វប្បធម៌-សិល្បៈ សិល្បៈ

24/03/2026 - 11:35

ក្រុមសិល្បៈខ្មែរទីក្រុងកឹងធើ ខិតខំអស់ពីកម្លាំងកាយចិត្តដើម្បីសម្ដែងបម្រើទស្សនិកជនក្នុងរដូវប្រាំង

ជារៀងរាល់ឆ្នាំ រដូវប្រាំងគឺជាពេលវេលាដែលពន្លឺភ្លើងឆាកសិល្បៈល្ខោនយូរកេបានចាប់ផ្តើមបំភ្លឺឡើងដើម្បីសម្ដែងបម្រើជូនជនរួមជាតិ។ មុនពេលឈានចូលរដូវកាលចេញទៅសម្តែងឆ្នាំនេះ ក្រុមសិល្បៈខ្មែររបស់ទីក្រុងបានហាត់សមយ៉ាងសស្រាក់សស្រាំ និងដំឡើងឈុតឆាកតាំងពីចម្ងាយ ដោយបំណងនាំយកនូវឈុតសម្ដែងពិសេសៗបម្រើជូនទស្សនិកជន។

សកម្មភាពចេញទៅសម្តែងរបស់ក្រុមសិល្បៈខ្មែរទីក្រុងកឹងធើ។

ឆ្នាំនេះ ក្រោយពីការរួមបញ្ចូលខេត្តមកភូមិឋានសកម្មភាពរបស់ក្រុមសិល្បៈខ្មែរទីក្រុងកឹងធើ (មុននេះគឺក្រុមសិល្បៈខ្មែរខេត្តសុកត្រាំង) បានធំទូលាយជាងមុន ផ្ដើមពីនោះ ទាមទារថ្នាក់ដឹកនាំក្រុម និងសិល្បករ សិល្បការិនី ត្រូវក្តាប់ឱ្យច្បាស់ពីតម្រូវការរបស់ទស្សនិកជន ក៏ដូចជាខ្នះខ្នែងនិពន្ធ និងហ្វឹកហាត់នូវឈុតឆាកពិសេសៗ ដើម្បីបម្រើតម្រូវការកម្សាន្តសប្បាយរបស់មាមីងជនរួមជាតិ។ ទន្ទឹមនឹងនោះ ដើម្បីបង្កឱ្យមានការផ្លាស់ថ្មី បម្រើឱ្យកាន់តែល្អប្រសើរនូវភារកិច្ចនយោបាយ និងភារកិច្ចអភិរក្សវប្បធម៌ប្រពៃណីរបស់ជនរួមជាតិខ្មែរ ថ្នាក់ដឹកនាំក្រុម ក៏បានផ្លាស់ថ្មីជាបណ្ដើរៗ និងលើកកម្ពស់គុណភាពនៃកម្មវិធីសិល្បៈនានាផងដែរ។ ក្នុងនោះ ក្រុមបានហ្វឹកហាត់ និងនិពន្ធរឿងល្ខោនយូរកេថ្មីចំនួន ០៣ រឿង រួមជាមួយឈុតឆាកចម្រៀង និងរបាំថ្មីៗយ៉ាងពិសេស ដើម្បីត្រៀមបម្រើសាធារណជននៅលើភូមិឋានទីក្រុងកឹងធើថ្មី។

លោកស៊ើងណេង – ថ្នាក់ដឹកនាំការិយាល័យរដ្ឋបាលចម្រុះនៃក្រុមសិល្បៈខ្មែរទីក្រុងកឹងធើ បានឱ្យដឹង៖ “ដើម្បីលើកកម្ពស់គុណភាពនៃការសម្តែងបម្រើឱ្យបានល្អនូវភារកិច្ចនយោបាយ កិច្ចការបរទេស និងជាពិសេសគឺបម្រើប្រជាជនឱ្យបានល្អបំផុត។ រយៈពេលកន្លង គណៈដឹកនាំក្រុម ក៏បានដាក់ចេញនូវភារកិច្ច និងដំណោះស្រាយជាច្រើន។ ទីមួយ ផ្ដោតលើការអាទិភាពធនធានមនុស្ស ជាពិសេសគឺធនធានមនុស្សគុណភាពខ្ពស់ ដោយផ្តល់អាទិភាពជ្រើសរើសកូនចៅដែលមានកម្រិតជំនាញឯកទេស មានបំណិនសិល្បៈ និងបទដ្ឋានមួយចំនួនទៀត... ដើម្បីឆ្លើយតបឱ្យបានល្អនូវតម្រូវការការងារដែលបានប្រគល់ជូន។ ទីពីរ បន្តអនុវត្តឱ្យបានល្អនូវការងារបណ្តុះបណ្តាល និងបំប៉ន ដើម្បីធ្វើឱ្យសុក្រឹតបទដ្ឋានលើកកម្ពស់កម្រិតជំនាញ ក៏ដូចជាគុណភាពនៃកងជួរកម្មាភិបាល បុគ្គលិក និងពលករ ដែលក្នុងនោះមានទាំងកម្មាភិបាលដឹកនាំ គ្រប់គ្រង កម្មាភិបាលធ្វើការងារជំនាញ សិល្បករ សិល្បការិនី និងតន្ត្រីករជាដើម។ ទីបី ហ៊ានស្នើសុំវិនិយោគថវិកាសម្រាប់ការស្រាវជ្រាវ ប្រមូលចងក្រង និពន្ធ និងសម្តែងសាកល្បង ដើម្បីចងក្រង និពន្ធទៅជាកម្មវិធីសិល្បៈដែលមានគុណភាពខ្ពស់ សំដៅឆ្លើយតបទៅនឹងតម្រូវការកម្សាន្តសប្បាយរបស់សាធារណជន ទស្សនិកជន និងប្រជាពលរដ្ឋឱ្យបានកាន់តែល្អប្រសើរក្នុងស្ថានភាពថ្មី។”

នាពេលបច្ចុប្បន្ន ក្រុមបានចេញទៅសម្តែងបានប្រហែល ១០ កន្លែងនៅលើភូមិឋានទីក្រុងកឹងធើ។ តាមរយៈរាត្រីនៃការសម្តែងកន្លងមកនេះ ក្រុមសិល្បៈខ្មែរទីក្រុងកឹងធើ បាននាំមកនូវឈុតឆាកថ្មីនិងពិសេសៗ បម្រើបានល្អនូវតម្រូវការកម្សាន្តសប្បាយរបស់ទស្សនិកជន។ ចាប់តាំងពីសំនៀងចម្រៀង ក្បាច់រាំ រហូតដល់ការសម្តែងរឿងល្ខោនយូរកេ ទាំងអស់សុទ្ធតែបានសម្រិតសម្រាំងយ៉ាងហ្មត់ចត់បំផុត។

បងស្រី ស្រីមុំ – សិល្បការិនីនៃក្រុមសិល្បៈខ្មែរទីក្រុងកឹងធើ បានចែករំលែក៖ “រយៈពេលកន្លងមក នាងខ្ញុំ និងបងប្អូនក្នុងក្រុមបានរួមគ្នាហាត់សម ដើម្បីត្រៀមខ្លួនចេញទៅសម្តែងបម្រើមាមីងក្នុងរដូវប្រាំងនេះ។ ឆ្នាំនេះក៏មានចំណុចថ្មីៗច្រើនដែរ បងប្អូនបានហាត់ទាំងតន្ត្រីប្រពៃណី និងសម័យ ដោយសង្ឃឹមថាទស្សនិកជននឹងទទួលយក។ ចំពោះនាងខ្ញុំ ការបានបម្រើមាមីងជនរួមជាតិ គឺជាមោទនភាពរបស់នាងខ្ញុំ ហើយនាងខ្ញុំនឹងខិតខំឆ្លើយតបឱ្យបាននូវតម្រូវការទស្សនាកម្សាន្តរបស់ទស្សនិកជន។”

ដូច្នេះ ពន្លឺភ្លើងឆាកសិល្បៈកំពុងបានបំភ្លឺឡើងវិញនៅតាមបណ្តាភូមិស្រុកខ្មែរនានា។ ជាមួយនឹងការត្រៀមរៀបចំយ៉ាងហ្មត់ចត់ និងក្តីស្រឡាញ់សិល្បៈដ៏លើសលុបនោះ ក្រុមសិល្បៈខ្មែរទីក្រុងកឹងធើ សន្យានឹងនាំមកនូវរដូវកាលចេញទៅសម្តែងឆ្នាំ ២០២៦ ដ៏គួរឱ្យចាប់អារម្មណ៍ រួមចំណែកក្នុងការអភិរក្ស និងលើកកម្ពស់អត្តសញ្ញាណវប្បធម៌ខ្មែរនៅកណ្តាលតំបន់តៃដូ៕

ច័ន្ទសិរី - ថាច់ធី

ចែករំលែកអត្ថបទ

ពាក្យគន្លឹះ