សុខភាព - អប់រំ អប់រំ

13/06/2026 - 12:05

បណ្តុះអក្សរនាឱកាសវិស្សមកាល

ជាច្រើនឆ្នាំកន្លង ឱ្យតែដល់វិស្សមកាល វត្តអារាមខ្មែរនានានៅលើភូមិដ្ឋានទីក្រុងកឹងធើ តែងមានភាពអ៊ូអរ ជាមួយនឹងសកម្មភាពបង្រៀនអក្សរខ្មែរ។ នេះជាសកម្មភាពប្រចាំឆ្នាំ ក្រោយពីប្អូនៗសិស្សានុសិស្សឈានចូលរដូវវិស្សមកាល ហើយបានក្លាយជាលក្ខណៈដ៏ប្រពៃនៃវប្បធម៌ ដែលបានថែរក្សាជាច្រើនជំនាន់ រួមចំណែកក្នុងការអភិរក្សភាសា អក្សរសាស្ត្រ និងអត្តសញ្ញាណរបស់ជនរួមជាតិខ្មែរ។

ព្រះសង្ឃកំពុងណែនាំប្អូនៗសិស្សានុសិស្សអានមេរៀននៅវត្តសេរីពោធិដើមពោធិ៍។

រៀងរាល់ពេលរសៀល គឺទីធ្លាវត្តសេរីពោធិដើមពោធិ៍ ឃុំត្រឹងដេ តែងលាន់ឮរំពងដោយសំឡេងអានមេរៀនរបស់ប្អូនៗសិស្សានុសិស្ស ក្រោមការណែនាំយ៉ាងយកចិត្តទុកដាក់ពីសំណាក់ព្រះសង្ឃ។ ទោះបីជាគ្មានក្តារខៀនអេឡិចត្រូនិក ឬបន្ទប់រៀនទំនើបៗក៏ដោយ ប៉ុន្តែថ្នាក់រៀននៅទីនេះ នៅតែអ៊ូអររំពងទៅដោយសំឡេងអានមេរៀនរបស់ប្អូនៗសិស្សានុសិស្ស។ ប្អូន តាំងវ៉ាំងឡឹប នៅភូមិបឹងព្រលិត ឃុំត្រឹងដេ ចែករំលែក៖ “២ឆ្នាំមកនេះ ឱ្យតែដល់វិស្សមកាល គឺខ្ញុំមកវត្តរៀនអក្សរខ្មែរ ដោយបានព្រះសង្ឃអស់ពីចិត្តបង្ហាត់បង្រៀន ឥឡូវនេះខ្ញុំអាចអាន និងចេះសរសេរអក្សរ ក្រៅពីនេះ ពេលមករៀនក្នុងវត្ត ខ្ញុំថែមទាំងបានស្គាល់មិត្តភក្តិថ្មីៗជាច្រើនទៀត ខ្ញុំសប្បាយចិត្តណាស់”។ តាមព្រះតេជព្រះគុណ ស៊ើង មិញហៀង ព្រះចៅអធិការវត្តសេរីដើមពោធិ៍ ឃុំត្រឹងដេ មានថេរដីការ៖ ឆ្នាំសិក្សា ២០២៦ វត្តដើមពោធិ៍ បែងចែកជា៣ថ្នាក់ គឺថ្នាក់ទី១ ទី២ និងទី៣ គិតមកដល់បច្ចុប្បន្ន មានបន្ទប់រៀនចំនួន ៤ បានបង្រៀនក្នុងបរិវេណវត្ត និង៣បន្ទប់ទៀត បើកនៅតំបន់តាំងទីលំនៅ។ ដោយបំណងចង់បង្កស្មារតីស្រស់ស្រាយដល់ប្អូនៗ វត្តបានចាត់ចែងព្រះសង្ឃទទួលបន្ទុកបង្រៀនតាមថ្នាក់នីមួយៗដាច់ដោយឡែក ក្រោមការជ្រោមជ្រែងពីព្រះចៅអធិការ។

បរិយាកាសនៃថ្នាក់រៀននៅវត្តពោធិធំផ្តៅពេន។

វិស្សមកាលឆ្នាំនេះ វត្តពោធិធំផ្ដៅពេន ឃុំលីវទូ ក៏បានទាក់ទាញសិស្សានុសិស្សជាង ៣០០ រូប មកចូលរួមសិក្សាផងដែរ។ ដើម្បីបង្កលក្ខណៈងាយស្រួល និងបរិយាកាសសិក្សាដោយស្រស់ស្រាយសម្រាប់សិស្សានុសិស្ស ចាប់ពីដើមខែមិថុនា វត្តបានរៀបចំបន្ទប់រៀន តុ កៅអី និងចាត់ព្រះសង្ឃដែលមានបទពិសោធន៍ឈរថ្នាក់បង្រៀនប្អូនៗ។ ចែករំលែកអំពីថ្នាក់រៀននាវិស្សមកាល ប្អូន ស៊ើងសមសេរី នៅភូមិតាអុង ឃុំលីវទូ បានឱ្យដឹង៖ “នេះជាវិស្សមកាលលើកដំបូងដែលខ្ញុំចូលវត្តរៀនអក្សរ ក្រៅពីរៀនអក្សរ ពួកប្អូននៅទាំងបានព្រះសង្ឃបង្រៀនពីវប្បធម៌ សីលធម៌ និងរបៀបរស់នៅ ដូច៖ របៀបសំពះនៅពេលជួបព្រះសង្ឃ ការគោរពមាតាបិតា និងអ្នកវ័យចាស់... ”។ ព្រះតេជព្រះគុណ ឡឹមវឿន គ្រូពហុសូត្រវត្តពោធិធំផ្ដៅពេន ឃុំលីវទូ មានថេរដីការ៖ “ថ្នាក់រៀននារដូវវិស្សមកាល មិនត្រឹមតែបង្រៀនអក្សរសាស្ត្រប៉ុណ្ណោះទេ នៅទាំងជាកន្លែងអប់រំសីលធម៌ របៀបរស់នៅ និងសេចក្តីស្រឡាញ់ស្រុកកំណើត ដើមកំណើតសម្រាប់ក្មេងជំនាន់ក្រោយ។ ព្រះសង្ឃទាំងអស់ គឺជាអ្នកផ្ទេរចំណេះដឹងផង ទាំងជាអ្នកអភិរក្ស និងផ្សព្វផ្សាយនូវតម្លៃវប្បធម៌ប្រពៃណីរបស់ជនរួមជាតិខ្មែរទៀតផង”។

ទីក្រុងកឹងធើ បច្ចុប្បន្នមានអត្រាប្រជាជនជាង ៣ លាននាក់ ក្នុងនោះជនរួមជាតិខ្មែរស្រូបអត្រា ១៤,១១%។ ទូទាំងទីក្រុងមានទីសក្ការបូជាពុទ្ធសាសនាទក្ខិណនិកាយខ្មែរចំនួន ១៥៧ កន្លែង ក្នុងនោះមានវត្តអារាមចំនួន ១២០ វត្ត។ អាចនិយាយបានថា ប៉ុន្មានឆ្នាំមកនេះ ការសិក្សានារដូវវិស្សមកាលនៅតាមបណ្តាវត្តពុទ្ធសាសនាទក្ខិណនិកាយខ្មែរ បានក្លាយជាចលនាយ៉ាងពុះពោរជាងពេលណាៗទាំងអស់។ ការងារចាត់តាំងថ្នាក់រៀនមានរបៀបរៀបរយជាងមុន ជាពិសេស ថ្នាក់រៀនតែងទទួលបានការយកចិត្តទុកដាក់ពីសំណាក់សហគមន៍ទាំងមូល ដោយមានពុទ្ធបរិស័ទជាច្រើនរួមគ្នាឧបត្ថម្ភថវិកា និងសម្ភារៈសិក្សាសម្រាប់ប្អូនៗ។

ថ្នាក់រៀនអក្សរខ្មែរនាឱកាសវិស្សមកាល មិនត្រឹមតែជួយឱ្យប្អូនៗមានឱកាសដោះដូរ និងជួបជុំ មិត្តភក្តិ រួមគ្នាអាន និងសរសេររាល់តួអក្សររបស់ជាតិខ្លួនប៉ុណ្ណោះទេ ប៉ុន្តែថែមទាំងបង្កបាននូវបរិយាកាសប្រជុំជីវភាពវិស្សមកាលដ៏មានអត្ថន័យសម្រាប់ប្អូនៗ។ តាមរយៈនោះ រួមចំណែកព្រួតដៃគ្នាថែរក្សាភាសា និងអក្សរសាស្ត្ររបស់ជនជាតិខ្លួន៕

ថាញវ៉ាង - មេងលី

ចែករំលែកអត្ថបទ

ពាក្យគន្លឹះ