជាតិនិងសប្តាហ៍វប្បធម៌-មហាសាមគ្គី នៅភូមិឡឹមយ៉ោ

ព្រឹកថ្ងៃទី៨ ខែវិច្ឆិកា នៅវត្តសិរីពោធិ (ដើមពោធិ៍) គណៈការងាររណសិរ្សមាតុភូមិភូមិឡឹមយ៉ោ ឃុំត្រឹងដេ ទីក្រុងកឹងធើ បានចាត់តាំងទិវាវប្បធម៌វៀតណាម ផ្សារភ្ជាប់នឹងទិវាមហាសាមគ្គីទូទាំងជនជាតិនិងសប្តាហ៍វប្បធម៌-មហាសាមគ្គី ឆ្នាំ២០២៦។ អញ្ជើញចូលរួមក្នុងពិធីនេះ មានលោកត្រឹងង៉ុកហ៊ុង សមាជិកគណៈកម្មាធិការបក្សទីក្រុង អនុប្រធានគណៈគ្រប់គ្រងមណ្ឌលផលិតនាំចេញនិងឧស្សាហកម្មកឹងធើ; ថ្នាក់ដឹកនាំគណៈកម្មាធិការបក្ស គណៈកម្មាធិការប្រជាជន គណៈកម្មាធិការរណសិរ្សមាតុភូមិវៀតណាមឃុំត្រឹងដេ ព្រមទាំងកម្មាភិបាល ប្រជាជនភូមិភាគយ៉ាងច្រើនកុះករ។

ទិដ្ឋភាពនៃទិវាវប្បធម៌វៀតណាម ផ្សារភ្ជាប់នឹងទិវាមហាសាមគ្គីទូទាំងជនជាតិ ឆ្នាំ២០២៦ នៅវត្តសិរីពោធិ (ដើមពោធិ៍) ភូមិឡឹមយ៉ោ ឃុំត្រឹងដេ។

ក្នុងឱកាសនៃទិវានេះ អ្នកតំណាងនិងប្រជាជនបានរួមគ្នារំលឹកឡើងវិញនូវប្រវេណីក្នុងឱកាសខួបលើកទី ៩៦ នៃទិវាបង្កើតរណសិរ្សជាតិឯកភាពវៀតណាម (១៨/១១/១៩៣០ - ១៨/១១/ ២០២៦) បច្ចុប្បន្ន គឺរណសិរ្សមាតុភូមិវៀតណាម ព្រមទាំងស្វែងយល់អំពីអត្ថន័យនៃទិវាវប្បធម៌វៀតណាម។ ឆ្លងតាមរយៈនោះ បន្តបញ្ជាក់ពីតួនាទីរបស់រណសិរ្សក្នុងការប្រមូលផ្តុំ និងពង្រីកកម្លាំងផែនមហាសាមគ្គីទូទាំងជនជាតិ ព្រមទាំងលើកកម្ពស់ការយល់ដឹងអំពីការរក្សា និងពង្រីកអត្តសញ្ញាណវប្បធម៌នៃបណ្តាជនជាតិនានា។

ភូមិឡឹមយ៉ោ មានជនរួមជាតិខ្មែរជាង ៩៨% នៃចំនួនប្រជាជនសរុប។ ឆ្នាំ២០២៦ កម្មាភិបាល និងប្រជាជនក្នុងភូមិសកម្មចូលរួមបណ្តាចលនាប្រឡងប្រណាំងស្នេហាជាតិ សម្រេចបានលទ្ធផលជាក់ស្តែងជាច្រើន។ តាមរយៈការវាយតម្លៃ មានប្រជាជន ៤២០/៤២០គ្រួសារ បានចុះឈ្មោះ ហើយបានទទួលស្គាល់ជាគ្រួសារវប្បធម៌ សម្រេច ១០០%។ មណ្ឌលប្រជាជនតាំងទីលំនៅបន្តរក្សាខ្ជាប់កិត្តិនាម "មណ្ឌលប្រជាជនតាំងទីលំនៅវប្បធម៌" ៥ ឆ្នាំបន្តរបន្ទាប់; គ្រួសារទាំង ១០០% មានអគ្គិសនីនិងទឹកស្អាតប្រើប្រាស់ស្របអនាម័យ។ ទម្រង់សេដ្ឋកិច្ចសមូហភាពដូចជា ក្រុមសហការចិញ្ចឹមគោសាច់ ផលិតស្រូវនិងសកម្មភាពនានាចំណុះគម្រោងលេខ ៨ នៅតែបន្តបានអនុវត្ត រួមចំណែកឧបត្ថម្ភមុខរបររកស៊ីចិញ្ចឹមជីវិត យកចិត្តទុកដាក់លើសុខុមាលភាពសង្គម និងលើកកម្ពស់ជាបណ្តើរៗនូវជីវភាពសម្ភារៈ ស្មារតីរបស់ប្រជាជន ព្រមទាំងធ្វើឱ្យទិដ្ឋភាពភូមិស្រុកផ្លាស់ថ្មី។

តំណាងថ្នាក់ដឹកនាំទីក្រុងកឹងធើ ជូនស្លាកនិមិត្តរូបនៃការឧបត្ថម្ភសង់ផ្ទះមហាសាមគ្គីជូនឃុំត្រឹងដេ ក្នុងឱកាសនៃទិវាបុណ្យ។

ថ្លែងក្នុងឱកាសទិវាបុណ្យ លោកត្រឹងង៉ុកហ៊ុង សមាជិកគណៈកម្មាធិការបក្សទីក្រុង អនុប្រធានគណៈគ្រប់គ្រងមណ្ឌលផលិតនាំចេញនិងឧស្សាហកម្មកឹងធើ បានស្ងើចសរសើរចំពោះលទ្ធផលដែលភូមិឡឹមយ៉ោសម្រេចបានក្នុងរយៈពេលកន្លងមក។ ជាមួយគ្នានេះ លោកបានសំណូមពរឱ្យគណៈកម្មាធិការបក្ស រដ្ឋអំណាច រណសិរ្សឃុំ និងគណៈប្រជាជនភូមិ បន្តពង្រីកកម្លាំងផែនមហាសាមគ្គីទូទាំងជនជាតិ។ ផ្តោតការយកចិត្តទុកដាក់ថែរក្សាភាសា អក្សរសាស្ត្រ និងពង្រីកតម្លៃអត្តសញ្ញាណវប្បធម៌ប្រពៃណីរបស់ជនរួមជាតិខ្មែរ; លើកកម្ពស់គុណភាពនៃចលនាកសាងជនបទថ្មី ផ្សារភ្ជាប់នឹងការការពារបរិស្ថាន; ជំរុញការឧបត្ថម្ភមុខរបររកស៊ីចិញ្ចឹមជីវិត និងពង្រីកទម្រង់សេដ្ឋកិច្ចដែលមានប្រសិទ្ធភាព ដើម្បីបន្ថយភាពក្រីក្រប្រកបដោយចីរភាព ព្រមទាំងអនុវត្តឱ្យបានល្អនូវបទបញ្ជាស្តីពីលទ្ធិប្រជាធិបតេយ្យនៅមូលដ្ឋាន សំដៅកសាងភូមិស្រុកសុវត្ថិភាព ស៊ីវិល័យ និងពោរពេញដោយមនោសញ្ចេតនា។

ស្របក្នុងឱកាសនេះ គណៈកម្មាធិការបក្សទីក្រុង - ក្រុមប្រឹក្សាប្រជាជន - គណៈកម្មាធិការប្រជាជន - គណៈកម្មាធិការរណសិរ្សមាតុភូមិវៀតណាមទីក្រុងកឹងធើ និងក្រុមហ៊ុនហាថាញ់ បានឧបត្ថម្ភសង់ផ្ទះមហាសាមគ្គីចំនួន ០៧ ខ្នង ជូនដល់គ្រួសារក្រីក្រ និងគ្រួសារក្បែរក្រលើភូមិឋានឃុំ។ គណៈកម្មាធិការបក្ស - ក្រុមប្រឹក្សាប្រជាជន - គណៈកម្មាធិការប្រជាជន - គណៈកម្មាធិការរណសិរ្សមាតុភូមិវៀតណាមឃុំ ក៏បានជូនអំណោយដើម្បីអបអរសាទរក្នុងឱកាសនៃទិវាបុណ្យ។ គណៈចាត់តាំង ក៏បានស្ងើចសរសើរនិងជូនរង្វាន់ដល់សមូហភាព និងបុគ្គលដែលមានស្នាដៃឆ្នើមក្នុងចលនាប្រឡង ប្រណាំងស្នេហាជាតិ ព្រមទាំងជូនអំណោយជិត ១០០ ចំណែកដល់គ្រួសារគោលនយោបាយ គ្រួសារក្រីក្រ និងសិស្សានុសិស្សដែលមានស្ថានភាពលំបាក ខិតខំប្រឹងប្រែងរៀនសូត្រ។

ទិវាបុណ្យ បានរួមចំណែកពង្រឹងចំណងសាមគ្គីស្អិតល្មួតរវាងបណ្តាជនជាតិ ពង្រីកស្មារតីឯកភាព និងការរួមកម្លាំងគ្នាកសាងមាតុភូមិ ថែរក្សាអត្តសញ្ញាណវប្បធម៌ និងកសាងផែនមហាសាមគ្គីទូទាំងជនជាតិកាន់តែរឹងមាំ៕

ហុងទើ - ពេជ្រសឿន

ចែករំលែកអត្ថបទ

ពាក្យគន្លឹះ