វប្បធម៌-សិល្បៈ វប្បធម៌

11/09/2026 - 05:54

ត្រៀមលក្ខណៈរួចរាល់សម្រាប់រដូវកាលប្រណាំងទូក ង

ប៉ុន្មានថ្ងៃនេះ បរិយាកាសត្រៀមលក្ខណៈសម្រាប់ពិធីបុណ្យអកអំបុក-ប្រណាំងទូកងប្រពៃណី ឆ្នាំ ២០២៦ របស់ជនរួមជាតិខ្មែរនៅទីក្រុងកឹងធើ ប្រព្រឹត្តទៅយ៉ាងផុលផុស។ នៅតាមវត្តអារាមខ្មែរ ប្រញាប់បង្ហើយទូកងថ្មី កីឡាករទូកងកំពុងហាត់សម អុំសាកល្បងល្បឿនទូកថ្មី ដើម្បីត្រៀមលក្ខណៈឱ្យបានល្អសម្រាប់ឈានចូលរដូវកាលប្រណាំងដោយការប្តេជ្ញាចិត្តខ្ពស់។

 ទូកងវត្តទឹកប្រៃអុំសាកល្បងល្បឿនលើដងព្រែក Máspero។

សម្រាប់ជនរួមជាតិខ្មែរ ទូកងមិនត្រឹមតែជាកីឡាប្រពៃណីប៉ុណ្ណោះទេ ថែមទាំងជានិមិត្តរូបនៃស្មារតីសាមគ្គីសហគមន៍។ នៅរាល់រដូវកាលប្រណាំងគឺជាឱកាសដើម្បីវត្តអារាម កីឡាករ និងមាមីងតាមភូមិស្រុក ចូលរួមអភិរក្សនិងពង្រីកលក្ខណៈវប្បធម៌ដ៏ពិសេសរបស់ជនជាតិ។ ដើម្បីបោះបានទូកដូចគោលបំណង មានវត្តជាច្រើនម្ចាស់ការទៅរកជ្រើសទិញឈើល្អ ជួលជាងមានបទពិសោធន៍ក្នុងការបោះទូក។ ពេលបោះទូកងសម្រេចរួចរាល់ ក្រុមកីឡាករមកជួបជុំគ្នាអុំហាត់សមដើម្បីសាកល្បងល្បឿនទូកលើដងព្រែក។ បន្ទាប់ពីសាកល្បងល្បឿនម្តងៗ ជាងនឹងបន្តការកែសម្រួលទូក ចំណែកគ្រូបង្វឹក ក៏កែសម្រួលបច្ចេកទេសនិងគិតគូររបៀបអុំឱ្យបានសមស្រប ជួយឱ្យទូកសម្រេចប្រសិទ្ធភាពខ្ពស់បំផុតពេលអុំប្រណាំង។ បងស៊ើងហ្វាងមិញ កីឡាករទូកងវត្តទឹកប្រៃ នៅឃុំឡុងភូ ចែករំលែក៖ “ខ្ញុំចូលរួមអុំទូកងវត្តបាន ១៣ឆ្នាំ ដូច្នេះ មានកិត្តិយស និងមោទនភាពខ្លាំងណាស់ ព្រោះបានក្លាយជាកីឡាករម្នាក់របស់ក្រុមទូកង។ ថ្ងៃនេះ មកដល់ព្រែក Máspero ដើម្បីអុំសាកល្បងល្បឿនទូកទើបជួសជុល។ ឆ្នាំនេះ វត្តមានទូកងចូលរួមអុំប្រណាំង ២ ទូក ដូច្នេះ បងប្អូនកីឡាករទាំងអស់អ្នកណាក៏មានភាពស្វាហាប់ បន្ទាប់ពីអុំសាកល្បងល្បឿន បងប្អូននឹងហាត់សមជាបន្ត។ ទិសដៅគឺឈានចូលរដូវ កាលប្រណាំងដោយបានត្រៀមលក្ខណៈរួចរាល់ ប្រកួតអស់ពីសមត្ថភាព សាមគ្គីនិងប្តេជ្ញាចិត្តដណ្តើមបានជ័យលាភីខ្ពស់”។

នៅវត្តពាមបួនថ្មី សង្កាត់ភូឡើយ ក៏មានបរិយាកាសអ៊ូអរ ពេលមាមីងពុទ្ធបរិស័ទមកទស្សនាទូក ងថ្មី។ បន្ទាប់ពី ២០ ឆ្នាំអវត្តមានលើខ្សែទឹកអុំប្រណាំង ឆ្នាំនេះវត្តបានរដ្ឋអំណាចឧបត្ថម្ភបោះទូកងថ្មី ដើម្បីវិលមករដូវកាលប្រណាំង។ មាមីងកាន់តែមានក្តីរីករាយ ពេលមានឱកាសបន្តរួមកម្លាំងថែរក្សាកីឡាប្រពៃណីរបស់ជនជាតិ។ ដើម្បីត្រៀមលក្ខណៈឱ្យបានល្អសម្រាប់រដូវកាលប្រណាំង វត្តក៏បានជ្រើស រើសកីឡាករមកហាត់សមសម្រាប់ការអុំប្រណាំង។ ព្រះតេជព្រះគុណ ឌិញហ្វាងសឺ ព្រះចៅអធិការវត្តពាមបួនថ្មី សង្កាត់ភូឡើយ មានថេរដីកា៖ “មានទូកថ្មី ព្រះសង្ឃនិងមាមីងពុទ្ធបរិស័ទសប្បាយចិត្តខ្លាំងណាស់។ ចូលរួមអុំប្រណាំងគឺដើម្បីរួមចំណែកថែរក្សាប្រពៃណីរបស់ជនរួមជាតិខ្មែរ។ នៅរាល់រដូវកាលប្រណាំង មាមីងកាន់តែយល់ច្បាស់ ហើយរឹតតែស្រឡាញ់ចូលចិត្តកីឡាទូកងជាវប្បធម៌ជនជាតិ។ ហេតុនេះ ទោះបីប្រណាំងនៅទីណា លទ្ធផលយ៉ាងដូចម៉្តេច ក្រុមទូកងនៅតែរក្សាស្មារតីសាមគ្គី ប្តេជ្ញាចិត្តអុំប្រណាំងអស់ពីសមត្ថភាព រួមចំណែកជំរុញកីឡាប្រណាំងទូកងកាន់តែផុលផុស”។

ផ្តើមពីទូកថ្មី រហូតដល់សំឡេងកញ្ចែបន្លឺឡើងកងរំពងស្របតាមចង្វាក់អុំរបស់កីឡាករ អ្វីៗទាំងអស់កំពុងបង្កជាបរិយាកាសយ៉ាងផុលផុសមុនរដូវកាលប្រណាំង។ ក្រុមនីមួយៗសុទ្ធតែនាំយកក្តីមោទនភាពនិងការរំពឹងទុករបស់វត្តអារាម របស់មាមីងភូមិ ស្រុក ត្រៀមលក្ខណៈរួចរាល់សម្រាប់ការប្រណាំងដោយមានស្មារតីសាមគ្គី រួមចំណែកជំរុញកីឡាប្រពៃណីកាន់តែរីកសាយភាយនិងអភិរក្សនូវអត្តសញ្ញាណវប្បធម៌ខ្មែរក្នុងជីវភាពបច្ចុប្បន្ន៕

យ្វីអាញ-មុនី

ចែករំលែកអត្ថបទ

ពាក្យគន្លឹះ