តាំងពីដើមឆ្នាំមកដល់ពេលនេះ ទីក្រុងកឹងធើ បានខិតខំប្រឹងប្រែងជម្នះការលំបាក អនុវត្តល្អបណ្តាភាគកម្រិតអភិវឌ្ឍសេដ្ឋកិច្ច-សង្គម។ ពិសេស វិស័យឧស្សាហកម្ម ពាណិជ្ជកម្ម-សេវាកម្ម និងកសិកម្ម មានភាពរីកចម្រើន ធ្វើឱ្យខឿនសេដ្ឋកិច្ចរក្សាបាននូវកំណើនល្អ។ នេះគឺជាលក្ខណៈងាយស្រួលសម្រាប់ទីក្រុងកឹងធើ សម្រេចល្អនូវបណ្តាភាគកម្រិតអភិវឌ្ឍសេដ្ឋកិច្ច - សង្គម ក្នុងប៉ុន្មានខែចុងឆ្នាំ។
សកម្មភាពពាណិជ្ជកម្មមានការអភិវឌ្ឍនៅសង្កាត់ថូកណូក ទីក្រុងកឹងធើ។
ខិតខំជម្នះការលំបាក
លោក វ៉ក្វាងញឹក នាយករងមន្ទីរហិរញ្ញវត្ថុទីក្រុងកឹងធើ បានវាយតម្លៃ៖ “ក្នុងខែតុលា និង ១០ ខែនៃឆ្នាំ ២០២៥ ស្ថានភាពសេដ្ឋកិច្ច - សង្គម របស់ទីក្រុងនៅតែមានស្ថិរភាព និងសម្រេចបានលទ្ធផលល្អប្រសើរជាច្រើនលើគ្រប់វិស័យ។ ក្នុងនោះ លេចធ្លោគឺទឹកប្រាក់លក់រាយទំនិញ និងចំណូលសេវាកម្មសរុប ១០ ខែនៃឆ្នាំ ២០២៥ កើនឡើង ១៦,៥% បើធៀបនឹងរយៈពេលដូចគ្នាក្នុងឆ្នាំ ២០២៤; តម្លៃនាំចេញទំនិញ និងចំណូលរូបិយប័ណ្ណបរទេសប៉ាន់ស្មានកើនឡើង ១១,៤% បើធៀបនឹងរយៈពេលដូចគ្នាកាលពីឆ្នាំមុន; ចំណូលពីទេសចរណ៍កើនឡើង ២៤,៨៦%; សហគ្រាសចុះបញ្ជីថ្មីកើនឡើង ៣៨,៩៣%។ ការងាររៀបគម្រោងប្លង់ទីក្រុង កំពុងបានត្រួតពិនិត្យយ៉ាងសកម្ម រួមចំណែកធ្វើឱ្យទិដ្ឋភាពទីក្រុងកាន់តែសមរម្យ និងទំនើបជាងមុន។ល។”។
តាមមន្ទីរហិរញ្ញវត្ថុទីក្រុងកឹងធើ ក្នុងខែតុលា ទីក្រុងមានសន្ទស្សន៍ផលិតកម្មឧស្សាហកម្មកើនឡើង ៤,៥% បើធៀបនឹងខែមុន និងកើនឡើង ១៥% បើធៀបនឹងរយៈពេលដូចគ្នាកាលពីឆ្នាំមុន។ បូកសរុបរយៈពេល ១០ ខែនៃឆ្នាំ ២០២៥ សន្ទស្សន៍ផលិតកម្មឧស្សាហកម្មប៉ាន់ស្មានកើនឡើង ៩,៥% បើធៀបនឹងរយៈពេលដូចគ្នាក្នុងឆ្នាំ ២០២៤។ ទឹកប្រាក់លក់រាយទំនិញ និងចំណូលសេវាកម្មប្រើប្រាស់ក្នុងខែតុលា ប៉ាន់ស្មានសម្រេចបាន ៣១.៦៤៩ ពាន់លានដុង កើនឡើង ៥% បើធៀបនឹងខែមុន។ បូកសរុបរយៈពេល ១០ ខែនៃឆ្នាំ ២០២៥ ទឹកប្រាក់លក់រាយទំនិញ និងចំណូលសេវាកម្មប្រើប្រាស់ប៉ាន់ស្មានសម្រេចបាន ២៩១.២៦៥ ពាន់លានដុង កើនឡើង ១៦,៥% បើធៀបនឹងរយៈពេលដូចគ្នាក្នុងឆ្នាំ ២០២៤។ តម្លៃនាំចេញទំនិញ និងចំណូលរូបិយប័ណ្ណបរទេសក្នុងខែតុលា ប៉ាន់ស្មានសម្រេចបាន ៤៨៣,៩ លានដុល្លារ កើនឡើង ៣,៧% បើធៀបនឹងខែមុន។ បូកសរុបរយៈពេល ១០ ខែនៃឆ្នាំ ២០២៥ តម្លៃនាំចេញទំនិញ និងចំណូលរូបិយប័ណ្ណបរទេសសម្រេចបាន ៤,៥៦៦ ពាន់លានដុល្លារ កើនឡើង ១១,៤% បើធៀបនឹងរយៈពេលដូចគ្នាក្នុងឆ្នាំ ២០២៤។ សម្រាប់វិស័យទេសចរណ៍ បូកសរុបរយៈពេល ១០ ខែនៃឆ្នាំ ២០២៥ ទីក្រុងបានទទួលភ្ញៀវទេសចរចំនួន ៩.៩៨៥.០០០ នាក់ សម្រេចបាន ៩០,៨២% នៃផែនការ កើនឡើង ២៥,៨៣% បើធៀបនឹងរយៈពេលដូចគ្នាក្នុងឆ្នាំ ២០២៤។ ចំណូលសរុបពីទេសចរណ៍សម្រេចបាន ៨.៦៧០ ពាន់លានដុង សម្រេចបាន ៨៦,៨៨% នៃផែនការប្រចាំឆ្នាំ និងកើនឡើង ២៤,៨៦% បើធៀបនឹងរយៈពេលដូចគ្នាកាលពីឆ្នាំមុន។
លើសពីនេះ ទីក្រុងក៏បានបង្កលក្ខណៈងាយស្រួលសម្រាប់សហគ្រាសវិនិយោគផលិតកម្ម ធ្វើអាជីវកម្ម និងអភិវឌ្ឍ។ ក្នុងខែតុលា ទីក្រុងបានផ្តល់អាជ្ញាប័ណ្ណចុះបញ្ជីអាជីវកម្មថ្មីសម្រាប់សហគ្រាសគ្រប់ប្រភេទចំនួន ៤៤២ ដែលមានទុនចុះបញ្ជីសរុប ២.៧៧០,២ ពាន់លានដុង កើនឡើង ១៧,២៤% នៃចំនួនសហគ្រាស និងកើនឡើង ៣២,២៤% ដើមទុន បើធៀបនឹងខែមុន។ បូកសរុបតាំងពីដើមឆ្នាំរហូតដល់ដាច់ខែតុលា ទូទាំងទីក្រុងមានសហគ្រាសចុះបញ្ជីថ្មីចំនួន ៣.៧៦៨ ដែលមានទុនចុះបញ្ជីសរុប ២០.៣២២,២២ ពាន់លានដុង កើនឡើងជិត ៤០% នៃចំនួនសហគ្រាស និងកើនឡើង ៨,៨៦% ដើមទុន បើធៀបនឹងរយៈពេលដូចគ្នាក្នុងឆ្នាំ ២០២៤។ ទន្ទឹមនឹងនេះ តាំងពីដើមឆ្នាំមកដល់ពេលនេះ ទីក្រុងបានទាក់ទាញគម្រោងវិនិយោគថ្មីចំនួន ២០។ ក្នុងនោះមានគម្រោងវិនិយោគផ្ទាល់ពីបរទេស (FDI) ចំនួន ១ ដែលមានទុនវិនិយោគ ១០០ លានដុល្លារ និងគម្រោងវិនិយោគក្នុងស្រុកចំនួន ១៩ ដែលមានទុនវិនិយោគចុះបញ្ជីសរុប ១៩.១៧៣,៥៧ ពាន់លានដុង។ បច្ចុប្បន្ន ទូទាំងទីក្រុងមានគម្រោង FDI ចំនួន ១២៤ ដែលមានទុនវិនិយោគចុះបញ្ជីសរុបជាង ៧,៤៥១ ពាន់លានដុល្លារ; មានគម្រោងវិនិយោគក្នុងស្រុកចំនួន ១.០២៩ ដែលត្រូវបានផ្តល់អាជ្ញាប័ណ្ណចុះបញ្ជីវិនិយោគ ជាមួយទុនសរុបជាង ៤៥០.៥០០,១៦ ពាន់លានដុង... គម្រោងទាំងនេះរួមចំណែកដល់ការអភិវឌ្ឍសេដ្ឋកិច្ចនិងដោះស្រាយការងារសម្រាប់ពលករនៅទីក្រុងកឹងធើ និងតំបន់ជុំវិញ។
ខិតខំសម្រេចភាគកម្រិតអភិវឌ្ឍន៍
យោងតាមការវាយតម្លៃរបស់មន្ទីរហិរញ្ញវត្ថុទីក្រុងកឹងធើ ក្រៅពីលទ្ធផលវិជ្ជមាន ស្ថានភាពនៃការអនុវត្តភារកិច្ចអភិវឌ្ឍន៍សេដ្ឋកិច្ច - សង្គម លើភូមិឋាននៅជួបការលំបាកនិងភាពអន់ថយមួយចំនួន។ ជាក់ស្តែងដូចការរំសាយថវិកាវិនិយោគសាធារណៈមិនទាន់ឆ្លើយតបនឹងតម្រូវការមិនទាន់គាំទ្របានល្អដល់ផលិតកម្មឧស្សាហកម្ម និងសំណង់ ដើម្បីរួមចំណែកជំរុញកំណើន។ យោងតាមស្ថិតិគិតត្រឹមចុងថ្ងៃទី ២៣ ខែតុលា បូកសរុបទឹកប្រាក់ដែលផ្តល់ផ្ទេរថវិកាគឺ ១០.៤៦៤ ពាន់លានដុង បើធៀបនឹងសេចក្តីសម្រេចរបស់នាយករដ្ឋមន្ត្រី គឺសម្រេចបាន ៣៧,៨៥% និងបើធៀបនឹងផែនការទុនដែលបានបែងចែកលម្អិត គឺសម្រេចបាន ៣៦,៤៥%។ ទន្ទឹមនឹងនោះ គណៈកម្មាធិការប្រជាជនទីក្រុងក៏បានវាយតម្លៃថា សន្ទស្សន៍កំណើនរបស់ទីក្រុងតាំងពីដើមឆ្នាំមកដល់ពេលនេះ នៅមានកម្រិត និងមិនសម្រេចបានតាមសេណារីយ៉ូ។ ដូច្នេះ ចាំបាច់ត្រូវមានការប្តូរផ្តាច់ជាងទៀតក្នុងការដឹកនាំ ចង្អុលការ និងផ្សព្វផ្សាយអនុវត្តនូវភារកិច្ចដែលបានប្រគល់ជូន។
ដើម្បីដោះស្រាយការលំបាក អនុវត្តបានល្អនូវទិសដៅ និងភាគកម្រិតអភិវឌ្ឍន៍សេដ្ឋកិច្ច - សង្គម ឆ្នាំ ២០២៥ ទីក្រុងកឹងធើ កំណត់ភារកិច្ចក្នុងប៉ុន្មានខែចុងឆ្នាំគឺធំធេងណាស់ ទាមទារការរួមសាមគ្គីគ្នា និងការព្រមព្រៀងនៃប្រព័ន្ធនយោបាយទាំងមូល ការខិតខំប្រឹងប្រែងរបស់សហគមន៍សហគ្រាស និងការគាំទ្រពីប្រជាជន។ ក្នុងនោះ គ្រប់ផ្នែក គ្រប់ថ្នាក់ ត្រូវពន្លឿនល្បឿននៃការអនុវត្ត និងរំសាយថវិកាវិនិយោគសាធារណៈ កៀរគរប្រភពទុនឯកជនបានល្អសម្រាប់ការវិនិយោគអភិវឌ្ឍន៍។ ផ្តុំកម្លាំងធានាគុណភាព និងល្បឿនកសាងគម្រោងធំៗ សំណង់សំខាន់ៗដែលមានលក្ខណៈលោតផ្លោះ និងតម្លៃរីកសាយភាយខ្ពស់ រួមចំណែកជំរុញកំណើន បង្កើតសមត្ថភាពផលិតថ្មីបន្ថែមទៀតសម្រាប់ខឿនសេដ្ឋកិច្ច។ ផ្តុំកម្លាំងជំរុញការប្រើប្រាស់ អភិវឌ្ឍទីផ្សារ; អនុវត្តប្រកបដោយប្រសិទ្ធភាពនូវកម្មវិធីជំរុញពាណិជ្ជកម្ម ជំរុញការចែកចាយទំនិញតាមរយៈវេទិកាឌីជីថល ពាណិជ្ជកម្មតាមប្រព័ន្ធអេឡិចត្រូនិក ដើម្បីពង្រីកការប្រើប្រាស់នៅភូមិភាគ; ពង្រឹង និងលើកកម្ពស់សមត្ថភាពផលិតរបស់សហគ្រាសក្នុងមណ្ឌលឧស្សាហកម្ម; ផ្តុំកម្លាំងត្រួតពិនិត្យ ដើម្បីដោះស្រាយការលំបាក និងគាំទ្រសហគ្រាសបានទាន់ពេលវេលា តាមរយៈគោលនយោបាយអទិភាពទុនឥណទាន បញ្ចុះពន្ធ ថ្លៃដីធ្លី និងជំរុញពាណិជ្ជកម្ម។ ក្រៅពីនេះ ទីក្រុងកឹងធើ ក៏បានដាក់ចេញផែនការ បង្កើនវិធានការគ្រប់គ្រងទីផ្សារ និងតម្លៃឱ្យបានល្អក្នុងប៉ុន្មានខែចុងឆ្នាំ; ធានាតុល្យភាពផ្គត់ផ្គង់-តម្រូវការទំនិញ; ពង្រឹងការត្រួតពិនិត្យ និងគ្រប់គ្រងទំនិញក្លែងក្លាយ និងទំនិញគ្មានគុណភាព។ អនុវត្តកម្មវិធីតភ្ជាប់ការប្រើប្រាស់ផលិតផលកែច្នៃ ផលិតផលកសិកម្ម ជំរុញការចែកចាយទំនិញតាមរយៈវេទិកាឌីជីថល ពាណិជ្ជកម្មតាមប្រព័ន្ធអេឡិចត្រូនិក។ ពង្រឹងការផ្សព្វផ្សាយ ជំរុញទេសចរណ៍ អភិវឌ្ឍផលិតផលទេសចរណ៍ចម្រុះ ដែលផ្សារភ្ជាប់នឹងសក្តានុភាព និងឧត្តមភាព។ល។
ថ្មីៗនេះ ក្នុងកិច្ចប្រជុំជាប្រចាំវាយតម្លៃពីលទ្ធផលអនុវត្តភារកិច្ចអភិវឌ្ឍន៍សេដ្ឋកិច្ច - សង្គម ខែតុលា និង១០ ខែនៃឆ្នាំ ២០២៥ ផ្សព្វផ្សាយការងារសំខាន់ៗចាប់ពីពេលនេះរហូតដល់ចុងឆ្នាំ លោក ទ្រឿងកាញ់ត្វៀង អនុលេខាគណៈកម្មាធិការបក្សទីក្រុង ប្រធានគណៈកម្មាធិការប្រជាជនទីក្រុងកឹងធើ បានសង្កត់ធ្ងន់៖ ចាប់ពីពេលនេះរហូតដល់ចុងឆ្នាំ ទីក្រុងកឹងធើ បានដាក់ចេញភារកិច្ចសំខាន់ៗចំនួន ១២ ដើម្បីអនុវត្តឱ្យបានជោគជ័យនូវភាគកម្រិតនិងផែនការអភិវឌ្ឍន៍សេដ្ឋកិច្ច - សង្គម ឆ្នាំ ២០២៥។ ដូច្នេះ គណៈកម្មាធិការប្រជាជនទីក្រុង សំណូមពរដល់បណ្តាមន្ទីរ ផ្នែក និងកម្មាភិបាល ត្រូវពង្រីកបន្ថែមទៀតនូវស្មារតីសកម្ម ច្នៃប្រតិដ្ឋ ហ៊ានធ្វើ ហ៊ានសម្រេចចិត្ត និងហ៊ានទទួលខុសត្រូវ; ប្រមូលផ្តុំរាល់ប្រភពធនធាន ដើម្បីសម្រេចភាគកម្រិតអភិវឌ្ឍន៍ឆ្នាំ ២០២៥ តាមផែនការ។ ជាពិសេស ត្រូវផ្តោតការយកចិត្តទុកដាក់យ៉ាងខ្លាំងក្លាក្នុងការជំរុញកំណើនសេដ្ឋកិច្ចក្នុងប៉ុន្មានខែចុងឆ្នាំ ធានាតាមតម្រូវការសេណារីយ៉ូកំណើន តាមសេចក្តីសម្រេចចិត្តរបស់រដ្ឋាភិបាលដែលបានប្រគល់ជូន សំដៅរួមចំណែកសម្រេចកំណើនសេដ្ឋកិច្ចនៃទូទាំងប្រទេស; ប្រញាប់ត្រួតពិនិត្យ និងសម្រេចការកែសម្រួលផែនការរៀបគម្រោងប្លង់ទីក្រុង ដំណាក់កាល ២០២១-២០៣០ តម្រង់ទិសដល់ឆ្នាំ ២០៥០ ឱ្យបានឆាប់រហ័សតាមកិច្ចចង្អុលការក្នុងសេចក្តីសម្រេចចិត្តលេខ ២៧៣/NQ-CP ចុះថ្ងៃទី ៩ ខែកញ្ញា ឆ្នាំ ២០២៥ របស់រដ្ឋាភិបាល ធានាការរៀបគម្រោងប្លង់ ស្របតាមព្រំប្រទល់រដ្ឋបាលថ្មី និងអង្គការរដ្ឋអំណាចមូលដ្ឋាន ២ កម្រិត; បន្តផ្តុំកម្លាំងចង្អុលការអនុវត្តប្រកបដោយប្រសិទ្ធភាពនូវសេចក្តីសម្រេចចិត្តស្តីពីយន្តការពិសេស អភិវឌ្ឍសេដ្ឋកិច្ច - សង្គមរបស់ទីក្រុង។ ផ្តុំកម្លាំងអនុវត្តប្តូរផ្តាច់បណ្តាដំណោះស្រាយពន្លឿនរំសាយថវិកាវិនិយោគសាធារណៈ ល្បឿននៃការអនុវត្តកម្មវិធីទិសដៅជាតិ ខិតខំប្រឹងប្រែងក្នុងឆ្នាំ ២០២៥ ផ្តល់ផ្ទេរថវិកាវិនិយោគរដ្ឋសម្រេចតាមផែនការដែលនាយករដ្ឋមន្ត្រីបានប្រគល់ជូន និង ១០០% ដើមទុននៃកម្មវិធីទិសដៅជាតិ; ជំរុញខ្លាំងក្លាការអនុវត្តកម្មវិធីជំរុញពាណិជ្ជកម្ម គាំទ្រការប្រើប្រាស់ផលិតផលទំនិញដែលផលិតនៅភូមិភាគ; ផ្សព្វផ្សាយអនុវត្តបណ្តាវិធានការសម្រួលដល់ការផ្គត់ផ្គង់ តម្រូវការទំនិញ និងលំនឹងទីផ្សារ អភិវឌ្ឍទីផ្សារក្នុងឱកាសចុងឆ្នាំ។ល។៕
អត្ថបទនិងរូបថត៖ ហាវ៉ាំង - សុផន
អគ្គនិពន្ធនាយកស្តីទី: ហ្វិញហ្វាងម៉េន
លិខិតអនុញាតលេខ ៧៨៩/GP- BTTTTអាស្រ័យក្រសួងព័ត៌មាននិងសារគមនាគមន៍ផ្តល់នូវថ្ងៃទី០២-១២-២០២១។លេខ២៤ ត្រឹងវ៉ាំងហ្វាយ សង្កាត់និញកេវ ក្រុងកឹងធើ - ទូរស័ព្ទ: (០២៩២) ៣៨៣០០៩៨
ទូរសារ: (០២៩២) ៣៨៣០៥៦១។ អ៊ីម៉ែល: toasoan@baocantho.com.vn
ទំនាក់ទំនងផ្សាយពាណិជ្ជកម្ម: quangcao@baocantho.com.vn
សរសេរច្បាស់ប្រភព "សារព័ត៌មានអេឡិចត្រូនិកកឹងធើ" នៅពេលផ្សាយបន្តពី websiteនេះ។
អភិវឌ្ឍន៍ដោយ:
ពាក្យគន្លឹះ